Brief Red Sur Offering—Tibetan

༄༅། །དམར་གསུར་མདོར་བསྡུས།

ཨོཾ་ཨཱཿཧཱུྃ།

ཐོག་མེད་ངར་འཛིན་བག་ཆགས་ཀྱིས། །

དུག་ལྔ་འཁྲུགས་པའི་རང་གཟུགས་ནི། །

རྒྱལ་འགོང་དམ་སྲི་མོ་འདྲེ་སོགས། །

སྡོམ་ཤོར་དམ་ཉམས་གནོད་སེམས་ཅན། །

རྟག་ཏུ་གཞན་ལ་འཚེ་བྱེད་ཅིང་། །

རྣམ་དཀར་བསྒྲུབ་ལ་བར་དུ་གཅོད། །

བློ་བསྒྱུར་འཁོན་འཐབ་ཕུང་སྣ་འདྲེན། །

ཟས་ནོར་ལོངས་སྤྱོད་དཔལ་ལ་བརྐུ། །

ཕྱི་བཞིན་འབྲང་བའི་སྒབ་འདྲེའི་རིགས། །

ལན་ཆགས་མགྲོན་གྱུར་ཐམས་ཅད་ལ། །

ཤ་ཁྲག་ལ་སོགས་མཁོ་རྒུའི་རྫས། །

འདོད་རྒུར་འཆར་བའི་དྲི་གསུར་སྤྲིན། །

ནམ་མཁའ་མཛོད་དུ་སྤྲོས་བྱས་ཏེ། །

ཕམ་རྒྱལ་འཐབ་རྩོད་མེད་པར་བསྔོ། །

དགའ་མགུ་ཡི་རངས་ཚིམས་གྱུར་ནས། །

བུ་ལོན་ལན་ཆགས་ཤ་འཁོན་བྱང་། །

རྒྱུད་ལ་བྱང་ཆུབ་སེམས་སྐྱེས་ཏེ། །

ཐར་པའི་བདེ་བ་ཐོབ་གྱུར་ཅིག །

བདེན་གཉིས་བསླུ་བ་མེད་པའི་མཐུས། །

སྨོན་ལམ་ཡོངས་སུ་འགྲུབ་པར་ཤོག །

ཅེས་དང་ཆོས་སྦྱིན་བསྔོ་བ་སོགས་བྱའོ།།

ཞེས་པའང་འཁྲུལ་ཞིག་རྡོ་རྗེའི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།