Praise to Noble Tārā—Tibetan

༄༅། །རྒྱལ་ཡུམ་སྒྲོལ་མ་ལ་བསྟོད་པ་དངོས་གྲུབ་རྒྱ་མཚོ་ཞེས་བྱ་བ།

ན་མོ་ཨཱརྻ་ཏཱ་རེ་ཡེ།

ཕུན་ཚོགས་དངོས་གྲུབ་གཏེར་ཆེན་རྗེ་བཙུན་མ། །སྤངས་རྟོགས་ཡོངས་རྫོགས་བདེ་གཤེགས་བཅོམ་ལྡན་མ། ། མཐའ་མེད་འཁོར་བའི་མཚོ་ལས་སྒྲོལ་མཛད་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

ལྷ་དང་ལྷ་མིན་ཀླུ་དབང་ཅོད་པན་ལ། །གང་གིས་ཞབས་པད་བཀོད་པའི་འོད་ཟེར་གྱི། ། ཕྲེང་བ་འཇིག་རྟེན་ཀུན་ན་རབ་མཛེས་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

རྣམ་དག་ཆོས་དབྱིངས་ཟླ་བའི་དཀྱིལ་འཁོར་དབུས། །ཏཱཾ་ཡིག་ལས་འཁྲུངས་མར་གད་ལྟ་བུའི་སྐུ། ། ཞལ་གཅིག་ཕྱག་གཉིས་ཞི་བའི་གཟུགས་ཅན་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

ཕྱག་གཡས་མཆོག་སྦྱིན་འགྲོ་ལ་དངོས་གྲུབ་སྟེར། །གཡོན་པ་དཀོན་མཆོག་གསུམ་མཚོན་ཕྱག་རྒྱ་ཡིས། ། ཨུཏྤལ་ཡུ་བ་ཐུགས་ཁར་འཛིན་མཛད་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

ཐབས་མཁས་འགྲོ་དོན་ལ་བཞེངས་ཞབས་གཡས་བརྐྱང་། །ཤེས་རབ་གཟུང་འཛིན་རབ་སྤངས་གཡོན་བསྐུམ་གྱིས། ། མི་འབྲལ་མཚོན་ཕྱིར་འཁྲིལ་བའི་ཚུལ་མཛད་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

སྐྲ་འཁྱིལ་མེ་ཏོག་གིས་བརྒྱན་མཛེས་པའི་དབུ། །ཅུང་ཟད་གཡོ་བའི་ཐུགས་རྗེའི་སྤྱན་ཟུར་གྱིས། ། མཐའ་དག་འགྲོ་ལ་རྟག་ཏུ་གཟིགས་མཛད་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

རྒྱབ་ཡོལ་ཟླ་བ་ལ་ནི་རྒྱབ་བརྟེན་ནས། །འགྱིང་བག་གཞོན་ནུ་ལང་ཚོ་འགྱིང་མཛད་ཅིང་། ། རྒྱན་མཆོག་རིན་ཆེན་ཀུན་གྱི་རྒྱན་ལྡན་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

ནུ་འབུར་ཟུང་མཛེས་ཉི་ཟླ་ལྟ་བུ་སྟེ། །དྲི་ཞིམ་ངད་ལྡན་མ་ལ་ཡ་ཡི་རི། ། ཨུཏྤལ་བསྣམས་པས་རྫིང་བུ་དང་མཚུངས་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

བཀྲ་ཤིས་ཨོཾ་གྱི་ང་རོས་རབ་དྲངས་ནས། །སྐྱོབ་མཛད་ཏཱ་རེས་འཇིགས་སྒྲོལ་ཏུཏྟཱ་རེ། ། མྱུར་མགྱོགས་ཏུ་རེ་སྭཱ་ཧཱ་དང་ལྡན་མ། །ཡི་དམ་ལྷ་མོ་དེ་ལ་བདག་སྐྱབས་མཆི། །

སྤྲིན་བྲལ་མཁའ་ལ་རྒྱུ་བའི་ཉི་ཟེར་གྱིས། །པད་མོ་གཞོན་ནུ་ཕྱེ་བ་ཇི་བཞིན་དུ། ། ཤེས་བྱའི་གནས་ལ་མཁྱེན་པ་རབ་རྒྱས་མ། །ཡི་དམ་ལྷ་མོའི་ཐུགས་ལ་བདག་སྐྱབས་མཆི། །

འཇིག་རྟེན་མགོན་པོའི་སྤྱན་ཆབ་ལས་འཁྲུངས་ཚེ། །མཐའ་ཡས་འགྲོ་བ་སྐྱོབ་པའི་དོན་མཛད་ཅེས། ། དམ་བཅའ་ཞལ་བཞེས་བསྙེལ་བ་མི་མངའ་བར། །བདག་དང་མཁའ་མཉམ་འགྲོ་ལ་བསྐྱབ་ཏུ་གསོལ། །

སྟོབས་སོགས་ཡོན་ཏན་ཀུན་གྱི་གཏེར་གྱུར་པ། །སྙིང་པོ་ཡོད་ཀྱང་དྲི་མས་བསྒྲིབས་གྱུར་ནས། ། ཡོན་ཏན་འབྱོར་བས་དབུལ་བའི་འགྲོ་རྣམས་ལ། །ཐུགས་རྗེའི་ཆུ་ཡིས་དྲི་མ་སྦྱང་དུ་གསོལ། །

བདེ་ནས་བདེ་བར་འགྲོ་བའི་ལམ་མཆོག་ལ། །ཐོས་བསམ་ཚུལ་གྱིས་ངེས་པ་རྙེད་གྱུར་ཀྱང་། ། བསྒོམས་པའི་རོ་མཆོག་མྱང་བར་མ་གྱུར་པ། །དམན་པ་བདག་ལ་ཉམས་རྟོགས་སྩལ་དུ་གསོལ། །

སྙིགས་དུས་བདེ་གཤེགས་བསྟན་པ་འཛིན་པ་ཡི། །ཕྱི་ནང་བར་ཆད་མཐའ་དག་ཉེར་ཞི་ནས། ། རྒྱལ་བས་བསྔགས་པའི་མཐུན་རྐྱེན་མ་ལུས་པ། །འབད་མེད་ལྷུན་གྱིས་གྲུབ་པར་མཛད་དུ་གསོལ། །

ཚེ་འདིའི་སྣང་བ་ནུབ་པར་གྱུར་མ་ཐག །འོད་དཔག་མེད་པའི་ཞིང་མཆོག་དམ་པ་དེར། ། རྗེ་བཙུན་སྒྲོལ་མའི་དྲུང་དུ་སྐྱེས་ནས་ཀྱང་། །ས་རབ་དགའ་བ་ཐོབ་པར་མཛད་དུ་གསོལ། །

རྒྱལ་ཡུམ་སྒྲོལ་མ་ལ་བསྟོད་པ་དངོས་གྲུབ་རྒྱ་མཚོ་ཞེས་བྱ་བ་འདི་ནི་གནས་སྐབས་དང་མཐར་ཐུག་གི་འདོད་པའི་དོན་ཞུ་བའི་ཆེད་དུ་ཤཱཀྱའི་དགེ་སློང་བསོད་ནམས་སེང་གེས་ལྕགས་ཕོ་སྟག་གི་རྒྱལ་གྱི་ཉི་མ་ལ་དགའ་བ་ཚལ་གྱི་དགོན་པར་སྦྱར་བའོ། །དགེའོ།། །།