Bright Lamp of Definitive Meaning—Tibetan
༄༅། །བླ་མའི་རྣལ་འབྱོར་ངེས་དོན་གསལ་སྒྲོན་བཞུགས་སོ། །
རང་རིག་ཆོས་སྐུའི་བླ་མ་ནི། །
མཚོན་པ་གཟུགས་ཀྱི་སྐུར་ཤར་བ། །
དཔལ་ལྡན་རྩ་བའི་བླ་མ་ཉིད། །
རྒྱུན་དུ་ལམ་བྱེད་རྣལ་འབྱོར་དབྱེ། །
དེ་ལ་སྔོན་དངོས་རྗེས་གསུམ་གྱི། །
དང་པོ་སྐྱབས་འགྲོ་སེམས་བསྐྱེད་བྱ།
ཨཿ ཡེ་ནས་གྲོལ་བ་རང་རིག་པ། །
ཆོས་ཀྱི་སྐུ་ལ་སྐྱབས་སུ་མཆི། །
བཏང་བཞག་བྲལ་བའི་བྱང་ཆུབ་སེམས། །
རང་ངོ་ཤེས་པས་སེམས་བསྐྱེད་དོ། །
དངོས་གཞི་ལ།
ཨཿ ཆོས་ཀུན་ཀ་དག་སྟོང་ཆེན་མཁར། །
ལྷུན་གྲུབ་འོད་ལྔ་འཁྲིགས་པའི་དབུས། །
སེང་ཁྲི་པད་ཟླ་ཉི་མའི་སྟེང་། །
རྩ་བའི་བླ་མ་ཧེ་རུ་ཀཿ
རྣལ་འབྱོར་སྤྱོད་པའི་ཆ་བྱད་ཅན། །
སྐུ་མདོག་དམར་སྨུག་ཁྲོ་ཆགས་ཉམས། །
རྡོ་རྗེ་དང་ནི་དྲིལ་བུ་བསྣམས། །
བདེ་ཆེན་ཌཱ་ཀི་དཀར་དམར་མདངས། །
གྲི་ཐོད་འཛིན་དང་མཉམ་སྦྱོར་བའི། །
གནས་གསུམ་ཡིག་འབྲུ་གསུམ་གྱིས་མཚན། །
དམ་ཡེ་གཉིས་མེད་ཆེན་པོར་བཞུགས། །
ཨཿ སྲིད་གསུམ་བླ་མའི་རོལ་པ་ལ། །
དག་མཉམ་ལྟ་བའི་ཕྱག་གིས་འདུད། །
ཅིར་སྣང་མཆོད་པའི་རྒྱན་དུ་ཤར། །
སྡིག་ལྟུང་སྐྱེ་མེད་ངང་དུ་བཤགས། །
མ་བྱས་དགེ་ལ་རྗེས་ཡི་རང་། །
ལྷུན་གྲུབ་ཆེན་པོའི་ཆོས་འཁོར་བསྐོར། །
འཕོ་འགྱུར་མེད་པར་བཞུགས་གསོལ་འདེབས། །
དགེ་ཚོགས་གཞོན་ནུ་བུམ་སྐུར་བསྔོ།
སྤྲོ་ན་མཎྜལ་མཆོད་པ་འབུལ།
ཆེ་མཆོག་རིག་འཛིན་གྲུབ་པ་ཆེ། །
འཕོ་ཆེན་བི་མ་ལ་མི་ཏྲ། །
དགེ་བའི་བཤེས་ཀྱི་གཟུགས་བསྒྱུར་བ། །
མཁྱེན་བརྩེའི་དབང་པོར་གསོལ་བ་འདེབས། །
ཕྲིན་ལས་རྣམ་བཞི་ལྷུན་གྱིས་གྲུབ། །
མཁྱེན་ནུས་བརྩེ་བའི་རྩལ་ཆེན་རྫོགས། །
རིག་འཛིན་གྲུབ་པའི་དཔའ་བོ་ཆེ། །
ཡེ་ཤེས་རྡོ་རྗེར་གསོལ་བ་འདེབས། །
ཨོཾ་ཨཱཿགུ་རུ་པདྨ་ཛྙཱ་ན་བཛྲ་སརྦ་སིདྡྷི་ཧཱུྃ།
ཞེས་པའི་མཚན་སྔགས་གསོལ་འདེབས་བྱ།
གནས་གསུམ་རྡོ་རྗེའི་འབྲུ་གསུམ་ལས། །
སྐུ་དང་སྔགས་ཕྲེང་ཕྱག་མཚན་ཚོགས། །
འོད་ཟེར་བདུད་རྩིའི་རྒྱུན་དང་བཅས། །
སྐར་མདའ་འཕྲོས་བཞིན་གནས་གསུམ་དུ། །
རིམ་དང་ཅིག་ཆར་ཐིམ་པ་ཡིས། །
སྒྲིབ་དག་དབང་དང་དངོས་གྲུབ་ཐོབ། །
མཐར་ནི་དགྱེས་པ་ཆེན་པོ་ཡིས། །
རང་གི་ཚངས་བུག་ནས་བརྒྱུད་དེ། །
སྙིང་དབུས་འོད་ཀྱི་གུར་ཁང་དུ། །
འབྲལ་མེད་བཞུགས་པའི་ཐུགས་དབུས་སུ། །
ཙིཏྟ་འོད་ཀྱི་གོང་བུའི་ནང་། །
ཀུན་བཟང་ཡབ་ཡུམ་རྒྱན་མེད་ཀྱི། །
ཐུགས་ཀར་ཨཱཿཡིག་མཐིང་གསལ་ལ། །
རིག་པ་གཏད་དེ་ཐུགས་ཡིད་བསྲེ། །
བློ་བྲལ་དགོངས་པའི་ངང་དུ་བཞག །
རྗེས་ལ་དགེ་བསྔོ་སྨོན་ལམ་ནི།
སྣོད་བཅུད་སྣང་གྲགས་དྲན་རྟོག་ཀུན། །
དཔལ་ལྡན་བླ་མའི་རོལ་པར་བལྟ། །
དགེ་འདིས་མཐའ་ཀླས་འགྲོ་བ་རྣམས། །
བླ་མའི་ངོ་བོར་བྱང་ཆུབ་ཤོག །
ཅེས་པའང་དད་དམ་དགེ་བའི་བློ་མངའ་ཤེས་རབ་མཐར་ཕྱིན་གྱིས་ལྷ་རྫས་རིན་གཉིས་འཁོར་ལོ་དབང་བཅུའི་གྲངས་ལྡན་བཅས་ནན་ཏན་ཆེན་པོས་བསྐུལ་ངོར་ཆོས་ཀྱི་བློ་གྲོས་པས་བྲིས་པ་འདིས་ཀྱང་རང་རིག་སྐུ་གསུམ་མངོན་དུ་བྱེད་པའི་རྒྱུར་གྱུར་ཅིག །
