Dodrupchen Rinpoche Swift Rebirth Prayer—Tibetan

༄༅། །༧སྐྱབས་རྗེ་བདེ་བར་གཤེགས་པ་རྡོ་གྲུབ་ཆེན་བཞི་པའི་མྱུར་བྱོན་གསོལ་འདེབས་བཞུགས།

ཐེག་མཆོག་འོད་གསལ་རྡོ་རྗེ་རྩེ་མོའི་ལམ། །

ཀུན་མཁྱེན་ཡབ་སྲས་རིང་ལུགས་སྨིན་གྲོལ་གྱིས། །

སྐལ་ལྡན་རྗེས་འཛིན་སྙིགས་དུས་བསྟན་འགྲོའི་མགོན། །

ཐུབ་བསྟན་ཕྲིན་ལས་དཔལ་འབར་གསོལ་བ་འདེབས། །

མགོན་ཁྱེད་ཞི་བའི་དབྱིངས་སུ་མི་མནལ་བར། །

སླར་ཡང་བསྟན་དང་འགྲོ་བའི་དཔལ་མགོན་དུ། །

ཡང་སྤྲུལ་ཟླ་བ་གཞོན་ནུའི་ཚུལ་བསྟན་ནས། །

སྙིགས་འགྲོ་མཚན་མོའི་མགོན་དུ་མྱུར་འབྱོན་གསོལ། །

ཞེས་པའང་དིལ་མགོ་མཁྱེན་བརྩེའི་གསུང་གསོལ་འདེབས་ལ་ཁ་བསྒྱུར་བ་མཁན་ཆེན་ཀ་ཏྱ་ནའི་ངོར་རབ་འབྱམས་མིང་པས་ལྕགས་གླང་བོད་ཟླ་ ༡༡ ཚེས་ ༣༠ ལ་གསོལ་བ་བཏབ་པའོ།།