Advice to Sangye Gyaltsen—Tibetan
༄༅། །སངས་རྒྱས་རྒྱལ་མཚན་གྱི་ཕྱག་ཏུ་ཕུལ་བའི་གདམས་པ།
དགེ་བཤེས་སངས་རྒྱས་རྒྱལ་མཚན་གྱི་ཕྱག་ཏུ་ཕུལ་བ།
ཁྱེད་ཁམས་བཟང་པར་ཡུལ་ཕྱོགས་སུ་སླེབ་ཡོད་འདུག་བ་ལེགས། སྤྱིར་སྤྲོས་པ་ཐམས་ཅད་བཅད་ནས་དགེ་སྦྱོར་ལ་དྲིལ་བ་འཐད།
འཇིག་རྟེན་ཆོས་བརྒྱད་ཀྱི་རྣམ་རྟོག་བྱུང་བའི་ཚེ་དྲན་ཤེས་བཞིན་གྱིས་ཟིན་པར་བྱས་ནས་མགོ་སྙོམས་པ་འཐད། རློམ་སེམས་བྱུང་ན་དགེ་རྩ་ཆུད་ཟོས་སུ་འགྲོ་བས་ངའོ་སྙམ་པའི་རྣམ་རྟོག་མེད་པ་འཐད། མི་སེམས་དང་བསྟུན་དྲགས་ན་གཞན་གྱི་ངོ་མི་ཟིན་པའི་སྟེང་དུ་རང་དོན་ཉམས་པས་བློ་ཐག་གཅད་པ་འཐད། ཧ་ཅང་གཞན་དང་མ་མཐུན་ན་མཐའ་མི་འཁྱོངས་པས་གཞན་དང་འགྲོགས་དུས་རང་ལུགས་སུ་གཞག་པ་འཐད། གསང་སྔགས་ཀྱི་ཉམས་ལེན་ཐམས་ཅད་ཀྱི་རྩ་བ་ཡིན་པས་དམ་ཚིག་ཚུལ་བཞིན་དུ་བསྲུང་བ་འཐད། དངོས་གྲུབ་ཐམས་ཅད་ཀྱི་རྩ་བ་བླ་མའི་རྣལ་འབྱོར་ལ་འབད་པ་བྱེད་པ་འཐད། སྙིགས་མའི་དུས་སུ་ཆོས་ཚུལ་བཞིན་དུ་བྱེད་པ་ལ་བར་ཆད་འབྱུང་བས་མཁའ་འགྲོ་ཆོས་སྐྱོང་ལ་བསྙེན་སྒྲུབ་བྱེད་པ་འཐད།
གདམས་པའི་རྒྱལ་པོ་འཐད་པ་བརྒྱད་ལྡན་འདི། །
དད་ཅིང་བརྩོན་པས་ཚུལ་བཞིན་ཉམས་བླངས་ན། །
གང་དུ་གནས་ཀྱང་རང་སེམས་བཤེས་གཉེན་ཡིན། །
དལ་འབྱོར་ལུས་ལ་འདུན་མ་གྲུབ་པར་མཛོད། །
དད་པའི་རྟེན་དུ་སེམས་དཔའ་ཆེན་པོའི་གདུང་ཐལ་ལས་གྲུབ་པའི་སྤྱན་རས་གཟིགས་ཀྱི་སྐུ་དངུལ་གྱིས་བརྒྱན་པ་གཅིག་ཡོད། ཁྱི་ལོ་ཧོར་ཟླ་ལྔ་པའི་ཚེ་བཅུ་ལ་ཐུབ་བསྟན་རྣམ་རྒྱལ་ནས་ཕུལ། །དགེའོ།།
