Prayer for this Life, Next and Bardos—Tibetan

༄༅། །འདི་ཕྱི་བར་དོ་གསུམ་དུ་སྐྱོབ་པའི་གསོལ་འདེབས།

ས་མཆོག་དཀྱིལ་འཁོར་མངོན་གྱུར་བཱི་མ་ལ། །

ཀུན་བཟང་ཆོས་སྐུའི་སྟོན་པ་ཀློང་ཆེན་པ། །

པདྨ་ལས་འབྲེལ་རྩལ་ལ་གསོལ་བ་འདེབས། །

འདི་ཕྱི་བར་དོ་གསུམ་ལ་ཐུགས་རྗེས་བཟུང༌། །

བར་དོ་དང་པོའི་འོད་གསལ་ཤར་བའི་ཚེ། །

ངོ་ཤེས་རྩལ་རྫོགས་བརྟན་པ་ཐོབ་ནས་ཀྱང༌། །

ཁྱད་ཆོས་དྲུག་ལྡན་དབྱིངས་སུ་བྱང་ཆུབ་ནས། །

གཞོན་ནུ་བུམ་སྐུར་བརྟན་པ་ཐོབ་པར་ཤོག །

རིག་རྩལ་ལོངས་སྐུའི་སྣང་ཆ་ཤར་བའི་ཚེ། །

མ་པང་བུ་འཇུག་ལྟ་བུའི་གདེང་ཐོབ་ཅིང༌། །

འོད་དང་རིག་པ་འཇུག་པའི་གནད་མཐོང་ནས། །

ལོངས་སྤྱོད་རྫོགས་པའི་སྐུ་རུ་སངས་རྒྱས་ཤོག །

རྣམ་སྨིན་སྲིད་པ་བར་དོ་ཤར་བའི་དུས། །

མ་སྒོམ་སངས་རྒྱས་ཆོས་ལྔའི་ལམ་བརྟེན་ནས། །

རྣམ་གྲོལ་དབུགས་ཆེན་འབྱིན་པའི་ཞིང་ཁམས་སུ། །

སྐྱེ་བ་གཅིག་གིས་སངས་རྒྱས་ཐོབ་པར་ཤོག །

ཅེས་པའང་ཚུལ་ཁྲིམས་དཔལ་མོའི་ངོར་པདྨ་ལས་འབྲེལ་རྩལ་གྱིས་སྤེལ་བ་དགེའོ།།