Daily Practice of Vajrasattva—Tibetan

༄༅། །རྡོར་སེམས་རྒྱུན་ཁྱེར།

སྐྱབས་སེམས་སྤྱི་ལྟར་དང་།

ཨཱཿ རྡོ་རྗེ་སེམས་དཔའ་ནམ་མཁའ་ཆེ།  །

བཟུང་བས་མི་ཟིན་ཆུ་ཟླ་འདྲ།  །

ཀུན་ཏུ་བཟང་པོའི་རོལ་པ་ལས།  །

ཐབས་ཤེས་ཟུང་འཇུག་རྩ་བའི་ལྷ།  །

སེམས་དཔའ་དཀར་པོ་རྡོར་དྲིལ་བསྣམས།  །

རང་འོད་སྙེམས་མ་གྲི་ཐོད་འཁྱུད།  །

ཞབས་གཉིས་རྡོ་རྗེ་སྐྱིལ་ཀྲུང་བཞུགས།  །

ཐུགས་ཀར་ཟླ་བའི་དཀྱིལ་འཁོར་སྟེང་།  །

ཧཱུྃ་གི་མཐའ་མར་སྔགས་ཀྱིས་བསྐོར།  །

འོད་འཕྲོས་འཕགས་མཆོད་འགྲོ་སྒྲིབ་སྦྱངས།  །

ཚུར་འདུས་མཆོག་ཐུན་དངོས་གྲུབ་ཐོབ།  །

རྒྱུད་དག་བྱིན་གྱིས་བརླབས་པར་གྱུར།  །

ཡིག་བརྒྱ་བཟླ།

དགེ་བ་འདི་ཡི་མྱུར་དུ་བདག  །

རྡོ་རྗེ་སེམས་དཔའ་འགྲུབ་གྱུར་ནས།  །

འགྲོ་བ་གཅིག་ཀྱང་མ་ལུས་པ།  །

དེ་ཡི་ས་ལ་འགོད་པར་ཤོག  །

སོགས་བསྔོ་སྨོན་བྱ།

མངྒ་ལཾ།  །།  ཕྱག་བྲིས་ལས་ཞལ་བཤུས།།