Spontaneous Success—Tibetan

༄༅། །སེང་ཆེན་ནོར་བུ་དགྲ་འདུལ་ལ་བསྟོད་བསྐུལ་འདོད་གསོལ་བསམ་དོན་ལྷུན་གྲུབ།

 

ཀྱེ། རང་སྣང་གནས་ཡུལ་དག་པའི་ཞིང༌། །

ནམ་མཁའ་མཐིང་གི་གུར་ཁྱིམ་ན། །

མཁའ་སྤྱོད་མཐོང་བ་ཀུན་སྨོན་གླིང༌། །

རྨ་གཡང་འཇའ་སྤྲིན་འཐིབ་པའི་ཀློང༌། །

བདེ་མཆོག་ནོར་བུའི་ཕོ་བྲང་ནས། །

ཆེ་རྒུའི་གཙུག་ན་མངོན་མཐོ་བ། །

སྣང་སྲིད་དྲེགས་པའི་སྲོག་གི་བདག །

དགྲ་བླ་ཝེར་མའི་སྙིང་གི་བཅུད། །

ཐོགས་མེད་སྣ་ཚོགས་ནོར་བུའི་ཚུལ། །

ཕྱོགས་ལས་རྣམ་པར་རྒྱལ་བའི་ལྷ། །

དོན་གྲུབ་ཝེར་མ་དཀར་པོ་ལ། །

བོད་ཡུལ་སེང་ཆེན་ནོར་བུ་ཞེས། །

ཙི་ནས་བཀྭན་ལོ་ཡེན་དུ་འབོད། །

ཞང་ཞུང་དགྲ་བླ་ཆེན་པོ་ལ། །

འཁོར་ནི་ལྷ་དམག་བྱེ་བ་འབུམ། །

མ་ལུས་འཁོར་དང་བཅས་པ་རྣམས། །

ཀི་བསོ་ཆ་དང་ཧེ་ཡིས་འབོད། །

 

དགྲ་བླ་དྲ་མ་ཆེ་དགུ་དང༌། །

མགོན་མཛད་དགྲ་བླ་བཅུ་གསུམ་དང༌། །

མཐུ་ཆེན་དགྲ་བླ་སྤུན་གསུམ་དང། །

མགྲོན་ཡག་དར་མ་བཅུ་གསུམ་སོགས། །

ཡེ་ཤེས་ལས་དང་འཇིག་རྟེན་གྱི། །

ཚུལ་འཛིན་དགྲ་བླ་ཝེར་མ་ཀུན། །

ལ་ལ་ཁྱོད་ཀྱི་རྩལ་ལས་འཕྲོ། །

ལ་ལ་ཁྱོད་ཀྱི་སྐུ་ལ་འདུ། །

ཐམས་ཅད་ཁྱོད་ལ་བརྟེན་ལགས་ན། །

ཁྱོད་ནི་དགྲ་བླའི་དཔའ་རྫོང་སྟེ། །

དྲན་པས་མཐུ་སྟོབས་ནུས་པ་སྤེལ། །

བདག་ཅག་རེ་ལྟོས་མི་འགྱུར་བའི། །

དད་དང་དམ་ཚིག་དབང་གིས་ནི། །

མཐུ་དཔུང་སྙན་པའི་རྒྱལ་མཚན་དང༌། །

གཏན་གྱི་གྲོགས་དང་ཡུན་གྱི་མགོན། །

ཕོ་ལྷ་འཕྲག་ལྷ་དགྲ་བླ་རུ། །

བསྟེན་ནོ་མཆོད་དོ་མཐུ་མ་ཆུང། །

མངའ་གསོལ་གཟེང་བསྟོད་ཐུགས་དམ་བསྐང། །

བདུད་རྩི་ཆང་གི་དཔའ་སྐྱེམས་འབུལ། །

བ་དན་སྣ་ཚོགས་དཔའ་དར་འབུལ། །

བསྟོད་དབྱངས་རོལ་མོའི་དཔའ་རྔམ་འབུལ། །

བསང་དང་མཆོད་སྤྲིན་དཔའ་ནོར་འབུལ། །

 

སངས་རྒྱས་ཆོས་ཀྱི་དགྲ་བླ་དང། །

འཇིག་རྟེན་སྲིད་པའི་དགྲ་བླ་རྣམས། །

དེ་རིང་རྟེན་ལ་བརྟན་པར་བཞུགས། །

ཕོ་ལྷ་ཡོ་བ་དེ་རིང་འཆོས། །

དམ་ཚིག་ཉམས་ཆགས་དེ་རིང་བཤགས། །

ལྷ་ལ་ངོ་སོ་དེ་རིང་བསྟོད། །

བདུད་ལས་རྒྱལ་ཁ་དེ་རིང་ལོངས། །

ཕོ་ལྷ་མ་ཡོ་མ་འཁྱོམས་ཤིག །

དགྲ་བླ་མ་འཁྲུགས་མ་འཁོན་ཞིག །

རྣལ་འབྱོར་བདག་ཅག་འཁོར་བཅས་ལ། །

བྱང་ཆུབ་བར་དུ་སྲུང་སྐྱོབ་མཛོད། །

རང་བྱུང་ཡེ་ཤེས་ཆེན་པོ་ནི། །

དབྱེར་མེད་བསམ་དོན་ལྷུན་གྲུབ་མཛོད། །

 

ཀྱེ། ནམ་མཁའི་ཁམས་སུ་རྒྱུ་ཙ་ན། །

གཡུ་འབྲུག་སྔོན་མོ་རྟ་རུ་ཞོན། །

གཟའ་དང་རྒྱུ་སྐར་རོལ་དུ་ཁྲིད། །

ལྷོ་སྤྲིན་སྟུག་པོའི་གཡང་གཞི་འཆང། །

ཉི་མ་ཟླ་བའི་མིག་གིས་བལྟ། །

ཁ་རླངས་ན་བུན་སྤྲིན་དུ་འཁྲིགས། །

ང་རོ་འབྲུག་གི་གད་རྒྱངས་ཅན། །

གཡས་ན་བ་དན་དཀར་པོ་དང། །

གཡོན་ན་གློག་གི་ཞགས་པ་འཛིན། །

སྲིད་གསུམ་ཁྱབ་པའི་མཐུ་བོ་ཆེ། །

དྲེགས་པ་སྡེ་བརྒྱད་བྲན་དུ་བཀོལ། །

བསང་དང་བདུད་རྩིའི་སྐྱེམས་ལ་དགའ། །

ཀི་ལ་འདུ་ཞིང་བསོ་ལ་དགྱེས། །

སངས་རྒྱས་ཆོས་ཀྱི་དབུ་འཕང་བསྟོད། །

ལས་ཅན་བསོད་ནམས་ལྡན་པ་ཡི། །

སྙན་གྲགས་མཁའ་དང་མཉམ་པར་བྱེད། །

མཆོད་དོ་ཨ་དཀར་ཝེར་མ་ནི། །

ཀླུང་རྟ་སྙན་པའི་བ་དན་བདག །

བདུད་འདུལ་ཝེར་མའི་རྒྱལ་པོ་ཆེ། །

སྐྱེས་མཆོག་གེ་སར་ནོར་བུ་མཆོད། །

མཆོད་དོ་བསྟོད་དོ་མཐུ་བོ་ཆེ། །

མཐུ་རྩལ་ནུས་པའི་ཤུགས་ཕྱུངས་ལ། །

དམ་ལྡན་རྣལ་འབྱོར་བདག་ཅག་གི །

ཕོ་ལྷ་གཉན་པོ་ཁྱེད་ཀྱིས་མཛོད། །

ཀླུང་གི་ཀ་བ་གནམ་དུ་སྒྲེངས། །

ཚེ་ཡི་དམུ་ཐག་གྱེན་དུ་དྲོངས། །

སྲིད་པ་གསུམ་གྱི་གཙུག་རོལ་ན། །

ཆེ་བཙན་འགྲན་ཟླ་མེད་པ་ཡི། །

ངོ་མཚར་སྙན་པའི་འབྲུག་སྒྲ་སྒྲོགས། །

སྣང་སྲིད་བྲན་དུ་འཁོལ་བར་མཛོད། །

 

སངས་རྒྱས་ཆོས་ཀྱི་དགྲ་བླ་དང། །

འཇིག་རྟེན་སྲིད་པའི་དགྲ་བླ་རྣམས། །

དེ་རིང་རྟེན་ལ་བརྟན་པར་བཞུགས། །

ཕོ་ལྷ་ཡོ་བ་དེ་རིང་འཆོས། །

དམ་ཚིག་ཉམས་ཆགས་དེ་རིང་བཤགས། །

ལྷ་ལ་ངོ་སོ་དེ་རིང་བསྟོད། །

བདུད་ལས་རྒྱལ་ཁ་དེ་རིང་ལོངས། །

ཕོ་ལྷ་མ་ཡོ་མ་འཁྱོམས་ཤིག །

དགྲ་བླ་མ་འཁྲུགས་མ་འཁོན་ཞིག །

རྣལ་འབྱོར་བདག་ཅག་འཁོར་བཅས་ལ། །

བྱང་ཆུབ་བར་དུ་སྲུང་སྐྱོབ་མཛོད། །

རང་བྱུང་ཡེ་ཤེས་ཆེན་པོ་ནི། །

དབྱེར་མེད་བསམ་དོན་ལྷུན་གྲུབ་མཛོད། །

 

བསྭོ། བར་སྣང་ཁམས་སུ་རྒྱུ་བ་ན། །

རྫུ་འཕྲུལ་རྐྱང་རྒོད་ཕེར་པོ་ཆིབས། །

དགྲ་བླའི་སྐུ་ཆས་ཡོངས་སུ་རྫོགས། །

སྟག་སེང་ཁྱུང་འབྲུག་རྔམ་རྔམ་གཡོ། །

དྲེགས་པ་སྡེ་བརྒྱད་སྤྲིན་ལྟར་གཏིབ། །

དགྲ་བླ་ཝེར་མ་གློག་ལྟར་འཁྱུག །

གཡུལ་ལ་མགུ་ཞིང་དམག་ལ་དགྱེས། །

ཕ་རོལ་དཔུང་འཇོམས་མཐུ་བོ་ཆེ། །

མཆོད་དོ་ནོར་བུ་དགྲ་འདུལ་རྩལ། །

སྐྱེས་བུ་སེང་ཆེན་རྒྱལ་པོ་མཆོད། །

མཆོད་དོ་བསྟེན་ནོ་སྙིང་གི་ལྷ། །

རིག་འཛིན་རྣལ་འབྱོར་བདག་ཅག་གི །

འཕྲག་ལྷ་གཉན་པོ་ཁྱོད་ཀྱིས་མཛོད། །

ཀླུང་རྟ་སྙན་པའི་བ་དན་ཕྱོར། །

མི་མཐུན་དགྲ་དཔུང་ཆམ་ལ་ཕོབ། །

མི་མཉམ་པ་དང་མཉམ་དུ་ཆུག །

མཉམ་པ་རྣམས་ལས་ཁྱད་དུ་ཐོན། །

བཟང་རྒུའི་རྒྱལ་ཁ་ཐོན་པ་དང༌། །

ཆེ་རྒུའི་མགོ་བོ་གནོན་པ་ཡིས། །

ཕྱོགས་ལས་རྣམ་པར་རྒྱལ་བར་མཛོད། །

 

སངས་རྒྱས་ཆོས་ཀྱི་དགྲ་བླ་དང། །

འཇིག་རྟེན་སྲིད་པའི་དགྲ་བླ་རྣམས། །

དེ་རིང་རྟེན་ལ་བརྟན་པར་བཞུགས། །

ཕོ་ལྷ་ཡོ་བ་དེ་རིང་འཆོས། །

དམ་ཚིག་ཉམས་ཆགས་དེ་རིང་བཤགས། །

ལྷ་ལ་ངོ་སོ་དེ་རིང་བསྟོད། །

བདུད་ལས་རྒྱལ་ཁ་དེ་རིང་ལོངས། །

ཕོ་ལྷ་མ་ཡོ་མ་འཁྱོམས་ཤིག །

དགྲ་བླ་མ་འཁྲུགས་མ་འཁོན་ཞིག །

རྣལ་འབྱོར་བདག་ཅག་འཁོར་བཅས་ལ། །

བྱང་ཆུབ་བར་དུ་སྲུང་སྐྱོབ་མཛོད། །

རང་བྱུང་ཡེ་ཤེས་ཆེན་པོ་ནི། །

དབྱེར་མེད་བསམ་དོན་ལྷུན་གྲུབ་མཛོད། །

 

ཧེ། ས་གཞིའི་ཁྱོན་དུ་རྒྱུ་བའི་ཚེ། །

འཇིག་བྱེད་བསྐལ་པའི་མེ་རླུང་འཁྲུགས། །

ཕྱག་ན་ལྕགས་གཞུ་ལྕགས་མདའ་འགེངས། །

བདུད་དགྲའི་སྲོག་གི་གནད་ལ་འདེབས། །

ཆོས་སྐྱོང་སྡེ་བརྒྱད་བྲན་བཞིན་འདུ། །

སྲིད་གསུམ་སྤྲུལ་པའི་དམག་གིས་གང། །

ཀུན་ཀྱང་མི་བཟད་ཁྲོ་གཏུམ་འབར། །

ཀི་བསོ་ཆ་སྒྲ་དི་རི་རི། །

 

དགྲ་ཤ་ཟ་ཞིང་དགྲ་ཁྲག་འཐུང༌། །

ཤ་ལ་རྔམས་ཞིང་གསོད་ལ་ཧུར། །

དམ་ཉམས་སྲོག་ལ་རྒྱུག་པའི་དཔུང། །

མཆོད་དོ་བསྟེན་ནོ་མཐུ་བོ་ཆེ། །

དམ་ལྡན་བདག་གི་དགྲ་བླ་མཛོད། །

ཕྱོགས་མཚམས་སྟེང་འོག་གང་ནས་ཀྱང། །

བདག་ལ་བསམ་སྦྱོར་ངན་པ་ཡི། །

དགྲ་བགེགས་གང་འདུག་ཁྱོད་ཀྱིས་མཐོང། །

དེ་མ་ཐག་དུ་ཁུག་ལ་ཤོག །

སྨྲ་བ་ངན་པའི་ལྕེ་ཆོད་ལ། །

བསམ་ངན་འཆང་བའི་དོན་སྙིང་དྲོངས། །

སྦྱོར་ངན་ཤོམས་པའི་ལག་པ་བྲོག །

རྩུབ་མོར་ལྟ་བའི་མིག་ཕྱུངས་ལ། །

བཞིན་ངན་སྟོན་པའི་མགོ་བོ་ཆོད། །

གཤེ་ཞིང་འཕྱ་བའི་ཀླུང་རྟ་སྣུབ། །

མདུན་གྲོས་ཤིག་ལ་བསམ་པ་སྒྱུར། །

དགྲ་བགེགས་གཏན་ནས་བརླག་པར་མཛོད། །

 

རིག་འཛིན་རྣལ་འབྱོར་བདག་ཅག་དང། །

ལུས་དང་གྲིབ་ལྟར་མི་འབྲལ་བར། །

ལེགས་དང་སྤྲོད་ལ་ཉེས་དང་བསྣོལ། །

མ་ཤེས་སློབ་ལ་མ་དྲན་སྐུལ། །

འགྲན་འདོད་ཆམ་ལ་ཕབ་པ་ཡི། །

ཟིལ་གནོན་རྡོ་རྗེའི་ཏོག་མཐོ་བ། །

དབང་དྲག་རུ་དང་རྔམ་པ་ཡི། །

མི་འགྱུར་ཀླུང་གི་ཀ་བ་ཚུགས། །

སུམ་རྩེན་པདྨའི་དགའ་ཚལ་དང། །

མཁའ་སྤྱོད་རིག་འཛིན་གྲུབ་པའི་གྲོང། །

མི་དབང་ཆེ་རྒུའི་མདུན་ས་ནས། །

སྟོབས་འབྱོར་ཕྱྭ་གཡང་བཅུད་བསྡུས་ལ། །

 

བཀྲ་ཤིས་ནོར་བུའི་གཞལ་ཡས་ཁང༌། །

དགྲ་བླ་ཝེར་མའི་ཕོ་བྲང་འདིར། །

སྟེང་ནས་ཆར་བཞིན་འབེབ་པ་དང། །

བར་ནས་སྤྲིན་བཞིན་གཏིབ་པ་དང། །

ས་གཞིར་ན་བུན་ལྟར་འཁྲིགས་ནས། །

རྨ་གཡང་བཅུད་དུ་ཆགས་པར་མཛོད། །

སྟེང་འོག་ཕྱོགས་མཚམས་གནས་པ་ཡི། །

རྒྱལ་བློན་བཙུན་འབངས་བན་བོན་དང། །

སྐྱེས་བྲན་བུད་མེད་ལྷ་ཀླུ་མི། །

སྣང་སྲིད་སྐྱེ་རྒུ་དབང་བསྡུས་ལ། །

བདག་གི་བྲན་དུ་འཁོལ་བར་མཛོད། །

མཁའ་དང་ས་གཞི་ཡངས་པའི་མཐར། །

སྙན་གྲགས་དྲི་བསུང་མངར་བའི་སྤྲིན། །

ཝེར་མའི་རླུང་གིས་རབ་བསྐྱོད་པས། །

ཕྱོགས་རྣམས་མྱུར་དུ་ཁྱབ་པར་མཛོད། །

རང་སེམས་ཐིག་ལེ་ཉག་གཅིག་དང། །

མཉམ་པ་ཉིད་གྱུར་དགྲ་བླའི་དཔུང། །

དོན་དམ་འབྲས་བུའི་ཧེ་རུ་ཀ །

མངོན་གྱུར་འགྲོ་རྣམས་སྒྲོལ་བར་མཛོད། །

 

ཞེས་ཤིང་ཕག་ཟླ་ ༩ ཚེས་ ༦ ལའོ།།

 

རྟེན་མདའ་དར་སོགས་བཞག མཆོད་པ་བསང་རྒྱས་པ་བྱ། ཚིག་མཚམས་སུ།

སངས་རྒྱས་ཆོས་ཀྱི་དགྲ་བླ་དང། །

འཇིག་རྟེན་སྲིད་པའི་དགྲ་བླ་རྣམས། །

དེ་རིང་རྟེན་ལ་བརྟན་པར་བཞུགས། །

ཕོ་ལྷ་ཡོ་བ་དེ་རིང་འཆོས། །

དམ་ཚིག་ཉམས་ཆགས་དེ་རིང་བཤགས། །

ལྷ་ལ་ངོ་སོ་དེ་རིང་བསྟོད། །

བདུད་ལས་རྒྱལ་ཁ་དེ་རིང་ལོངས། །

ཕོ་ལྷ་མ་ཡོ་མ་འཁྱོམས་ཤིག །

དགྲ་བླ་མ་འཁྲུགས་མ་འཁོན་ཞིག །

རྣལ་འབྱོར་བདག་ཅག་འཁོར་བཅས་ལ། །

བྱང་ཆུབ་བར་དུ་སྲུང་སྐྱོབ་མཛོད། །

རང་བྱུང་ཡེ་ཤེས་ཆེན་པོ་ནི། །

དབྱེར་མེད་བསམ་དོན་ལྷུན་གྲུབ་མཛོད། །

 

འདིས་ཕོ་ལྷ་ཡོ་བཅོས་ཀྱི་གོ་ཆོད། གཟའ་སྐར་ལེགས་པ་ལ་བྱ། མེ་སྤྲེལ་ཟླ་ ༤ ཚེས་ ༢༥ ལ་དྲན་པའོ།།