Autobiography of Longchen Rabjam—Tibetan

༄༅། །ལོ་རྒྱུས་རིན་པོ་ཆེའི་ཕྲེང་བ་ལས། ཀློང་ཆེན་པའི་རང་རྣམ།

དེ་ཡང་ཁོ་བོའི་ཡུལ་ནི་གཡོ་རུ་གྲའི་ཕུ་སྟོད་ཞེས་བྱ་བ་ན། སློབ་དཔོན་བསྟན་པ་སྲུང་བ་ཞེས་བྱ་བ་དང་། འབྲོ་བཟའ་མོ་བསོད་ནམས་རྒྱན་གཉིས་ཀྱི་བུར་སྐྱེས་ཏེ། ཆུང་ངུའི་དུས་ནས་དད་པ་དང་སྙིང་རྗེ་ཤེས་རབ་ཆེ་ཞིང་། ནམ་གྲུ་རེ་མ་ཏིས་ཤིན་ཏུ་འགོ་བའི་དགེ་མཚན་དང་གཟུགས་ཀྱང་མཐོང་ངོ་། །ལོ་བདུན་ནས་ཀློག་ཤེས་ཏེ་ཕུར་པ་དང་། བདེ་གཤེགས་འདུས་པ་དང་། གུ་རུའི་ཕྲིན་སྒྲུབ་རྣམས་བསླབས་པས། ལོ་དགུ་ནས་ཁོང་དུ་ཆུད་དོ། །ལོ་བཅུ་གཉིས་ན་མཁན་པོ་བསམ་འགྲུབ་རིན་ཆེན་དང་། སློབ་དཔོན་ཀུན་དགའ་འོད་ཟེར་ལས་རབ་ཏུ་བྱུང་སྟེ། འདུལ་བ་བསླབ་ནས་ལོ་བཅུ་བཞི་ནས་བཤད་དོ། །དེ་ནས་ལོ་བཅུ་དྲུག་ལ་སློབ་དཔོན་བཀྲ་ཤིས་རིན་ཆེན་ལས་ལམ་འབྲས་དང༌། ཆོས་དྲུག་གཉིས་དང་། ཕག་མོ་ཆོས་དྲུག་དང་། བདེ་མཆོག་དྲིལ་བུ་པ་དང་། ཕྱག་ན་རྡོ་རྗེ་འཁོར་ལོ་ཆེན་པོ་ལ་སོགས་པའི་དབང་ཁྲིད་གདམས་པ་དང་བཅས་པ་ཞུས་ཤིང་། སློབ་དཔོན་དབང་ཡེ་ལ་སོགས་པ་ལས་གསང་སྔགས་ཀྱི་སྒྲུབ་སྡེ་མང་པོ་དང་། །ཟྭ་ལུང་རིན་པོ་ཆེ་ལ་སོགས་པ་ལས་ཞང་ཚལ་པའི་གདམས་སྐོར་དང་། རྒོད་ཚང་བའི་ལམ་ཁྲིད་དང་། གཅོད་དང་ཞི་བྱེད་ལ་སོགས་པ་མང་དུ་མནོས་སོ། །ལོ་བཅུ་དགུ་ན་གསང་ཕུར་ཕྱིན་ནས་བྱམས་ཆོས་དང་ཚད་མ་ལ་སོགས་པའི་མཚན་ཉིད་ཀྱི་ཐེག་པ་མང་དུ་ཉན་ཏེ། སློབ་དཔོན་ཆེན་པོ་བླ་བྲང་བ་ཆོས་དཔལ་རྒྱལ་མཚན་དང་། ཆོས་གྲགས་གཉིས་པ་ལ་སོགས་པའི་དྲུང་དུ་ལོ་དྲུག་ཏུ་ཞུན་ཐར་བཅད་ཅིང་། སློབ་དཔོན་ཆེན་པོ་བཙན་དགོན་པ་ལས། ཚད་མ་སྡེ་བདུན་གྱི་རྩ་བ་དང་ཤེས་རབ་སྙིང་པོ་དང༌། སྒྲོལ་མ་ལ་སོགས་པའི་ལུང་ཕྲན་མང་ཞིག་ཏུ་མནོས་ཤིང་། ལོ་ཙཱ་བ་བློ་བརྟན་ལས་ཏིང་འཛིན་རྒྱལ་པོ་ལ་སོགས་པ་ཟབ་མོའི་མདོ་ལྔ་དང་། ཤེས་རབ་སྙིང་པོའི་རྒྱ་ཆེར་འགྲེལ་བ་ལ་སོགས་པའི་ལུང་ཕྲན་མང་དུ་མནོས་ཏེ། དེ་ཡང་དུས་སྐབས་འགའ་ཞིག་ན། མི་གཡོ་བ་དང་། དབྱངས་ཅན་མ་དང་། ཤེས་རབ་གསལ་བྱེད་ལ་སོགས་པ་བློ་འཕེལ་གྱི་ལྷ་འགའ་ལ་སྒྲུབ་པ་བྱས་པས། རྨི་ལམ་དུ་གྲུབ་པའི་མཚན་མ་ཙམ་བྱུང་ཞིང་། ལུང་དང་། རིག་པ་དང་། མན་ངག་དང་། སྙན་དངགས་ལ་སོགས་པའི་དོན་ལ་བློ་གྲོས་ཀྱི་སྣང་བ་ཅུང་ཟད་ཐོབ་ནས། ཕྱོགས་ཐ་དད་ཀུན་ཏུ་འཁྱམས་ཤིང་། བླ་མ་དགེ་བའི་བཤེས་གཉེན་དུ་མ་ལས། མདོ་དང་རྒྱུད་དང༌། མན་ངག་དུ་མ་ཞུས་ཏེ། ཐོས་བསམ་གྱི་བློ་གྲོས་སྦྱངས་ཤིང༌། སློབ་དཔོན་གཞོན་ནུ་དོན་གྲུབ་ལ་སོགས་པ་ལས་མདོ་སྒྱུ་འཕྲུལ་སེམས་ཕྱོགས་ལ་སོགས་པའི་སྐོར་མང་པོ་ཞུས་ཤིང་། སློབ་དཔོན་གཞོན་ནུ་རྒྱལ་པོ་ལ་སོགས་པ་ལས་དབུ་མ་རྩ་འཇུག་ལ་སོགས་པ་འཕགས་སྐོར་རྣམས་ཚང་བར་ཞུས་ཤིང་། སློབ་དཔོན་གཞོན་ནུ་རྡོ་རྗེ་ལ་སོགས་པ་ལས་སྤྱོད་འཇུག་དང་བསླབ་བཏུས་དང་། ཇོ་བོའི་གདམས་སྐོར་གྱི་ཆོས་དྲུག་སྦྱོར་དྲུག་ལ་སོགས་པའི་སྙན་བརྒྱུད་མང་དུ་ཞུས་ཤིང་། མཁན་པོ་ལས་ཁྲོ་ཕུའི་ཆོས་སྐོར་དང་། ཁ་རག་གི་ཆོས་སྐོར་དང་། གཞན་ཡང་སྒྲུབ་ཐབས་རྒྱ་མཚོ་དང་། ཆོས་ཆུང་བརྒྱ་རྩ་དང་། འདུལ་བའི་ལུང་ལ་སོགས་པ་མང་དུ་ཐོས་སོ། །བླ་མ་དམ་པ་ཆོས་རྗེ་ཀརྨ་པ་ལས། སྦྱོར་དྲུག་གེགས་སེལ་དང་བཅས་པ་དང་། ནཱ་རོའི་ཆོས་དྲུག་དང་། སྐུ་གསུམ་ངོ་སྤྲོད་དང་། ཐུགས་རྗེ་ཆེན་པོ་རྒྱལ་བ་རྒྱ་མཚོ། ཐུགས་རྗེ་ཆེན་པོ་རྒྱལ་པོ་ལུགས་ལ་སོགས་པ་མང་དུ་ཐོས་སོ། །གཞན་ཡང་སློབ་དཔོན་དབང་ཚུལ་ལ་སོགས་པའི་དྲུང་དུ། སྦྱོར་དྲུག་དང་། བསྙེན་སྒྲུབ་དང་། རླུང་སྐོར་ལ་སོགས་པ་མང་དུ་ཞུས་ཤིང་ངེས་པ་མེད་པའི་སྒྲུབ་པ་བྱེད་པ་ལས། ལྕོག་ལ་རིན་པོ་ཆེའི་བྲག་ཕུག་ཏུ་ཟླ་བ་ལྔ་མུན་ཁང་གཅིག་ན་ཡོད་པའི་ཐོ་རངས་ཀྱི་རྨི་ལམ་ན་ལུང་པའི་མདའ་བྱེ་མ་དང་རི་ཆུང་ཆུ་འབབ་ཡོད་པའི་དྲུང་ན་ཡོད་པ་ལ། སིལ་སྙན་གྱི་སྒྲ་གླུ་དབྱངས་དང་བཅས་པ་ཞིག་ཐོས་ནས་བལྟས་པས། རྟ་ལ་བསེ་ཁྲབ་དྲིལ་བུས་བརྒྱན་པ་ཞིག་ལ་བུད་མེད་ལོ་བཅུ་དྲུག་ལོན་པའི་ན་ཚོད་ཙམ་ཟ་འོག་གི་གོས་དང་གསེར་གཡུའི་རྒྱན་ཆས་སྤྲས་པ་གསེར་གྱི་དྲ་བས་གདོང་བཀབ་པ་ཞིག་བྱོན་པའི་ཐུ་བ་ལ་འཇུས་ཏེ། འཕགས་མ་ཐུགས་རྗེས་འཛིན་པར་ཞུས་པས། རིན་པོ་ཆེའི་དབུ་རྒྱན་ཞིག་འདུག་པ་ཕུད་ནས་བདག་གི་མགོ་ལ་བསྐོན་ཏེ། དུས་དེ་ནས་རྟག་ཏུ་བྱིན་གྱིས་རློབ་ཅིང་དངོས་གྲུབ་སྦྱིན་པར་བྱའོ། །ཞེས་གསུང་པའི་མོད་ལ། ལུས་སེམས་བདེ་གསལ་མི་རྟོག་པའི་ཏིང་ངེ་འཛིན་གྱིས་ཕྱམ་གདལ་ནས་ཡུན་རིང་པོར་གཉིད་མ་སད་ཅིང་ཉི་མ་རྩེ་ཤར་དུས་སད་ནའང་། ཉམས་དེ་དང་མ་བྲལ་བ་ཞག་གསུམ་བྱུང་ངོ༌། །དེ་ནས་བསམ་ཡས་སུ་འོང་བའི་དཔྱིད་སོར། བླ་མ་དམ་པ་ཡར་སྟོད་སྐྱམ་གྱི་ཕུ་ན་བཞུགས་པ་དང་མཇལ་ཏེ། བླ་མས་གསུང་ནས་མདང་ལྷའི་བྱ་ཡིན་ཟེར་བའི་ཡ་མཚན་ཅན་ཞིག་བྱུང་བ་དེ་ཁྱོད་ལ་ལྟ་བ་ཡིན་པར་འདུག ངའི་ཆོས་འདིའི་བརྒྱུད་པ་འཛིན་པ་ཞིག་ཡོང་བ་འདྲ། གདམས་པ་ཚང་བར་སྦྱིན་དགོས་གསུངས་ནས་དགྱེས་ཚོར་ཆེན་པོ་ཡང་མཛད། དེའི་དཔྱིད་དེར་ལུང་སྟོང་གཅིག་ནས་གཅིག་ཏུ་སྤོ་བ་ལན་དགུ་མཛད་པས། གཞི་རེ་ཟིན་དུས་གཤེགས་པ་འདྲ་བ་དེས། ཤིན་ཏུ་ལུས་ངག་ལ་དཀའ་བ་མང་དུ་བྱུང་ཞིང་། དེ་དུས་ཕྱེ་བྲེ་གསུམ་དང་། དངུལ་ཆུ་རིལ་བུ་སྲན་མ་ཙམ་ཉི་ཤུ་རྩ་གཅིག་གིས་ཟླ་བ་གཉིས་ཀྱི་འཚོ་བ་བྱས་ཏེ། ཁ་བ་བབས་དུས་སྒྱེ་ཞིག་ཡོད་པའི་ནང་དུ་ཞུགས་པས་གོས་གདན་གཉིས་ཀའི་གོ་བཅད་ཅིང་། ཆོས་ཕྱོགས་སུ་དཀའ་བ་མང་པོ་སྤྱད་ནས་ལོ་གསུམ་གྱི་དམ་བཅའ་བྱས་ཏེ་མཆིམས་ཕུ་ལ་སོགས་པའི་རི་ཁྲོད་ལ་སྒོམ་ཞིང་། སྐབས་སུ་བླ་མའི་དྲུང་དུ་གདམས་པའི་ཞུན་ཐར་རྣམས་ལེགས་པར་བཅད་དེ་སྒྲུབ་པའི་མཆོད་པས་བླ་མ་མཉེས་པར་བྱས་ནས་ཚེ་འདིའི་སྣང་བ་ལ་ཞེན་པ་མེད་ཅིང་འཁོར་འདས་ལ་རེ་དོགས་སུ་འཛིན་པའི་གཟེབ་ལས་གྲོལ་ཏེ། གནས་ལུགས་རྫོགས་པ་ཆེན་པོའི་ལྟ་བ་དང་། ཏིང་ངེ་འཛིན་ལ་རྒྱུན་ཆགས་སུ་གནས་པས་ཐར་པའི་ལམ་སྣ་ཟིན་པ་ཙམ་དུ་འཁོད་ཅིང་། ཁྱད་པར་དུ་སྔོན་གྱི་ལས་དང་སྨོན་ལམ་གྱི་བྱེད་པས་རང་བྱུང་པདྨའི་སྒྲུབ་གནས་བོད་ཀྱི་རི་བོ་རྩེ་ལྔའི་ཕྱོགས་སུ་འོངས་ཏེ། ལས་དང་སྐལ་བར་ལྡན་པའི་སྐྱེས་བུ་འགའ་ལ་འོད་གསལ་རྡོ་རྗེ་སྙིང་པོའི་ལམ་བཟང་སྣང་བར་བྱས་ཤིང་། ཉིན་མཚན་དུ་གཞན་ལ་ཕན་པའི་བརྩོན་པས་ལེགས་པར་སྨོན་པ་ཙམ་དང༌། བླ་མ་དམ་པའི་དྲུང་དུ་འཁོར་གསུམ་ཡོངས་སུ་དག་པ་ལན་ལྔ་འབུལ་བ་ཞིག་དང་བདུན་རྣམ་དག་གིས་མཆོད་ཅིང་། དཔའ་བོ་མཁའ་འགྲོ་རྣམས་ལ་ཟླ་བ་བྱུང་ངོ་ཅོག་གི་ཚེས་བཅུ་དང་ཚེས་བརྒྱད་ཀྱི་མཆོད་པ་བཟུང་ནས་དད་པས་བྱིན་པ་དོན་ཡོད་པར་བྱས་ཤིང་། སྣང་སེམས་སྒྱུ་མའི་རོལ་པ་ཙམ་དུ་ཅི་བྱེད་དམ་པའི་ཆོས་བཞིན་སྤྱད་དེ་ཡང་དག་པའི་གདམས་པའི་གནད་རྣམས་མི་འཕྱུགས་ཤིང་། བདེ་བླག་ཏུ་རྟོགས་པས་ལག་ཏུ་བླང་བདེ་བའི་ཕྱིར་མན་ངག་གི་ཡི་གེ་མང་དུ་བཀོད་ཅིང་། ཁྱད་པར་དུ་ཆོས་སྡེ་སུམ་ཅུ་རྩ་ལྔའི་ཡང་ཏིག་ཡིད་བཞིན་ནོར་བུའི་གདམས་པ་བཀོད་ཅིང་། ཕྱི་རབས་ཀྱི་དོན་དུ་སྨོན་ལམ་གྱི་རྒྱ་དང་བཅས་པ་ཡིན་ནོ། །ཕྱིན་ཆད་བདག་གི་རྗེས་སུ་འཇུག་པ་རྣམས་ཀྱིས་ཀྱང་ཚེ་འདིའི་བྱ་བ་རྒྱབ་ཏུ་དོར། ཕྱི་མའི་བྱ་བ་དང་དུ་ལོངས། ཡང་དག་པའི་དགེ་བའི་བཤེས་གཉེན་བསྟེན། འོད་གསལ་སྙིང་པོའི་གདམས་པ་ཞུས་ནས། གཅིག་པུར་དབེན་པའི་གནས་སུ་སྙིང་ཏིག་གསང་བའི་གདམས་པ་ཉམས་སུ་བླངས་ཤིང་ཚེ་འདིས་འཁོར་འདས་ཀྱི་ལ་ཟློས་པར་བྱས་ཏེ། ལུང་བསྟན་བྱུང་ན་གཞན་དོན་ཅི་ནུས་སུ་བྱ་ཞིང་། ལོག་སྒྲུབ་དང་སྐྱོ་ངལ་ཐམས་ཅད་བཟོད་པར་བྱས་ལ་གདམས་པ་དར་ཞིང་རྒྱས་པར་བྱའོ། །