Dorsem Ngön-ga Empowerment Extracts—Tibetan
༄༅། །རྡོ་རྗེ་སེམས་དཔའ་ལ་བརྟེན་པའི་བླ་མ་མཆོད་པའི་ཆོ་ག་གཞན་ཕན་གྱི་ཕྲིན་ལས་དང་བཅས་པ་བདེ་ཆེན་ལམ་བཟང་།
རྡོར་སེམས་གཙོ་བོ་ཁྱོད་ལ་འདུད། །
ཐར་ལམ་ཆེན་པོ་བདག་འདོད་དེ། །
དེ་ཉིད་དབང་དང་དམ་ཚིག་དང་། །
མགོན་པོ་དཔའ་བོར་སྐྱབས་སོང་ནས། །
ཐེག་ཆེན་ཁང་པར་གཞུག་པ་དང་། །
མཁྱེན་རབ་ཡེ་ཤེས་བདག་ལ་སྩོལ། །
ཧོཿ རྡོ་རྗེ་སློབ་དཔོན་སངས་རྒྱས་དཔལ༔
དུས་གསུམ་བཞུགས་ལ་ཕྱག་འཚལ་ལོ༔
མཆོག་གསུམ་བསྟེན་པའི་ཞིང་གྱུར་ལ༔
གཉིས་མེད་ཡིད་ཀྱིས་སྐྱབས་སུ་མཆི༔
དངོས་འབྱོར་ཡིད་ཀྱིས་རྣམ་སྤྲུལ་པའི༔
དག་པའི་མཆོད་པ་བཞེས་སུ་གསོལ༔
དངོས་གྲུབ་ཆུ་བོ་གཅོད་པའི་གེགས༔
ཉེས་བྱས་མ་ལུས་བཤགས་པར་བགྱི༔
ཕྱོགས་བཅུ་འཁོར་གསུམ་དག་པའི་ཆོས༔
མ་ཆགས་སྤྱོད་ལ་རྗེས་ཡི་རང་༔
དག་པའི་མཐའ་བཞི་དྲི་མ་མེད༔
རྫོགས་པའི་བྱང་ཆུབ་སེམས་བསྐྱེད་དོ༔
བདེ་གཤེགས་དབང་ཕྱུག་སེམས་ཅན་ལ༔
དགོས་པ་གསུམ་ཕྱིར་ལུས་འབུལ་ལོ༔
ཚེ་རབས་བགྲངས་པའི་ལས་རྣམས་ཀུན༔
བསྡུས་ཏེ་བྱང་ཆུབ་ཆེན་པོར་བསྔོ༔
བདེ་བར་གཤེགས་པ་ཁྱེད་ཅི་འདྲ། །
དེ་འདྲ་ཁོ་ནར་བདག་འགྱུར་ཤོག །
སྤྱོད་པ་རྨད་བྱུང་བསམ་ཡས་པ། །
འགྲོ་ལ་ཕན་ཕྱིར་བདག་གིས་སྤྱད། །
བྱང་ཆུབ་སེམས་མཆོག་དམ་པ་དང་། །
སྐུ་གསུང་ཐུགས་ཀྱི་ཕྱག་རྒྱ་ནི། །
སྲོག་གི་ཕྱིར་ཡང་མི་གཏོང་ན། །
རྡོ་རྗེ་རྒྱལ་པོས་བྱིན་བརླབ་མཛོད། །
བྱིན་རླབས་ཆར་འབེབས་དངོས་བརྒྱུད་བླ་མ་དང་། །
གྲུབ་གཉིས་མཆོག་སྩོལ་ཡི་དམ་དཀྱིལ་འཁོར་ལྷ། །
ཕྲིན་ལས་མངའ་བདག་མཁའ་འགྲོ་ཆོས་སྐྱོང་སོགས། །
སྐྱབས་གནས་རྒྱ་མཚོའི་སྤྱི་གཟུགས་ཡེ་ཤེས་སྐུ། །
རྩ་བའི་བླ་མ་དཔལ་ལྡན་རྡོ་རྗེ་སེམས། །
རིགས་ཀུན་འདུས་པའི་བདག་ཉིད་ཆེན་པོ་ལ། །
ཕྱག་འཚལ་སྐྱབས་མཆི་ལུས་དང་ལོངས་སྤྱོད་འབུལ། །
སྡོམ་གསུམ་དམ་ཚིག་ཉམས་པ་མཐོལ་ལོ་བཤགས། །
བྱང་ཆུབ་བསོད་ནམས་མཆོག་ལ་རྗེས་ཡི་རང་། །
ཐེག་པ་རྒྱ་མཚོའི་ཆོས་འཁོར་བསྐོར་དུ་གསོལ། །
རྟག་པ་རྒྱུན་གྱི་འཁོར་ལོར་བཞུགས་གསོལ་འདེབས། །
དགེ་ཚོགས་འཁོར་གསུམ་ཡོངས་དག་ཆེན་པོར་བསྔོ། །
ཁྱེད་ཤེས་མོས་གུས་གདུང་བས་གསོལ་བ་འདེབས། །
སྐུ་མཆོག་རྡོ་རྗེ་མཛོད་སྤུའི་དཀྱིལ་འཁོར་ནས། །
གདན་གསུམ་ཚང་བའི་དཀྱིལ་འཁོར་མངོན་སྤྲུལ་ཏེ། །
བུམ་དབང་བསྐུར་ནས་ཕུང་ཁམས་སྐྱེ་མཆེད་སོགས། །
ཡོངས་གྲུབ་གདན་གསུམ་འཁོར་ལོར་སྨིན་བྱིན་རློབས། །
ཨེ་ཝྃ་ཟུང་འཇུག་རོལ་པའི་དཀྱིལ་འཁོར་ནས། །
ཞུ་བ་སྐུ་དང་བདེ་བ་གསུང་རྡོ་རྗེ། །
མི་རྟོག་ཐུགས་ཀྱི་རྡོ་རྗེའི་རང་བཞིན་ནི། །
བྱང་ཆུབ་སེམས་དང་རྣམ་ཐར་གསུམ་ལྡན་གྱི། །
ཚོགས་མཆོག་དབང་རྣམ་གསུམ་མངོན་བྱས་ཏེ། །
རླུང་ཡིད་ཤེས་བྱའི་སྒྲིབ་པ་དྷཱུ་ཏིའི་དབྱིངས། །
གཅིག་ཅར་བཅོམ་ནས་དགའ་མཆོག་ཁྱད་པར་གྱི། །
དཔེ་དོན་ལྷན་སྐྱེས་ཡེ་ཤེས་མཐོང་སྒོམ་ལམ། །
སློབ་པ་མིན་པ་ཡེ་ཤེས་བླ་མའི་དབྱིངས། །
བདེ་གཤེགས་ཁམས་ཀྱི་ཡོན་ཏན་མཐར་ཕྱིན་སྩོལ། །
ཨོཾ་ཨཱཿགུ་རུ་བཛྲ་སཏྭ་རུ་ལུ་རུ་ལུ་ཧཱུྃ་བྷྱོ་ཧཱུྃཿ
གཙོ་བོས་ཇི་ལྟར་བཀའ་བསྩལ་པ། །
དེ་དག་ཐམས་ཅད་བདག་གིས་བགྱི། །
དེང་ནས་བརྩམས་ཏེ་བདག་བྲན་དུ། །
ཁྱེད་ལ་བདག་ནི་འབུལ་ལགས་ན། །
ཁྱེད་ཀྱི་སློབ་མར་བཟུང་བ་དང༌། །
ཆ་ཤས་ཀྱང་ནི་སྤྱད་དུ་གསོལ། །
