Nyingtik Saldrön Empowerment—Tibetan
༄༅། །ཟབ་ལམ་སྙིང་ཐིག་གསལ་སྒྲོན་གྱི་དབང་ཆོག་བདུད་རྩིའི་བུམ་བཟང་ཞེས་བྱ་བ་བཞུགས་སོ། །
རང་རིག་བླ་མར་གུས་བཏུད་ནས། །
ཟབ་མོ་བླ་མའི་སྒྲུབ་པ་ཡི། །
དབང་བསྐུར་ཡེ་ཤེས་ཆུ་རྒྱུན་ནི། །
སྒྲུབ་པར་འདོད་པས་སྟེགས་བུ་ལ། །
མཎྜལ་ཆོས་འབྱུང་དམར་པོའི་དབུས། །
པད་འདབ་བཞི་དང་མཐའ་སྐོར་དུ། །
པད་ཕྲེང་རྡོ་རྭ་མེ་རིས་མཛེས། །
དེ་སྟེང་བུམ་པ་ཐོད་ཆང་དང་། །
མེ་ལོང་སྔགས་མཚན་མན་ཤེལ་བཤམས། །
ཕྱི་ནང་མཆོད་པ་ཚོགས་བྱས་ཏེ། །
རྣལ་འབྱོར་བདེ་བའི་སྟན་ལ་འདུག །
བླ་མའི་སྒྲུབ་པ་གཞུང་བསྲངས་ཤིང་། །
བུམ་ཐོད་དབྱངས་གསལ་རྟེན་སྙིང་གིས། །
བྱིན་གྱིས་བརླབས་ཤིང་ཚོགས་མཆོད་བྱ། །
སློབ་དཔོན་དགོངས་པ་གཡོ་མེད་ངང་། །
སྣོད་ལྡན་སློབ་མ་ཁྲུས་ནས་དབྱུངས། །
བགེགས་བསྐྲད་སྲུང་བའི་འཁོར་ལོས་བཅིང་། །
ངེས་འབྱུང་ཆོས་འཆད་སྤྲོ་བ་བསྐྱེད། །
མཎྜལ་ཕུལ་ལ་གསོལ་བ་གདབ། །
རྩ་གསུམ་རྒྱ་མཚོ་འདུས་པའི་དངོས། །
རྡོ་རྗེའི་བླ་མ་དགོངས་སུ་གསོལ། །
བདག་ཅག་སྐལ་ལྡན་བུ་རྣམས་ལ། །
སྙིང་པོ་དོན་གྱི་དབང་མཆོག་སྩོལ། །
གསོལ་བཏབ་གནང་བ་སྦྱིན་པ་ནི།
ཨེ་མ་སྐལ་ལྡན་རིགས་ཀྱི་བུ། །
དད་དང་དམ་ཚིག་མོས་ལྡན་ན། །
ཡང་གསང་བླ་མ་སྒྲུབ་པ་ཡི། །
སྙིང་པོ་དོན་གྱི་དབང་བསྐུར་སྦྱིན། །
དེ་ནས་རྒྱུད་སྦྱོང་རིམ་པ་ནི། །
དམ་ཆུ་སྦྱིན་ཅིང་དམ་བསྒྲགས་པ།
ཧོཿའདི་ནི་རྡོ་རྗེའི་དམ་ཚིག་ཆུ། །
བསྲུངས་ན་དངོས་གྲུབ་ཚེ་འདིར་ཐོབ། །
མ་བསྲུང་ཉམས་ན་དམྱལ་བར་ལྟུང་། །
དེ་བས་ཁེ་ཉེན་ཤེས་པར་གྱིས། །
བཛྲ་ས་མ་ཡ་ན་ར་ཀན། །
ཞེས་བརྗོད་རྡོ་རྗེ་སྤྱི་བོར་བཞག །
ཡེ་ཤེས་དབབ་ཕྱིར་ལུས་བསྲང་ཞིང་། །
རླུང་བཟུང་དམིགས་པ་རྩེ་གཅིག་གཏད།
བླ་མ་ཧེ་རུ་ཀར་གསལ་བའི། །
ཐུགས་ནས་མེ་འོད་འཕྲོས་པ་ཡིས། །
སློབ་མའི་ཕུང་ཁམས་བསྲེགས་ཤིང་སྦྱངས། །
དེ་ལས་སྐད་ཅིག་དྲན་རྫོགས་སུ། །
རྡོ་རྗེ་ཕག་མོ་སྐུ་མདོག་དམར། །
གྲི་གུག་ཐོད་ཁྲག་དོར་སྟབས་འགྱིང་། །
དར་དང་རིན་ཆེན་རུས་པས་བརྒྱན། །
ཐུགས་ཀར་བདེ་བའི་ཐིག་ལེ་ནི། །
དགའ་བ་འཁྱིལ་པ་དཀར་དམར་དབུས། །
བྃ་དང་ཡན་ལག་བཞི་ལ་ནི། །
ཧ་རི་ནི་སས་མཚན་པར་བསྒོམ། །
སྤྱི་བོར་བླ་མ་ཧེ་རུ་ཀ །
ཅང་ཏེ་ཐོད་པ་བསྣམས་པ་ནི། །
བདེ་བའི་ཉམས་དང་ལྡན་པར་གསལ། །
ཐུགས་ནས་འོད་འཕྲོས་ཡེ་ཤེས་པ། །
སྤྱན་དྲངས་དབྱེར་མེད་ཐིམ་པར་བསམ། །
ཡེ་ཤེས་འབེབ་པའི་སྔགས་ཀྱིས་དབབ། །
ཡེ་ཤེས་ཕེབས་པའི་རྟགས་བྱུང་ན། །
ཉམས་ནི་བྱུང་རྒྱལ་དག་ཏུ་བསྐྱང་། །
མ་ཕེབ་བླ་མར་མོས་གུས་བསྐྱེད། །
རྗེས་ཆགས་འོད་ཀྱིས་བསྐུལ་བྱས་ཏེ། །
སྙིང་གའི་དགའ་འཁྱིལ་གཡོན་དྲག་འཁོར། །
དགོངས་པས་གཟེར་ཞིང་དབྱིངས་རིག་བསྲེ།
ཛྙཱ་ན་བཛྲ་ཏིཥྛ་ས་མ་ཡ།
ཞེས་བརྗོད་རྡོ་རྗེ་རྒྱ་གྲམ་འཇོག །
དངོས་གཞིའི་དབང་བསྐུར་སྦྱིན་པ་ལ།
བླ་མའི་དཔྲལ་བའི་ཨོཾ་དཀར་ལས། །
ཨོཾ་དང་རང་འདྲ་དཔག་མེད་འཕྲོས། །
དཔྲལ་བར་ཐིམ་པས་ལུས་སྒྲིབ་དག །
བུམ་པའི་དབང་བསྐུར་ཐོབ་པར་བསམ། །
ཨོཾ་གྱི་གླུ་དབྱངས་བརྗོད་པ་དང་། །
བརྟན་བྱེད་བུམ་པའི་ཆུས་དབང་བསྐུར།
ཨོཾ། སྣོད་བཅུད་ཡོངས་རྫོགས་བུམ་པ་ན། །
རིག་འཛིན་རྒྱལ་བའི་དཀྱིལ་འཁོར་བཞུགས། །
སྐལ་ལྡན་ཁྱོད་ལ་བསྐུར་བ་ཡིས། །
ཕུང་ཁམས་ལྷ་སྐུར་སྨིན་པར་ཤོག །
བཛྲ་ཀ་ལ་ཤ་ཨ་བྷི་ཥིཉྩ་ཧཱུྃ།
བུམ་ཆུ་བླུད་ཅིང་གནས་བཞིར་གཏོར། །
དབང་དོན་ངོ་སྤྲོད་རྟོགས་པ་བརྗོད། །
དེ་ནས་གསང་བའི་དབང་བསྐུར་ནི།
བླ་མའི་མགྲིན་པའི་ཨཱཿ དམར་ལས། །
འོད་དམར་སྔགས་ཕྲེང་དཔག་མེད་འཕྲོས། །
མགྲིན་པར་ཐིམ་པས་ངག་སྒྲིབ་དག །
གསང་བའི་དབང་བསྐུར་ཐོབ་པར་དམིགས། །
ཨཱཿ ཡི་གླུ་དབྱངས་བསྒྲགས་པ་དང་། །
བྷནྡྷའི་བདུད་རྩི་སྦྱིན་བྱས་ཏེ།
ཨཱཿ རང་བྱུང་བྷནྡྷའི་སྣོད་ནང་དུ། །
བླ་མ་ཡབ་ཡུམ་སྙོམས་ཞུགས་པའི། །
བྱང་སེམས་བདུད་རྩིའི་རྒྱུན་དབང་བསྐུར། །
ངག་རླུང་དབུ་མར་ཐིམ་པར་ཤོག །
བྷོ་དྷི་ཙིཏྟ་ཨ་བྷི་ཥིཉྩ་ཧཱུྃ།
ཨ་ཧོ་མ་ཧཱ་སུ་ཁ་ཧོཿ
ཞེས་མྱོང་བདེ་སྟོང་ངང་ལ་བཞག །
དོན་ངོ་སྤྲོད་ཅིང་རྟོགས་པ་བརྗོད། །
ཤེར་དབང་ཕོ་ཉའི་དབང་མཆོག་ནི།
བླ་མའི་ཐུགས་ཀའི་ཧཱུྃཿསྔོན་ལས། །
འོད་སྔོན་ཕྱག་མཚན་ཚོགས་སྤྲོས་པས། །
སློབ་མའི་སྙིང་གར་ཐིམ་པ་དང་། །
ཡིད་སྒྲིབ་དག་ནས་ཤེར་དབང་ཐོབ། །
དམ་ཚིག་ཕྱག་རྒྱའི་རྟེན་མཚོན་པར། །
མེ་ལོང་སྔགས་ཀྱིས་མཚན་པ་གཏད། །
ཧཱུྃ་གི་གླུ་དབྱངས་སྒྲོགས་པ་དང་།
ཨེ་མ་ཧོཿ
མཆོག་ཏུ་བདེ་བ་ཆེ། །
བདེ་བ་འདི་ནི་རྨད་དུ་བྱུང་། །
སངས་རྒྱས་ཀུན་གྱིས་དགྱེས་རོལ་པའི། །
བདེ་མཆོག་ཐར་པ་སྤྱོད་པར་གྱིས། །
ས་མ་ཡ་ཧོཿ
ས་མ་ཡ་སྟྭཾཿ
ཨ་ནུ་རཱ་ག་ཡ་ཧོཿ
ཨ་ནུ་རཱ་ག་ཡ་མི།
ཛཿཧཱུྃ་བྃ་ཧོཿཛྙཱ་ན་བཛྲ་མ་ཧཱ་སུ་ཁ་ཨཏྨ་ཀོ྅ཧཾ།
ཞེས་བརྗོད་བདེ་བའི་ཡེ་ཤེས་སྐྱོང་། །
དོན་ངོ་སྤྲོད་ཅིང་དག་པ་བརྗོད། །
དེ་ནས་བཞི་པའི་དབང་བསྐུར་སྦྱིན།
བླ་མའི་ལྟེ་བའི་ཧོཿཡིག་ལས། །
འོད་ཟེར་སེར་པོ་གསེར་མདོག་དང་། །
བཻ་ཌཱུརྱ་མདོག་ནོར་བུ་སྤྲོས། །
སློབ་མའི་ལྟེ་བར་ཐིམ་པ་དང་། །
བཞི་པའི་དབང་ཐོབ་སྒྲིབ་དག་དམིགས། །
ཧོཿཡི་གླུ་ལེན་མན་ཤེལ་ཐོགས།
ཧོཿཤིན་ཏུ་རྣམ་པར་དག་པ་ཡི། །
ཡེ་ཤེས་མཆོག་གིས་ཀུན་ཏུ་ཁྱབ། །
མཚན་མཚོན་བརྗོད་པ་ལས་འདས་པའི། །
རང་བྱུང་ཡེ་ཤེས་ངོ་མཚར་ཆེ། །
དྷརྨ་དྷཱ་ཏུ་ཛྙཱ་ན་ཨ་ཏི་ཧོཿ
དབྱིངས་རིག་དབྱེར་མེད་ངང་དུ་བཞག །
དེ་ནས་རིག་པ་རྩལ་གྱི་དབང་། །
སློབ་དཔོན་དགོངས་པ་མི་གཡོའི་ངང་། །
ཐུགས་ཀར་ཨ་ཡིག་གསལ་བ་ལ། །
སློབ་མས་རྟོག་པ་ཐམས་ཅད་སྤངས། །
རིག་པ་དེ་ལ་གཏད་པ་དང་། །
ཨ་ཞེས་དགོངས་པའི་དྲོད་བསྐྱེད་དེ། །
ཕཊ་ཀྱིས་རིག་པའི་རྩལ་ཆེན་སྤར།
ཨ་ཧོཿསངས་རྒྱས་ཀུན་གྱི་གསང་བ་ཆེ། །
རང་བྱུང་རིག་པ་ལྷུན་གྱིས་གྲུབ། །
འོད་གསལ་ཆེན་པོའི་དགོངས་པ་ལ། །
མི་གཡོ་རྟག་ཏུ་མཉམ་པར་སྤྱོད། །
ཨ་ལ་ལ་ཧོཿ
ཞེས་བརྗོད་ལྟ་སྟངས་དབྱིངས་ལ་གཟིར། །
དོན་ངོ་སྤྲོད་ཅིང་རྟོགས་པ་བརྗོད། །
རྗེས་ལ་དམ་ཚིག་རྒྱ་ཡིས་གདབ།
ཧོཿའདི་ནི་གསང་བ་ཆེན་པོ་སྟེ། །
གསང་བ་གཞན་ལ་སྨྲ་མི་བྱ། །
འདས་ན་དམ་ཚིག་ཉམས་འགྱུར་ཞིང་། །
སྒྲུབ་པས་དངོས་གྲུབ་མཆོག་ཐོབ་འགྱུར། །
ཞེས་བསྒྲགས་དམ་ཚིག་ཁས་བླང་སོགས། །
དབང་རྗེས་རིམ་པ་སྤྱི་ལྟར་བྱ། །
ས་མ་ཡ།
ཞེས་པའང་མཆོག་སྤྲུལ་རིན་པོ་ཆེ་བཀྲ་ཤིས་དཔལ་འབྱོར་དང་། ཌཱ་ཀི་ཚེ་རིང་ཆོས་སྒྲོན། སྤར་རྐོ་ཆོས་འཕེལ་སོགས་ཀྱིས་ནན་ཏན་ཆེན་པོས་ཡང་ཡང་བསྐུལ་བས་རྐྱེན་བྱས་ཏེ། ཤིང་ལུག་ཟླའི་དཀར་ཕྱོགས་ཀྱི་དགའ་བ་དང་པོར་སྨྲས་རིམ་བཞིན་ཡི་གེའི་བྱེད་པོ་རང་སློབ་བློ་གྲོས་མཆོག་ལྡན་གྱིས་བགྱིས་པ་འདི་ཡང་དོན་དང་ལྡན་པར་གྱུར་ཅིག །སརྦ་མངྒ་ལཾ།། །།
