Abbreviated Daily Practice of Zabtik Drolchok—Tibetan
༄༅། །དགོངས་གཏེར་སྒྲོལ་མའི་ཟབ་ཏིག་སྒྲོལ་མའི་རྒྱུན་ཁྱེར་བསྡུས་པ་བཞུགས་སོ།།
ན་མོ་གུ་རུ་ཨཱརྻ་ཏཱ་རཱ་ཡཻ།
སྐྱབས་སེམས་ནི།
མདུན་གྱི་ནམ་མཁར་རྗེ་བཙུན་མ་མངོན་སུམ་བཞུགས་པར་མོས་ལ།
ན་མོ།
དཀོན་མཆོག་ཀུན་དངོས་རྗེ་བཙུན་མར། །
བདག་སོགས་འགྲོ་ཀུན་སྐྱབས་སུ་མཆི། །
བྱང་ཆུབ་སྨོན་པའི་སེམས་བསྐྱེད་ནས། །
ཟབ་མོའི་ལམ་ལ་འཇུག་པར་བགྱི། །
རང་ཉིད་སྐད་ཅིག་དྲན་རྫོགས་སུ༔
རྗེ་བཙུན་འཕགས་མའི་སྐུར་གསལ་བའི༔
ཐུགས་ཀར་ཟླ་སྟེང་ཏཱྃ་ལྗང་གུ༔
དེ་ལས་འོད་ཟེར་དཔག་ཡས་འཕྲོས༔
འཕགས་མ་རྣམ་འཕྲུལ་ཉེར་གཅིག་དང་༔
དཀོན་མཆོག་རྒྱ་མཚོ་སྤྲིན་འཕྲོ་བ༔
མདུན་གྱི་ནམ་མཁར་སྤྱན་དྲངས་གྱུར༔
པདྨ་ཀ་མ་ལཱ་ཡ་སྟྭཾ༔
བསྟོད་པའི་རྒྱལ་པོའི་རྒྱུད་ཕྱག་འཚལ་ཉེར་གཅིག་ཚར་གཅིག་བརྗོད།
ཕྱག་གཡས་མཆོག་སྦྱིན་ཕྱག་རྒྱ་ཉིད༔
སྐྱབས་སྦྱིན་ཕྱག་རྒྱར་གྱུར་པའི་འོག༔
བདག་དང་བསྲུང་བྱ་ཀུན་ཚུད་ནས༔
འཇིགས་པ་ཀུན་ལས་དབུགས་དབྱུང་གྱུར༔
ཅེས་མོས་ལ་ཕྱག་འཚལ་ཉེར་གཅིག་ཚར་གཅིག་བརྗོད།
སྐུ་ལས་བདུད་རྩིའི་ཆུ་རྒྱུན་བབས༔
རང་དང་བསྲུང་བྱའི་སྤྱི་བོ་ནས༔
ཞུགས་ཏེ་ལུས་ཀུན་གང་བ་ཡིས༔
བྱིན་རླབས་མ་ལུས་ཞུགས་པར་གྱུར༔
ཅེས་མོས་ལ་ཕྱག་འཚལ་ཉེར་གཅིག་ཚར་གཅིག་བརྗོད།
མདུན་བསྐྱེད་འོད་ཞུ་རང་ལ་ཐིམ༔
དབྱེར་མེད་ཉིད་དུ་བྱིན་རླབས་པས༔
རང་ཉིད་འཕགས་མ་སྒྲོལ་མའི་སྐུ༔
སྣང་ལ་རང་བཞིན་མེད་པར་གྱུར༔
ཅེས་རང་ཉིད་འཕགས་མའི་གསལ་སྣང་དང་ང་རྒྱལ་ལ་སེམས་བཟུང་སྟེ་ཡི་གེ་བཅུ་པའི་བཟླས་པ་ཅི་འགྲུབ་མཐར།
ཨོཾ་ཏཱ་རེ་ཏུཏྟཱ་རེ་ཏུ་རེ་སྭཱ་ཧཱ།
ཡིག་བརྒྱ་དང༌།
ཨོཾ་བཛྲ་སཏྭ་ས་མ་ཡ། མ་ནུ་པཱ་ལ་ཡ། བཛྲ་སཏྭ་ཏྭེ་ནོ་པ་ཏིཥྛ་དྲྀ་ཌྷོ་མེ་བྷ་ཝ། སུ་ཏོ་ཥྱོ་མེ་བྷ་ཝ། སུ་པོ་ཥྱོ་མེ་བྷ་ཝ། ཨ་ནུ་རཀྟོ་མེ་བྷ་ཝ། སརྦ་སིདྡྷི་མྨེ་པྲ་ཡཙྪ། སརྦ་ཀརྨ་སུ་ཙ་མེ། ཙིཏྟཾ་ཤྲེ་ཡཾ། ཀུ་རུ་ཧཱུྂ། ཧ་ཧ་ཧ་ཧ་ཧོཿ བྷ་ག་ཝཱན། སརྦ་ཏ་ཐཱ་ག་ཏ་བཛྲ་མཱ་མེ་མུཉྩ་བཛྲཱི་བྷ་ཝ་མ་ཧཱ་ས་མ་ཡ་སཏྭ་ཨཱཿ
བཛྲ་མུཿ
ཞེས་བརྗོད་ལ་མགྲོན་ཐབས་ཀྱི་ལྷ་རྣམས་གཤེགས།
ལྷ་དང་རང་སེམས་དབྱེར་མེད་པ༔
ཆོས་དབྱིངས་གཉུག་མའི་ངང་དུ་བཞག༔
ཅེས་གནས་ལུགས་ཀྱི་ལྟ་བ་བསྐྱང༌།
དགེ་བ་འདི་ཡིས་མྱུར་དུ་བདག །
འཕགས་མ་སྒྲོལ་མ་འགྲུབ་གྱུར་ནས། །
འགྲོ་བ་གཅིག་ཀྱང་མ་ལུས་པ། །
དེ་ཡི་ས་ལ་འགོད་པར་ཤོག །
ཡིད་བཞིན་ནོར་དང་བུམ་པ་བཟང་པོ་ལྟར། །
བསམ་པའི་དོན་ཀུན་ཐོགས་མེད་སྩོལ་མཛད་པ། །
རྗེ་བཙུན་སྒྲོལ་མ་རྒྱལ་བ་སྲས་བཅས་ཀྱིས། །
མི་འབྲལ་ཐུགས་རྗེས་སྐྱོང་བའི་བཀྲ་ཤིས་ཤོག །
ཅེས་སོགས་ཤིས་པ་བརྗོད་ལ་མེ་ཏོག་འཐོར་རོ། །
ཅེས་པ་ལས་དགོངས་གཏེར་ཟབ་ཏིག་སྒྲོལ་མའི་གཏེར་གཞུང་ཆོག་བསྒྲིགས་བསྡུས་པ་འདི་ཡབ་རྗེ་དམ་པའི་ཞལ་སློབ་འཇར་མན་འོད་གསལ་རྡོ་རྗེ་ནས་བསྐུལ་བ་བཞིན་རྩི་ཀི་མཆོག་གླིང་སྐྱེས་སྤྲུལ་བཞི་པ་མི་འགྱུར་བདེ་བའི་རྡོ་རྗེ་ནས་ཆོག་བསྒྲིགས་བྲིས་པའོ།། །།
