Calling the Guru from Afar—Tibetan

༄༅། །བླ་མ་རྒྱང་འབོད་བཞུགས་སོ།།

བླ་མ་མཁྱེན།

བླ་མ་མཁྱེན།

བླ་མ་མཁྱེན།

རིགས་རྣམས་ཀུན་གྱི་བདག་པོ། །

དཀྱིལ་འཁོར་ཀུན་གྱི་གཙོ་བོ། །

བརྟན་གཡོ་ཀུན་གྱི་ཁྱབ་བདག །

འཁོར་འདས་ཀུན་གྱི་དཔལ་མགོན། །

དྲིན་ཅན་རྩ་བའི་བླ་མ། །

ཐུགས་རྗེའི་སྤྱན་གྱི་གཟིགས་ཤིག །

མ་རིག་མུན་པས་བསྒྲིབས་ལ། །

ཐུགས་རྗེའི་སྤྱན་གྱི་གཟིགས་ཤིག །

འཆི་བ་ཡོང་སྙམ་མེད་ལ། །

ཐུགས་རྗེའི་སྤྱན་གྱི་གཟིགས་ཤིག །

ལྟོ་གོས་ཞེན་པ་ཅན་ལ། །

ཐུགས་རྗེའི་སྤྱན་གྱི་གཟིགས་ཤིག །

བློ་བསྐྱེད་ཡོང་རྒྱུ་མེད་ལ། །

ཐུགས་རྗེའི་སྤྱན་གྱི་གཟིགས་ཤིག །

སྐྱབས་མགོན་ཁྱེད་རང་མ་གཏོགས། །

རེ་ས་གཞན་ན་མི་འདུག །

འདི་ཕྱི་བར་དོ་གང་དུ། །

ཐུགས་རྗེའི་སྤྱན་གྱི་གཟིགས་ཤིག །

ཅེས་བླ་མ་རྒྱང་འབོད་འདི་ནི་དད་ཅན་སྙིང་གར་རྒྱལ་ལ་གདམས་པའོ།། །།