Wish-Fulfilling Jewel Ḍākinī Practice—Tibetan

༄༅། །མཁའ་འགྲོ་ཡིད་བཞིན་ནོར་བུ་བཞུགས་སོ། །

འདོད་དགུ་མ་ལུས་གྲུབ་མཛད་པ། །མཁའ་འགྲོ་རྡོ་རྗེ་ཕག་མོ་ལ། །དང་པོ་ཉིད་དུ་ཕྱག་འཚལ་ཏེ། །མཁའ་འགྲོ་ཡིད་བཞིན་ནོར་བུ་བྲི། །དང་པོ་དབེན་ཞིང་ཉམས་དགའ་བའི་གནས་སུ་སྟན་བདེ་བ་ལ་འདུག་སྟེ། སྐྱབས་སུ་འགྲོ་བ་དང་སེམས་བསྐྱེད་ལ། ཨ་ཨ་ཨཱ་ཞེས་བརྗོད་པས་སྟོང་པའི་ངང་ལས་པདྨ་དང་ཉི་མའི་དབུས་སུ་རོའི་གདན་ལ་རྡོ་རྗེ་ཕག་མོ་ནམ་མཁའི་མདོག་ཅན། གཡས་བསྐུམས་པའི་རྟིང་པ་བྷ་གར་གཏད་ཅིང་གཡོན་བརྐྱངས་པས་གར་མཛད་པ། གཅེར་བུ་སྤྱན་གསུམ་པ་སྐྲ་གྲོལ་ཞིང་ནུ་མ་འཕྱང་བ། ཕྱག་གཡས་གྲི་གུག་ནམ་མཁའ་ལ་ཕྱར་ཞིང༌། གཡོན་པས་ཐོད་པ་ཁྲག་གིས་བཀང་བ་ཐུགས་ཀར་བསྣམས་པ། ཕག་ཞལ་མཐིང་ནག་གྱེན་ལ་ངུར་ཞིང་མི་མགོའི་དབུ་རྒྱན་དང་དོ་ཤལ། མི་ལྤགས་དང་གླང་ཆེན་གྱི་ཀོ་བས་སྟོད་གཡོགས་ཤིང༌། རིན་པོ་ཆེ་ཡིས་བརྒྱན་པ། གྲུ་མོ་ན་ཁ་ཊཱཾ་ག་འཛིན་པ། ཕཊ་དང་ཕཻན་གྱི་སྒྲ་སྒྲོགས་ཤིང༌། མེའི་འོད་ཕུང་འབར་བའི་དབུས་ན་རིགས་བཞིའི་མཁའ་འགྲོས་བསྐོར་བར་བསམ་པའི་སྙིང་ནང་ན་ཉི་མའི་དབུས་སུ་འོད་ཀྱི་གཡུང་དྲུང་འཁྱིལ་བའི་དབུས་སུ་ཨ་མཐིང་ཀ ཤར་དུ་ཧ་དཀར་པོ། ལྷོར་རི་སེར་པོ། ནུབ་ཏུ་ནི་དམར་པོ། བྱང་དུ་ས་ལྗང་གུ་བསམ་པ་ལས་འོད་ཟེར་འཕྲོས་པའི་རྩེ་ལས་མཁའ་འགྲོ་སྡེ་ལྔ་ཐོན་ནས་ནམ་མཁའི་དབྱིངས་གང་སྟེ་ཨ་ཧ་རི་ནི་སའི་སྒྲ་སྒྲོགས་ཤིང༌། དངོས་གྲུབ་ཅི་འདོད་ཆར་དུ་འབེབས་པར་བསམ་པ་ལ་རླུང་ཁ་སྦྱོར་དུ་གཟུང་སྟེ་མ་ཡེངས་པར་བསྒོམ་ལ། བཟླས་པ་བྱེད་པར་འདོད་ན་སྙིང་ནང་གི་གཡུང་དྲུང་འཁྱིལ་པ་གཡས་བསྐོར་དུ་འཁོར་བས་འོད་ཟེར་ཕྱོགས་བཅུར་འཁྲུགས་པས་སྣང་སྲིད་ཐམས་ཅད་གཡོ་ལྡེག་འཕར་ཞིང་དབང་དུ་བསྡུ་བ་དང་ཚེ་དང་ནོར་འཕེལ་བ་དང༌། ནད་དང་གདོན་བགེགས་ཞི་བར་བསམ་མོ། །མཁའ་འགྲོས་ནམ་མཁའ་གང་བ་ཐམས་ཅད་ཀྱིས་སྔགས་ཟློས་པར་བསམ་ལ། ཨ་ཧ་རི་ནི་ས་ཙིཏྟ་ཧྲིཾ་ཧྲིཾ་ཛ་ཛཿསིདྡྷི་ཕ་ལ་ཧོཿ ཞེས་བཟླས་པས་ཕྲིན་ལས་བཞིའི་དངོས་གྲུབ་ཐོབ་པར་བསམ་ལ། སྣང་བ་ཐམས་ཅད་མཁའ་འགྲོའི་རང་བཞིན། སྒྲ་སྐད་ཐམས་ཅད་རིག་སྔགས་ཀྱི་རང་སྒྲ། དྲན་རྟོག་ཐམས་ཅད་ཡེ་ཤེས་ཀྱི་རང་བཞིན་དུ་ཤེས་པར་བྱའོ། །ཐུན་རྗེས་མཁའ་འགྲོའི་རྣམ་པ་མི་བསྡུ་བར་གསལ་གདབ་ལ་བསྔོ་བ་བྱའོ། །དེ་ལྟར་ཞག་ཉེར་གཅིག་བསྒོམས་པས། དངོས་སུ་ཉམས་འབར་ཞིང་མི་ནོར་ཟས་གོས་ཀྱི་འདུ་བ་རྒྱ་ཆེ་ཞིང་རྨི་ལམ་དུ་བུད་མེད་ཀྱི་ཚོགས་མང་པོ་རྨིའོ། །སྒྲུབ་དུས་གཏོར་ཚོགས་དང་མེ་ཚོགས་ཆེར་བྱའོ། །དེ་ཡང་མེ་ནང་དུ་མཁའ་འགྲོ་བསམ་ལ་ཟས་སྣ་དང༌། འབྲུ་སྣ་དང༌། དར་ཟབ་དང༌། རིན་པོ་ཆེ་དང༌། མི་དང་ལུང་པའི་མིང་བྱང་བསྲེག་ལ། རྩ་སྔགས་བརྗོད་ཅིང་རིག་པ་ངར་བསྐྱེད། བཀྲ་ཤིས་བརྗོད་དོ། །གཏོར་མའང་བདུད་རྩིར་བསམ་ལ། རྩ་སྔགས་བདུན་གྱིས་ནམ་ཕྱེད་ན་དབུལ་ལོ། །དེའང་སངས་རྒྱས་མཁའ་འགྲོས་ལྟ་བ་བློ་འདས་ཆེན་པོའི་དངོས་གྲུབ་སྟེར་དམ་ཚིག་དུ་ཡིན་མིན་གྱི་ཐེ་ཚོམ་མི་བྱ། རྡོ་རྗེ་མཁའ་འགྲོས་སྒོམ་པ་འོད་གསལ་ལྷུན་གྲུབ་སྟེར། དམ་ཚིག་ཏུ་བྱིང་རྒོད་ཀྱི་དགྲས་ཡེངས་སུ་མི་འཇུག །པདྨ་མཁའ་འགྲོས་སྤྱོད་པ་ཆགས་མེད་རང་གྲོལ་སྟེར་ཞིང་འགྲོ་བ་དབང་དུ་སྡུད། དམ་ཚིག་ཏུ་བུད་མེད་བསྟེན་ཞིང་བདེ་སྟོང་གི་དོན་བསྒོམ། རིན་ཆེན་མཁའ་འགྲོས་དངོས་གྲུབ་རྣམ་གཉིས་སྟེར་བས་ཞེན་ཆགས་དང་རེ་དོགས་མི་བྱ། ཁྱད་པར་དུ་རིན་ཆེན་མཁའ་འགྲོས་ཟས་ནོར་གྱི་ཆར་འབེབས། དམ་ཚིག་ཏུ་ཆགས་མེད་སྦྱིན་པའི་ཚོགས་འགྱེད། ལས་ཀྱི་མཁའ་འགྲོས་གདོན་བགེགས་བར་ཆད་སེལ། དམ་ཚིག་ཏུ་མི་ཕོད་པ་ལ་ཐོག་བརྫིས་དང་གདུག་རྩུབ་སྨྱོན་པའི་སྤྱོད་པ་བྱའོ། །དེས་ནི་མྱུར་དུ་འགྲུབ་པ་ཡིན་ནོ། །དགེ་བས་འགྲོ་ཀུན་མཁའ་འགྲོ་དངོས་གྲུབ་ཤོག །མཁའ་འགྲོ་ཡིད་བཞིན་ནོར་བུ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་བཀོད་པ་རྫོགས་སོ། །དགེའོ། ། དགེའོ། །དགེའོ།། །།