Lama Yangtik Homage Supplement—Tibetan
༄༅། །བླ་མ་ཡང་ཏིག་གི་བརྒྱུད་པའི་ཕྱག་འཚལ་བྱིན་རླབས་སྤྲིན་ཚོགས་ཀྱི་ཞལ་སབ།
ཀུན་མཁྱེན་ཆེན་པོའི་འཕྲོར།
མཁྱེན་པའི་ཆ་ཤས་ཡོངས་རྫོགས་ཤིང་། །
བརྩེ་ཆེན་ཐུགས་རྗེའི་འོད་སྟོང་གིས། །
འགྲོ་བློའི་མུན་སེལ་མཛད་པའི། །
ཁྱབ་བརྡལ་ལྷུན་གྲུབ་ལ་ཕྱག་འཚལ། །
དཔག་ཡས་ཐུགས་རྗེའི་སྤྲིན་ཆེན་ལས། །
ངེས་གསང་སྙིང་པོའི་གྲུ་ཆར་གྱིས། །
རྣམ་གྲོལ་མྱུ་གུ་བསྐྱེད་མཛད་པའི། །
གྲགས་པ་འོད་ཟེར་ལ་ཕྱག་འཚལ། །
གཟུང་འཛིན་བདེན་ཞེན་འཁྲུལ་པ་ཞིག །
རྣམ་གསུམ་ཤེས་རབ་རྩལ་ཆེན་རྫོགས། །
གདུལ་བྱ་རྒྱ་མཚོ་སྨིན་མཛད་པའི། །
སངས་རྒྱས་དབོན་པོ་ལ་ཕྱག་འཚལ། །
མཁྱེན་རབ་མེ་ལོང་གཙང་མའི་ངོས། །
ཤེས་བྱའི་གཟུགས་བརྙན་འབུམ་ཕྲག་བཀྲ། །
དོན་གཉིས་མཐར་ཕྱིན་རྒྱལ་བའི་སྲས། །
ཀུན་མཁྱེན་ཟླ་གྲགས་ལ་ཕྱག་འཚལ། །
སྲིད་འབྱོར་སྒྱུ་མའི་ཚུལ་དུ་གཟིགས། །
ཕྱོགས་མེད་སྒྲུབ་པའི་རྒྱལ་མཚན་བཙུགས། །
ཀ་དག་དགོངས་པའི་རྩལ་ཆེན་རྫོགས། །
ཀུན་བཟང་རྡོ་རྗེ་ལ་ཕྱག་འཚལ། །
རྣམ་དག་ཚུལ་ཁྲིམས་གསེར་སྦྱང་ཁམས། །
ཟག་མེད་ཏིང་འཛིན་མུ་ཁྱུད་ཅན། །
ཤེས་རབ་རྩིབས་སྟོང་རྣམ་བཀྲ་བའི། །
རྒྱལ་མཚན་དཔལ་བཟང་ལ་ཕྱག་འཚལ། །
ཕུལ་བྱུང་མཁྱེན་བརྩེའི་གྲུ་ཆེན་གྱིས། །
སྲིད་ཞིའི་ཆུ་བོ་རབ་བརྒལ་ནས། །
དོན་གཉིས་ནོར་བུའི་གླིང་ཕྱིན་པའི། །
སྤྲུལ་སྐུ་སྣ་ཚོགས་ལ་ཕྱག་འཚལ། །
བཀའ་གཏེར་གདམས་པའི་བུམ་བཟང་ལས། །
སྨིན་གྲོལ་བདུད་རྩིའི་དགའ་སྟོན་གྱིས། །
འགྲོ་བློའི་རེ་སྐོང་ཐུབ་པའི་དབང་། །
བསྟན་འཛིན་གྲགས་པ་ལ་ཕྱག་འཚལ། །
མང་ཐོས་མཁྱེན་རབ་ཡངས་པའི་མཁར། །
སྒོམ་བྱུང་རྟོགས་པའི་མེ་ཤེལ་བཀྲ། །
ཐུབ་བསྟན་པད་ཚལ་བཞད་པའི་གཉེན། །
མདོ་སྔགས་བསྟན་འཛིན་ལ་ཕྱག་འཚལ། །
བརླབ་ཆེན་ཚོགས་གཉིས་གྲུ་ཟིང་གིས། །
སྲིད་མཚོར་བྱིང་བའི་ཉམ་ཐག་འགྲོ །
རྣམ་གྲོལ་རིན་གླིང་འགོད་མཛད་པའི། །
ཕྲིན་ལས་ལྷུན་གྲུབ་ལ་ཕྱག་འཚལ། །
ཐེག་མཆོག་ཡོ་ག་སྡེ་གསུམ་གྱི། །
བཤད་སྒྲུབ་སྙིང་པོའི་བ་དན་མཆོག །
སྲིད་མཐར་མི་ནུབ་སྒྲེང་མཛད་པའི། །
འགྱུར་མེད་རྡོ་རྗེ་ལ་ཕྱག་འཚལ། །
ཀུན་བཟང་དགོངས་པའི་རྩལ་ཆེན་རྫོགས། །
འོད་གསལ་བསྟན་པའི་བདག་པོ་རུ། །
གདོད་མའི་མགོན་གྱིས་ལུང་བསྟན་པའི། །
མཁའ་འགྲོ་དཔལ་འཛིན་ལ་ཕྱག་འཚལ། །
བི་མའི་རྣམ་འཕྲུལ་གྲུབ་རིག་འཛིན། །
མཁས་ཚུལ་གསུམ་གྱི་བྱ་བ་ཡིས། །
སྔ་འགྱུར་བསྟན་སྲོག་མཐུད་མཛད་པ། །
རིན་ཆེན་རྣམ་རྒྱལ་ལ་ཕྱག་འཚལ། །
བསླབ་གསུམ་ཡོངས་འདུའི་ལྗོན་བཟང་རྩེར། །
ཐེག་མཆོག་འབྲས་བཟང་ཆེར་སྨིན་ཞིང་། །
ཕན་བདེའི་གྲིབ་བསིལ་རྨད་བྱུང་བའི། །
བསྟན་འཛིན་རྡོ་རྗེ་ལ་ཕྱག་འཚལ། །
རིག་འཛིན་བརྒྱུད་པའི་གངས་རིའི་སྤོར། །
མཁྱེན་རྟོགས་ཡོན་ཏན་རྩལ་ཆེན་རྫོགས། །
གདུལ་ཡུལ་རི་དྭགས་སྙིང་རྗེས་སྐྱོངས། །
ཕྲིན་ལས་རྣམ་རྒྱལ་ལ་ཕྱག་འཚལ། །
བཤད་སྒྲུབ་བསྟན་པའི་རྒྱལ་མཚན་རྩེར། །
ཐེག་མཆོག་ནོར་བུའི་ཏོག་མཛེས་པས། །
ངེས་གསང་འདོད་དགུའི་གྲུ་ཆར་འབེབས། །
ཕྲིན་ལས་ཆོས་སྒྲོན་ལ་ཕྱག་འཚལ། །
འཇམ་དཔལ་ཆོས་ཀྱི་བཤེས་གཉེན་གྱི། །
ཡང་སྤྲུལ་བཀའ་འབབ་བདུན་གྱི་བདག །
འོད་གསལ་བསྟན་པའི་ཤིང་རྟ་པ། །
སྤྲུལ་པའི་རྡོ་རྗེ་ལ་ཕྱག་འཚལ། །
རྒྱལ་བས་ལུང་བསྟན་སྤྲུལ་པའི་སྐུ། །
མཛོད་ལྔའི་སྲོལ་འབྱེད་ཤིང་རྟ་ཆེ། །
ཡོངས་རྫོགས་བསྟན་པའི་མངའ་བདག་མཆོག །
བློ་གྲོས་མཐའ་ཡས་ལ་ཕྱག་འཚལ། །
གཞན་ཡང་ཕྱོགས་བཅུའི་སངས་རྒྱས་དང་། །
སོགས་དཀྱུས་ལ་འཇུག་པར་བྱའོ།།
ཅེས་པའང་དུས་མཐའི་ཆོས་གཟུགས་འཛིན་པ་འགྱུར་མེད་པདྨ་རྣམ་རྒྱལ་གྱིས་བདེ་ཆེན་འོད་གསལ་ཕུག་ཏུ་བྲིས་ཤིང་གསོལ་བ་བཏབ་པ་དགེ།།
