Guru Yoga—Tibetan

༄༅། །བླ་མའི་རྣལ་འབྱོར་ཡེ་ཤེས་གཟི་འབར་བཞུགས།

ན་མོ་གུ་རུ།

རང་གི་སྤྱི་བོར་ཆུ་སྐྱེས་གེ་སར་ལྟེར། །

ཐབས་ཤེས་ཉི་ཟླ་མཛེས་པའི་ཁྲི་སྟེང་ནས། །

དུས་གསུམ་རྒྱལ་ཀུན་ཡེ་ཤེས་འདུས་པའི་གཟུགས། །

དཀོན་མཆོག་ཀུན་འདུས་བླ་མ་ཀརྨ་པ། །

ཞི་འཛུམ་བདེ་ཆེན་རྒྱས་པའི་ཉམས་བརྒྱ་འབར། །

ཕྱག་གཉིས་བདེ་སྟོང་རྡོར་དྲིལ་ཐུགས་ཀར་བསྣོལ། །

ཞབས་ཟུང་རྡོ་རྗེའི་སྐྱིལ་མོ་ཀྲུང་གིས་བཞུགས། །

དབུ་ལ་ཞྭ་ནག་སྐུ་ལ་ཆོས་གོས་གསོལ། །

གནས་བཞིར་ཨོཾ་དཀར་ཨཱཿདམར་ཧཱུྃ་སྔོན་དང་། །

ཧོཿསེར་དེ་རྣམས་མར་མེ་ལྟ་བུ་འབར། །

ཡེ་ཤེས་ཆོས་སྐུའི་གཟི་བྱིན་འབར་བའི་ཀློང་། །

རྩ་གསུམ་རྒྱ་མཚོའི་འཕྲོ་འདུ་འགྱེད་བཞིན་གསལ། །

དཔལ་ལྡན་བླ་མ་མཚུངས་མེད་རྡོ་རྗེ་འཆང་། །

སངས་རྒྱས་ཀུན་དངོས་འགྲོ་མགོན་ཧེ་རུ་ཀར། །

སྙིང་ཁོང་རུས་པའི་གཏིང་ནས་གསོལ་བ་འདེབས། །

ཐུགས་རྗེས་གཟིགས་ཤིག་ཕྱི་ནང་བར་ཆད་གསོལ། །

བྱིན་གྱིས་རློབས་ཤིག་གྲུབ་གཉིས་དངོས་གྲུབ་སྩོལ། །

ཞེས་གསོལ་བཏབ་པས་སྐུ་ཡི་གནས་བཞི་ནས། །

འོད་ཟེར་རིམ་དང་གཅིག་ཅར་སྤྲོས་པ་ཡིས། །

ནད་གདོན་ཀུན་ཞི་ཚེ་བསོད་དཔལ་འབྱོར་རྒྱས། །

སྣང་བ་དབང་འདུས་གདོན་བགེགས་བྲལ་པར་བརླག །

དབང་བཞི་བསྐུར་ཞིང་སྒྲིབ་བྱང་སྐུ་བཞིར་སྨིན། །

གཉིས་མེད་ཡེ་ཤེས་དོན་གྱི་དགོངས་ཉམས་ལོན། །

ཀ་དག་ཆོས་སྐུའི་ངང་དུ་མཉམ་པར་བཞག །

ཀརྨ་པ་མཁྱེན་ནོ། །

ཞེས་གྲངས་མེད་བརྗོད། མཐར།

བླ་མ་དགྱེས་པས་འོད་ཞུ་རང་ལ་ཐིམ། །

བླ་མའི་ཐུགས་དང་རང་སེམས་དབྱེར་མེད་འདྲེས། །

མཐའ་བྲལ་ཟབ་མོ་ཀུན་ཏུ་བཟང་པོའི་དབྱིངས། །

གང་ཤར་འཛིན་མེད་རང་གྲོལ་ལམ་དུ་ཁྱེར། །

དགེ་འདིས་འགྲོ་ཀུན་ཉེས་པའི་གཡུལ་ལས་གྲོལ། །

ཐམས་ཅད་མཁྱེན་པའི་ཡེ་ཤེས་མཆོག་ཐོབ་ཤོག །

ཅེས་པའང་དད་ལྡན་འཇང་བ་ཀརྨ་རང་བྱུང་ནས་ཆེད་དུ་བསྐུལ་ངོར། དཔལ་ཀརྨ་པས་བྲིས།།