Glorious Gift of Longevity and Granting All Desires—Tibetan

༄༅། །ཚེ་ཐར་གཏོང་བའི་ཆོ་ག་ཚེ་རིང་འདོད་དགུའི་དཔལ་སྟེར་བཞུགས།

སེམས་ཅན་དེའི་སྤྱི་གཙུག་ཏུ་མགོན་པོ་ཚེ་དཔག་མེད་བསྒོམས་ལ།

བདག་དང་སེམས་ཅན་ཐམས་ཅད་དུས་འདི་ནས་བཟུང་སྟེ་བྱང་ཆུབ་སྙིང་པོའི་བར་དུ་རྒྱལ་བ་ཚེ་དང་ཡེ་ཤེས་དཔག་ཏུ་མེད་པ་ལ་སྐྱབས་སུ་མཆིའོ། །

ལན་གསུམ།

སེམས་ཅན་ཐམས་ཅད་འཆི་བའི་འཇིགས་པ་ལས་ཐར་ཏེ་འཆི་མེད་རྟག་པ་དམ་པའི་གོ་འཕང་འཐོབ་པའི་ཆེད་དུ་ཚེ་ཐར་གཏོང་བའི་དགེ་བ་སྒྲུབ་པར་བྱའོ། །

སྙམ་དུ་སེམས་བསྐྱེད་ལན་གསུམ། ཚད་མེད་བཞི་བསྒོམས་ནས། ཚེ་གཟུངས་ཚར་གསུམ་བརྗོད་ལ་ནས་འཐོར་བས་སེམས་ཅན་དེ་དང་དེའི་རིགས་ཅན་འཆི་བས་འཇིགས་པ་ཐམས་ཅད་འཆི་བདག་ལས་རྒྱལ་ཏེ་སྐྱེ་བ་ཀུན་ཏུ་ཚེ་ཡི་དངོས་གྲུབ་ཐོབ་པར་བསམ།

ཨོཾ་ན་མོ་བྷ་ག་ཝ་ཏེ། ཨ་པ་རི་མི་ཏ་ཨཱ་ཡུརྫྙཱ་ན་སུ་བི་ནི་ཤྩི་ཏ་ཏེ་ཛོ་རྭ་ཛཱ་ཡ། ཏ་ཐཱ་ག་ཏཱ་ཡ། ཨརྷ་ཏེ་སམྱཀྶཾ་བུདྡྷཱ་ཡ། ཏདྱ་ཐཱ། ཨོཾ་པུཎྱེ་པུཎྱེ་མ་ཧཱ་པུཎྱེ། ཨ་པ་རི་མི་ཏ་པུཎྱེ་ཨ་པ་རི་མི་ཏ་པུཎྱ་ཛྙཱ་ན་སཾ་བྷཱ་རོ་པ་ཙི་ཏེ། ཨོཾ་སརྦ་སཾ་སྐཱ་ར་པ་རི་ཤུདྡྷ་དྷརྨ་ཏེ་ག་ག་ན་ས་མུཏྒ་ཏེ་སྭ་བྷཱ་ཝ་བི་ཤུདྡྷེ་མ་ཧཱ་ན་ཡ་པ་རི་ཝཱ་རེ་སྭཱ་ཧཱ།

ཡེ་དྷར་བཟླ་ཞིང་ཚེ་ཐར་གྱི་རྟགས་གདབ་དགོས་ན་བྱ། མཆན། དཔྲལ་བར་མར་གྱི་གཡུང་དྲུང་དང༌། སྟེང་དུ་ཉི་ཟླ་བཀོད་ལ།

ཨོཾ་ཡེ་དྷརྨཱ་ཧེ་ཏུ་པྲ་བྷཱ་ཝཱ་ཧེ་ཏུནྟེ་ཥཱནྟ་ཐཱ་ག་ཏོ་ཧྱ་ཝ་དཏ། ཏེ་ཥཱཉྩ་ཡོ་ནི་རོ་དྷ་ཨེ་ཝྃ་ཝཱ་དཱི་མ་ཧཱ་ཤྲ་མ་ཎཿསྭཱ་ཧཱ།

སྭ་བྷཱ་ཝས་སྦྱང༌།

ཨོཾ་སྭ་བྷཱ་ཝ་ཤུ་དྡྷཱཿསརྦ་དྷརྨ་སྭ་བྷཱ་ཝ་ཤུདྡྷོ་ཧཾ།

སྟོང་པའི་ངང་ལས་དམིགས་བྱའི་ལུས་ཕུང་ཁམས་སྐྱེ་མཆེད་ཐམས་ཅད་རྣམ་དག་བདེ་བ་ཆེན་པོའི་རང་བཞིན་མཆོད་པའི་སྤྲིན་ཕུང་བསམ་གྱིས་མི་ཁྱབ་པར་གྱུར།

ཨོཾ་ཨཱཿཧཱུྃ་དང་ནམ་མཁའ་མཛོད་ཀྱིས་བརླབས།

ཨོཾ་ཨཱཿཧཱུྃ།

ན་མཿསརྦ་ཏ་ཐཱ་ག་ཏེ་བྷྱོ་བི་ཤྭ་མུ་ཁེ་བྷྱཿསརྦ་ཏ་ཁཾ་ཨུདྒ་ཏེ་སྥ་ར་ཎ་ཨི་མཾ་ག་ག་ན་ཁཾ་སྭཱ་ཧཱ།

ཀྱེ། ཕྱོགས་བཅུའི་ཞིང་ན་བཞུགས་པ་ཡི། །

སངས་རྒྱས་ཆོས་དང་དགེ་འདན་དང༌། །

བླ་མ་ཡི་དམ་མཁའ་འགྲོའི་ཚོགས། །

ཆོས་སྐྱོང་ནོར་ལྷ་གཏེར་གྱི་བདག །

ཡུལ་རིས་ཟོ་དོར་དཀར་ཕྱོགས་སྐྱོང༌། །

ཚེ་རྫི་ཚེ་མགོན་ཚེ་འཛིན་ལྷ། །

འགོ་ཞིང་སྐྱོབ་པའི་ལྷ་ཚོགས་ལ། །

མཆོད་པ་དམ་པ་འབུལ་བ་ནི། །

སྲོག་དབུགས་རྣམ་ཤེས་ལྡན་པ་ཡི། །

སེམས་ཅན་འདི་ནི་ཚེ་བདུད་ལས། །

ཐར་ཏེ་འཇིགས་མེད་དབུགས་དབྱུང་ཐོབ། །

འདི་ཡི་ཕུང་ཁམས་སྐྱེ་མཆེད་རྣམས། །

རང་བཞིན་རྣམ་དག་མཆོད་པའི་སྤྲིན། །

ནམ་མཁའ་ཁྱབ་པར་སྤྲོ་བྱེད་ཅིང༌། །

འདོད་ཡོན་ཀུན་ལྡན་བདེ་བ་ཆེ། །

འཆི་མེད་ཚེ་མཆོག་གྲུབ་པའི་རྫས། །

མུ་མཐའ་མེད་པར་ཡོངས་ཤར་བས། །

ཁྱེད་རྣམས་ཐུགས་དམ་གཉན་པོ་བསྐང༌། །

དགྱེས་རབ་མཆོག་དང་ལྡན་གྱུར་ཅིག །

བདག་དང་རྒྱུ་སྦྱོར་ཡོན་བདག་གིས། །

ཐོག་དྲངས་མཁའ་མཉམ་སེམས་ཅན་ཀུན། །

དས་མིན་འཆི་བའི་སྐེག་ལས་ཐར། །

ཤིན་ཏུ་ཡུན་རིང་འཚོ་འགྱུར་ཞིང༌། །

བདེ་ལེགས་ཕུན་ཚོགས་འཐོབ་བར་ཤོག །

ཕུང་ཁམས་ཉམས་པ་སོར་ཆུད་ཅིང༌། །

བརྟན་གཡོའི་དྭངས་བཅུད་གསོས་སུ་སྨིན། །

ཚེ་དཔལ་བཀྲག་མདངས་གཟི་བརྗིད་རྒྱས། །

ནད་མེད་ཆོས་འབྱོར་འཕེལ་བར་ཤོག །

བདག་དང་སེམས་ཅན་ཐམས་ཅད་ཀུན། །

བླ་མེད་བྱང་ཆུབ་ཐོབ་ཀྱི་བར། །

སྐྱེ་བ་ཀུན་ཏུ་ཚེ་རིང་ཞིང༌། །

འཆི་མེད་ཚེ་མཆོག་གྲུབ་པར་ཤོག །

དགེ་འདིས་མཁའ་མཉམ་འགྲོ་བ་ཀུན། །

སྐྱེ་འཆི་ལས་འདས་རྡོ་རྗེའི་སྐུ། །

མགོན་པོ་ཚེ་དཔག་མེད་པ་ཡི། །

གོ་འཕང་དམ་པ་འཐོབ་པར་ཤོག །

ཅེས་བརྗོད་ལ། ཞབས་བརྟན་ཡིན་ན། །

འདི་ལྟར་བསྒྲུབ་པའི་ལེགས་བྱས་རྟེན་འབྲེལ་གྱིས། །

དཔལ་ལྡན་བླ་མ་སྐུ་ཚེ་རབ་བརྟན་ཞིང༌། །

རྨད་བྱུང་ཕྲིན་ལས་ཕྱོགས་བཅུར་རབ་ཏུ་ཁྱབ། །

ཐུགས་ཀྱི་བཞེད་དོན་ཡོངས་སུ་འགྲུབ་པར་ཤོག །

ཞེས་སྦྱར། མཐར་བཀྲ་ཤིས་ཀྱི་ཚིགས་སུ་བཅད་པ་ཅི་རིགས་པ་དང་བཅས་ཏེ་མེ་ཏོག་འཐོར་བས་དགེ་ལེགས་སུ་བྱའོ། །

གསེར་འཕྱངས་མེ་བྱ་ཟླ་བ་བཅུ་པའི་ཚེས་བརྒྱད་ལ་མི་ཕམ་རྣམ་རྒྱལ་བས་གང་ཤར་བཀོད་པ་བཀྲ་ཤིས་པར་གྱུར་ཅིག་གུ །མངྒལཾ།