Lama Yangtik Homage—Tibetan
༄༅། །བླ་མ་ཡང་ཏིག་གི་བརྒྱུད་པའི་ཕྱག་འཚལ་བྱིན་བརླབས་སྤྲིན་ཚོགས་བཞུགས་སོ། །
ཨཱོཾ་ཨཱཿཧཱུཾ།
སངས་རྒྱས་ཐམས་ཅད་ཀྱི་འབྱུང་གནས་དཔལ་ཀུན་ཏུ་བཟང་པོའི་རང་བཞིན།
ཚད་མེད་པའི་ཐུགས་རྗེ་དང་ལྡན་པ།
དཔལ་མགོན་བླ་མ་དམ་པའི་ཞབས་ལ་གུས་པས་ཕྱག་འཚལ་ཞིང་སྐྱབས་སུ་མཆིའོ། །
བརྩེ་བ་ཆེན་པོས་རྗེས་སུ་གཟུང་དུ་གསོལ།
གདོད་མའི་མགོན་པོ་འོད་མི་འགྱུར། །
དཀྱིལ་འཁོར་ཀུན་གྱི་འབྱུང་གནས་གཙོ། །
མཁྱེན་རབ་ཡེ་ཤེས་རྒྱ་མཚོ་བརྙེས། །
ཀུན་བཟང་ཡབ་ཡུམ་ལ་ཕྱག་འཚལ། །
མི་གནས་མི་དམིགས་ཆོས་སྐུའི་ངང༌། །
འོད་གསལ་ཡེ་ཤེས་ལོངས་སྤྱོད་རྫོགས། །
ཡིད་བཞིན་རིན་ཆེན་གཏེར་མངའ་བའི། །
ཞི་ཁྲོ་རབ་འབྱམས་ལ་ཕྱག་འཚལ། །
མི་འགྱུར་ཀུན་གྲོལ་ཡེ་ཤེས་བདག །
བདེ་ཆེན་ཆོས་མཆོག་མི་གཡོ་བ། །
བླ་མེད་ཡིད་བཞིན་རིན་ཆེན་གཏེར། །
རྡོ་རྗེ་འཆང་ཆེན་ལ་ཕྱག་འཚལ། །
འོད་གསལ་ཡེ་ཤེས་སྒྱུ་མའི་ལྷ། །
མཚན་རྫོགས་དཔེ་བྱད་དཔལ་འབར་ཞིང༌། །
སྐུ་གསུམ་ལྷུན་གྲུབ་རྫོགས་སངས་རྒྱས། །
རྡོ་རྗེ་སེམས་དཔའ་ལ་ཕྱག་འཚལ། །
རྒྱལ་བ་ཀུན་གྱི་གསང་ཆེན་གྱི། །
སྐུ་གསུང་ཐུགས་ཀྱི་རྡོ་རྗེ་འཛིན། །
མཐུ་སྟོབས་དབང་ཕྱུག་འགྲོ་བའི་ཡབ། །
ཕྱག་ན་རྡོ་རྗེ་ལ་ཕྱག་འཚལ། །
ཐབས་དང་ཤེས་རབ་ཕ་རོལ་ཕྱིན། །
རྣམ་གྲོལ་ཡེ་ཤེས་རྒྱ་མཚོ་བརྙེས། །
འགྲོ་བའི་རྩ་ལག་མཆོག་གྱུར་པ། །
དགའ་རབ་རྡོ་རྗེ་ལ་ཕྱག་འཚལ། །
བླ་མེད་གྲུབ་པ་མཆོག་བརྙེས་ཤིང༌། །
གསུང་རབ་ཡིད་བཞིན་འབྱུང་བའི་མཛོད། །
འགྲོ་ལ་ཆོས་ཀྱི་ཆར་འབེབས་པ། །
འཇམ་དཔལ་བཤེས་གཉེན་ལ་ཕྱག་འཚལ། །
མཁྱེན་བརྩེ་བརྩོན་པའི་ནམ་མཁའ་ལ། །
ཡེ་ཤེས་ཉི་མའི་འོད་གདལ་བས། །
ཕྱོགས་བཅུའི་མུན་པ་སེལ་མཛད་པ། །
ཤྲཱྀ་སེངྷ་ལ་ཕྱག་འཚལ། །
རྣམ་དག་ཐུགས་རྗེའི་དཀྱིལ་འཁོར་ལས། །
ཕན་བདེའི་ཡེ་ཤེས་འོད་འཕྲོ་བ། །
འགྲོ་བའི་ལམ་བཟང་སྣང་མཛད་པ། །
ཛྙཱ་ན་སཱུ་ཏྲ་ལ་ཕྱག་འཚལ། །
མཁྱེན་བརྩེའི་འོད་སྟོང་བླ་མེད་ཀྱིས། །
གསུང་རབ་པདྨོ་ཁ་འབྱེད་ཅིང༌། །
འགྲོ་བའི་མ་རིག་མུན་པ་སེལ། །
བི་མ་མི་ཏྲ་ལ་ཕྱག་འཚལ། །
རང་བྱུང་པདྨའི་སྡོང་པོ་ལ། །
ཉི་ཤར་སངས་རྒྱས་པདྨ་སྐྱེས། །
མཁའ་འགྲོ་འབར་བའི་སྤྲིན་འཕྲོ་བ། །
པདྨ་འབྱུང་གནས་ལ་ཕྱག་འཚལ། །
མཁྱེན་བརྩེའི་བརྩོན་པ་དཔག་ཡས་ཤིང༌། །
ས་མཆོག་དཀྱིལ་འཁོར་ཆེན་པོ་བརྙེས། །
རྣམ་འཕྲུལ་དུ་མས་འགྲོ་ཀུན་སྐྱོང༌། །
ཆོས་རྒྱལ་ཁྲི་སྲོང་ལ་ཕྱག་འཚལ། །
ཏིང་ངེ་འཛིན་དང་གཟུངས་རྣམས་ཀྱི། །
གཏེར་གྱུར་འོད་གསལ་སྒྱུ་མའི་སྐུ། །
མངོན་ཤེས་རྫུ་འཕྲུལ་དབང་བསྒྱུར་བའི། །
ཏིང་འཛིན་བཟང་པོ་ལ་ཕྱག་འཚལ། །
ཟབ་མོའི་དམ་ཆོས་མཛོད་འཛིན་ཅིང༌། །
བར་དོའི་འོད་གསལ་སྙིང་པོ་བརྙེས། །
བརྩེ་ཆེན་ཐབས་མཁས་ཐུགས་རྗེའི་བདག །
ལྡང་མ་ལྷུན་རྒྱལ་ལ་ཕྱག་འཚལ། །
རྣམ་གྲོལ་བརྩོན་པའི་སྟོབས་ཆེན་གྱིས། །
ཟག་མེད་ཡེ་ཤེས་བདུད་རྩི་བརྙེས། །
འོད་སྐུར་ཡོན་ཏན་ལྷུན་རྫོགས་པའི། །
སེང་གེ་དབང་ཕྱུག་ལ་ཕྱག་འཚལ། །
ཐབས་དང་ཤེས་རབ་མཉམ་སྦྱོར་ཞིང༌། །
རྟག་ཏུ་ཟག་མེད་འོད་གསལ་ངང༌། །
མི་འགྱུར་ལྷུན་མཉམ་རྫོགས་པར་བཞུགས། །
རྒྱལ་བ་ཞང་སྟོན་ལ་ཕྱག་འཚལ། །
ས་ཆེན་གཟུངས་སྤྲིན་སྙིང་པོ་ཅན། །
རྣམ་གྲོལ་ཡེ་ཤེས་མཆོག་རབ་བརྙེས། །
འགྲོ་བའི་མ་རིག་མུན་སེལ་བ། །
མཁས་པ་ཉི་འབུམ་ལ་ཕྱག་འཚལ། །
བླ་མེད་ཚོགས་ཆེན་རབ་རྫོགས་ཤིང༌། །
རྣམ་ཀུན་མཆོག་ལྡན་སྟོང་པའི་གཟུགས། །
ངེས་དོན་སྙིང་པོའི་དོན་སྟོན་པའི། །
གུ་རུ་ཇོ་འབེར་ལ་ཕྱག་འཚལ། །
ཡང་དག་སྒྱུ་མའི་ཚུལ་བརྙེས་ཤིང༌། །
སྟོང་ཉིད་སྙིང་རྗེའི་བདག་ཉིད་ཅན། །
རང་བཞིན་སྤྲུལ་སྐུའི་ཞིང་བགྲོད་པ། །
སེང་གེ་རྒྱབ་པ་ལ་ཕྱག་འཚལ། །
ཆོས་ཉིད་བདེན་པ་རབ་གཟིགས་ཤིང༌། །
ཡེ་ཤེས་རོལ་པའི་བརྟུལ་ཞུགས་ཀྱིས། །
དཔག་མེད་འགྲོ་བའི་དོན་མཛད་པ། །
གྲུབ་ཆེན་མེ་ལོང་ལ་ཕྱག་འཚལ། །
རྣམ་དག་འོད་གསལ་སྙིང་པོའི་དོན། །
རྟག་ཏུ་རང་བཞིན་ལྷུན་གྲུབ་ཅིང༌། །
མངོན་ཤེས་གཟུངས་སྤྲིན་ཡིད་བཞིན་གཏེར། །
ཀུ་མ་རཱ་ཛ་ལ་ཕྱག་འཚལ། །
མི་འགྱུར་རྟོག་པའི་རྩལ་ཆེན་གྱིས། །
ཐམས་ཅད་ཡེ་ནས་སངས་རྒྱས་ངང༌། །
བྱ་བྲལ་ནམ་མཁའི་རྣལ་འབྱོར་པ། །
སྣ་ཚོགས་རང་གྲོལ་ལ་ཕྱག་འཚལ།
ཁ་བསྐང་ནི།
བདེ་ལེགས་ཡོན་ཏན་ཐམས་ཅད་ཀྱི། །
འབྱུང་གནས་མཁྱེན་བརྩེའི་རྒྱ་མཚོ་ཆེ། །
བྱམས་དང་སྙིང་རྗེའི་གཏེར་གྱུར་པ། །
བདེ་ལེགས་རྒྱ་མཚོ་ལ་ཕྱག་འཚལ། །
ཚེ་འདིའི་བྱ་བ་དང་བྲལ་ནས། །
བསྟན་དང་འགྲོ་བའི་དོན་ཆེན་མཛད། །
སྙིང་ཏིག་ཟབ་ཆོས་མཛོད་འཛིན་རྗེ། །
བྱ་བྲལ་ཆོས་རྗེ་ལ་ཕྱག་འཚལ། །
དུས་གསུམ་སངས་རྒྱས་ཐམས་ཅད་ཀྱིས། །
ལེགས་གསུང་དམ་ཆོས་མཛོད་འཛིན་ཅིང༌། །
བཀྲ་ཤིས་འདོད་དགུ་འབྱུང་བའི་གནས། །
སངས་རྒྱས་བཀྲ་ཤིས་ལ་ཕྱག་འཚལ། །
ཡོན་ཏན་རིན་ཆེན་དཔལ་འབར་ཞིང༌། །
ཟབ་མོའི་དེ་ཉིད་ལེགས་རྟོགས་ནས། །
འགྲོ་རྣམས་སྨིན་གྲོལ་འགོད་མཛད་པའི། །
གྷུ་ཎ་ཤྲཱྀ་ལ་ཕྱག་འཚལ། །
སྣང་སྲིད་ཡེ་སངས་རྒྱས་པའི་དོན། །
མ་ལུས་ཐུགས་སུ་ཆུད་མཛད་ཅིང༌། །
ཟབ་ཆོས་རིན་ཆེན་མཛོད་འཆང་བའི། །
སངས་རྒྱས་རིན་ཆེན་ལ་ཕྱག་འཚལ། །
སངས་རྒྱས་མ་ལུས་ཐམས་ཅད་ཀྱི། །
ཐུགས་ཀྱི་གསང་བ་རིན་པོ་ཆེ། །
སྙིང་ཐིག་བསྟན་པའི་རྒྱལ་མཚན་འཛིན། །
སངས་རྒྱས་རྒྱལ་མཚན་ལ་ཕྱག་འཚལ། །
བསླབ་གསུམ་ཚུལ་ཁྲིམས་རྒྱན་གྱིས་སྤྲས། །
རྡོ་རྗེ་གསུམ་གྱི་རྣལ་འབྱོར་ཆེ། །
བླ་མེད་བསྟན་པའི་རྒྱལ་མཚན་འཛིན། །
ཚུལ་ཁྲིམས་རྒྱལ་མཚན་ལ་ཕྱག་འཚལ། །
བསོད་ནམས་ཚོགས་ཆེན་ལྷུན་རྫོགས་ཤིང༌། །
ཡེ་ཤེས་རང་སྣང་འོད་གསལ་བས། །
སྲིད་ཞིའི་མཐའ་ལས་རྣམ་པར་རྒྱལ། །
བསོད་ནམས་རྣམ་རྒྱལ་ལ་ཕྱག་འཚལ། །
ཨོ་རྒྱན་སློབ་དཔོན་པདྨ་ཡི། །
རྗེས་བཟུང་ཤེས་བྱའི་དོན་རྣམས་གཟིགས། །
སྙིང་པོའི་བསྟན་པ་འཛིན་མཛད་པ། །
ཨོ་རྒྱན་བསྟན་འཛིན་ལ་ཕྱག་འཚལ། །
རྒྱལ་བའི་ཕྲིན་ལས་མ་ལུས་བཟུང༌། །
འགྲོ་ལ་ཕན་པ་རླབས་ཆེན་སྤྱོད། །
ཀུན་གྱི་བླ་མ་རིན་པོ་ཆེ། །
ཀརྨ་གུ་རུ་ལ་ཕྱག་འཚལ། །
དྲི་མེད་ཚུལ་ཁྲིམས་པདྨའི་མཚོར། །
བླ་མེད་ཡིད་བཞིན་སྙིང་པོ་བླངས། །
རྟག་པའི་རྒྱལ་མཚན་རྩེར་མཆོད་པའི། །
པདྨ་རྒྱལ་མཚན་ལ་ཕྱག་འཚལ། །
བློ་གསལ་པདྨའི་སྐྱེད་ཚལ་དུ། །
བློ་གྲོས་འདབ་སྟོང་སྦྲང་རྩིའི་བཅུད། །
བློ་ལྡན་བུང་བ་ཚིམ་བྱེད་པ། །
པདྨ་བློ་གྲོས་ལ་ཕྱག་འཚལ། །
བཀྲ་ཤིས་ཕུན་ཚོགས་འདོད་དགུའི་དཔལ། །
སྨིན་གྲོལ་རིམ་གཉིས་མཐར་ཕྱིན་པ། །
དབང་ཕྱུག་ཡོན་ཏན་བརྒྱད་བརྙེས་པའི། །
བཀྲ་ཤིས་དབང་ཕྱུག་ལ་ཕྱག་འཚལ། །
སྐྱེ་བ་ཚེ་རབས་ཐམས་ཅད་དུ། །
ཟབ་དོན་བདུད་རྩིའི་རིང་ལུགས་འཛིན། །
བླ་མེད་རྡོ་རྗེ་སྙིང་པོའི་བདག །
ཚེ་རིང་རྡོ་རྗེ་ལ་ཕྱག་འཚལ། །
ཀུན་བཟང་པདྨའི་བསྟན་པ་ལ། །
ཕྱོགས་རིས་མེད་པར་ཁྱབ་གདལ་དུ། །
དད་མོས་གུས་པས་ལྷུར་ལེན་པ། །
ཀུན་བཟང་ཁྱབ་གདལ་ལ་ཕྱག་འཚལ། །
བཀའ་དྲིན་ཐུགས་རྗེ་ཆེན་པོའི་མཛོད། །
རྩ་གསུམ་ཀུན་འདུས་འགྲོ་བའི་མགོན། །
བླ་མེད་ཐེག་པ་མ་ལུས་འཆང༌། །
རྩ་བའི་བླ་མ་ལ་ཕྱག་འཚལ། །
ཡང་བརྒྱུད་ཚུལ་གཅིག་ལ་སྣ་ཚོགས་རང་གྲོལ་གྱི་འཕྲོར། །
ངག་གི་དབང་པོས་རྗེས་སུ་བཟུང༌། །
རྡོ་རྗེ་ལྟ་བུའི་ཏིང་འཛིན་བརྙེས། །
བྱམས་ཆེན་སྙིང་རྗེ་ཆེན་པོའི་བདག །
བྱ་བྲལ་ཆོས་རྗེ་ལ་ཕྱག་འཚལ། །
ཐོས་བསམ་རྒྱ་མཚོའི་ཕ་རོལ་ཕྱིན། །
ཡིད་བཞིན་འཕགས་པའི་ནོར་མཆོག་ལ། །
དབང་འབྱོར་དོན་གཉིས་ལྷུན་གྲུབ་པའི། །
གཞན་ཕན་རྡོ་རྗེ་ལ་ཕྱག་འཚལ། །
ལུང་རྟོགས་ཡོན་ཏན་རྒྱ་མཚོའི་གཏེར། །ཤོ་ལོ་ཀ་འདི་ངག་དབང་བློ་གྲོས་ཀྱིས་ཆད་བསབས་བགྱིས་པ་ལགས།
མཆོག་གཟིགས་གྲུབ་བརྙེས་རྡོ་རྗེ་འཛིན། །
མཁྱེན་བརྩེ་ནུས་པས་འགྲོ་བ་འདུལ། །
ནམ་མཁའ་རྡོ་རྗེ་ལ་ཕྱག་འཚལ། །
སྤྲོས་པའི་མཚན་མ་བྲལ་བ་ཡི། །
རྣམ་གྲོལ་ཞི་བ་ཆེ་ལ་བཞུགས། །
སེམས་ཅན་ཀུན་ལ་བརྩེར་ལྡན་པའི། །
འོད་གསལ་ཀློང་ཡངས་ལ་ཕྱག་འཚལ། །
སྨིན་ལམ་དབང་བཞིའི་ཆུ་རྒྱུན་གྱིས། །
འགྲོ་བའི་སྒྲིབ་བཞི་ཡོངས་སྦྱངས་ནས། །
སྐུ་བཞིའི་དབྱིངས་སུ་གྲོལ་མཛད་པ། །
བསོད་ནམས་རིན་ཆེན་ལ་ཕྱག་འཚལ། །
ལུང་དང་རྟོགས་པའི་འོད་དཀར་ཅན། །
ཉོན་མོངས་སྨག་རུམ་འཇོམས་པའི་དགྲ། །
བྱང་གྲོལ་ཀུ་མུད་རྒྱས་པའི་གཉེན། །
ངག་དབང་པདྨ་ལ་ཕྱག་འཚལ། །
ཐེག་དགུའི་ཡང་རྩེ་རྫོགས་པ་ཆེ། །
ཆོས་ཚུལ་སྨིན་གྲོལ་བདུད་རྩིའི་བཅུད། །
འཛིན་མཛད་རྡོ་རྗེ་འཛིན་པ་དངོས། །
བསོད་ནམས་དབང་པོ་ལ་ཕྱག་འཚལ། །
ཆོས་ཀུན་དེ་ཉིད་ཐམས་ཅད་གཟིགས། །
སྲིད་པའི་འཆིང་གཅོད་ཤེས་རབ་འབར། །
གང་ཐུགས་ཇི་བཞིན་འཇམ་པའི་དབྱངས། །
ནམ་མཁའ་འཇིགས་མེད་ལ་ཕྱག་འཚལ། །
རྣམ་མང་ཐོས་པ་རྒྱ་མཚོའི་རྟེན། །
རྣམ་དག་ཏིང་འཛིན་ཟབ་མོ་བརྙེས། །
རྣམ་མཁྱེན་གོ་འཕང་མངོན་གྱུར་པའི། །
ཀློང་རྫོགས་མཐའ་བྲལ་ལ་ཕྱག་འཚལ། །
རྫོགས་ཆེན་ཉམས་བཞེས་ཚད་དུ་ཕེབས། །
གྲུབ་པའི་དབང་ཕྱུག་བརྟུལ་ཞུགས་ཅན། །
ཁམས་གསུམ་འདྲེན་པ་ཆོས་ཀྱི་རྒྱལ། །
པདྨ་རིག་འཛིན་ལ་ཕྱག་འཚལ། །
ཉམས་དང་རྟོགས་པ་མཐའ་རུ་ཕྱིན། །
གསང་ཆེན་བསྟན་པའི་སྲོག་ཤིང་འཛིན། །
རྒྱལ་ཚབ་དམ་པ་ཐུགས་རྗེའི་བདག །
ནམ་མཁའི་མཚན་ཅན་ལ་ཕྱག་འཚལ། །
སྡོམ་གསུམ་རྣམ་དག་ཉེས་ལྟུང་བྲལ། །
ཆོས་རྣམས་མཁྱེན་པའི་སྤྱན་ཡངས་ཤིང༌། །
དབང་བསྐུར་མན་ངག་སྲོལ་འཛིན་པ། །
པདྨ་རྣམ་རྒྱལ་ལ་ཕྱག་འཚལ། །
ཡོངས་འཛིན་དུ་མའི་ཞབས་པད་བརྟེན། །
ཤེས་རབ་གསུམ་གྱིས་ཉམས་སུ་བླངས། །
ཐར་ལམ་སྟོན་པའི་དེད་དཔོན་པ། །
དབང་རྒྱལ་རྒྱ་མཚོ་ལ་ཕྱག་འཚལ། །
རིགས་དང་དཀྱིལ་འཁོར་ཀུན་གྱི་གཙོ། །
སྐུ་བཞི་ཡེ་ཤེས་ལྔ་ཡི་བདག །
ཧེ་རུ་ཀ་དཔལ་རྡོ་རྗེ་འཆང༌། །
བསྟན་པའི་རྒྱལ་མཚན་ལ་ཕྱག་འཚལ། །
སྐུ་གསུམ་གསང་མཛོད་རྒྱ་མཚོ་ཆེའི། །
ཡང་བཅུད་སྙིང་ཏིག་ཡིད་བཞིན་ནོར། །
གཙུག་འཆང་ལྷ་དབང་རྫོགས་ཆེན་པ། །
བསྟན་འཛིན་བཟང་པོ་ལ་ཕྱག་འཚལ། །
གང་གི་ཐུགས་བཅུད་བདུད་རྩིའི་གཏེར། །
བློ་མཆོག་རིན་ཆེན་བུམ་ནང་དུ། །
ཡོངས་གཏམས་འགྲོ་ཀུན་སྨིན་མཛད་པའི། །
ཀུན་བཟང་གཞན་ཕན་ལ་ཕྱག་འཚལ། །
སྙིང་ཐིག་བརྒྱུད་པའི་ཕྱག་འཚལ་ཁ་སྐོང་དཔའ་བོ་ལས་རབ་རྩལ་གྱིས་མཛད་པ་ལ་ཤོ་ལོ་ཀ་རྗེས་མ་གཉིས་གསབ་བསྣན་བྱས་པའོ། །
ཡང་ན་ཉེ་བརྒྱུད་ཁྱད་པར་བ་ནི་ཀུན་མཁྱེན་སྣ་ཚོགས་རང་གྲོལ་གྱི་འཕྲོར།
མཁྱེན་བཟང་ཀུན་གསལ་ལམ་ཆེན་དུ། །
བྱམས་བརྩེའི་འོད་སྟོང་སྤྲོ་བའི་ཟེར། །
གདུལ་བྱའི་པད་ཚལ་རྒྱས་པའི་གཉེན། །
འཇིགས་མེད་གླིང་པ་ལ་ཕྱག་འཚལ། །
གང་གི་ཐུགས་བཅུད་བདུད་རྩིའི་གཏེར། །
སོགས་སོ། །
གཞན་ཡང་ཕྱོགས་བཅུའི་སངས་རྒྱས་དང༌། །
དཀྱིལ་འཁོར་ལྷུན་གྲུབ་བྱང་ཆུབ་སེམས། །
ཆོས་དང་འཕགས་པའི་ཚོགས་མཆོག་ལ། །
རབ་ཏུ་གུས་པས་ཕྱག་འཚལ་ལོ། །
སྐུ་གཟུགས་མཆོད་རྟེན་ལ་སོགས་པ། །
འགྲོ་བའི་བསོད་ནམས་ཞིང་གི་མཆོག །
མ་ལུས་ཇི་སྙེད་ཐམས་ཅད་ལ། །
ཀུན་ནས་དང་བས་ཕྱག་འཚལ་ལོ། །
འཁོར་འདས་ཀུན་གྱི་བྱང་ཆུབ་སེམས། །
བླ་མེད་འོད་གསལ་སྙིང་པོ་ནི། །
བདེ་གཤེགས་སྙིང་པོའི་ཁམས་མཆོག་ལ། །
ངོ་མཚར་ཆེན་པོས་ཕྱག་འཚལ་ལོ། །
ཐར་པའི་ལམ་དུ་ཞུགས་རྣམས་དང༌། །
དཀོན་མཆོག་སྒྲ་དབྱངས་ཐོས་སོ་འཚལ། །
སེམས་ཅན་ཀུན་གྱི་རིགས་ཀུན་ལའང༌། །
རྣམ་གྲོལ་སླད་དུ་ཕྱག་འཚལ་ལོ། །
སྣང་སྲིད་སྣོད་བཅུད་ཐམས་ཅད་ཀུན། །
ཡེ་ནས་ལྷུན་མཉམ་སངས་རྒྱས་ཞིང༌། །
གདོད་ནས་རང་བཞིན་རྣམ་དག་པས། །
གཉིས་མེད་ངང་དུ་ཕྱག་འཚལ་ལོ། །
དངོས་དང་ཡིད་ལས་བྱུང་བ་ཡི། །
ཕྱི་ནང་གསང་བའི་མཆོད་སྤྲིན་འདི། །
དཔག་ཡས་ནམ་མཁའི་དབྱིངས་ཁྱབ་པས། །
མཆོད་འོས་ཀུན་ལ་མཆོད་པར་བགྱི། །
རང་བཞིན་མཉམ་པའི་མཆོད་ཆེན་པོ། །
མཁའ་མཉམ་དྲི་མ་མེད་པ་ཡིས། །
རྒྱལ་བ་ཀུན་ལ་རབ་མཆོད་ཅིང༌། །
དགྱེས་མཉམ་བྱང་ཆུབ་མཆོག་ཆེན་མཆོད། །
བདག་གི་ལུས་དང་ལོངས་སྤྱོད་དང༌། །
དགེ་བ་ཀུན་གྱི་དངོས་རྣམས་ཀྱིས། །
འགྲོ་ཀུན་ཡོངས་མཆོད་སེམས་ཅན་ཀུན། །
ཡོངས་གྲོལ་ཡེ་ཤེས་མཆོད་པས་མཆོད། །
ཕྱོགས་བཅུའི་སངས་རྒྱས་ཞིང་རྣམས་སུ། །
སངས་རྒྱས་སེམས་ཅན་གནས་ཀྱི་བར། །
བདག་གི་ཡིད་བཞིན་མཆོད་སྤྲིན་གྱིས། །
རྒྱུན་མི་འཆད་པའི་མཆོད་སྤྲིན་ཤོག །
ལུས་དང་ངག་ཡིད་སྒྲིབ་པ་ཀུན། །
མཆོད་འོས་རྣམས་ཀྱི་སྤྱན་སྔར་བཤགས། །
སླན་ཆད་རབ་ཏུ་འགྱོད་སེམས་ཀྱིས། །
སྲོག་གི་སླད་དུའང་མི་བགྱིའོ། །
ཉན་ཐོས་བྱང་ཆུབ་སེམས་དཔའ་དང༌། །
གསང་སྔགས་རྡོ་རྗེ་ཐེག་པ་ཡི། །
སྡོམ་པ་གསུམ་དང་འགལ་གྱུར་པ། །
ཐམས་ཅད་རབ་ཏུ་བཤགས་པར་བགྱི། །
ལུས་དང་ངག་དང་ཡིད་སྒོ་ནས། །
སྐུ་དང་གསུང་དང་ཐུགས་རྡོ་རྗེ། །
གསང་བ་གསུམ་དང་འགལ་གྱུར་པ། །
ཐམས་ཅད་མ་ལུས་བཤགས་པར་བགྱི། །
ཤེས་དང་མི་སྤང་དང་དུ་བླང༌། །
སྒྲུབ་དང་སྤྱད་པ་ལྔ་ལྔ་སྟེ། །
རྩ་བ་ཡན་ལག་ཉམས་ཆག་ཀུན། །
གནོང་འགྱོད་ཆེན་པོས་སོ་སོར་བཤགས། །
བདག་ནི་མི་མཁས་གཏི་མུག་པས། །
འཁོར་བ་ངན་སོང་རྒྱུར་གྱུར་ཏེ། །
ཐར་པར་བསྒྲིབས་པ་གྱུར་ཏོ་འཚལ། །
ཐམས་ཅད་བཤགས་ཀྱིས་དག་གྱུར་ཅིག །
མཁའ་མཉམ་ཡངས་པ་ཆེན་པོའི་ངང༌། །
མ་ལུས་རང་བཞིན་རྣམ་དག་པ། །
སྤང་བླང་མེད་པའི་བྱང་ཆུབ་མཆོག །
ཆོས་ཉིད་དབྱིངས་སུ་རྫོགས་གྱུར་ཅིག །
རྒྱལ་བ་ཀུན་དང་སེམས་ཅན་གྱིས། །
དགེ་བ་ཀུན་ལ་ཡི་རང་ཞིང༌། །
འགྲོ་ཀུན་བསམ་པ་ཇི་བཞིན་དུ། །
ཆོས་ཀྱི་འཁོར་ལོ་བསྐོར་བར་བསྐུལ། །
རྒྱལ་དང་རྒྱལ་སྲས་བྱང་ཆུབ་སེམས། །
འགྲོ་བའི་བླ་མ་མཆོག་ཀུན་གྱིས། །
མ་ལུས་སེམས་ཅན་གནས་ཀྱི་བར། །
རྣམ་གྲོལ་མཛད་པར་གསོལ་བ་འདེབས། །
སྐུ་ཚེ་ལྷུན་པོ་ལྟར་བརྟན་ཞིང༌། །
རི་དབང་རྒྱལ་པོ་ལྟར་བཞུགས་ནས། །
ནམ་མཁའ་མཉམ་པའི་འགྲོ་བ་རྣམས། །
སྲིད་ནས་ཞི་བར་དྲང་དུ་གསོལ། །
ལས་དང་ཉོན་མོངས་རྒྱ་མཚོ་འདིར། །
དབང་མེད་བྱིང་བའི་འགྲོ་བ་རྣམས།
ཁྱེད་ཀྱི་ཐུགས་རྗེའི་གྲུ་ཆེན་གྱིས། །
ཡོངས་སུ་གྲོལ་བར་མཛད་དུ་གསོལ། །
སྡུག་བསྔལ་ཀུན་འབྱུང་མེ་ཚོགས་ཀྱིས། །
ཡོངས་སུ་གདུངས་བ་ཞི་བར་མཛོད། །
རྟེན་འབྲེལ་བཅུ་གཉིས་ཤིང་རྟ་ཡི། །
འཕང་ལོ་འདྲ་བ་གཞིག་ཏུ་གསོལ། །
ཚུལ་མིན་ཡིད་བྱེད་ཀྱིས་སྤྲུལ་པའི། །
སྤྲོས་པའི་བྱ་བ་གཞོམ་པ་དང༌། །
དོན་མེད་འཇིག་རྟེན་བྱ་བ་ལས། །
བདག་གི་ཡིད་ནི་བཟློག་ཏུ་གསོལ། །
ཉིན་དང་མཚན་མོ་དུས་ཀུན་ཏུ། །
སྡིག་སེམས་ཡིད་ལ་མི་འགྱུ་ཞིང༌། །
ཐར་པའི་དགེ་ལ་རབ་བརྩོན་པས། །
བྱང་ཆུབ་ཐོབ་པར་མཛད་དུ་གསོལ། །
རང་གཞན་དོན་གཉིས་ལྷུན་གྲུབ་ཕྱིར། །
ཐོས་བསམ་སྒྲུབ་པ་ལྷུར་ལེན་ཅིང༌། །
ནོར་བདུན་ཡོན་ཏན་ཕུན་ཚོགས་ཏེ། །
རྟག་ཏུ་གཞན་ལ་ཕན་བརྩོན་ཤོག །
བདག་ནི་དེང་ནས་དུས་ཀུན་ཏུ། །
འགྲོ་ཀུན་ཉེར་འཚོའི་གཞིར་གྱུར་ཏེ། །
མཐོང་ཐོས་དྲན་རེག་གྱུར་པ་ཀུན། །
བླ་མེད་བྱང་ཆུབ་ཐོབ་པར་ཤོག །
འགའ་ཞིག་ཁྲོའམ་དམོད་ཀྱང་རུང༌། །
དེ་ཡང་བྱང་ཆུབ་རྒྱུར་གྱུར་ཅིག །
བདག་ལ་བརྟེན་ནས་གཞན་དག་གི །
སྡིག་ཀུན་ཟད་པ་ཉིད་གྱུར་ཅིག །
སེམས་ཅན་མ་ལུས་གནས་ཀྱི་བར། །
བདག་གིས་བརྩོན་པས་དོན་བྱེད་ཅིང༌། །
ཐམས་ཅད་འཁོར་བ་ལས་སྒྲོལ་ནས། །
བདག་གིས་བྱང་ཆུབ་ཐོབ་པར་ཤོག །
འོད་གསལ་རྡོ་རྗེ་སྙིང་པོའི་ལམ། །
སྣང་བ་བཞི་པོ་མཐར་ཕྱིན་ནས། །
འཕོ་བ་ཆེན་པོའི་ལུས་བཟུང་སྟེ། །
གཞན་དོན་མཐའ་ཡས་སྤྱོད་པར་ཤོག །
བདག་ལ་བརྟེན་པའི་འགྲོ་བ་ཀུན། །
ཚེ་འདི་ཉིད་དམ་བར་དོ་འམ། །
ཕྱི་མ་སྦྲུལ་སྐུའི་ཞིང་བགྲོད་དེ། །
ཐམས་ཅད་གདོད་མར་གྲོལ་བར་ཤོག །
བདག་གིས་བརྩོན་པ་མ་ལུས་ཀུན། །
སེམས་ཅན་ཀུན་གྱི་དོན་གྱུར་ཏེ། །
སྲིད་པའི་རྒྱ་མཚོ་རབ་བརྒལ་ནས། །
ཕྱམ་ཅིག་སངས་རྒྱས་འགྲུབ་པར་ཤོག །
སྙིང་ཏིག་བརྒྱུད་པའི་ཕྱག་འཚལ་བྱིན་རླབས་སྤྲིན་ཚོགས་ཞེས་བྱ་བ་ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་སྦྱར་བ་རྫོགས་སོ།། །།
ཆོས་ཚུལ་འདི་ནི་དྲི་མེད་འོད་ཟེར་ལ། །
སློབ་མ་དམ་པ་གཞོན་ནུ་སངས་རྒྱས་ཀྱིས། །
བསྐུལ་བའི་ངོར་བརྟེན་པདྨའི་དབེན་གནས་མཆོག །
ལྷ་རིང་བྲག་ཏུ་ལེགས་པ་བཀོད་པ་ཡིན། །
དགེའོ།་་་་ཐོག་མར་དགེ་བ། དགེའོ།་་་་བར་དུ་དགེ་བ། དགེའོ།་་་་ཐ་མར་དགེ་བ། ཅེས་ཀུན་ལ་འདྲེས་པའི་དོན་ཡིན་ནོ། །
