Prayer to Māratika—Tibetan

༄༅། །རྡོ་རྗེའི་གནས་མཆོག་འཆི་བ་མཐར་བྱེད་ཀྱི་གསོལ་འདེབས།

རྡོ་རྗེའི་བླ་མ་པདྨ་སཾ་བྷ་ཝ། །

རྡོ་རྗེའི་སྐྱེ་འཆི་མེད་པའི་སྐུར་བཞེངས་པའི། །

རྡོ་རྗེའི་གནས་མཆོག་འཆི་བ་མཐར་བྱེད་ཅེས། །

རྡོ་རྗེ་ཚེ་ཡི་དཀྱིལ་འཁོར་གསོལ་བ་འདེབས། །

ཕྱི་ལྟར་རི་བྲག་སྨན་ཤིང་ལྗོན་ཚལ་མཛེས། །

ནང་ལྟར་རྡོ་རྗེ་ཕུང་པོའི་ཙིཏྟའི་དབྱིབས། །

དོན་ལ་འཆི་མེད་རྡོ་རྗེ་བཀོད་པའི་ཚལ། །

རང་སྣང་པདྨ་དྲྭ་བར་གསོལ་བ་འདེབས། །

ཡེ་ཤེས་སྐུ་ཅན་ལྷ་དང་ཌཱ་ཀི་བཞུགས། །

ཚེ་དང་ཡེ་ཤེས་ཡོན་ཏན་མཐའ་ཡས་ཞིང་། །

འཆི་མེད་རྡོ་རྗེའི་གྲོང་ཁྱེར་ཆེན་པོ་ལ། །

མི་ཕྱེད་དད་མོས་གུས་པས་གསོལ་བ་འདེབས། །

ཀུན་བརྟགས་མཚན་མའི་སྐྱེ་འཆི་འཁྲུལ་པ་དག །

ཡོངས་གྲུབ་འཕོ་མེད་རྡོ་རྗེའི་སྲོག་ཏུ་ཤར། །

དག་པའི་གཞན་དབང་ཐིག་ལེ་ཆེན་པོའི་སྲོག །

པདྨ་ཚེ་མཐའ་ཡས་པ་མངོན་གྱུར་ཅིག །

ཅེས་སྒྲུབ་བརྩོན་པུཎྱེ་ལཀྵྨཱི་ནས་རྟེན་བཅས་བསྐུལ་ངོར་རྒྱལ་ཁམས་ཀྱི་འཁྱམས་པོ་མངྒ་ལས་གནས་དེར་ལྷག་པའི་ཚེ་གསོལ་བ་བཏབ་པས་འགྲོ་ཀུན་བདེ་ཆེན་པདྨ་འོད་འབར་གྱི་གོ་འཕང་ཐོབ་པའི་རྒྱུར་གྱུར་ཅིག། །།