Aspiration to Perfect, Mature and Purify—Tibetan

༄༅། །རྫོགས་སྨིན་སྦྱོང་བའི་སྨོན་ལམ།

དུས་གསུམ་སངས་རྒྱས་ཐམས་ཅད་དང་། །

རྒྱལ་ཡུམ་ཤེས་རབ་ཕ་རོལ་ཕྱིན། །

འཕགས་པ་ཐུགས་རྗེ་ཅན་རྣམས་ཀྱིས། །

བདག་རྒྱུད་བྱིན་གྱིས་བརླབ་ཏུ་གསོལ། །

དལ་འབྱོར་མི་ལུས་ཐོབ་སྙམ་ཡང་། །

ལོག་ལྟས་མི་ཁོམ་གནས་སུ་བསྐྱལ།

ཁ་ལྟས་རྒྱུ་འབྲས་ཁྱད་དུ་བསད། །

ལས་མཐའ་ལོག་པས་རང་འབྱོར་ཉམས། །

དམ་པས་མ་ཟིན་གཞན་འབྱོར་སྤངས། །

འཇིགས་སྐྱོབ་ལེགས་སྨོན་ཆོས་སུ་འཁྲུལ། །

དཀོར་དང་ལོག་འཚོར་བག་མེད་སྤྱད། །

ཆོས་ཀྱི་གཟུགས་ལ་ཆོས་མིན་སེམས། །

ཤི་མ་ཐག་ཏུ་ངན་སོང་ལས། །

འགྲོ་ས་མེད་པ་བདག་གི་བློ། །

སྙིང་ནས་ཆོས་ལ་འགྱུར་བར་ཤོག །

དེ་ཡང་བླ་མ་དམ་པས་ཟིན། །

ངེས་འབྱུང་སྐྱོ་ཤས་མོས་གུས་དང་། །

སྙིང་རྗེ་བྱང་ཆུབ་དམ་པའི་སེམས། །

རྒྱུད་ལ་ངམ་ངམ་ཤུགས་ཀྱིས་སྐྱེ། །

སེམས་ཅན་ཀུན་ལ་ཕན་སེམས་དང་། །

ཕ་རོལ་ཕྱིན་དྲུག་སྤྱོད་པ་ལ། །

བདུད་ཀྱི་བར་གཅོད་མི་འབྱུང་ཞིང་། །

ཚེ་དང་སྒྲུབ་པ་མཉམ་པ་ཡིས། །

གྲངས་མེད་དང་པོའི་ཚོགས་སྦྱོར་ལམ། །

ཐབས་ལ་མཁས་པས་འདུམ་པར་ཤོག །

རྡོ་རྗེའི་ལམ་ལ་རྣལ་འབྱོར་བའི། །

མཐོང་ལམ་བདེན་པས་མ་དག་ས། །

བདུན་གྱིས་གྲངས་མེད་གཉིས་རྫོགས་ཤིང་། །

དག་ས་གསུམ་གྱིས་གྲངས་མེད་མཐའ། །

མཆོག་དབང་ལྷན་སྐྱེས་ཡེ་ཤེས་དབྱིངས། །

མངོན་སུམ་རྫོགས་ཀྱང་ཡང་དག་མཐའ། །

མངོན་དུ་མི་བྱེད་སྨོན་ལམ་རྫོགས། །

སེམས་ཅན་ཡོངས་སུ་སྨིན་བྱེད་ཅིང་། །

སྣོད་དང་བཅུད་ཀྱིས་བསྡུས་པ་ཡིས། །

སངས་རྒྱས་ཞིང་ཁམས་སྦྱོང་བ་སྟེ། །

རྫོགས་སྨིན་སྦྱངས་གསུམ་མཐར་ཕྱིན་ཤོག །

ཅེས་པའང་དགེ་འདུན་དོན་གྲུབ་ཀྱི་ངོར་རྫོགས་ཆེན་པ་རང་བྱུང་རྡོ་རྗེས་སོ།།