Gesar Lungta—Tibetan
༄༅། །ཡང་ཀླུང་རྟ་སྤེལ་སོགས།
ཡང་ཀླུང་རྟ་སྤེལ་ན། མདུན་དུ་གེ་སར་དགྲ་བླའི་རྒྱལ་པོའི་སྐུ་རྟེན་བཀྲམ་པའི་སྤྱན་སྔར། ཀླུང་རྟའི་བ་དན་ནམ་མཁར་དར་ཕྱར། ཕྱེ་མར་བསང་གསེར་སྐྱེམས་སོགས་ཇི་འབྱོར་བའི་མཆོད་པ་བཀོད་པས་མཛེས་པར་བཤམས་ལ།
ཧཱུཾ། སྣང་སྟོང་རོལ་པ་ཆེན་པོ་ལས། །
རིག་གསུམ་པདྨའི་སྒྱུ་འཕྲུལ་གར། །
ནམ་མཁའི་མཐིང་གི་གུར་ཁྱིམ་ནས། །
བདེ་མཆོག་ནོར་བུའི་ཕོ་བྲང་ན། །
དགྲ་བླའི་རྒྱལ་པོ་མཐུ་བོ་ཆེ། །
གེ་སར་ནོར་བུ་དགྲ་འདུལ་རྩལ། །
བདུད་འདུལ་དགྲ་བླ་ཝེར་མ་དང༌། །
སྣང་སྲིད་དྲེགས་པ་སྡེ་བརྒྱད་བཅས། །
དད་པ་དང་ནི་དམ་ཚིག་གིས། །
མཆོད་ཅིང་ཐུགས་དམ་བསྐུལ་ལགས་ན། །
ཀི་བསོ་ཆའོ་དགྲ་བླའི་དམག །
འཇིགས་རུང་སེར་སྤྲིན་བཞིན་དུ་བསྐྱོད། །
ཐུགས་དམ་མ་གཡེལ་ཝེར་མའི་དཔུང༌། །
མཆོད་དོ་བསྟོད་དོ་བཀུར་རོ་བཀྱགས། །
དར་སྣ་བ་དན་གློག་ལྟར་གཡོ། །
རྔ་དུང་རོལ་མོ་འབྲུག་ལྟར་སྒྲོགས། །
སྣ་ཚོགས་མཆོད་པ་སྤྲིན་ལྟར་གཏིབས། །
ཀུན་ཀྱང་དག་མཉམ་ཆེན་པོ་ཡི། །
རང་བཞིན་ཡེ་ཤེས་བདུད་རྩི་འདིས། །
དགྲ་བླ་ཝེར་མ་གསོལ་ཞིང་མཆོད། །
མངའ་གསོལ་གཟེངས་བསྟོད་དཔའ་སྐྱེམས་འབུལ། །
རྣལ་འབྱོར་བདག་གི་མཐུ་དཔུང་གི །
རྒྱལ་མཚན་དགྲ་བླ་ཝེར་མ་ཡིས། །
ཐུགས་དམ་ནུས་པའི་དཔུང་བསྐྱེད་ལ། །
ཕྲིན་ལས་མངོན་སུམ་ཉིད་དུ་སྒྲུབས། །
སྲིད་པ་གསུམ་གྱི་གཙུག་རོལ་ན། །
ཆེ་བཙན་འགྲན་ཟླ་མེད་པ་ཡི། །
ངོ་མཚར་སྙན་པའི་འབྲུག་སྒྲ་ཅན། །
ཀླུང་གི་ཀ་བ་ཁྱོད་ཀྱིས་ཚུགས། །
ཕྱོགས་ལས་རྣམ་པར་རྒྱལ་བ་ཡི། །
རྒྱལ་མཚན་སྲིད་པའི་རྩེར་མཐོ་བ། །
ཡིད་བཞིན་ནོར་བུའི་ཏོག་མཛེས་པའི། །
མཆོག་འདི་བདག་གི་ལག་ཏུ་སྩོལ། །
བསམ་སྦྱོར་ངན་པའི་དགྲ་དང་བགེགས། །
བསྐལ་པའི་མེ་ཡིས་སྦྲང་བུ་བཞིན། །
གཟི་བྱིན་ཟིལ་གྱིས་བརླག་ནུས་པའི། །
མཐུ་སྟོབས་ནུས་པ་ཆེས་ཆེར་བསྐྱེད། །
དགྲ་བླ་ཝེར་མའི་སྐུ་དཔུང་ཤུགས། །
རྡོ་རྗེའི་མེ་རླུང་ལྟར་འབར་བ། །
རྒྱ་མཚོ་ཆེ་ལ་ཆུ་བོ་བཞིན། །
མྱུར་དུ་བདག་ལ་འཇུག་པར་མཛོད། །
ཕུན་ཚོགས་ལས་རླུང་གྲགས་པའི་རྟ་ཕོ་ལ། །
ཞོན་ནས་སྲིད་པའི་མཐོ་གྲལ་སྙེགས་འདོད་ན། །
སེང་ཆེན་རྡོ་རྗེ་རླུང་རྟའི་ཀ་འཛུག་ནི། །
ཡིད་བཞིན་དབང་གི་རྒྱལ་པོ་ལག་ཏུ་ལོངས། །
འདི་ལ་བརྟེན་པའི་དངོས་ཉམས་རྨི་ལམ་ལ། །
བཀྲ་ཤིས་ཀླུང་གི་ཤུགས་འཕེལ་བརྡའ་དང་རྟགས། །
རབ་དུ་གསལ་བར་མཐོང་བའི་མོད་ཉིད་ལ། །
དགེ་མཚན་སྙན་པ་འབུམ་གྱི་རོལ་མོ་འཁྲོལ།
ས་མ་ཡ།
རབ་ཚེས་ཤིང་ཁྱི་ཟླ་ ༦ ཚེས་ ༢༥ ལ་བྲིས་པ་དགེ། །
