In Praise of Yangleshö—Tibetan

༄༅། །བལ་ཡུལ་ཡང་ལེ་ཤོད་ཀྱི་གནས་བསྟོད་བཞུགས།

ཤྲཱི་བཛྲ་ཧེ་རུ་ཀ་ན་མོ། །

འབར་བའི་སྐུ་ནི་གཅིག་ཏུ་འཁྱིལ། །

ཡེ་ཤེས་གྲུབ་པའི་ཕྱག་རྒྱ་ཆེ། །

གདོད་ནས་གྲུབ་པའི་འོག་མིན་ནི། །

ས་འདིར་འཕོས་པ་རྨད་དུ་བྱུང༌། །

རྡོ་རྗེའི་ལུས་ཀྱི་བཀོད་པ་ནི། །

ཕྱི་རོལ་དངོས་པོའི་ཆོས་སུ་ཤར། །

དཔྱད་ལེགས་རྣམ་ཤེས་དག་པ་ཡི། །

བཀྲ་ཤིས་རྟགས་ཀྱི་མཚན་མས་སྤྲས། །

ཧཾ་དང་ཨ་ཐུང་སྙོམས་ཞུགས་ཀྱི། །

ཁ་སྦྱོར་རྟགས་སུ་ཤེལ་དཀར་རི། །

ནགས་ཚལ་སྟུགས་པོའི་རྣམ་པར་མཛེས། །

སྤྲུལ་པའི་འཁོར་ལོ་ས་འཛིན་ནི། །

ཟླུམ་པོ་ཐིག་ལེ་གཅིག་ཏུ་འཁྱིལ། །

དྲན་པ་རྣམ་བཀོད་དྭངས་བསིལ་རྫིང༌། །

རྔམ་ལ་རོ་དྲུག་འདོད་ཡོན་མཆོད། །

བདེ་སྐྱིད་ལྷ་མོའི་གར་གྱིས་རྩེན། །

ཨ་དོན་སྐྱེ་མེད་སྟོང་པའི་སྒྲ། །

སུ་རས་མྱོས་པའི་བརྟུལ་ཞུགས་ཀྱིས། །

དབང་ཆེན་རྔམས་པའི་སྒྲ་སྒྲོགས་པས། །

བདག་འཛིན་རུ་ཏྲ་རྣམ་གསུམ་གཞོམ། །

དཔལ་ཆེན་སྐུ་སྔགས་ཕྱག་མཚན་སོགས། །

ཕན་ཚུན་འགྲན་པ་བཞིན་དུ་བཀྲ། །

པདྨ་རྒྱལ་པོ་ཐོད་ཕྲེང་རྩལ། །

ཡང་དག་གྲུབ་པ་ཆེན་པོ་ཡི། །

སྲོད་ལ་བདུད་རྣམས་ཀཱི་ལས་བསྒྲལ། །

ཐོ་རངས་མངོན་པར་བྱང་ཆུབ་བརྙེས། །

དེ་ཡི་བྱིན་རླབས་སྒྲུབ་གནས་ཆེ། །

ས་ཆེན་འདི་ན་འགྲན་ཟླ་དབེན། །

ཕྱི་ནང་གསང་བའི་དེ་ཉིད་དང༌། །

ལེགས་སྦྱར་བཀོད་པའི་སྒྲ་དབྱངས་ཀྱིས། །

སྲིད་གསུམ་འགྲོ་བ་ཀུན་བསྒྲལ་ནས། །

གསང་བ་མཆོག་གི་གྲོང་འཇུག་ཤོག །

སླར་ཡང་ཆོས་གཏེར་བང་མཛོད་རྣམས། །

ཕ་ནོར་བུ་ཡིས་སྤྱོད་པ་དང༌། །

ས་གསུམ་རབ་དགའི་དབྱངས་སྒྲོགས་པས། །

འཛམ་གླིང་ཀུན་ཏུ་ཁྱབ་པར་ཤོག །

ཅེས་པའང་རྡོ་རྗེ་གཟི་འབར་རྩལ་གྱིས་སོ། །