Chimé Pakmé Nyingtik Permission Blessing—Tibetan
༄༅། །འཆི་མེད་འཕགས་མའི་སྙིང་ཏིག་ལས། ཐུན་མོང་ཚེའི་རྗེས་གནང་བྱ་བའི་ཚུལ་གསལ་བར་བཀོད་པ་ཡེ་ཤེས་སྒོ་འབྱེད་ཅེས་བྱ་བ་བཞུགས་སོ།།
ན་མོ་གུ་ར་བེ།
འཆི་མེད་ཡེ་ཤེས་ཟླ་བའི་འཛུམ། །
གདུལ་བྱའི་སྙིང་ལ་རབ་བསིལ་ནས། །
དུས་ཀྱི་མུན་རུམ་འཇོམས་མཛད་དེར། །
གུས་པས་འདུད་དོ་རྗེས་འཛིན་མཛོད། །
འཆི་མེད་འཕགས་མའི་སྙིང་ཐིག་གི་སྨིན་བྱེད་བསྡུས་པའམ་ཐོག་མའི་སྒོ་འབྱེད་དུའང་གྱུར་པ་ཐུན་མོང་ཚེའི་རྗེས་གནང་བསྒྲུབ་པ་ལ།
སྦྱོར་བ་སྟེགས་བུའི་སྟེང་མཎྜལ་ལ་འབྲུ་དཀར་གྱི་ཚོམ་བུ་གཅིག་བཀོད་པའི་སྟེང་། དབུས་སུ་འཕྲུལ་སྟེགས་ཀྱི་ཁར་བུམ་པ་ཉེར་ལྔའི་བཅུད་ལྡན་མགུལ་ཆིངས་དཀར་པོས་དཀྲིས་ཤིང་ཁ་རྒྱན་དང་བཅས་པ་བཀོད། དེའི་གཡས་སུ་བནྡྷ་མཚན་ལྡན་ནང་མངར་གསུམ་དང་སྦྱར་བའི་ཆང་གིས་བཀང་བ་དང་། གཡོན་དུ་ཚེའི་འབྲང་རྒྱས། མཐའ་སྐོར་ཚེ་རིལ་གྱིས་བསྐོར་བ་བཞག །མདུན་དུ་སྨན་རཀ་གཏོར་གསུམ་དང་ཆུ་གཉིས་ཉེར་སྤྱོད་ཕྲེང་ཚར་དུ་བཤམ། ལས་བུམ་སྔོན་གཏོར་སོགས་མཁོ་བའི་ཡོ་བྱད་རྣམས་ཀྱང་ཉེ་བར་བསྡོག་གོ །
དངོས་གཞིའི་ཐོག་མར་ཕྲིན་ལས་མདོར་བསྡུས་ཀྱིས་འཐུས་པས།
དང་པོ་སྐྱབས་སེམས་ནི།
ན་མོ༔ བདག་སོགས་འགྲོ་ཀུན་བྱང་ཆུབ་བར༔
དཀོན་མཆོག་གསུམ་གྱི་ངོ་བོ་ཉིད༔
བླ་མ་ཡིད་བཞིན་འཁོར་ལོ་ལ༔
མི་ཕྱེད་གུས་པས་སྐྱབས་སུ་མཆི༔
ལན་གསུམ།
ཧོ༔ མཁའ་མཉམ་སེམས་ཅན་མ་ལུས་ཀུན༔
སྡུག་བསྔལ་མཚོ་ལས་བསྒྲལ་བྱའི་ཕྱིར༔
རྗེ་བཙུན་འཕགས་མའི་རྣལ་འབྱོར་གྱིས༔
འཆི་མེད་བསྒྲུབ་པར་སེམས་བསྐྱེད་དོ༔
ལན་གསུམ།
ཧཱུྃ་ཧཱུྃ་ཧཱུྃ། ཞེས་དང་སུམྦྷ་ནིའི་སྔགས་ཀྱིས་བགེགས་བསྐྲད།
བཛྲ་ཛྙཱ་ན་རཀྵ་ཨོཾ་ཨཱཿཧཱུྃ༔གིས་སྲུང་བའི་འཁོར་ལོ་བརྟན་པར་བསྒོམ།
ཨོཾ་ཨཱཿཧཱུྃ༔
གནས་ཡུལ་བདེ་ཆེན་པདྨོ་བཀོད༔
དག་པ་རབ་འབྱམས་ཞིང་གི་དབུས༔
ཕྱི་ནང་གསང་བའི་མཆོད་རྫས་ཀུན༔
ནམ་མཁའ་མཛོད་ཀྱི་འཁོར་ལོར་གྱུར༔
ཨོཾ་ཨཱཿཧཱུྃ་སརྦ་པཱུ་ཛ་མེ་གྷ་ས་མ་ཡ་ཧཱུྃ༔
ཞེས་དང་ནམ་མཁའ་མཛོད་ཀྱི་ཕྱག་རྒྱ་དང་བཅས་པས་བརླབ།
ལྷ་བསྐྱེད་ནི།
ཨོཾ་མ་ཧཱ་ཤཱུནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅་ཧཾ༔
འཁོར་འདས་ཆོས་ཀུན་གཟོད་མ་ནས༔
འོད་གསལ་དེ་བཞིན་ཉིད་དབྱིངས་ལས༔
ཟུང་འཇུག་ཀུན་སྣང་སྙིང་རྗེའི་རྩལ༔
རྒྱུ་ཡི་ཏིང་འཛིན་ཏཱཾ་དཀར་པོ༔
མཁའ་ལས་འཇའ་ཚོན་བཞིན་དུ་ཤར༔
འོད་འཕྲོས་སྣོད་བཅུད་དངོས་འཛིན་སྦྱངས༔
འབྱུང་ལྔ་ཡུམ་གྱི་མཁའ་ཀློང་དུ༔
ནོར་བུ་ཆུ་ཤེལ་ལས་གྲུབ་པའི༔
ཐར་པ་ཆེན་པོའི་གཞལ་མེད་ཁང༔
གྲུ་བཞི་སྒོ་བཞི་མཚན་ཉིད་རྫོགས༔
དེ་དབུས་པདྨ་འདབ་བཞིའི་སྟེང༔
ཐབས་ཤེས་ཉི་ཟླ་ཁ་སྦྱོར་དབུས༔
ཟུང་འཇུག་ཏཱཾ་ཡིག་སྙོམས་པར་ཞུགས༔
དེ་ལས་འོད་འཕྲོས་འཕགས་པ་མཆོད༔
འཁོར་འདས་དྭངས་བཅུད་གཅིག་ཏུ་འདུས༔
ཡོངས་གྱུར་ཡེ་ཤེས་སྒྱུ་མའི་སྐུ༔
དུས་གསུམ་རྒྱལ་བའི་ཕྲིན་ལས་བདག༔
འཆི་མེད་ཡིད་བཞིན་འཁོར་ལོ་ནི༔
རབ་དཀར་ཞལ་གཅིག་ཕྱག་གཉིས་མ༔
ཕྱག་གཡས་མཆོག་སྦྱིན་གཡོན་པ་ནི༔
དཀོན་མཆོག་གསུམ་མཚོན་སྐྱབས་སྦྱིན་རྒྱས༔
ཨུཏྤལར་གནས་ཚེ་བུམ་བསྣམས༔
ཞི་འཛུམ་ཡེ་ཤེས་སྤྱན་བདུན་ལྡན༔
དར་དང་རིན་ཆེན་རྒྱན་གྱིས་མཛེས༔
ཞབས་གཉིས་རྡོ་རྗེའི་སྐྱིལ་ཀྲུང་གིས༔
པདྨ་ཟླ་བའི་གདན་ལ་བཞུགས༔
རང་འོད་ཐབས་མཆོག་གར་གྱི་དབང༔
པདྨ་ཚེ་བུམ་བསྣམས་པས་འཁྲིལ༔
དེ་ཡི་སྤྱི་མགྲིན་ཐུགས་ཀ་རུ༔
རྡོ་རྗེ་གསུམ་གྱི་ཡི་གེས་མཚན༔
དེ་ལས་འཕྲོས་པའི་འོད་ཟེར་གྱིས༔
ཡེ་ཤེས་སེམས་དཔའ་སྤྱན་དྲངས་གྱུར༔
ཅེས་གསལ་བཏབ་ལ།
ཧྲཱི༔ སོ་སོར་ཀུན་ཏུ་རྟོག་པ་ཡི༔
ཡེ་ཤེས་ཆེན་པོ་ཚེ་ཡི་ལྷ༔
འོད་དཔག་མེད་པའི་དབུ་རྒྱན་ཅན༔
དུས་གསུམ་སངས་རྒྱས་ཕྲིན་ལས་མ༔
ཚུར་གཤེགས་ཡིད་བཞིན་འཁོར་ལོ་འཆང༔
སྒྲུབ་ལ་དངོས་གྲུབ་མཆོག་སྩོལ་ཕྱིར༔
དམ་ཚིག་དཀྱིལ་འཁོར་འདིར་དགོངས་ལ༔
རྡོ་རྗེའི་ཡེ་ཤེས་བསྐྱེད་དུ་གསོལ༔
ས་མ་ཡ་ཧོ༔ ས་མ་ཡ་སཏྭཾ༔ ཨེ་ཨ་རལླི་ཧྲཱིཾ་ཧྲཱིཾ་ཛ༔ ཛྙཱ་ན་སཏྭ་ཨ་ཨཱ༔
ཞེས་པས་སྤྱན་དྲངས་པའི་ཡེ་ཤེས་པ།
བཛྲ་ཛྙཱ་ན་ཛཿཧཱུྃ་བཾ་ཧོ༔ ས་མ་ཡ་ཏིཥྛ་ལྷན༔
ཅེས་དམ་ཚིག་པ་ལ་བསྟིམ།
ཨ་ལ་ལ་ཧོ༔ ཨ་ཏི་པཱུ་ཧོ༔ པྲ་ཏཱིཙྪ་ཧོ༔ས་ཕྱག་བྱ།
ཨོཾ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔
ཕྱི་ནང་གསང་བའི་མཆོད་རྫས་ཀུན༔
འཕགས་མ་ཡིད་བཞིན་འཁོར་ལོར་འབུལ༔
བཞེས་ནས་འཆི་མེད་དངོས་གྲུབ་སྩོལ༔
ཨོཾ་ཨཱརྻ་ཏཱ་ར་ས་པ་རི་བཱ་ར་ཨརྒྷཾ་པཱ་དྱཾ་པུཥྤེ་དྷཱུ་པེ་ཨཱ་ལོ་ཀེ་གྷནྡྷེ་ནཻ་བིདྱ་ཤབྡ་རཱུ་པ་ཤབྡ་གནྡྷེ་ར་ས་སྤརྴེ་པྲ་ཏཱིཙྪ་སྭཱ་ཧཱ༔ སརྦ་པཉྩ་ཨ་མྲྀཏ་མ་ཧཱ་རཀྟ་མ་ཧཱ་བ་ལིཾ་ཏ་ཁཱ་ཧི༔ སརྦ་དྷརྨ་དྷཱ་ཏུ་ཨཱཏྨ་ཀོ྅་ཧཾ༔
ཞེས་ཕྱི་ནང་གསང་བ་དེ་ཁོ་ན་ཉིད་ཀྱིས་མཆོད།
ཨོཾ༔ འཇིག་རྟེན་དབང་ཕྱུག་སྙིང་རྗེའི་བདག༔
ཞལ་གྱི་ཆུ་སྐྱེས་ལས་བྱུང་བ༔
དུས་གསུམ་སངས་རྒྱས་སྐྱེད་མཛད་ཡུམ༔
ཡིད་བཞིན་འཁོར་ལོར་ཕྱག་འཚལ་བསྟོད༔
ཅེས་བསྟོད།
བྷྲཱུྃ་བི་ཤྭ་བི་ཤུདྡྷེ་ཡིག་བཅུ་ལ་ཕཊ་ཛཿ
བཏགས་པས་མདུན་དཀྱིལ་གྱི་གོ་སར་ཛཔ྄་ཁང་དབྱེ།
བདག་མདུན་འཕགས་མའི་ཐུགས་ཀ་རུ༔
ཡེ་ཤེས་སེམས་དཔའ་ཚེ་དཔག་མེད༔
དཀར་གསལ་མཉམ་གཞག་ཚེ་བུམ་འཛིན༔
དར་དང་རིན་ཆེན་རྒྱན་གྱིས་མཛེས༔
རྡོ་རྗེའི་སྐྱིལ་ཀྲུང་པད་ཟླར་བཞུགས༔
འོད་དང་འོད་ཟེར་འཕྲོ་བ་ཡི༔
ཐུགས་དབུས་ཆུ་སྐྱེས་ཉི་ཟླའི་དབུས༔
ཏཱཾ་མཐར་སྔགས་ཀྱི་ཕྲེང་བས་བསྐོར༔
བཟླས་པས་ཐུགས་དམ་རྒྱུད་བསྐུལ་ཏེ༔
འོད་ཀྱི་སྣང་བ་མཐའ་ཡས་པ༔
གཙུག་ཏོར་ནོར་བུའི་རྩེ་ནས་འཐོན༔
དེ་ལས་འཕགས་མ་རྣམ་པར་རྒྱལ༔
ཆུ་ཤེལ་མདོག་ཅན་ཕྱག་གཡས་ཀྱིས༔
སྐྱབས་སྦྱིན་ཕྱག་རྒྱས་ལྕགས་ཀྱུ་དང༔
གཡོན་པས་མཆོག་སྦྱིན་ཚེ་བུམ་བསྣམས༔
འོད་དང་འོད་ཟེར་དང་བཅས་པ༔
གྲངས་མེད་ཉི་ཟེར་རྡུལ་ལྟར་འཕྲོས༔
འཁོར་འདས་བརྟན་གཡོའི་དྭངས་བཅུད་ཀུན༔
བདེ་བ་ཆེན་པོའི་རྣམ་པར་བསྡུས༔
བདག་དང་སྒྲུབ་པའི་རྫས་ལ་ཐིམ༔
འཆི་མེད་ཚེ་ཡི་དངོས་གྲུབ་དང༔
བདེ་ཆེན་ཡེ་ཤེས་རྒྱས་པར་གྱུར༔ ཅེས་དམིགས་ལ།
ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔
ཞེས་རྡོ་རྗེའི་ཡི་གེ་བཅུ་པ་ཅི་འགྲུབ་དང་།
ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿབྷྲཱུྃ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ༔
ཞེས་པའང་ཅུང་ཟད་བཟླ། དེ་ནས་བུམ་པ་སོགས་ལས་སྔགས་ཀྱིས་བསང་།
སྭ་བྷཱ་ཝས་སྦྱང་།
སྟོང་པའི་ངང་ལས་པད་ཟླའི་སྟེང༔
ཁ་དོག་ལྔ་ལྡན་ཡི་གེ་བྷྲཱུྃ༔
ཡོངས་གྱུར་ཕྱི་ནི་རིན་པོ་ཆེའི༔
རང་བཞིན་བུམ་པ་བཟང་པོ་ཆེ༔
མཚན་ཉིད་ཡོངས་རྫོགས་འོད་དུ་འབར༔
ནང་ནི་རིན་ཆེན་གཞལ་མེད་ཁང༔
དེ་དབུས་ཏཱཾ་ལས་འོད་ཟེར་འཕྲོས༔
འཕགས་མཆོད་འཁོར་འདས་དྭངས་བཅུད་བསྡུས༔
ཡོངས་གྱུར་ཡེ་ཤེས་སྒྱུ་མའི་སྐུ༔
སོགས་ནས།
པདྨ་ཚེ་བུམ་བསྣམས་པས་འཁྲིལ༔
བར་དང་ཐོད་པའི།
བདུད་རྩིའི་དབུས་སུ་པདྨ་དང༔
ཟླ་བའི་གདན་ལ་ཚེ་དཔག་མེད༔
དཀར་གསལ་མཉམ་གཞག་ཚེ་བུམ་འཛིན༔
དར་དང་རིན་ཆེན་རྒྱན་གྱིས་མཛེས༔
རྡོ་རྗེའི་སྐྱིལ་མོ་ཀྲུང་གིས་བཞུགས༔
ཚེ་འབྲང་འཕགས་མ་རྣམ་པར་རྒྱལ༔
ཆུ་ཤེལ་མདོག་ཅན་ཕྱག་གཡས་ཀྱིས༔
སྐྱབས་སྦྱིན་ཕྱག་རྒྱས་ལྕགས་ཀྱུ་དང༔
གཡོན་པས་མཆོག་སྦྱིན་ཚེ་བུམ་བསྣམས༔
འོད་དང་འོད་ཟེར་དང་བཅས་གསལ༔
ཀུན་གྱི་སྤྱི་མགྲིན་ཐུགས་ཀ་རུ༔
སོགས་ནས་བསྟོད་པའི་བར་ཕྲིན་ལས་གོང་བཞིན་གཏང་། གཟུངས་ཐག་བླངས་ལ།
རང་གི་ཐུགས་ནས་སྔགས་ཀྱི་ཕྲེང༔
རྡོ་རྗེའི་གཟུངས་ཐག་ལས་བརྒྱུད་དེ༔
བུམ་ལྷའི་ཐུགས་དམ་རྒྱུད་བསྐུལ་བས༔
བདེ་སྟོང་རོལ་པའི་འོད་ཟེར་སྤྲིན༔
མཁའ་ཁྱབ་ཀུན་ཏུ་སྣང་བ་ཡིས༔
འཕགས་མཆོད་འགྲོ་བའི་དོན་ཀུན་བསྒྲུབས༔
ཚུར་འདུས་ཐུགས་ཀའི་དཔལ་བེར་འཁྱིལ༔
སྐུ་དང་སྔགས་ལས་བདུད་རྩིའི་རྒྱུན༔
དཔག་མེད་བྱུང་ནས་བུམ་པའི་བཅུད༔
དངོས་གྲུབ་ཀུན་གྱི་སྙིང་པོར་གྱུར༔
ཅེས་དང་། ཚེ་དཔག་མེད་པའི་སྐུ་ལས་བདུད་རྩིའི་རྒྱུན་བབས་པས་ཐོད་པ་གང་བ་དང་། རྣམ་པར་རྒྱལ་མའི་སྐུའི་འོད་ཟེར་གྱིས་འཁོར་འདས་ཀྱི་དྭངས་བཅུད་ཐམས་ཅད་བསྡུས་པར་དམིགས་ལ་ཡིག་བཅུ་ཅི་མང་དང་། གཞན་གཉིས་དང་དྲིལ་སྔགས་རྣམས་བརྒྱ་རྩ་ལས་མི་ཉུང་བ་བཟླ། མཆོད་བསྟོད་ཕུལ། ཡིག་བརྒྱས་ནོངས་པ་བཤགས། འབྲུ་གསུམ་གྱིས་མཆོད་ཡོན་ཕུལ།
བུམ་པ་དང་ཐོད་པའི་ལྷ་འཆི་མེད་བདུད་རྩིའི་ངོ་བོར་ཞུ་བར་གྱུར།
ཅེས་དམིགས།
ལས་བུམ་ནང་དུ་པད་ཟླའི་སྟེང༔
པདྨ་རྟ་མགྲིན་སྐུ་མདོག་དམར༔
ཕྱག་གཉིས་པདྨ་དྲིལ་བུ་འཛིན༔
དུར་ཁྲོད་ཆས་ལྡན་དོར་སྟབས་བཞུགས༔
སྐུ་ལས་རྡོ་རྗེའི་བདུད་རྩིའི་རྒྱུན༔
བབས་པས་བུམ་པ་གང་བར་གྱུར༔ ཅེས་དམིགས་ལ།
ཨོཾ་ཧྲཱིཿཔདྨཱནྟ་ཀྲྀཏ་སརྦ་བིགྷྣཱན་ཧ་ན་ཧ་ན་ཧཱུྃ་ཕཊ༔
ཅེས་བརྒྱ་རྩ་ཙམ་བཟླས་ལ་ལས་བུམ་བསྒྲུབ། དེ་ནས།
ཇི་ལྟར་བལྟམས་པ་ཙམ་གྱིས་ནི༎
ལྷ་རྣམས་ཀྱིས་ནི་ཁྲུས་གསོལ་ལྟར༎
ལྷ་ཡི་ཆུ་ནི་དག་པ་ཡིས༎
དེ་བཞིན་བདག་གིས་སྐུ་ཁྲུས་གསོལ༎
སོགས་བརྗོད་ལ་སློབ་མ་རྣམས་ལས་བུམ་གྱི་ཆུས་སྒོའི་ཕྱི་རོལ་དུ་ཁྲུས་བྱ།
ལས་བྱང་ལྟར་འབྱུང་གཏོར་བསྔོ་ཞིང་བགེགས་བསྐྲད།
སྲུང་འཁོར་འདོན་བསྒོམ་བྱ། མེ་ཏོག་བཀྱེ་བསྡུ་དང་སེམས་བསྐྱེད་གསལ་བཏབ་ལ།
དེ་ལ་འདིར་སངས་རྒྱས་སྲས་དང་བཅས་པ་སྐྱེད་པའི་ཡུམ་གཅིག །
འཕགས་བོད་མཁས་གྲུབ་ཀུན་གྱི་འདྲེན་པ།
སྙིགས་དུས་ཀྱི་འགྲོ་བ་སྤྱི་དང་ཁྱད་པར་གངས་ཅན་བོད་ཡུལ་གྱི་སྐྱེ་དགུ་ཡོངས་ཀྱི་ལྷ་མཆོག་རྗེ་བཙུན་འཕགས་མ་སྒྲོལ་མ་ལ་རྩ་བཤད་ཀྱི་རྒྱུད་དང་།
གྲུབ་པའི་སློབ་དཔོན་སོ་སོས་བཀྲལ་པའི་སྒྲུབ་ཐབས་མན་ངག་གི་བཀའ་སྲོལ་མཐའ་ཡས་པ་བཞུགས་ཤིང་འཕགས་བོད་ཀྱི་ལྗོངས་སུ་ཉི་ཟླ་ལྟར་གྲགས་པ་ལས།
སྔ་འགྱུར་རྙིང་མའི་རིང་ལུགས་ཟབ་མོ་གཏེར་གྱི་ཕྱོགས་སུ་ཤིན་ཏུ་དཀོན་ཅིང་གཞན་ལས་ཁྱད་པར་དུ་འཕགས་པའི་ཟབ་ཆོས།
འཆི་མེད་ཡེ་ཤེས་ཀྱི་སྐུ་ཅན་རིག་འཛིན་ཆེན་པོ་ཤྲཱི་སིཾ་ཧ་དང་བི་མ་ལ་མི་ཏྲ།
སངས་རྒྱས་གཉིས་པ་པདྨ་སཾ་བྷ་བ་རྣམ་པ་གསུམ་གྱི་དགོངས་ཉམས་གཅིག་ཏུ་བསྡུས་པ།
རྗེ་བཙུན་ཡིད་བཞིན་འཁོར་ལོ་གཙོ་བོར་གྱུར་པའི་ཚེ་ལྷ་རྣམ་གསུམ་གཅིག་དྲིལ་གྱི་སྒྲུབ་ཐབས་འཆི་མེད་འཕགས་མའི་སྙིང་ཏིག་ཏུ་གྲགས་པ་འདི་ནི།
འགྲན་ཟླ་ཐམས་ཅད་དང་བྲལ་བའི་གཏེར་སྟོན་མཁས་གྲུབ་ཡོངས་ཀྱི་འཁོར་ལོས་སྒྱུར་བ་༧པདྨ་འོད་གསལ་མདོ་སྔགས་གླིང་པ་ལ་བཀའ་བབས་ཆོས་མཛོད་ཆེན་པོ་བདུན་དུ་བཞུགས་པའི་ཡ་གྱལ་ཟབ་མོ་དག་སྣང་གི་ཆོས་སྡེ་ལས་བྱོན་པ་སྟེ།
དེ་ལ་རྩ་བའི་སྨིན་བྱེད་རྒྱས་འབྲིང་བསྡུས་གསུམ་དུ་བཞུགས་པ་ལས་འདིར་ཐོག་མའི་ཆོས་ཀྱི་སྒོ་འབྱེད་དུའང་གྱུར་པ།
སྨིན་བྱེད་བསྡུས་པ་ཐུན་མོང་ཚེའི་རྗེས་སུ་གནང་བ་སྒྲུབ་པ་ལ་བདག་ཉིད་ཀྱིས་བགྱི་བར་འོས་པ་
སོགས་སྤྱི་ལྟར་བརྗོད་པས་མཚམས་སྦྱར་ལ་མཎྜལ་འབུལ་དུ་གཞུག །
སྙིམ་པ་མེ་ཏོག་གིས་བཀང་བའི་ཐལ་མོ་སྦྱོར་ལ་གསོལ་བ་འདེབས་པ་འདིའི་རྗེས་ཟློས་ལན་གསུམ་མཛོད།
པདྨ་དགྱེས་པར་རོལ་པའི་ཡུམ༔
འཆི་མེད་འཕགས་མའི་བཀའ་དྲིན་གྱིས༔
སྐུ་གསུང་ཐུགས་ཀྱི་དཀྱིལ་འཁོར་ཆེར༔
རྡོ་རྗེའི་ཡེ་ཤེས་བསྐྱེད་དུ་གསོལ༔
ལན་གསུམ།
དེ་ལྟར་གསོལ་བ་བཏབ་པ་སྔོན་དུ་སོང་ནས།
ཐེག་པ་ཐུན་མོང་དང་ཐུན་མོང་མ་ཡིན་པའི་ལམ་གྱི་གཞི་འགོད་པ་སྐྱབས་སུ་འགྲོ་ཞིང་སེམས་བསྐྱེད་པའི་སླད་དུ།
བླ་མ་དང་མདུན་བསྐྱེད་འཆི་མེད་འཕགས་མའི་དཀྱིལ་འཁོར་པ་ལ་རྩ་གསུམ་རྒྱལ་བ་རབ་འབྱམས་ཀྱིས་བསྐོར་ཏེ་མངོན་སུམ་བཞིན་དུ་བཞུགས་པའི་སྤྱན་སྔར།
བདག་གཞན་སེམས་ཅན་ཐམས་ཅད་བྱང་ཆུབ་མ་ཐོབ་ཀྱི་བར་དུ་སྐྱབས་སུ་མཆིའོ་སྙམ་པའི་ཡིད་རྩེ་གཅིག་པས་འདིའི་རྗེས་ཟློས།
ན་མོ༔ བདག་སོགས་འགྲོ་ཀུན་བྱང་ཆུབ་བར༔
དཀོན་མཆོག་གསུམ་གྱི་ངོ་བོ་ཉིད༔
བླ་མ་ཡིད་བཞིན་འཁོར་ལོ་ལ༔
མི་ཕྱེད་གུས་པས་སྐྱབས་སུ་མཆི༔
སོགས་ལས་བྱང་ལྟར་ལན་གསུམ།
སེམས་ཅན་ཐམས་ཅད་སྡུག་བསྔལ་འཁོར་བའི་རྒྱ་མཚོ་ལས་བསྒྲལ་ཏེ་མི་གནས་པའི་མྱང་འདས་ཆེན་པོར་འགོད་པར་བྱ།
དེའི་ཐབས་མཆོག་ཏུ་གྱུར་པ་འཆི་མེད་འཕགས་མའི་སྨིན་བྱེད་ཀྱི་རིམ་པ་ནོད་ནས་ལམ་གྱི་རྣལ་འབྱོར་ལ་འཇུག་པར་བགྱིའོ་སྙམ་པས་འདིའི་རྗེས་ཟློས།
ཧོ༔ མཁའ་མཉམ་སེམས་ཅན་མ་ལུས་ཀུན༔
སྡུག་བསྔལ་མཚོ་ལས་བསྒྲལ་བྱའི་ཕྱིར༔
རྗེ་བཙུན་འཕགས་མའི་རྣལ་འབྱོར་གྱིས༔
འཆི་མེད་བསྒྲུབ་པར་སེམས་བསྐྱེད་དོ༔
སོགས་གསུམ།
རྒྱུད་རྣམ་པར་དག་པར་བྱ་བའི་སླད་དུ། བླ་མ་དཀྱིལ་འཁོར་གྱི་ལྷ་ཚོགས་རྒྱལ་བ་སྲས་དང་བཅས་པའི་སྤྱན་སྔར་བདག་གཞན་མཁའ་ཁྱབ་ཀྱི་ཡིད་ཅན་མཐའ་དག་སྒོ་གསུམ་གུས་པའི་ཚུལ་རྩེ་གཅིག་པས། ཚོགས་གསག་ཡན་ལག་བདུན་པ་ཚུལ་བཞིན་དུ་བྱ་བའི་འདུན་པ་དང་བཅས་ཏེ་འདིའི་རྗེས་ཟློས།
ཧོ༔ ཕྱོགས་དུས་རྒྱལ་བ་སྲས་བཅས་དང༔
ཡུམ་གྱུར་སྒྲོལ་མའི་ཞབས་པདྨོར༔
ཞིང་རྡུལ་ཀུན་གྱི་གྲངས་སྙེད་ཀྱི༔
སྒོ་གསུམ་གུས་པས་ཕྱག་འཚལ་ལོ༔
ཕྱི་ནང་གསང་བ་བླ་མེད་པའི༔
ཀུན་བཟང་མཆོད་སྤྲིན་རྒྱ་མཚོས་མཆོད༔
སྡིག་སྒྲིབ་ཉེས་ལྟུང་མཐོལ་ཞིང་བཤགས༔
ཚོགས་གཉིས་སྤྱོད་ལ་རྗེས་ཡི་རང༔
ཆོས་ཀྱི་འཁོར་ལོ་བསྐོར་བཞིན་དུ༔
མྱ་ངན་མི་འདའ་བཞུགས་གསོལ་འདེབས༔
དགེ་ཚོགས་བྱང་ཆུབ་སྙིང་པོར་བསྔོ༔
གཞན་དོན་སངས་རྒྱས་མྱུར་འགྲུབ་ཤོག༔
ཅེས་ལན་གསུམ།
དེ་ནས་རྗེས་གནང་གི་གཞི་འགོད་པ་ཡེ་ཤེས་དབབ་པའི་སླད་དུ་སྒོ་གསུམ་འཇུག་པ་གཅིག་ཏུ་དྲིལ་ཏེ་དམིགས་འདུན་འདི་བཞིན་དུ་མཛད་འཚལ།
ལས་སྔགས་དང་བུམ་ཆུས་བསང་།
སྭ་བྷཱ་བས་སྦྱང་།
སྟོང་པའི་ངང་ལས་ཁྱེད་རང་རྣམས་གང་དུ་གནས་པའི་གོ་སར་པདྨ་འདབ་མ་རབ་ཏུ་རྒྱས་པའི་སྟེང་དུ་ཟླ་བའི་དཀྱིལ་འཁོར་ཉ་གང་བ།
དེའི་སྟེང་དུ་རང་གི་སེམས་ཉིད་ཏཱཾ་ཡིག་དཀར་པོ།
དེ་ལས་འོད་ཟེར་འཕྲོས། འཕགས་པ་མཆོད། འཁོར་འདས་ཀྱི་དྭངས་བཅུད་མ་ལུས་པ་བསྡུས་ཏེ་ཏཱཾ་ལ་ཐིམ།
དེ་ཡོངས་སུ་གྱུར་པ་ལས་ཁྱེད་རང་རྣམས་འཆི་མེད་འཕགས་མ་ཡིད་བཞིན་འཁོར་ལོ་སྐུ་མདོག་དཀར་གསལ་ཟླ་བ་ནོར་བུ་ཆུ་ཤེལ་གྱི་མདངས་ཅན།
ཞལ་གཅིག་ཞི་ཞིང་འཛུམ་ལ་སྐུ་སྒེག་པའི་ཉམས་ཅན་བཅུ་དྲུག་ལོན་པའི་ལང་ཚོ་རྒྱས་ཤིང་ཡེ་ཤེས་ཀྱི་སྤྱན་བདུན་དང་ལྡན་པ།
ཕྱག་གཡས་མཆོག་སྦྱིན་གྱི་ཕྱག་རྒྱ་པུས་མོའི་སྟེང་དུ་བརྐྱང་ཞིང་གཡོན་པས་ཐུགས་ཀར་མཐེབ་སྲིན་སྦྱར་བའི་སྐྱབས་སྦྱིན་གྱི་ཕྱག་རྒྱས་ཨུཏྤལ་དཀར་པོའི་སྡོང་བུ་ནས་འཛིན་པའི་འདབ་མ་སྙན་གྱི་ཐད་ཀར་རྒྱས་པའི་ཟེའུ་འབྲུར་འཆི་མེད་བདུད་རྩིའི་བཅུད་ཀྱིས་གཏམས་པའི་ཚེའི་བུམ་པས་མཚན་པ།
དར་གྱི་ན་བཟའ་དང་རིན་པོ་ཆེའི་རྒྱན་དུ་མས་མཛེས་པར་སྤྲས་ཤིང་ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས་པའི་པང་དུ་རང་འོད་ཀྱི་ཡབ་གར་གྱི་དབང་ཕྱུག་པདྨ་དང་ཚེ་བུམ་བསྣམས་པས་འཁྲིལ་བ།
དེའི་དཔྲལ་བར་ཨོཾ་དཀར་པོ།
མགྲིན་པར་ཨཱཿདམར་པོ།
ཐུགས་ཀར་ཧཱུྃ་སྔོན་པོ།
སངས་རྒྱས་ཐམས་ཅད་ཀྱི་རྡོ་རྗེ་གསུམ་གྱི་དབྱིག་ཏུ་གསལ་བ་དང་།
བདག་མདུན་གྱི་ཐུགས་ཀ་ནས་ཀྱང་འོད་ཟེར་གྱི་སྣང་བ་བསམ་གྱིས་མི་ཁྱབ་པ་འཕྲོས་པས་ཆོས་ཀྱི་དབྱིངས་མཐའ་དག་གང་།
དེ་དག་ཏུ་བཞུགས་པའི་རྒྱལ་བ་སྲས་དང་བཅས་པ་ཐམས་ཅད་འཕགས་མ་ཡིད་བཞིན་འཁོར་ལོའི་སྐུ་ཕྱག་རྒྱ།
གསུང་སྙིང་པོ། ཐུགས་ཕྱག་མཚན་གྱི་རྣམ་པར་ནམ་མཁའ་གང་བ་ཙམ་དུ་བྱོན་ཏེ་ཁྱེད་རང་གི་སྒོ་གསུམ་ལ་ཐིམ་པས་ཡེ་ཤེས་ཆེན་པོའི་བྱིན་རླབས་རྒྱུད་ལ་ཞུགས་པའི་མོས་པ་མཛོད།
ཅེས་དམིགས་པ་སྤྲོད་ལ་སྤྲོ་ན་ལས་གཞུང་གི་བྱིན་འབེབ་དང་། བསྡུ་ན་བྱིན་དབབ་པའི་སྔགས་བརྗོད་རོལ་མོ་སྦྱར་སྤོས་ཀྱི་དུད་པ་བཅས་ཡེ་ཤེས་པ་དབབ་ལ།
དེ་ལྟར་བྱིན་ཕབ་པའི་ཡེ་ཤེས་པའི་རྒྱུན་བྱང་ཆུབ་མ་ཐོབ་ཀྱི་བར་དུ་བརྟན་པར་བྱས་པར་མོས་ཤིག །
ཏིཥྛ་བཛྲ༔
ཞེས་རྒྱ་གྲམ་མགོར་བཞག །
དེ་དག་གིས་རྗེས་གནང་གི་གཞི་འགོད་པ་སོང་ནས།
རྗེས་གནང་དངོས་ལ་སྐུ་གསུང་ཐུགས་ཀྱི་རྗེས་གནང་གསུམ་དུ་ཡོད་པའི་
དང་པོ་སྐུའི་རྗེས་སུ་གནང་བ་ལ་དམིགས་པ་འདི་བཞིན་དུ་མཛོད།
མདུན་བསྐྱེད་འཕགས་མ་ཡིད་བཞིན་འཁོར་ལོའི་སྐུ་ལས་ཡེ་ཤེས་ཀྱི་སྐུ་གཉིས་པ་མར་མེ་གཅིག་ལས་གཉིས་མཆེད་ཀྱི་ཚུལ་དུ་མཆེད་དེ་བྱོན།
ཁྱེད་རང་རྣམས་ཀྱི་ལུས་ལ་ཐིམ་པས་རྗེ་བཙུན་འཕགས་མའི་སྐུའི་བྱིན་རླབས་མ་ལུས་པ་རྒྱུད་ལ་ཞུགས་པར་མོས་པ་བསམ་དང་།
དེ་བརྟན་པར་བྱ་བའི་སླད་དུ།
བླ་མ་དཀྱིལ་འཁོར་པའི་ལྷ་ཚོགས་རྣམས་ཀྱིས་བཀྲ་ཤིས་པའི་རྣམ་པ་དུ་མ་དང་ལྡན་པས་རིན་པོ་ཆེའི་བུམ་པ་རྗེ་བཙུན་འཕགས་མའི་གསང་བ་གསུམ་གྱི་བྱིན་རླབས་ཡེ་ཤེས་བདུད་རྩིའི་ཆུ་རྒྱུན་གྱི་རྣམ་པས་གང་བས་སྤྱི་བོ་ནས་དབང་བསྐུར་བར་གྱུར།
བུམ་པ་སྤྱི་བོར་བཞག་ལ།
ཏཱཾ༔ རྗེ་བཙུན་འཕགས་མའི་ཡེ་ཤེས་བཅུད༔
ཐུགས་རྗེའི་རྒྱུན་གྱིས་དབང་བསྐུར་བས༔
ལུས་ཀྱི་སྒྲིབ་པ་ཀུན་དག་ནས༔
རྡོ་རྗེའི་སྐུ་རུ་འགྲུབ་པར་ཤོག༔
ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ༔ ཀཱ་ཡ་ཨ་བྷི་ཥིཉྩ་ཨོཾ༔
བུམ་ཆུ་སྦྱིན།
དེས་སྐུའི་རྗེས་སུ་གནང་བ་ཐོབ།
ལུས་ཀྱི་སྒྲིབ་པ་དག །
ལྷ་སྐུ་ཕྱག་རྒྱ་བསྒོམ་པ་ལ་དབང།
འཆི་མེད་ཡེ་ཤེས་ཀྱི་སྐུ་འགྲུབ་པའི་སྐལ་པ་ཅན་དུ་བྱས་པའོ། །
གཉིས་པ་གསུང་གི་རྗེས་སུ་གནང་བ་ལ་དམིགས་པ་འདི་བཞིན་དུ་མཛོད།
བདག་མདུན་དཀྱིལ་འཁོར་གྱི་གཙོ་མོའི་ཐུགས་ཀར་བཞུགས་པའི་རིགས་བདག་ཡེ་ཤེས་སེམས་དཔའ་ཚེ་དཔག་མེད་པའི་ཐུགས་ཀར་ཉི་ཟླའི་གྭའུ་ཁ་སྦྱོར་གྱི་དབུས་སུ་ཐུགས་སྲོག་ཏཱཾ་ཡིག་དཀར་པོ་གནས་པ་ལས།
ལྷ་གསུམ་གྱི་སྔགས་ཕྲེང་ཟླ་བ་ཆུ་ཤེལ་གྱི་ཕྲེང་བ་ལྟ་བུ་བྱུང་།
ཞལ་ནས་ཐོན།
སློབ་མ་རྣམས་ལྷར་གསལ་བའི་ཁར་བརྒྱུད།
སྙིང་གར་ཐུགས་སྲོག་ཏཱཾ་ཡིག་ལ་ཐིམ་པས་གསུང་གི་བྱིན་རླབས་ངག་ལ་ཞུགས་པའི་མོས་པ་དང་བཅས་ཏེ་སྔགས་འདི་རྣམས་ཀྱི་རྗེས་ཟློས་ལན་གསུམ་གསུམ་མཛོད།
ཅེས་བསྙེན་པའི་བཟླས་པ་རྣམ་གསུམ་ལན་གསུམ་གསུམ་རྗེས་ཟློས་བྱར་གཞུག །
དེ་བརྟན་པར་བྱ་བའི་སླད་དུ།
རིགས་བདག་འཆི་མེད་མགོན་པོའི་བྱིན་རླབས་དྭངས་མའི་བཅུད་དུ་འཁྱིལ་བའི་བདུད་རྩི་ངག་ཏུ་བྱིན་པར་མོས་ཤིག །
བྷནྡྷའི་བདུད་རྩི་སྦྱིན་ལ།
ཧྲཱི༔ བཅོམ་ལྡན་ཚེ་དཔག་མེད་མགོན་གྱི༔
འཆི་མེད་བདུད་རྩི་འདི་སྦྱིན་པས༔
ངག་གི་སྒྲིབ་པ་ཀུན་དག་ནས༔
རྡོ་རྗེའི་སྔགས་སུ་འགྲུབ་པར་ཤོག༔
ཨོཾ་ཨ་མཱ་ར་ཎི་ཛཱི་བནྟི་ཡེ་སྭཱ་ཧཱ༔ ཝཱ་ཀ་ཨ་བྷི་ཥིཉྩ་ཨཱ༔
དེས་གསུང་གི་རྗེས་སུ་གནང་བ་ཐོབ།
ངག་གི་སྒྲིབ་པ་དག །
བསྙེན་སྒྲུབ་ལས་སྦྱོར་གྱི་བཟླས་བརྗོད་ལ་དབང་།
གཞོམ་མེད་རྡོ་རྗེའི་གསུང་འགྲུབ་པའི་སྐལ་པ་ཅན་དུ་བྱས་པའོ། །
གསུམ་པ་ཐུགས་ཀྱི་རྗེས་སུ་གནང་བ་ལ་དམིགས་པ་འདི་བཞིན་དུ་མཛོད།
སྤྱི་བོར་བཞུགས་པའི་ཕྲིན་ལས་ཀྱི་ལྷ་གཙུག་ཏོར་རྣམ་པར་རྒྱལ་མའི་ཐུགས་ཀ་ནས་འོད་ཟེར་གྱི་སྣང་བ་དཔག་ཏུ་མེད་པ་འཕྲོས།
དཀྱིལ་འཁོར་གཙོ་མོ་རིགས་བདག་དང་བཅས་པའི་ཐུགས་རྒྱུད་བསྐུལ།
ལྷ་གསུམ་གྱི་ཐུགས་ཀ་ནས་སོ་སོའི་ཕྱག་མཚན་ཚེའི་བུམ་པ།
ཨུཏྤལ་དཀར་པོ། ལྕགས་ཀྱུ་ལ་སོགས་པ་སྤྲོས་ཏེ་ཁྱེད་རང་རྣམས་ཀྱི་སྙིང་གར་ཐིམ་པས་ཐུགས་ཀྱི་བྱིན་རླབས་སེམས་ལ་ཞུགས་པར་མོས་ལ་འོད་གསལ་སྤྲོས་པ་དང་བྲལ་བའི་ངང་དུ་མཉམ་པར་འཇོག་པར་ཞུ།
དེ་བརྟན་པར་བྱ་བའི་སླད་དུ།
ཚེ་འབྲང་གཙུག་ཏོར་རྣམ་པར་རྒྱལ་མ་དངོས་སུ་གསལ་བ་སྙིང་གར་བཞག་པས་གཟུང་འཛིན་འཆི་བདག་གི་གཡུལ་ལས་རྣམ་པར་རྒྱལ་ཏེ་འཆི་མེད་ཡེ་ཤེས་ཆེན་པོའི་བྱིན་རླབས་རྒྱུད་ལ་ཞུགས་པར་མོས་ཤིག །
ཚེའི་འབྲང་རྒྱས་སྙིང་གར་བཞག་ལ།
བྷྲཱུྃ༔ གཙུག་ཏོར་རྣམ་པར་རྒྱལ་མ་ཡི༔
ཏིང་འཛིན་མཆོག་གིས་བྱིན་བརླབས་པས༔
ཡིད་ཀྱི་སྒྲིབ་པ་ཀུན་དག་ནས༔
རྡོ་རྗེའི་ཡེ་ཤེས་འགྲུབ་པར་ཤོག༔
ཨོཾ་ཨ་མྲྀཏ་ཨཱ་ཡུརྡ་དེ་སྭཱ་ཧཱ༔ ཙིཏྟ་ཨ་བྷི་ཥིཉྩ་ཧཱུྃ༔
དེས་ཐུགས་ཀྱི་རྗེས་སུ་གནང་བ་ཐོབ།
ཡིད་ཀྱི་སྒྲིབ་པ་དག །
རིམ་པ་གཉིས་ཀྱི་ཏིང་ངེ་འཛིན་བསྒོམ་པ་ལ་དབང་།
བདེ་སྟོང་འགྱུར་བ་མེད་པའི་ཐུགས་འགྲུབ་པའི་སྐལ་པ་ཅན་དུ་བྱས་པའོ། །
མཐའ་སྐོར་གྱི་རིལ་བུ་སྦྱིན་ལ།
བརྟན་གཡོའི་དྭངས་བཅུད་འདུས་པའི་རིལ་བུ་དངོས་གྲུབ་རྣམ་པ་གཉིས་ལ་དབང་ཐོབ་པ་དེ་ཉིད་ཞལ་བསྲོའི་ཚུལ་དུ་སྦྱིན་ཅིང་ཤིས་པ་བརྗོད་པས་ཀྱང་མངའ་གསོལ་བར་མོས་ཤིག །
ཨོཾ་ཏཱ་རེ་ཏུཏྟཱ་རེ་ཏུ་རེ་ཧྲཱིཿབྷྲཱུྃ་བཛྲ་ཛྙཱ་ན་ཨཱ་ཡུ་ཥེ་སྭཱ་ཧཱ༔
ཞེས་དང་ཤིས་བརྗོད་འཐད་ཅིང་འོས་པ་བྱས་ལ་རོལ་མོ་དང་མེ་ཏོག་འཐོར་རོ། །
གསུམ་པ་རྗེས་ཀྱི་བྱ་བ་ནི།
དེ་ལྟར་ངོ་མཚར་རྨད་དུ་བྱུང་བའི་དག་སྣང་གི་ཆོས་སྡེ་འཆི་མེད་འཕགས་མའི་སྙིང་ཐིག་གི་སྨིན་བྱེད་སྒོ་འབྱེད་ཚེའི་རྗེས་གནང་ལེགས་པར་གྲུབ་པ་སྟེ།
འདིའི་ཁྱད་པར་གྱི་དགོས་པའང་རྡོ་རྗེའི་གསུང་ལས།
ལྟ་དགོངས་ལྡན་པའི་སློབ་དཔོན་གྱིས༔
རྡོ་རྗེའི་སློབ་མར་འདི་སྦྱིན་ན༔
བར་ཆད་གེགས་ཞི་ཚེ་བསོད་དང༔
གཉིས་མེད་ཡེ་ཤེས་རྒྱས་པར་འགྱུར༔
ཅེས་པས་བསྔགས་པ་ལྟར་གནས་སྐབས་དང་མཐར་ཐུག་གི་དགོས་པ་དུ་མ་དང་ལྡན་པ་ཡིན་པས་དད་གུས་ཀྱི་ངེས་ཤེས་ཆེན་པོས་འདིའི་རྣལ་འབྱོར་ལ་ཡིད་དམ་དུ་འཆའ་བ་སོགས་ཐུན་མོང་དང་ཁྱད་པར་གྱི་དམ་ཚིག་རྣམས་ཚུལ་བཞིན་དུ་བསྲུང་བར་བགྱིའོ་སྙམ་པས་འདིའི་རྗེས་ཟློས།
གཙོ་བོའི་ཇི་ལྟར་བཀའ་སྩལ་པ། །
དེ་དག་ཐམས་ཅད་བདག་གི་བགྱི། །
སོགས་གཏང་རག་མཎྜལ་ཕྱིན་སྤྱི་ལྟར་བྱས་ལ་སློབ་མ་གྱེས། མཆོད་བསྟོད་ནོངས་བཤགས་གཤེགས་གསོལ། བསྡུ་ལྡང་བསྔོ་སྨོན་བཀྲ་ཤིས་བཅས་བྱའོ། །
གདམས་པའི་བདུད་རྩི་ཁྱད་པར་ཅན། །
སྐལ་ལྡན་ཀུན་གྱིས་བཅུད་དུ་ཐོབ། །
ཚེ་དང་ཡེ་ཤེས་ལང་ཚོ་རྒྱས། །
དོན་གཉིས་ཕྲིན་ལས་མཁའ་ཁྱབ་ཤོག །
ཅེས་པའང་ཐམས་ཅད་མཁྱེན་གཟིགས་མཁན་ཆེན་རྡོ་རྗེ་འཆང་ངག་དབང་བསོད་ནམས་རྒྱལ་མཚན་ཞལ་སྔ་ནས་རིན་ཆེན་དང་པོའི་མེ་ཏོག་དང་བཅས་ཏེ་བཀའ་ལུང་སྤྱི་བོར་ཕེབས་པར་བརྟེན། གཏེར་ཆེན་མཁས་གྲུབ་ཡོངས་ཀྱི་སྤྱི་རྗེ་ཉིད་ལས་བཀའི་གནང་བ་དང་ཞལ་ཁྲིད་ཀྱི་བདུད་རྩི་གུས་པས་ནོས་ཏེ། པདྨ་གར་དབང་བློ་གྲོས་མཐའ་ཡས་ཀྱིས་དཔལ་དེ་བཱི་ཀོ་ཊིའི་སྒྲུབ་གནས་ཀྱི་སྙིང་པོར་བགྱིས་པ་དགེ་ལེགས་འཕེལ།། །།
