A Daily Practice of Siṃhamukhā—Tibetan

༄༅། །སེང་གདོང་མའི་ཐལ་རྡེབ་རྒྱུན་ཁྱེར།

སྐད་ཅིག་རང་ཉིད་མཁའ་འགྲོ་མ། །

སེང་གེའི་གདོང་ཅན་སྐུར་གསལ་བའི། །

ཐུགས་ཀའི་སྔགས་ཀྱི་འཕྲོ་འདུ་ཡིས། །

གནོད་བྱེད་མ་ལུས་ཚར་བཅད་གྱུར། །

ཨཿཀཿསཿམཿརཿཙཿཤཿདཿརཿསཿམཱཿརཿཡཿཕཊཿ

ཅེས་ཅི་ནུས་བཟླས་མཐར།

ན་མོ། རྩ་བརྒྱུད་བླ་མ་ཡི་དམ་ལྷ། །

མཁའ་འགྲོ་བདུད་འདུལ་དྲག་མོ་ཡི། །

བདེན་པ་ཆེན་པོའི་བྱིན་རླབས་ཀྱིས། །

བྱད་ཁ་ཕུར་ཁ་རྦོད་གཏོང་སོགས། །

མི་མཐུན་ཆག་ཆེ་ཉམ་ང་ཀུན། །

སྡང་བར་བྱེད་པའི་དགྲ་ལ་བྷྱོ། །

གནོད་པར་བྱེད་པའི་བགེགས་ལ་བྷྱོ། །

བདུད་དགྲ་བྱད་མའི་སྟེང་དུ་བྷྱོ། །

རྗེས་ཤུལ་མེད་པར་ཟློག་གྱུར་ཅིག །

ཅེས་ཐལ་རྡེབ་བྱ།

ཁྲོ་མོའི་རིག་སྔགས་ནུས་པའི་མཐུས། །

བྱང་ཆུབ་སྒྲུབ་པའི་བར་ཆད་བདུད། །

གནོད་བྱེད་མ་ལུས་ཚར་བཅད་ནས། །

བསམ་དོན་ཡིད་བཞིན་འགྲུབ་པར་མཛོད། །

ཅེས་དང་བསྔོ་སྨོན་བྱའོ། །

འདིའང་རྒྱུན་གྱི་ངག་འདོན་དུ་འཇིགས་བྲལ་ཡེ་ཤེས་རྡོ་རྗེས་བྲིས་པ་ཛ་ཡནྟུ། །