Offering Prayer to Mātṛkā Pukkasī—Tibetan

༄༅། །མཆོད་རྟེན་བྱ་རུང་ཁ་ཤོར་གྱི་ཞིང་སྐྱོང་མ་མོ་པུཀྐ་སིའི་གསོལ་མཆོད་མདོར་བསྡུས་བཞུགས་སོ། །

ན་མོ་པདྨ་ཀ་ར་ཡེ།

གཙང་མའི་མཆོད་གཏོར་བཤམས་ལ།

རྃ་ཡྃ་ཁྃ་གྱིས་བསང་སྦྱང་།

ཨོཾ་ཨཱཿ་ཧཱུྃ་གིས་བྱིན་རླབས་ལ།

ཧཱུྃ། ཡུལ་གྱི་མིང་ནི་བལ་པོའི་ཡུལ། །

དུར་ཁྲོད་མིང་ནི་ལྷུན་གྲུབ་བརྩེགས། །

མཆོད་རྟེན་བྱ་རུང་ཁ་ཤོར་གྲགས། །

མ་མོའི་མཚན་ནི་པུཀྐ་སི། །

གནས་ཡུལ་སྐྱོང་བའི་མཐུ་བོ་ཆེ། །

དོན་ལ་དབྱིངས་ཀྱི་ཡུམ་ཆེན་ཡང་། །

རྣམ་པ་ཞིང་སྐྱོང་མ་མོའི་ཚུལ། །

གང་འདུལ་རྣམ་འགྱུར་ཅིར་ཡང་སྟོན། །

སྔོན་ཚེ་ཁྲག་འཐུང་ཧེ་རུ་ཀས། །

དབང་དུ་བསྡུས་ནས་གྲོགས་སུ་བཀོལ། །

དཀྱིལ་འཁོར་ཆེན་པོ་གཉེར་དུ་གཏད། །

བཀའ་ཡི་བསྟན་པ་སྐྱོང་བར་བསྐོས། །

གཡར་དམ་ཇི་བཞིན་ཐ་ཚིག་ལས། །

མི་འདའ་རྡོ་རྗེའི་རྣལ་འབྱོར་མ། །

རང་རྩལ་མ་མོ་འབུམ་སྡེར་བཅས། །

གནས་ནས་བསྐུལ་ལོ་ད་ཚུར་གཤེགས། །

དགྱེས་ཤིང་བརྩེ་བས་མྱུར་བྱོན་ལ། །

སྒྲུབ་ཅིང་མཆོད་པའི་གནས་འདིར་བཞུགས། །

ཕྱི་མཆོད་ཉེར་སྤྱོད་ཚར་དུ་དངར། །

ནང་མཆོད་འདོད་ཡོན་སྤྲིན་དུ་གཏིབས། །

གསང་མཆོད་སྨན་རཀ་གཏོར་ཚོགས་སྤུངས། །

ཡང་གསང་སྦྱོར་སྒྲོལ་བདེ་བ་ཆེ། །

ཟད་མི་ཤེས་པའི་ལོངས་སྤྱོད་ཀྱིས། །

གསོལ་ལོ་མཆོད་དོ་ཐུགས་དམ་བསྐང་། །

འགལ་འཁྲུལ་ནོངས་པ་བཟོད་པར་གསོལ། །

ཡོན་ཏན་དཔལ་ལ་མངོན་པར་བསྟོད། །

མི་འབྲལ་སྲུང་མར་མངའ་གསོལ་ལོ། །

སྔོན་གྱི་ཐུགས་དམ་ཞལ་བཞེས་དགོངས། །

གསང་ཆེན་བསྟན་དང་བསྟན་འཛིན་སྡེ། །

ཆོས་འཁོར་མཆོད་རྟེན་གཡེལ་མེད་སྐྱོངས། །

མི་མཐུན་ཉེས་པའི་ཚོགས་རྣམས་སོལ། །

མཐུན་རྐྱེན་ལེགས་ཚོགས་གོང་དུ་སྤོར། །

སྐྱེ་འགྲོའི་སྣང་བ་དགེ་ལ་སྒྱུར། །

གནོད་བྱེད་འབྱུང་པོ་ཚར་ཆོད་ཅིག །

མདོར་ན་བདག་ཅག་རྣལ་འབྱོར་གྱི། །

ཅི་བསམ་འགྲུབ་པའི་ཕྲིན་ལས་མཛོད། །

ཞེས་པའང་པདྨའི་ངོར་འཇིགས་བྲལ་ཡེ་ཤེས་རྡོ་རྗེས་སོ། །