Praise of Sarasvatī—Tibetan
༄༅། །དབྱངས་ཅན་མ་ལ་བསྟོད་པ་གཞོན་ནུ་རོལ་དགའི་དབྱངས་ཞེས་བྱ་བ་བཞུགས་སོ།།
སྙན་ངག་གི་ལྷ་ལ་ཕྱག་འཚལ་ལོ། །
མཆོག་དགའི་རང་བཞིན་ལྷ་མོ་ནི། །
ཡོན་ཏན་རྒྱ་མཚོའི་གླིང་ན་བཞུགས། །
རྒྱལ་བ་སྲས་བཅས་ཀུན་ཀྱི་ཡུམ། །
དབྱངས་ཅན་མ་ལ་ཕྱག་འཚལ་ལོ། །
ཐུགས་རྗེ་གངས་རི་ཞུ་བ་ལས། །
གསར་དུ་འཁྲུངས་པའི་ལྷ་མོ་ནི། །
སྙན་ངག་ཆུ་རླུང་དལ་གྱིས་འབབ། །
དབྱངས་ཅན་མ་ལ་ཕྱག་འཚལ་ལོ། །
བཅོ་ལྔའི་ཟླ་བ་ལྟར་མཛེས་ཤིང་། །
བཅུ་དྲུག་ལོ་ལོན་འཛུམ་པའི་ཞལ། །
སིལ་ཁྲོལ་རྒྱན་གྱི་ཕྲེང་བས་ཀླུབས། །
དབྱངས་ཅན་མ་ལ་ཕྱག་འཚལ་ལོ། །
པད་ཟླའི་སྟེང་ན་པདྨ་བཞིན། །
རབ་དཀར་གངས་རིའི་ལྷུན་པོ་བཞིན། །
སྟོན་ཀའི་སྤྲིན་དཀར་ཕུང་པོ་བཞིན། །
དབྱངས་ཅན་མ་ལ་ཕྱག་འཚལ་ལོ། །
ཟླ་བའི་འོད་ཅན་དཀར་བའི་ཞལ། །
ཟླ་བ་རྒྱས་པའི་གདན་སྟེང་ན། །
ཟླ་བའི་རྒྱབ་ཡོལ་མཛད་པ་མོ། །
དབྱངས་ཅན་མ་ལ་ཕྱག་འཚལ་ལོ། །
གླང་པོ་ཟླ་བ་མཚོ་སྐྱེས་ཀྱི། །
སྟོབས་དང་འོད་ཟེར་མདངས་འཕྲོག་ཅིང་། །
ཀུན་ཏུ་ཉི་མ་ལྟ་བུར་མཛེས། །
དབྱངས་ཅན་མ་ལ་ཕྱག་འཚལ་ལོ། །
གངས་རི་འདི་ནི་པདྨོ་ཡི། །
སྤྱན་དང་ལྡན་ན་ཁྱོད་ཞལ་མཚུངས། །
ཁྱོད་སྐུ་གངས་རིའི་རྩེ་མོ་བཞིན། །
དབྱངས་ཅན་མ་ལ་ཕྱག་འཚལ་ལོ། །
ཡང་ཡང་ཁྱོད་སྐུ་དྲན་བྱེད་ཅིང་། །
ཨ་ཨཱའི་དབྱངས་ཡིག་ལ་དམིགས་ནས། །
ཧྲཱིཾ་ཧྲཱིཾ་བསླབ་པས་མུན་སེལ་བའི། །
དབྱངས་ཅན་མ་ལ་ཕྱག་འཚལ་ལོ། །
ཨེ་མ་དཔའ་མོ་རྣལ་འབྱོར་མཛེས། །
དེ་རིང་མཁའ་ལ་འཇའ་ཚོན་བཞིན། །
སྣང་དང་མི་སྣང་གཟུགས་བརྙན་བཞིན། །
དབྱངས་ཅན་མ་ལ་ཕྱག་འཚལ་ལོ། །
ཁྱོད་སྐུ་འོད་ཀྱི་ཕུང་པོའི་ནང་། །
དཀར་སེར་དམར་དང་ལྗང་ཀུ་སྟེ། །
འདྲེས་དང་མ་འདྲེས་འོད་ཟེར་འཁྲུགས། །
དབྱངས་ཅན་མ་ལ་ཕྱག་འཚལ་ལོ། །
ལ་ལར་སྤྲིན་གྱི་བླ་རེའི་ནང་། །
ལུས་བྱེད་དཀར་ལ་དམར་གསལ་མཐིང་། །
རྩེ་དང་མཆོག་དང་ཞི་སྐུར་སྣང་། །
དབྱངས་ཅན་མ་ལ་ཕྱག་འཚལ་ལོ། །
ལ་ལར་ཉི་འོད་པད་ཟླའི་ནང་། །
འོད་ལྔའི་ཕུང་པོ་འོད་འབར་ཞིང་། །
རྔ་ཡབ་པི་ཝང་གླིང་བུ་སྒྲོགས། །
དབྱངས་ཅན་མ་ལ་ཕྱག་འཚལ་ལོ། །
ལ་ལར་འོད་དང་སྐར་མའི་ནང་། །
སྐད་ཅིག་སྐད་ཅིག་རྣམ་སྤྲུལ་ཏེ། །
སྣང་དང་མི་སྣང་ཆོ་འཕྲུལ་འགྱེད། །
དབྱངས་ཅན་མ་ལ་ཕྱག་འཚལ་ལོ། །
ལ་ལར་འོད་ཀྱི་གུར་ཁྱིམ་དང་། །
འཛུམ་མཛེས་འོད་ཟེར་སྣ་ཚོགས་སྟོན། །
སྤྲུལ་དང་ཡོངས་སུ་སྤྲུལ་པ་ཡི། །
དབྱངས་ཅན་མ་ལ་ཕྱག་འཚལ་ལོ། །
ཨེ་མ་ལྷ་མོ་སྐལ་བཟང་མ། །
ཡུན་རིང་སྨོན་པ་དེ་རིང་འགྲུབ། །
སླར་ཡང་མཐོང་ཐོས་འདྲི་བར་འདོད། །
དེ་ཚེ་ཁྱོད་སྐུ་སྣང་བར་མཛོད། །
གང་ཞིག་ཁྱོད་དང་ཁྱོད་ཀྱི་སྲས། །
ཀུན་ལ་དད་པ་དེ་དག་ལ། །
ཁྱོད་ཐུགས་མཁྱེན་རབ་ཟླ་བ་ནི། །
མཆོག་ཏུ་དཀར་བས་དགོངས་སུ་གསོལ། །
དེང་ནས་སྐྱེ་བ་ཐམས་ཅད་དུ། །
དཔལ་མོ་ཁྱོད་ཀྱིས་རྗེས་བཟུང་སྟེ། །
བློ་གྲོས་ཐོགས་པ་མི་མངའ་བའི། །
ཤེས་རབ་ཆེན་པོ་ཉིད་གྱུར་ཅིག །
སྐྱེ་བ་པདྨའི་ནགས་ཚལ་དུ། །
རིགས་གཟུགས་ཡོན་ཏན་སྦྲང་རྩི་ཅན། །
གྲགས་པའི་འདབ་བརྒྱ་མངའ་བ་ཡི། །
རྟག་པར་བདག་ནི་སྐྱོང་བར་ཤོག །
ཁྱོད་དང་ཁྱོད་ཀྱི་སྲས་ཀུན་གྱིས། །
རྟག་ཏུ་བདག་རྗེས་འཛིན་པ་དང་། །
གྲགས་དང་དཔལ་ཆེན་མཐའ་ཡས་ཀྱིས། །
རྟག་པར་བདག་ནི་སྤྱོད་པར་ཤོག །
གཞོན་ནུ་རབ་དགའི་རོལ་དབྱངས་མཆོག །
གང་གིས་མཐོང་ཐོས་ཁ་ཐོན་བྱེད། །
ཀུན་ཀྱང་དབྱངས་ཅན་ཞལ་མཐོང་ཞིང་། །
ཁྱོད་ཀྱིས་རྗེས་སུ་འཛིན་པར་ཤོག །
དེ་ལྟར་བསྟོད་པའི་དགེ་ཚོགས་ཀྱིས། །
འགྲོ་ཀུན་བློ་གྲོས་ཕུན་ཚོགས་ཤིང་། །
དབྱངས་ཅན་གོ་འཕང་མཆོག་ཐོབ་ནས། །
འགྲོ་བའི་དོན་ཀུན་འབྱུང་བར་ཤོག །
ཚུལ་ཁྲིམས་པད་རྫིང་བཟང་པོ་ནས། །
བློ་གྲོས་ངུར་བ་སྒྲ་འབྱིན་ཞིང་། །
བསླབ་གསུམ་གཤོག་ཡངས་དཀར་བ་ཡིས། །
བློ་གསལ་འགྲོ་ཀུན་དགའ་སྐྱིད་ཤོག །
འདི་ནི་སྔོན་གོམས་རྒྱ་མཚོའི་ཁྱོན། །
དཔལ་མོའི་དངོས་གྲུབ་ཆེར་སྩོལ་བའི། །
བསམ་ཡས་བློ་གྲོས་དང་ལྡན་པ། །
སྙན་དངགས་འབྱུང་གནས་བདག་གིས་སྦྱར། །
ས་སྐྱོང་སྲིད་པ་གསུམ་གྱི་མཐར། །
བདེ་ལེགས་བཀྲ་ཤིས་བྱེད་པར་ཤོག །
འཕགས་མ་ངག་གི་དབང་ཕྱུག་མ་ལ་བསྟོད་པ་གཞོན་ནུ་རོལ་དགའི་དབྱངས་ཞེས་བྱ་བ། མང་དུ་ཐོས་པའི་སྙན་དངགས་མཁན་བསམ་ཡས་པས་ལྷུན་གྱིས་གྲུབ་པའི་རི་རིན་ཆེན་འབྱུང་བའི་གནས་སུ་སྦྱར་བའོ། །
