Blissful Path to the Ocean of Bodhicitta—Tibetan

༄༅།  །བློ་སྦྱོང་སྨོན་ལམ་དོན་བསྡུས་བྱང་སེམས་རྒྱ་མཚོའི་བདེ་ལམ་བཞུགས།

འཕགས་མཆོག་སྤྱན་རས་གཟིགས་དབང་དང་། །

སངས་རྒྱས་བྱང་ཆུབ་སེམས་དཔའ་རྣམས། །

ཐུགས་སྐྱེད་མཐར་ཕྱིན་བདེན་པ་ཡིས། །

བདག་གཞན་མཁའ་མཉམ་འགྲོ་ཀུན་ལ། །

བྱང་ཆུབ་སེམས་མཆོག་སྐྱེ་བར་ཤོག །

སེམས་ཅན་དུག་ལྔ་ལ་ཞུགས་དང་། །

རིགས་དྲུག་སྡུག་བསྔལ་མྱོང་བ་ཡི། །

སྡུག་བསྔལ་རྒྱུ་འབྲས་བདག་ལ་སྨིན། །

བདག་གི་ཕྱིན་དྲུག་སེམས་དང་ནི། །

དུག་ལྔ་མེད་པའི་དགེ་རྩ་རྣམས། །

ནམ་མཁའ་མཉམ་པའི་འགྲོ་ལ་སྦྱིན། །

རིགས་དྲུག་འཁོར་བའི་གནས་སྟོང་ནས། །

རིགས་མཆོག་དྲུག་གི་སྤྱན་རས་གཟིགས། །

ཡེ་ཤེས་དྲུག་ལྡན་ཐོབ་པར་ཤོག །

ནད་མུག་མཚོན་བསྐལ་ལོག་པར་བལྟས། །

ཉམས་ཆག་ཉེས་ལྟུང་སྡིག་པའི་ཚོགས། །

གཅེས་འཛིན་བར་ཆད་གདོན་བགེགས་ཀུན། །

བདག་ཉིད་གཅིག་པུའི་སྟེང་དུ་སྨིན། །

ཚེ་དཔལ་ལོང་སྤྱོད་བདེ་སྐྱིད་མཐུ། །

ཉམས་རྟོགས་མཁྱེན་བརྩེའི་ཡེ་ཤེས་ཀུན། །

ནམ་མཁའ་མཉམ་པའི་འགྲོ་ལ་བསྔོ། །

ཀུན་ཀྱང་བྱང་ཆུབ་སྤྱོད་མཆོག་གིས། །

རབ་མཛེས་འཕགས་པའི་གནས་ཐོབ་ཤོག །

མདོར་ན་གཅེས་འཛིན་རང་འདོད་ལས། །

བྱུང་བའི་རྒྱུ་འབྲས་བདག་ལ་སྨིན། །

འགྲོ་ཀུན་ཕན་བདེའི་དཔལ་གྱིས་འབྱོར། །

སྟོང་ཉིད་སྙིང་རྗེའི་དོན་རྟོགས་ཤོག །

བདག་ལ་མཐོང་ཐོས་དྲན་རེག་གིས། །

ངན་འབྲེལ་གནོད་བྱེད་གཙོ་བྱས་འགྲོ། །

སྒྲིབ་སྦྱང་བྱང་ཆུབ་ལམ་ཞུགས་ནས། །

ཐོག་མ་ཉིད་དུ་འཚང་རྒྱ་ཤོག །

ཤིན་དུ་མི་བཟད་ལས་ངན་གྱི། །

རྣམ་སྨིན་རྒྱུ་འབྲས་སྤྱོད་པའི་ཚབ། །

བདག་ཉིད་གྱུར་ནས་དེ་དག་ཀུན། །

སྒྲིབ་བྱང་བདེ་ཆེན་ཞིང་སྐྱེ་ཤོག །

གནོད་བྱེད་གཙོར་གྱུར་འགྲོ་ཀུན་དོན། །

བདག་ཉིད་ངན་སོང་ཁོ་ནར་གནས། །

མ་རྒན་འགྲོ་ཀུན་འཁོར་མཚོ་ལས། །

གྲོལ་ནས་རྣམ་གྲོལ་སར་སྦྱོར་ཤོག །

བྱང་ཆུབ་སེམས་ཀྱི་གཞི་གཅིག་པུ། །

དགྲ་གདོན་བཀའ་དྲིན་ཅན་ཁྱོད་ཀྱི། །

ཕྱིར་དུ་བདག་གི་ལུས་དང་སྲོག །

དགའ་བཞིན་གཏང་ནས་ཕན་སྒྲུབ་ཤོག །

བདག་ཉིད་མངོན་སངས་རྒྱས་པའི་ཚེ། །

འཁོར་གྱི་ཐོག་མར་ཁྱོད་སྐྱེ་ནས། །

ལྔ་སྡེ་བཟང་པོ་འདུས་པ་བཞིན། །

མོད་ལ་ཐམས་ཅད་མཁྱེན་ཐོབ་ཤོག །

འདི་ནས་བྱང་ཆུབ་མ་ཐོབ་བར། །

གནོད་བྱེད་ཁྱེད་དང་མི་འབྲལ་ཞིང་། །

འཁྲུག་པ་མེད་པའི་ལྟ་སྤྱོད་ཀྱིས། །

བྱང་ཆུབ་ལམ་ལ་མཉམ་འཇུག་ཤོག །

མཐོང་ཐོས་དྲན་པ་ལྟ་ཅི་སྨོས། །

བདག་གི་མིང་ཙམ་ཐོས་པ་དང་། །

རྫི་ཕྱོགས་རླུང་གིས་རེག་པ་ཡང་། །

སྒྲིབ་ཟད་ཞི་བའི་ལམ་འཇུག་ཤོག །

ཕ་མར་གྱུར་པའི་མཁའ་ཁྱབ་འགྲོ། །

སྡང་བའི་ཡུལ་དུ་ཇི་ལྟར་འོས། །

དྲིན་བཟོའི་བསམ་སྦྱོར་འཇམ་པོ་ཡིས། །

ཕྱམ་གཅིག་སངས་རྒྱས་སར་སྦྱོར་ཤོག །

བདག་ལ་བརྟེན་ནས་དངོས་བརྒྱུད་དུ། །

སེམས་ཅན་ཀུན་ལ་གནོད་མ་གྱུར། །

ཕན་དང་བདེ་བ་འབའ་ཞིག་གིས། །

བདེ་ཆེན་ས་ལ་འགོད་ནུས་ཤོག །

སྐད་ཅིག་རེར་ཡང་དཔག་མེད་འགྲོ། །

སྒྲོལ་བའི་ཐབས་མཁས་སྙིང་རྗེའི་མཐུ། །

སྤྱན་རས་གཟིགས་དང་འཇམ་པའི་དབྱངས། །

གསང་བའི་བདག་པོ་ལྟ་བུར་ཤོག །

ཁྱད་པར་གདུལ་དཀའ་སྡུག་བསྔལ་ཅན། །

ལྷག་པར་བརྩེ་བས་རྗེས་འཛིན་ལ། །

ཐུབ་པ་མཆོག་དང་པད་འབྱུང་གི །

ཐུགས་སྐྱེད་སྨོན་ལམ་བཞིན་གྱུར་ཅིག །

བདག་གཞན་མཉམ་ཉིད་ཡེ་ཤེས་དབྱིངས། །

སྟོང་ཉིད་སྙིང་རྗེའི་རྩལ་ཤར་བས། །

གཞན་ཕན་འབའ་ཞིག་བསྒྲུབ་བྱའི་ཕྱིར། །

སྨོན་ལམ་བཏབ་བཞིན་མྱུར་འགྲུབ་ཤོག །

ཅེས་རྩོད་དུས་ཀྱི་འགལ་རྐྱེན་བྱང་ཆུབ་ལམ་གྱི་གྲོགས་སུ་མཐོང་བའི་སྨོན་ལམ་འདི་ཡང་འཇམ་མགོན་བླ་མའི་གསུང་གི་བཅུད་བསྡུས་ནས། །རྨད་བྱུང་བྱང་ཆུབ་སེམས་ཀྱི་མངའ་བདག་སྙིགས་མ་པ་རྣམས་ཀྱི་གཙུག་གི་ནོར་བུ་རྫོགས་པའི་སངས་རྒྱས་ཞེ་ཆེན་པའི་བཀའ་དྲིན་ལས་ཐེག་པ་ཆེན་པོའི་ལམ་ལ་མོས་པས་ལྷུར་ལེན་པའི་ཀུ་སཱ་ལི་རྒྱལ་བའི་སྲས་པོ་བློ་གྲོས་དྲི་མེད་གཟི་བརྗིད་རབ་ཏུ་དགའ་བའི་དཔལ་གྱིས་བྲིས་ཤིང་ཁ་ཏོན་དུ་བགྱིས་པ་ལྟར་འགྲུབ་པར་གྱུར་ཅིག། །།