Düpung Zilnön Vajrakīlaya Recitation—Tibetan
Deities › Vajrakīlaya | Collections & Cycles › Longchen Nyingtik | བོད་ཀྱི་བླ་མ། › བྱ་བྲལ་སངས་རྒྱས་རྡོ་རྗེ།
Düpung Zilnön Vajrakīlaya
© Deorali Choten Gonpa. Reproduced with permission.
༄༅། །ཀློང་སྙིང་ཕུར་པ་བདུད་དཔུང་ཟིལ་གནོན་གྱི་ཛཔ་དམིགས།
ཛཔ་དམིགས་ནི། ཛཔ་ཁང་དབྱེ་བ་སྔོན་དུ་འགྲོ་བས།
བདག་ཉིད་རྡོ་རྗེ་གཞོན་ནུ་ཆེའི། །
ཐུགས་ཀར་ཡེ་ཤེས་སེམས་དཔའ་ནི། །
རྡོར་སེམས་སྟངས་དཔྱལ་དཀར་གསལ་འཚེར། །
ཞི་བ་ལོངས་སྤྱོད་རྫོགས་སྐུ་ཡི། །
ཐུགས་ཀར་རྡོ་རྗེ་རྩེ་ལྔ་མཐིང་། །
ལྟེ་བར་ཉི་སྟེང་ཧཱུྃ་མཐིང་ནག །
དེ་མཐར་ཀཱི་ལ་ཡ་འབྲུ་དགུ །
སྤུ་ཡིས་བྲིས་པ་ལྟ་བུས་བསྐོར། །
དེ་ལས་འོད་ཟེར་རབ་འཕྲོས་པས། །
རྒྱལ་བའི་ཞིང་ཀུན་གཡོས་ཤིང་མཆོད། །
འགྲོ་བའི་སྒྲིབ་སྦྱངས་བདེ་ལ་བཀོད། །
དག་པའི་བརྟན་གཡོ་འབའ་ཞིག་གྱུར། །
རྒྱལ་ཀུན་གསང་གསུམ་བྱིན་རླབས་དབྱིག །
སྐུ་དང་ཡིག་འབྲུ་ཕྱག་མཚན་གྱི། །
རྣམ་པར་བྱུང་སྟེ་རང་ལ་ཐིམ། །
བྱིན་རླབས་དངོས་གྲུབ་ཀུན་ཐོབ་གྱུར། །
ཨོཾ་ནི་དཔལ་ཆེན༴ སོགས།
ཨོཾ་ནི་དཔལ་ཆེན་ཡབ་ཡིན་ཏེ༔
བཛྲ་ཤེས་རབ་ཡུམ་ཡིན་ནོ༔
ཀཱི་ནི་ཡེ་ཤེས་ཁྲོ་བོ་ལ༔
ལི་ནི་དབྱིངས་ཀྱི་ཁྲོ་མོ་ཡུམ༔
ཀཱི་ནི་ཐབས་ཀྱི་མཆེ་བ་ཅན༔
ལ་ནི་ཤེས་རབ་གཤོག་པ་ཅན༔
ཡ་ནི་སྲས་མཆོག་ཕུར་པ་སྟེ༔
ཧཱུྃ་ནི་ཕྱག་བརྙན་སྒོ་མ་བཞི༔
སརྦ་ཐམས་ཅད་འདུས་པ་སྟེ༔
བིག་ནི་དགྲ་དང་བགེགས་ཡིན་ཏེ༔
ནན་ནི་དགྲ་དང་བགེགས་མནན་ནོ༔
བཾ་ནི་དབང་དུ་སྡུད་པ་སྟེ༔
ཧཱུྃ་ནི་རླག་པར་བྱེད་པའོ༔
ཕཊ྄༔ཀྱིས་སྒྲོལ་བའི་ཕྲིན་ལས་མཛད༔
ཞེས་པའི་དམིགས་པ་སྲོག་ཏུ་བཟུང་ལ།
ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ།
ཞེས་འབྲུ་དགུ་པ་བཟླ་བ་ནི་བསྙེན་པའོ། །
རང་རང་སྔགས་ཀྱི་ཡིག་འབྲུ་ལས། །
སྔགས་ཕྲེང་གཉིས་པ་རེ་ཆད་པ། །
ལུ་གུ་རྒྱུད་དུ་འབྲེལ་བ་བྱུང་། །
རྡོ་རྗེའི་དབུས་ར་ནས་ཐོན་ཏེ། །
ཡེ་ཤེས་སེམས་དཔའི་སྐུའི་དབྱིབས་བརྒྱུད། །
ཞལ་ནས་བྱུང་སྟེ་བདག་རྩ་བའི། །
ཤངས་བུག་གཡས་ནས་མདུན་བསྐྱེད་ཀྱི། །
ཤངས་བུག་གཡོན་ཞུགས་ཐུགས་ཀར་ཐིམ། །
སྐུ་གསུང་ཐུགས་ལ་མཉེས་མཆོད་འབུལ། །
དབང་དང་དངོས་གྲུབ་མདུན་བསྐྱེད་ལྷའི། །
ཤངས་བུག་གཡས་ནས་ཚུར་བྱུང་བ། །
རང་གི་སྣ་བུག་གཡོན་ནས་ཞུགས། །
འཁོར་བས་བདག་མདུན་རྟེན་བརྟེན་པ། །
ཤིན་ཏུ་གསལ་ཞིང་འབར་བར་བྱས། །
དབང་བཞི་ཐོབ་ཅིང་སྒྲིབ་བཞི་དག །
མཆོག་ཐུན་དངོས་གྲུབ་ཐོབ་པར་གྱུར། །
ཞེས་དོ་ལིའི་དམིགས་པ་གཙོ་བོར་བཟུང་ལ།
ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་སརྦ་བིག་ནན་བཾ་ཧཱུྃ་ཕཊ།
ཅེས་ཡིག་འབྲུ་བཅུ་བཞི་པ་བཟླ་བ་ནི་ཉེ་བསྙེན།
ཡང་དམིགས་པ་གོང་ལྟར་གསལ་ལ།
ཨོཾ་བཛྲ་ཀཱི་ལི་ཀཱི་ལ་ཡ་ཧཱུྃ་སརྦ་བིག་ནན་བཾ་ཧཱུྃ་ཕཊ་ཛཿ་ཧཱུྃ་ཨཿ
ཞེས་ཡིག་འབྲུ་བཅུ་བདུན་པ་ཉིད་བསྙེན་པའི་འགྲོས་དང་སྦྱར་ནས་བཟླ་བ་ནི་སྒྲུབ་པའོ། །
སྒྲུབ་པ་ཆེན་པོ་ནི་ལུགས་འདིར་དམ་ཅན་ཉེ་བར་བསྙེན་པ་ཡིན་པས་དེ་ནི་ཕུར་པ་རྒྱུད་ལུགས་ལས་ཤེས་པར་བྱ་སྟེ་སྤྲོས་པས་ཆོག་གོ། །
ཞེས་པའང་པདྨའི་སྒྲུབ་གནས་བལ་ཡུལ་ཡང་ལེ་ཤོད་དུ་རང་གཞན་བདུད་བཞིའི་བར་ཆད་ལས་རྒྱལ་བའི་ཆེད་དུ་ཕུར་པ་བདུད་དཔུང་ཟིལ་གནོན་སྒོ་ནས་སྒྲུབ་ཕྲན་ཙམ་བགྱིས་སྐབས་ལས་དང་པོ་པ་རྣམས་འཇུག་པ་བདེ་ཕྱིར་ཉེ་བར་མཁོ་བ་ལ་བརྟེན་ནས་རྒྱུད་ཕུར་ལས་བྱང་ཆེ་འབྲིང་གི་དགོངས་པ་ཚིགས་བཅད་དུ་བསྡེབས་པ་པོ་ནི་རྡོ་རྗེ་ཕུར་པའི་རྣལ་འབྱོར་པ་ཁྲོ་རྒྱལ་རྡོ་རྗེ་སྟེ་འདིས་ཀྱང་དངོས་གྲུབ་རྣམ་གཉིས་འགུགས་པའི་ལྕགས་ཀྱུར་གྱུར་ཅིག། །།
