Anguished Prayer to Buddhas and Bodhisattvas—Tibetan

༄༅། །སངས་རྒྱས་བྱང་སེམས་ལ་སྨྲེ་སྔགས་ཀྱི་གསོལ་བ་འདེབས་པ་བཞུགས།    །

ན་མོ་གུ་རུ།

བླ་མ་མཉམ་མེད་ཐུབ་པའི་དབང་པོ་དང་།    །

འཇམ་དབྱངས་བྱམས་པ་ཕྱག་རྡོར་སྤྱན་གཟིགས་སོགས།    །

དམིགས་མེད་ཐུགས་རྗེ་ཆེན་པོ་དང་ལྡན་པའི།    །

རྒྱལ་དང་དེ་སྲས་ཚོགས་རྣམས་དགོངས་སུ་གསོལ།   །

ཀྱེ་མ།  བདག་འདྲའི་སེམས་ཅན་ལས་ངན་པ།    །

ལུས་ལ་སྣ་ཚོགས་ནད་ཀྱིས་གདུང་བས་མནར།    །

ངག་ནི་མི་དགེའི་གཏེར་གྱི་འབྱུང་གནས་གྱུར།    །

སེམས་ལ་བྱིང་རྨུགས་གཉིད་དང་བརྗེད་ངས་ཆེ།    །

སྒོ་གསུམ་འཁྲུལ་པའི་རང་བཞིན་འདི་འདྲ་བའི།    །

གནས་ངན་ལེན་ལ་སྲས་བཅས་རྒྱལ་བ་ཡི།    །

ཐུགས་རྗེ་ཆེན་པོས་ངེས་པར་གཟིགས་སུ་གསོལ།    །

བདག་ནི་བླང་དོར་ཅུང་ཟད་ཤེས་ནའང་།    །

ཤེས་བཞིན་ཉོན་མོངས་ཆང་གི་རབ་མྱོས་པས།    །

དབང་མེད་གྱུར་པའི་སྐྱེ་ངན་བདག་ཉིད་ལ།    །

རྒྱལ་སྲས་རྣམས་ཀྱིས་སྐྱོབ་པར་མཛད་དུ་གསོལ།    །

ལས་ཉོན་འཁྲུལ་འཁོར་དྲག་པོ་བཟློག་པ་དང་།    །

འཁོར་བའི་མུན་པ་སྨུག་པོ་བསལ་དུ་གསོལ།    །

ཡེ་ཤེས་ཟེར་གྱིས་སྣང་བའི་སྒོ་ཕྱེས་ལ།    །

མ་འཁྲུལ་གནས་ལུགས་ཟབ་མོ་དེ་ཁོ་ནའི།    །

རང་བཞིན་མངོན་གྱུར་བདག་ལ་མཛད་དུ་གསོལ།    །

ཀྱེ་མ་ཀྱི་ཧུད་རྒྱལ་བ་ཐུགས་རྗེ་ཅན།    །

ད་ལྟ་ཉིད་དུ་སྲིད་པའི་འདམ་ལས་དྲོངས།    །

བྱང་ཆུབ་མཆོག་གི་ལམ་ལ་དྲོང་དུ་གསོལ།    །

སྒྲིབ་པའི་དྲི་མ་དག་ཅིང་བྱང་བ་དང་།    །

རྟོགས་པའི་ཡོན་ཏན་ཉམས་འོག་ཆུད་པ་དང་།    །

སྐུ་བཞིའི་རྒྱལ་ས་ཐོབ་པར་མཛད་དུ་གསོལ།    །

ཅེས་པའང་བློ་གྲོས་རྒྱ་མཚོས་གསོལ་བ་བཏབ་པའོ།།    །།