A Reminder to Myself—Tibetan

༄༅། །རང་གིས་རང་ལ་གསོས་བཏབ་པ།

ཕ་བླ་མའི་ཞབས་ལ་ཕྱག་འཚལ་ལོ། །
དུས་རྣམ་པ་ཀུན་ཏུ་ཐུགས་རྗེས་ཟུངས། །
ལུས་འབྱུང་བཞི་འདུས་པའི་གཡར་ཁང་འདི། །
སྐད་ཅིག་གིས་མི་རྟག་མྱུར་དུ་འཇིག །
ཚེ་མི་རྟག་རྩྭ་རྩེའི་ཟིལ་པ་འདྲ། །
དགྲ་འཆི་བདག་བདུད་པོ་ངམ་ནག་དེས། །
དུས་ད་ལྟ་མདུན་ནས་བསུ་ཡིན་འདུག །
ལས་མི་དགེའི་རྣམ་སྨིན་ཁུར་ཆེན་དེ། །
སེམས་རྣམ་ཤེས་ཀྱི་སྟེང་དུ་ཁྱེར་ནས་འགྲོ། །
གྲོགས་མཛའ་བ་རྣམས་ཀྱང་ཤུལ་དུ་བཞག །
ཕུང་གསོགས་པའི་ནོར་ཡང་ཁྱེར་དབང་མེད། །
གར་འདི་འགྲོ་མེད་པའི་ཡད་ཡུད་དུ། །
སྲིད་པའི་ལས་རླུང་དྲག་པོས་བདས། །
གཤིན་རྗེའི་འཁྲུལ་སྣང་དཔག་ཏུ་མེད། །
དུག་གསུམ་གྱི་གཡང་ས་ཡ་རེ་ང་། །
ངན་སོང་གི་སྡུག་བསྔལ་བཟོད་ཐབས་མེད། །
དེ་ད་ལྟ་བསམ་ན་སྙིང་རྩ་འདར། །
བསམ་ཞིང་བསམ་ཞིང་བླ་མ་དྲན། །
ལས་དེ་འདྲ་ཤར་ཚེ་བླ་མ་ལས། །
སྐྱབས་གཞན་ན་མེད་དོ་ཐུགས་རྗེས་ཟུངས། །
ཕ་གཅིག་བླ་མ་འབོད་དོ་བརྩེ་བས་དགོངས། །
ལས་ངན་བདག་ལ་ཐུགས་རྗེས་གཟུང་དུ་གསོལ། །
བློ་སྣ་ཆོས་ལ་འགྱུར་བར་བྱིན་གྱིས་རློབས། །
བླ་མ་མཁྱེན། །

ཅེས་པའང་ཆུ་ལུག་ཟླ་༤ ཚེས་༡༥ ཉིན་རང་གིས་རང་ལ་གསོས་བཏབ་པ་སྟེ། འཇམ་དབྱངས་ཆོས་ཀྱི་བློ་གྲོས་པས་སོ།། །།