Vajra Akṣobhya Lineage Prayer—Tibetan

༄༅། །རྡོ་རྗེ་མི་འཁྲུགས་པའི་བརྒྱུད་འདེབས་བཞུགས་སོ།  །

སྣང་བ་མཐའ་ཡས་འཆི་མེད་པདྨ་འབྱུང་།  །

བདེ་ཆེན་རྒྱ་མཚོ་རྗེ་འབང་ལོ་ཙ་བ།  །

སྒྱུ་འཕྲུལ་རྡོ་རྗེ་བསོད་ནམས་ལྡེ་འུ་བཙན།  །

བཀྲ་ཤིས་འོད་ཟེར་རྗེ་དཔོན་དཀོན་མཆོག་མགོན།  །

ནམ་མཁའ་རྒྱ་མཚོ་དྲི་མེད་ཞིང་སྐྱོང་མགོན།  །

བརྒྱུད་སྲོལ་ཀུན་འདུས་སྨིན་གྲོལ་བདག་པོ་ལ།  །

གསོལ་བ་འདེབས་སོ་མཆོག་གི་དངོས་གྲུབ་སྩོལ།  །

བདེ་ལྡན་མངོན་དགའི་ཞིང་ཁམས་མངོན་སྣང་ཤོག  །

བདེ་གཤེགས་བཅོམ་ལྡན་མགོན་པོ་མི་འཁྲུགས་པ།  །

རྟེན་དང་བརྟེན་པའི་འཁོར་ལོ་ལྷུན་རྫོགས་པའི།  །

ཉམས་རོལ་སྤྲུལ་པར་བཅས་ལ་གསོལ་བ་འདེབས།  །

བདེ་ལྡན་མངོན་དགའི་ཞིང་ཁམས་མངོན་གྱུར་ཤོག  །

བདག་གི་སྒོ་གསུམ་མི་གཡོ་ཏིང་འཛིན་གྱིས།  །

སྒྲ་རྟོག་ཞལ་དང་རྡོ་རྗེ་གསུམ་དུ་དག  །

གྲུབ་པ་བརྒྱད་དང་རིག་འཛིན་རྣམ་པ་བཞི།  །

མངོན་གྱུར་མི་བསྐྱོད་རྡོ་རྗེའི་སྐུ་སྨིན་ཤོག  །

ཞེས་ཁྲོམ་ཐོག་བླ་མ་དམ་པ་ཆོས་ཀྱིས་གསུང་ངོར་ངེས་དོན་པས་བདེ་ཆེན་མངོན་དགའ་འདྲ་བའི་གནས་ནས་བྲིས་པ་དགེའོ།  །དགེའོ།།   །།