Concise Practice Instruction—Tibetan

༄༅། །བློ་གྲོས་སེང་གེ་ལ་བསྐུལ་བའི་ཉམས་ལེན་མདོར་བསྡུས་བཞུགས།

ཨོཾ་སྭ་སྟི་སིདྡྷཾ། བླ་མ་དང་འཇམ་པའི་དབྱངས་ལ་ཕྱག་འཚལ་ལོ། །
རྟག་ཏུ་འཆི་བ་བསམ་པར་བྱ། །དེ་ཡིས་ཚེ་འདིའི་ཞེན་པ་ལྡོག །
འཁོར་བའི་ཉེས་དམིགས་དྲན་པར་བྱ། །སྲིད་ལ་སྨོན་པའི་ཡིད་བྲལ་འགྱུར། །
འགྲོ་ལ་བྱམས་བརྩེ་བསྒོམས་པ་ཡིས། །གཅིག་ཏུ་བདག་དོན་གཉེར་བ་ལྡོག །
ཆོས་རྣམས་སྟོང་པ་ཉིད་དུ་བསྒོམ། །མཚན་མར་འཛིན་པ་སྤོང་བར་འགྱུར། །
རང་ལུས་ལྷག་པའི་ལྷ་རུ་བསྒོམ། །དེ་ཡིས་ཐ་མལ་མངོན་ཞེན་ལྡོག །
རྟག་ཏུ་སྔགས་ཀྱིས་བཟླས་པ་བྱ། །དེ་ཡིས་ངག་གི་སྒྲིབ་པ་སྤོང༌། །
སྟོང་ཉིད་སྙིང་རྗེ་ཟུང་འཇུག་བསྒོམ། །ཡིད་ཀྱི་དྲི་མ་དག་པར་འགྱུར། །
སྤྱི་བོར་བླ་མ་མོས་གུས་བྱ། །བྱིན་བརླབས་ཡེ་ཤེས་ཉེ་བར་འགྱུར། །
བདེ་བ་དཀོན་མཆོག་དྲིན་དུ་བསམ། །འབྱོར་པའང་ལམ་དུ་འགྱུར་བ་ཡིན། །
གདུང་བས་ལས་ངན་འདག་པར་བསམ། །སྡུག་བསྔལ་མྱོང་བའང་ལམ་དུ་འགྱུར། །
དགེ་བ་གཞན་གྱི་དོན་དུ་བསྔོ། །མི་ཟད་པ་ཡི་གཏེར་དུ་འགྱུར། །
ཟབ་མོ་ཉམས་སུ་ལེན་པའི་ཚུལ། །མདོར་བསྡུས་གོ་བདེར་བཀོད་པ་ཡིན། །
དཔོན་བློ་གྲོས་སེང་གེས་བསྐུལ་ནས། འཕགས་པས་མེ་མོ་ཡོས་བུའི་ལོ་ཟླ་བ་གཉིས་པའི་ཚེས་གཉིས་ལ་དཔལ་ས་སྐྱར་ཡི་གེར་བཀོད་པའོ།། །།