Mahāyāna Mind Training Aspiration—Tibetan

༄༅། །ཐེག་ཆེན་བློ་སྦྱོང་སྨོན་ལམ་ནོར་བུའི་སྙིང་པོ་ཞེས་བྱ་བ་བཞུགས་སོ།  །

ན་མོ་གུ་རུ།

སྟོན་པ་མཉམ་མེད་ཤཱཀྱའི་རྒྱལ་པོ་དང་།  །

སྤྱན་རས་གཟིགས་དང་རྗེ་བཙུན་སྒྲོལ་མའི་ཞབས།  །

ཁྲོ་བོའི་རྒྱལ་པོ་མི་གཡོ་མགོན་པོ་དང་།  །

ལྷ་གཅིག་ཇོ་བོ་ཆེན་པོ་ཡབ་སྲས་རྣམས།  །

མི་ངན་བདག་གི་གཙུག་གི་རྒྱན་བཞུགས་ནས།  །

སྒོ་གསུམ་ཆོས་དང་འདྲེས་པར་བྱིན་གྱིས་རློབས།  །

རྟེན་གཞི་ཕུན་ཚོགས་དལ་དང་འབྱོར་པ་འདི།  །

དུས་བརྒྱ་ལན་གཅིག་ཐོབ་པ་ད་རེས་ཙམ།  །

མི་ཚེ་སོས་དལ་བསྐྱལ་བའི་མེ་ལོང་ཡིས།  །

བདུད་ཀྱིས་མ་བསླུས་ད་རེས་དོན་ཡོད་དུ།  །

དམ་པའི་ཆོས་ལ་འབད་པ་དྲག་པོས་བརྩོན།  །

སང་དང་འཇིག་རྟེན་ཕྱི་མའི་སྣང་བ་གཉིས།  །

སྔོན་ལ་གང་འབྱུང་ངེས་པར་ཆ་མི་འཚལ།  །

ཡུན་རིང་སྡོད་པའི་གྲབས་ཆུས་ངན་པ་འདིས།  །

གཏན་བདེའི་འདུན་མ་བརླག་པར་བྱེད་པས་ན།  །

མྱུར་བ་མྱུར་བར་ཆོས་ལ་འབད་པར་ཤོག  །

བརྩོན་འགྲུས་ནགས་ཀྱི་མེ་ཆེན་རབ་སྦར་ནས།  །

འཁོར་བའི་རྒྱ་མཚོ་སྐེམ་པར་བྱེད་པ་དང་།  །

དཀར་ནག་བསགས་པའི་ལས་ལ་གྲངས་མི་ཆོད།  །

གཞན་ལ་བགོ་སྐལ་བྱེད་དུ་མ་མཆིས་ཤིང་།  །

རང་བྱས་མཚོན་ཆ་ཐམས་ཅད་རང་ལ་འཁོར།  །

རང་གི་ཕུང་པོར་མྱོང་བ་གདོན་མི་ཟ།  །

དཀར་ནག་ལས་ཀྱི་འབྲས་བུ་མ་ནོར་བ།  །

སྨིན་ལ་བསླུ་བ་མེད་པའི་ངེས་རྙེད་ཤོག  །

ལས་ངན་བསགས་པའི་འབྲས་བུ་ཆེན་པོ་ནི།  །

འཁོར་བའི་གནས་ན་སྡུག་བསྔལ་རྒྱུན་ཆད་མེད།  །

ངན་སོང་གསུམ་གྱི་སྡུག་བསྔལ་བཟོད་དུ་མེད།  །

མཐོ་རིས་གསུམ་གྱི་བདེ་བ་འགྱུར་ནས་འགྲོ།  །

ཀུན་འབྱུང་རྒྱུས་བསྐྱེད་སྡུག་བསྔལ་གཟེབ་ཏུ་ཚུད།  །

སྡུག་བསྔལ་གསུམ་གྱིས་མ་ཁྱབ་རྡུལ་ཙམ་མེད།  །

གནས་ངན་ལེན་གྱིས་རྒྱུན་ཐག་གཅོད་པའི་ཕྱིར།  །

ཐར་པའི་ལམ་སྟོན་བཤེས་གཉེན་བསྟེན་པར་ཤོག  །

མ་ནོར་ལམ་བཟང་ཆོས་ཀྱི་ཉིང་ཁུ་ནི།  །

རིན་ཆེན་བྱང་ཆུབ་སེམས་དང་འཕྲད་པར་ཤོག  །

སྐྱབས་གནས་བླ་མ་མཆོག་གསུམ་དྲན་པ་དང་།  །

དད་དང་མོས་གུས་ལམ་གྱི་གཞི་རྩ་ཚུགས།  །

བླ་མའི་གདམས་ངག་ཁོག་པའི་སྙིང་ལྟར་བཟུང་།  །

དུས་རྣམས་ཀུན་ཏུ་གསོལ་བ་དྲག་པོ་འདེབས།  །

དཔལ་མགོན་བླ་མའི་བྱིན་རླབས་འཇུག་པར་ཤོག  །

སེམས་ཅན་འདི་རྣམས་བདག་གི་དྲིན་ཆེན་ཡིན།  །

ཐོག་མ་མེད་ནས་བདག་གི་ཕ་མ་བྱས།  །

སྐུ་དྲིན་ཚད་མེད་བཏགས་པའི་དྲིན་ཅན་མ།  །

ད་ལྟ་སྡུག་བསྔལ་རྒྱ་མཚོའི་ཀློང་དུ་ཚུད།  །

སྡིག་དང་སྡུག་བསྔལ་ཆུ་སྲིན་གྱིས་བཟུང་རྣམས།  །

ལེགས་པར་བསམ་ན་སྲན་པའི་གོ་སྐབས་བྲལ།  །

མིག་གི་མཆི་མ་དྲག་ཏུ་འཁྲུགས་པ་དང་།  །

ཤས་མི་བཟོད་པའི་བྱམས་དང་སྙིང་རྗེ་སྒོམ།  །

རང་གི་བདེ་བ་མ་རྒན་རྣམས་ལ་བྱིན།  །

དེ་རྣམས་སྡུག་བསྔལ་རྒྱུ་འབྲས་རང་ལ་བླངས།  །

ལུས་འདི་ཡང་ནི་གྲངས་མེད་སྦྱིན་བྱས་ནས།  །

བདག་ཏུ་འཛིན་པའི་འདྲེ་ཆེན་བརླག་པར་ཤོག  །

ཉེས་པ་ཐམས་ཅད་རང་བདག་འཛིན་ལས་བྱུང་།  །

དགྲ་ལ་སོགས་པའི་སེམས་ཅན་དེ་ཀུན་ནི།  །

ངེས་པར་ཕན་འདོགས་དགེ་བའི་བཤེས་དང་མཚུངས།  །

དགྲ་གདོན་བགེགས་སྣང་རང་ཉིད་འཁྲུལ་པ་ཡིན།  །

ནད་གདོན་ཐམས་ཅད་རྒྱལ་བའི་རྣམ་འཕྲུལ་དང་།  །

ལྷ་དང་འདྲེ་རྣམས་བྱང་ཆུབ་སྒྲུབ་པའི་གྲོགས།  །

ལེགས་དགུ་མཐུན་རྐྱེན་བདུད་ཀྱི་ཆོ་འཕྲུལ་ཡིན།  །

ན་ཚ་སྡུག་བསྔལ་རྐྱེན་ངན་བྱང་ཆུབ་ཀྱི།  །

སེམས་མཆོག་འཕེལ་བའི་ཐབས་ལ་འབྱུང་བར་ཤོག  །

དགྲ་བོ་མ་ནོར་སྙིང་ལ་ཞུགས་པ་ཡི།  །

ང་དང་ང་ཡིར་འཛིན་པའི་འགོང་ཆེན་འདི།  །

ད་ལྟ་བདག་གི་བླ་མའི་དྲིན་ལས་མཐོང་།  །

ངེས་པར་ཁྱོད་མི་དགའ་བའི་སྡུག་བསྔལ་རྣམས།  །

ངེད་ཀྱིས་བླངས་ནས་འགོང་པོ་ཁྱོད་ལ་སྦྱིན།  །

གྲགས་སྙན་འབྱོར་སོགས་ཁྱོད་ལ་དགའ་བའི་རྫས།  །

གཅིག་ཀྱང་མ་ལུས་འཕྲོག་ནས་ཁྱོད་ཀྱིས་ནི།  །

དགྲ་རུ་བཟུང་བའི་སེམས་ཅན་དེ་ལ་སྦྱིན།  །

སྦྱིན་པ་དེ་བཞིན་ངེས་པར་ཐོབ་གྱུར་ཅིག  །

ཇོ་བོ་སེམས་ཅན་འདི་རྣམས་བཀའ་དྲིན་ཆེ།  །

འདི་རྣམས་ལ་ནི་གྲོགས་ངན་བྱེད་པ་རུ།  །

བདག་ནི་ནམ་ཡང་སངས་རྒྱས་ལ་མི་སྨོན།  །

སེམས་ཅན་ཚུལ་གྱིས་སེམས་ཅན་དོན་བྱེད་ཤོག  །

ང་ཡི་ལུས་འདི་ཡིད་བཞིན་ནོར་བུ་ལྟར།  །

འགྲོ་བ་རྣམས་ཀྱི་རེ་བ་བསྐངས་བྱས་ནས།  །

དེ་རྣམས་རྫོགས་སངས་རྒྱས་མཆོག་ཐོབ་པ་དང་།  །

བདག་གི་སེམས་མཆོག་མ་ཉམས་གོང་འཕེལ་ཤོག  །

དཀའ་སྤྱད་བཟོད་པའི་གོ་ཆ་རབ་བགོས་ནས།  །

ཆོས་རྣམས་རང་བཞིན་བདེན་མེད་ཤེས་པ་དང་།  །

རང་བཞིན་དོན་དམ་སྟོང་གསལ་འགགས་པ་མེད།  །

ཐོག་མཐའ་དབུས་བྲལ་སེམས་མཆོག་རྡོ་རྗེ་ཡིས།  །

སྒྲིབ་གཉིས་མུན་པ་རིང་དུ་སྤངས་བྱས་ནས།  །

ཡང་དག་ཡེ་ཤེས་སྣང་བ་རྒྱས་པ་ཡིས།  །

འགྲོ་བའི་དོན་ལ་མཐུ་སྟོབས་རྩལ་ལྡན་ཤོག  །

འཇམ་དཔལ་དཔའ་བོའི་རྣམ་ཐར་མངོན་བྱས་ནས།  །

བྱང་ཆུབ་སྤྱོད་པའི་རྒྱ་མཚོར་གཞོལ་བཞིན་དུ།  །

སེམས་ཅན་སྟོང་པར་མ་གྱུར་དེ་སྲིད་དུ།  །

དེ་ཡི་དོན་རྣམས་རབ་ཏུ་སྒྲུབ་པར་ཤོག  །

སངས་རྒྱས་རྒྱ་མཚོ་མཆོད་པ་བྱེད་པ་དང་།  །

ཞིང་ཁམས་རྒྱ་མཚོ་ཡོངས་སུ་སྦྱང་བ་དང་།  །

སེམས་ཅན་རྒྱ་མཚོ་ཡོངས་སུ་སྨིན་པ་ལ།  །

ཡེ་ཤེས་རྒྱ་མཚོ་ཆེ་ལ་འཇུག་པར་ཤོག  །

ཅེས་པའང་སྦྲུལ་ཟླ་བ་བརྒྱད་པའི་ཚེས་བཅུ་གསུམ་ལ་བྱང་ཆུབ་སེམས་དཔའ་བློ་གྲོས་ལུང་རྟོགས་རྒྱ་མཚོ་གཞན་ཕན་དྲི་མ་མེད་པའི་འོད་ཀྱིས་སྙིང་ནས་སྨོན་ལམ་དུ་བཏབ་པ་ངེས་པར་འགྲུབ་པ་ཞིག་བླ་མ་རྒྱལ་བ་སྲས་བཅས་ཀྱི་བྱིན་གྱི་རླབས་ཏུ་གསོལ།  འདི་ཁོ་ན་འགྲུབ་པར་གྱུར་ཅིག།  །།