Dukngal Rangdrol Empowerment Extracts—Tibetan
༄༅། །གསང་སྒྲུབ་ཐུགས་རྗེ་ཆེན་པོ་སྡུག་བསྔལ་རང་གྲོལ་གྱི་དབང་ཆོག་འོད་དཀར་མཐའ་ཡས།
ཀྱེ། ཁྲོ་བོ་མི་ཟད་འབར་བའི་སྐུ། །
མཚོན་ཆ་སྣ་ཚོགས་ཕྱག་ན་བསྣམས། །
བདག་ཅག་འཁོར་བ་ལས་བསྒྲལ་ཕྱིར། །
ཁྱེད་ཀྱིས་གནང་སྟེ་བཏང་དུ་གསོལ། །
སློབ་མས།
བླ་མ་རྡོ་རྗེ་འཛིན་པ་དང་། །
དཀྱིལ་འཁོར་ལྷ་ཚོགས་སྤངས་ནས་ནི། །
སྐྱོབ་པ་གཞན་ན་མ་མཆིས་པས། །
སྒོ་ཕྱེ་ཐར་པའི་གྲོང་བསྟན་འཚལ། །
ཀུན་མཁྱེན་ཡེ་ཤེས་ཕུང་པོ་ཅན། །
སྲིད་པའི་འཁོར་ལོ་རྣམ་སྦྱོང་བ། །
དེ་རིང་བཤད་པའི་རིན་ཆེན་གཏེར། །
གཙོ་བོས་བདག་ལ་བཀའ་དྲིན་སྩོལ། །
ན་མོ། མཐའ་མེད་འཁོར་བ་སྡུག་བསྔལ་རང་བཞིན་ལ༔
དབང་མེད་སྤྱོད་པའི་བདག་སོགས་སེམས་ཅན་ཀུན༔
མཆོག་གསུམ་ངོ་བོ་འཕགས་མཆོག་ཐུགས་རྗེའི་ལྷར༔
སྙིང་ནས་གདུང་ཤུགས་དྲག་པོས་སྐྱབས་སུ་མཆི༔
ཧོཿ ཕ་མ་རིགས་དྲུག་སྙིང་རྗེའི་ཡུལ་གྱུར་ཀུན༔
རང་ངོ་མ་ཤེས་འཁྲུལ་པའི་ལས་ལ་སྤྱོད༔
ཚད་མེད་སྙིང་རྗེས་བྱང་ཆུབ་ལམ་དགོད་ཕྱིར༔
སྨོན་འཇུག་དོན་དམ་སེམས་མཆོག་བསྐྱེད་པར་བགྱི༔
ཧོཿ དུས་གསུམ་བཞུགས་པའི་སྐྱབས་གནས་ཐམས་ཅད་ལ༔
གུས་པས་ཕྱག་འཚལ་ཕྱི་ནང་མཆོད་པ་འབུལ༔
མི་དགེ་སྡིག་པའི་ལས་ཀུན་མཐོལ་ལོ་བཤགས༔
དགེ་ལ་ཡི་རང་ཆོས་འཁོར་བསྐོར་བ་བསྐུལ༔
བཞུགས་གསོལ་འདེབས་སོ་དགེ་རྩ་བྱང་ཆུབ་བསྔོ༔
ཀུན་ཀྱང་འཕགས་པའི་གོ་འཕང་ཐོབ་པར་ཤོག༔
ཐུགས་རྗེ་ཆེན་པོ་སྐྱབས་ཀྱི་མཆོག་ཏུ་འཛིན། །
འགྲོ་བའི་དོན་དུ་སྨོན་འཇུག་སེམས་བསྐྱེད་ཅིང་། །
སྐུ་གསུང་ཐུགས་དང་མཉམ་སྦྱོར་གསང་སྔགས་ཀྱི། །
དམ་ཚིག་སྡོམ་པ་རྟག་ཏུ་བསྐྱང་བར་བགྱི། །
ཀྱཻ། ཐུགས་རྗེ་ཆེན་པོའི་ལྷ་ཚོགས་དང་། །
བླ་མ་ཡི་དམ་མཁའ་འགྲོ་དགོངས། །
སྒོ་བ་ཆེན་པོ་ཁྱེད་རྣམས་ཀྱིས། །
སྒོ་ཕྱེ་ཐར་པའི་གྲོང་བསྟན་འཚལ། །
ཨོཾ་ན་མ་ཏེ་ཧཱུྃ།
ཨོཾ་ན་མ་མི་ཧཱུྃ།
ཨོཾ་ན་མོ་ན་མ་ཧཱུྃ།
ཀྱཻ་ཐུགས་རྗེ་ཆེན་པོའི་དཀྱིལ་འཁོར་དུ། །
འབྲེལ་བའི་མེ་ཏོག་འདི་དོར་བས། །
ལས་འཕྲོ་གང་ཡོད་ལྷ་དང་མཇལ་བར་ཤོག །
པྲ་ཏཱིཙྪ་བཛྲ་ཧོ།
རྩ་བ་སྐུ་གསུང་ཐུགས་མཆོག་དང་། །
ཡན་ལག་དམ་ཚིག་ཉི་ཤུ་ལྔ། །
མེད་དང་གཅིག་པུ་ཕྱལ་པ་སོགས། །
ཆོ་ག་བཞིན་དུ་བསྲུང་བར་བགྱི། །
གཙོ་བོས་ཇི་ལྟར་བཀའ་བསྩལ་པ། །
དེ་དག་ཐམས་ཅད་བདག་གིས་བགྱི། །
ཁྱེད་ལ་བདག་ཀྱང་ཡོངས་སུ་འབུལ། །
སློབ་མར་བཟུང་ནས་སྤྱད་དུ་གསོལ། །
