Palchen Düpa Kangwa—Tibetan
༄༅། །ཐུགས་སྒྲུབ་དཔལ་ཆེན་འདུས་པའི་ལས་བྱང་ལ་སྦྱོར་རྒྱུའི་བསྐང་བ་མདོར་བསྡུས་ནི།
ན་མ་ཤྲཱི་ཧེ་རུ་ཀ
བསྐང་རྫས་ནམ་མཁའ་མཛོད་ཀྱི་སྔགས་རྒྱས་བརླབ་ལ།
ཧཱུྃ། ཆོས་དབྱིངས་ཀུན་ཁྱབ་ཡེ་ཤེས་ཆེན་པོའི་རྩལ། །
འགགས་མེད་སྒྱུ་འཕྲུལ་དྲྭ་བའི་རོལ་མོ་ནི། །
སྣང་བའི་དངོས་ཀུན་དག་ཆེན་རྡོ་རྗེའི་ཞིང་། །
ལྷུན་གྲུབ་རིག་པ་སྣང་སྲིད་གཞི་བཞེངས་ཆེའི། །
དཀྱིལ་འཁོར་ཡོངས་རྫོགས་འོག་མིན་ཆེན་པོའི་གནས། །
གཡོ་བའི་དངོས་སྣང་དག་པ་རབ་འབྱམས་ཀྱི། །
ཡེ་ཤེས་ནམ་མཁའི་རྡོ་རྗེར་ལྷུན་རྫོགས་པའི། །
བདེ་ཆེན་མཆོག་གི་བདུད་རྩིའི་མཆོད་སྤྲིན་གཏེར། །
ཕྱི་ལྟར་ཉེར་སྤྱོད་འདོད་པའི་ཡོན་ཏན་རྫས། །
མཆོད་ཡོན་ཞབས་བསིལ་མེ་ཏོག་བདུག་སྤོས་དང་། །
སྣང་གསལ་དྲི་ཆབ་ཞལ་ཟས་རོལ་མོའི་སྤྲིན། །
ནང་ལྟར་ཡུལ་དྲུག་དབྱིངས་སུ་ཐིམ་པའི་རྩལ། །
རྡོ་རྗེ་སྒེག་བཞད་གླུ་དང་གར་མཁན་མ། །
མཆོད་པའི་ལྷ་མོས་འདོད་ཡོན་ཆར་དུ་འབེབས། །
གསང་བ་སྦྱོར་སྒྲོལ་སྨན་གཏོར་རཀྟ་སོགས། །
ཡེ་ཤེས་སྒྱུ་མ་ལོངས་སྤྱོད་མཆོད་པའི་རྫས། །
ཀུན་བཟང་རིག་པ་རང་སྣང་རོལ་པའི་སྤྲིན། །
ཆོས་ཀྱི་དབྱིངས་ལྟར་འདོད་དགུའི་ཆར་འབེབས་པས། །
བླ་མ་ཧེ་རུ་ཀ་དཔལ་ཐུགས་དམ་བསྐངས། །
ཆེ་མཆོག་རྡོ་རྗེ་སྲིན་པོའི་ཐུགས་དམ་བསྐངས། །
དཔལ་ཆེན་ཡང་དག་ལྷ་ཚོགས་ཐུགས་དམ་བསྐངས། །
འཇམ་དཔལ་དུས་དགྲའི་ལྷ་ཚོགས་ཐུགས་དམ་བསྐངས། །
རྟ་མཆོག་དབང་གི་ལྷ་ཚོགས་ཐུགས་དམ་བསྐངས། །
ཐལ་འབྱིན་ཕུར་པའི་ལྷ་ཚོགས་ཐུགས་དམ་བསྐངས། །
རྦོད་གཏོང་མ་མོའི་ལྷ་ཚོགས་ཐུགས་དམ་བསྐངས། །
རིག་འཛིན་སློབ་དཔོན་ལྷ་ཚོགས་ཐུགས་དམ་བསྐངས། །
འཇིག་རྟེན་མཆོད་བསྟོད་ལྷ་ཚོགས་ཐུགས་དམ་བསྐངས། །
དྲག་སྔགས་དམོད་པའི་ལྷ་ཚོགས་ཐུགས་དམ་བསྐངས། །
བདུན་བརྒྱ་ཉེར་ལྔའི་ལྷ་ཚོགས་ཐུགས་དམ་བསྐངས། །
མདོར་ན་ཡེ་ཤེས་ཀློང་དགུའི་རྣམ་རོལ་ལས། །
གང་འདུལ་སྒྱུ་འཕྲུལ་དྲ་བའི་ཟློས་གར་གྱིས། །
དོན་གཉིས་འདོད་པ་ཡོངས་སུ་རྫོགས་མཛད་པ། །
སྒྲུབ་སྡེ་བཀའ་བརྒྱད་ལྷ་ཚོགས་ཐུགས་དམ་བསྐངས།
ཧཱུྃ། དེ་ལྟར་ཐུགས་དམ་བསྐང་ཞིང་མཆོད་པའི་མཐུས། །
བདག་གཞན་སྒོ་གསུམ་ཉེས་ཚོགས་ཡོངས་དག་ནས། །
རྩ་གསུམ་དཀྱིལ་འཁོར་རྒྱ་མཚོའི་སྤྱི་གཟུགས་མཆོག །
ཧེ་རུ་ཀ་དཔལ་ཚེ་འདིར་མངོན་འགྲུབ་ཤོག །
ཅེས་པའང་བཙུན་པ་ཟླ་བའི་མིང་ཅན་གྱི་ངོར་སྤྲང་པོ་འཇིགས་མེད་པས་སོ། །
