Aspiration Towards Sukhāvatī—Tibetan

༄༅། །ཞྭ་དམར་པ་ཆོས་ཀྱི་དབང་ཕྱུག་གི་བདེ་སྨོན་བཞུགས།

ཨེ་མ་ཧོ།

འདི་ནས་ཉི་མ་ནུབ་ཀྱི་ཕྱོགས། །

གྲངས་མེད་འཇིག་རྟེན་བརྒལ་བའི་སར། །

རྣམ་དག་ཞིང་ཁམས་བདེ་བ་ཅན། །

དེ་ན་རྫོགས་པའི་སངས་རྒྱས་མཆོག །

ཚེ་འོད་དཔག་ཏུ་མེད་པ་བཞུགས། །

མགོན་པོ་དེ་ལ་ཕྱག་འཚལ་ལོ། །

ཡིད་སྤྲུལ་ཀུན་བཟང་མཆོད་སྤྲིན་འབུལ། །

ཚེ་རབས་བསགས་པའི་སྡིག་པ་བཤགས། །

འགྲོ་ཀུན་དགེ་ལ་རྗེས་ཡི་རང་། །

ཆོས་ཀྱི་འཁོར་ལོ་བསྐོར་བར་བསྐུལ། །

མྱ་ངན་མི་འདའ་བཞུགས་གསོལ་འདེབས། །

བདག་གི་དུས་གསུམ་དགེ་ཚོགས་ཀྱིས། །

འདི་ནས་ཚེ་འཕོས་གྱུར་མ་ཐག །

ཞིང་མཆོག་དེར་སྐྱེས་མགོན་དེ་བཞིན། །

བདག་ཀྱང་དོན་གཉིས་ཕུན་ཚོགས་ཏེ། །

ངེས་པར་ཉིད་དུ་འགྲུབ་མཛད་གསོལ། །

ཞེས་པ་བདེ་བ་ཅན་གྱི་སྨོན་ལམ་ཉུང་བསྡུས་ཙམ་ཞིག་རྒྱུན་ཁྱེར་དུ་དགོས་པས་རྩོམ་པར་ཞུ་ཞེས་འབྲོང་པ་བླ་མ་དང་སྒིས་སྣ་དགོན་གྱི་བླ་མ་ཀརྨ་བློ་གྲོས་ཀྱི་དད་འདུན་བཟང་པོའི་བསྐུལ་ངོར། ཀརྨ་པ་ཞྭ་དམར་ཅོད་པན་འཛིན་པས་གསུངས་སོ།།