Essential Advice—Tibetan

༄༅། །ཞལ་གདམས་སྙིང་པོ་བཞུགས་སོ། །

ཨོཾ་སྭསྟི།
མཚན་ཙམ་བརྗོད་ཀྱང་དུཿཁའི་འཁྲུལ་འཁོར་འཇིག །
གསོལ་འདེབས་ཐར་པའི་ལམ་ལ་ཡོངས་སྦྱོང་མཛད། །
མཚུངས་མེད་བླ་མ་པད་འབྱུང་བདེ་བ་ཆེ། །
བདག་གི་བླ་མ་ཡིན་ནོ་གུས་ཕྱག་འཚལ། །

སྐལ་ལྡན་ཐར་འདོད་བདག་དང་ལས་མཐུན་པ། །
ཡོད་ན་ཁོ་བོའི་སྙིང་གི་གཏམ་འདི་ཉོན། །
དལ་འབྱོར་འདི་ནི་ཤིན་ཏུ་རྙེད་དཀའ་བ། །
ཨུ་དུམྭ་ར་ལྟ་བུར་རབ་ཏུ་དཀོན། །

ནམ་འཆི་ཆ་མེད་ཚེ་ལ་ངེས་མེད་པ། །
བར་སྣང་གློག་ལྟར་སྐད་ཅིག་འགྱུར་ནས་འགྲོ། །
རྒྱུ་འབྲས་ལས་འདི་ནམ་ཡང་མི་བསླུ་བས། །
དགེ་སྡིག་སྤང་བླང་ལས་ལ་མཁས་པར་བྱོས། །

ཐར་པའི་མཐུན་འཇུག་སངས་རྒྱས་གོ་འཕང་སྟེ། །
དེ་ཡི་མཐུན་འཇུག་སྔགས་ཀྱི་ལམ་ཡིན་ལ། །
དམ་ཚིག་ཆོས་ཀྱི་སྲོག་རྩ་དམར་པོས་གྲགས། །
འདི་དག་ཀུན་ལ་གཅེས་པའི་ཞལ་གདམས་ཡིན། །

ཉམས་ལེན་སྙིང་པོ་་གནས་ལུགས་ཕྱག་རྫོགས་ཡང་། །
རང་གི་སེམས་ཀྱི་ངོ་བོ་རིག་པ་ཉིད། །
རང་ངོ་རང་གི་ཤེས་ལས་གཞན་པ་མེད། །

དེ་ཡང་སེམས་ཉིད་ངོ་བོ་འདི་ལྟ་ཞེས། །
དཔེ་གཟུགས་མཚན་ཉིད་བརྗོད་པའི་ཡུལ་མ་གྲུབ། །
མེད་དོ་ཞེས་ན་འཁོར་འདས་ཐམས་ཅད་འཆར། །
ཡོད་དོ་ཞེས་ནི་མཛུག་ཏུ་འཛུགས་པ་མེད། །

དེ་ནི་སེམས་ཉིད་གདོད་མའི་གཤིས་ལུགས་ཏེ། །
གཤིས་ལུགས་དེ་ལས་ཚོལ་རྒྱུ་གཞན་ནི་མེད། །
དེ་ཀ་མ་ཡེངས་རང་ངོ་ཤེས་བཞིན་བསྐྱོང་། །
ཡང་དག་དོན་ལ་བསྐྱོང་བྱ་བསྐྱོང་བྱེད་མེད། །

འོན་ཀྱང་གཞི་ལམ་འོད་གསལ་མ་འདྲེས་བར། །
མ་ཡེངས་དྲན་པས་སངས་རྒྱས་ཀུན་གྱི་ལམ། །
ཡིན་ནོ་ཡིན་ངེས་དེས་ན་དྲན་པ་བསྐྱོང་། །

དེ་ཡང་བློ་འདས་ལྟ་བའི་མཐར་ཐུག་ཡིན། །
དམིགས་གཏད་མེད་པ་བསྒོམ་པའི་མཐུན་འཇུག་ཡིན། །
མ་ཡེངས་དྲན་པ་སྤྱོད་པའི་མཐུན་འཇུག་ཡིན། །
རེ་དོགས་མེད་པ་འབྲས་བུའི་ངོ་བོ་ལགས། །

མང་པོ་བརྗོད་ན་ཟད་པའི་མཐའ་མེད་ཡང་། །
མདོར་བསྡུས་སྙིང་གཏམ་དེས་ཀྱང་ཕན་ཐོགས་འགྱུར། །
དེ་སྐད་ལྷོ་ཡི་གཏེར་བསྟོན་ལས་འཕྲོ་གླིང་། །
གང་གི་གདུང་རིགས་དྲི་མ་མེད་པ་ལས། །
འཁྲུངས་པའི་སྔགས་འཆང་་པདྨ་ཚངས་དབྱངས་དང་། །
དབུས་གྱུར་ལྷོ་རྒྱུད་རྒྱལ་རིགས་བྱ་བ་ཡི། །
བློན་གྱུར་དད་གུས་བློ་གྲོས་ལང་ཚོ་ཅན། །
ཚེ་རིང་རྣམ་རྒྱལ་ཞེས་པར་ཕན་སླད་དུ། །
རྒྱལ་དབང་པདྨ་ཀ་རའི་ཕོ་ཉ་བ། །
རིག་པ་འཛིན་པ་ཚེ་དབང་ནོར་བུ་ཞེས། །
གངས་ཅན་རི་བོའི་ཁྲོད་དུ་གྲགས་པ་དེས། །
གཉལ་ཡུལ་ས་ཡི་ཐིག་ལེ་བྲ་གོར་དུ། །
སྐད་ཅིག་མ་ལ་བརྗོད་པར་བྱས་པ་སྟེ། །

ཚིག་འདི་མ་བརྗེད་རྟག་ཏུ་དྲན་བྱས་ན། །
ཐར་པ་མཆོག་གི་ལམ་ལ་འཛེག་པ་དང་། །
ཀུན་ཏུ་དགེ་་ལེགས་དཔལ་ལ་སྤྱོད་པར་ཤོག །

མངྒ་ལཾ།