Yoga of the View—Tibetan

༄༅། །རྣལ་འབྱོར་བཞི་ལས་ལྟ་བའི་རྣལ་འབྱོར་བཞུགས་སོ༔

རྒྱ་གར་སྐད་དུ༔ ཌཱཀྐི་ནི་གཅ།།ཏུ།ན།ཤ༔ ཨུ་པ་དེ་ཤ༔ བོད་སྐད་དུ༔ མཁའ་འགྲོ་སྙིང་ཐིག་གི་རྣལ་འབྱོར་བཞིའི་མན་ངག སྐུ་གསུམ་གྱི་སྟོན་པ་བཅོམ་ལྡན་འདས་ལ་ཕྱག་འཚལ་ལོ༔ ཨོ་རྒྱན་པདྨ་བདག་འདྲ་ཡིས༔ རྒྱུད་ལུང་མན་ངག་དོན་བསྡུས་ནས༔ རྫོགས་ཆེན་གསང་སྔགས་སྙིང་ཐིག་གི༔ མན་ངག་རྣལ་འབྱོར་བཞི་རུ་བསྟན༔ ལས་ཅན་ཅིག་དང་འཕྲད་པར་ཤོག༔ རྒྱ་རྒྱ་རྒྱ༔ དེ་ལ་དང་པོ་རྫོགས་པ་ཆེན་པོ་སྙིང་ཐིག་གི་ཆོས་ཐམས་ཅད་ལྟ་སྒོམ་སྤྱོད་པ་འབྲས་བུ་བཞིར་གཏན་ལ་ཕབ་སྟེ༔ དང་པོ་ལྟ་བའི་རྣལ་འབྱོར་དུ་བྱེད་པ་ནི་དྲུག་སྟེ༔ ལྟ་བའི་ངོ་བོ༔ རྟོགས་ཚུལ༔ ངེས་ཚིག༔ དབྱེ་བ༔ ཉམས་སུ་བླང་ཐབས༔ ལྟ་བའི་མཚན་བསྟན་པའོ༔ དང་པོ་ལྟ་བའི་ངོ་བོ་ལ་གསུམ་སྟེ༔ ངོ་བོ་རང་བཞིན་ཐུགས་རྗེའོ༔ དང་པོ་ལྟ་བའི་ངོ་བོ་ནི༔ ཆོས་ཐམས་ཅད་རང་བཞིན་ཅིར་ཡང་མ་གྲུབ་པ་དེའོ༔ ལྟ་བའི་རང་བཞིན་ནི༔ སྟོང་པའི་རང་མདངས་འོད་དུ་གསལ་བ་དེའོ༔ ལྟ་བའི་ཐུགས་རྗེ་ནི་གང་ཤར་རང་སར་གྲོལ་བ་དེ་ལ་བྱའོ༔ ཐལ་འགྱུར་ལས༔ ལྟ་བའི་ངོ་བོ་མཐོང་བ་ལ༔ ཡིད་དཔྱོད་ཚིག་གིས་འགྱུ་ས་མེད༔ ཅེས་སོ༔ ད་རྟོགས་ཚུལ་ནི་ཕྱི་ནང་གསང་བ་གསུམ་སྟེ༔ ཕྱི་ཚོགས་དྲུག་གིས་བསྡུས་པའི་ཡུལ་སྣང་ཕྲ་རགས་ལ་བལྟས་པས༔ སྣང་ལ་རང་བཞིན་མེད་པ་རྒྱ་མཚོའི་གཟའ་སྐར་ལྟར་མཐོང་ཞིང་རྟོགས༔ ནང་ཆོས་ཉིད་སྟོང་པའི་ངོ་བོ་ལ་བལྟས་པས་ཐམས་ཅད་རང་བཞིན་མེད་པ་ནམ་མཁའི་དཀྱིལ་ལྟར་མཐོང་ཞིང་རྟོགས༔ གསང་བ་རིག་པ་ལ་བལྟས་པས་ཡིད་དཔྱོད་དུ་མ་ལུས་པར་དབང་པོས་མངོན་གསུམ་དུ་མཐོང་ཞིང་རྟོགས་པའོ༔ ཀློང་གསལ་ལས༔ ཕྱི་ནང་གསང་བ་ཐམས་ཅད་ཀྱང་༔ ངོ་བོ་ཉིད་དུ་མཐོང་ཞིང་རྟོགས༔ ཞེས་སོ༔ ད་ངེས་ཚིག་ནི༔ འཁོར་འདས་ཀྱི་ཆོས་ཐམས་ཅད་དབང་པོས་མངོན་གསུམ་དུ་མཐོང་བས་ལྟ་བ་ཞེས་བྱའོ༔ རྒྱུད་ལས༔ ཆོས་ཉིད་དབང་པོས་མཐོང་བ་ན༔ ལྟ་བ་ཞེས་ནི་དེ་ལ་བྱ༔ ཞེས་སོ༔ དབྱེ་བ་ནི་སྤྱིའི་ལྟ་བ་དང་༔ རང་བཞིན་གྱི་ལྟ་བ་གཉིས་སོ༔ དེ་ལ་སྤྱིའི་ལྟ་བ་ནི་ཐེག་པ་རིམ་དགུའི་འདོད་ལུགས་མི་འདྲ་བ་ཐ་དད་པ་རྣམས་སོ༔ རྒྱུད་ལས༔ རིས་ཆད་སོ་སོའི་འདོད་པ་ལ༔ ཡིད་དཔྱོད་འཛིན་པ་ཉིད་དུ་འདོད༔ ཅེས་པས༔ དེ་དག་ནི་དོན་མ་རྟོགས་པར་ཡིད་དཔྱོད་ཚིག་གི་ལྟ་བ་ཞེས་བྱའོ༔ རང་གཞུང་གི་ལྟ་བ་ནི་གོང་གི་ཕྱི་ནང་གསང་བ་གསུམ་པོ་དེའོ༔ ད་ཉམས་སུ་བླང་བ་ནི༔ ཕྱི་རོལ་གྱི་ཡུལ་སྣང་ལ་མ་ཡེངས་པར་བལྟས་པས༔ ཅིར་སྣང་རྨི་ལམ་དང་སྒྱུ་མ་ལྟ་བུར་མཐོང་ནས་འཁྲུལ་པ་མ་སྤངས་གནས་སུ་དག་ནས་ཉོན་མོངས་པ་རང་སར་གྲོལ་བའོ༔ ནང་འགྱུ་བྱེད་དྲན་པའི་སེམས་ལ་བལྟས་པས་འགྱུ་བྱེད་ཀྱི་རྟོག་པ་ཐམས་ཅད་བར་སྣང་གི་ན་བུན་ལྟར་རང་ཡལ་དུ་གྲོལ་བའོ༔ ཉི་ཟླ་ཁ་སྦྱོར་ལས༔ དམིགས་པས་གནས་པའི་ཡུལ་རྣམས་ལ༔ རང་བཞིན་མེད་པར་གང་གོམས་པ༔ དེ་ལ་སྣང་སྟོང་གཉིས་སུ་མེད༔ ཚོགས་དྲུག་མ་འགགས་ལྷུག་པའོ༔ ཞེས་པ་དང་༔ རྒྱུད་ལས༔ འགྱུ་བྱེད་ཉིད་ལ་ཚུར་བལྟས་པས༔ མ་སྤངས་རང་གྲོལ་སེར་བུ་འདྲ༔ ཞེས་སོ༔ གསང་བ་ཆོས་ཉིད་གསལ་མདངས་ཀྱི་ངང་ལ་མ་ཡེངས་པར་བལྟས་པས་ཆོས་སུ་འཛིན་པ་ཙམ་དང་བྲལ་ནས་ཀ་དག་གི་ངང་ལ་ཆོས་ཟད་པའོ༔ ཡི་གེ་མེད་པ་ལས༔ ལྟ་བ་མེད་པས་དེ་ལ་ལྟ་རུ་མེད༔ ལྟ་བ་བྱར་མེད་ངང་དུ་ཤེས་པར་བྱ༔ དེ་ལྟར་སྐྱེ་མེད་དོན་རྟོགས་ན༔ ལྟ་བའི་དོན་ལས་མི་འདའ་ལྟ་བ་ངང་གིས་མེད༔ དེ་ཡོད་མ་ཡིན་དེ་ཡི་ངང་དུ་གནས་པར་བྱའོ༔ ཞེས་སོ༔ ཡང་གསང་རིག་པ་མངོན་སུམ་གྱི་ངོ་བོ་ལ་མ་ཡེངས་པར་བལྟས་པས་དབང་པོས་མངོན་སུམ་དུ་མཐོང་བས་ཡིད་དཔྱོད་ཀྱི་ལྟ་བ་ལས་རང་གྲོལ་བའོ༔ རང་ཤར་ལས༔ རང་རིག་ལྟ་བ་འདི་ལྟར་གནས༔ གནས་ནི་ཙིཏྟའི་དཀྱིལ་ན་གནས༔ ལམ་ནི་བྲི་གུ་ཏ་ནས་འབྱུང་༔ ཡུལ་ནི་ནམ་མཁའ་སྟོང་པ་འོ༔ རྟོག་མེད་གསལ་པའི་ངོ་བོ་ལ༔ འཛིན་པའི་རྣམ་རྟོག་ངང་གིས་མེད༔ ཅེས་པ་དང་༔ རྩལ་རྫོགས་ལས༔ སངས་རྒྱས་ཀུན་གྱི་ལྟ་ཕུགས་ནི༔ དབྱིངས་རིག་གཉིས་ལས་མ་འདས་སོ༔ ཞེས་སོ༔ ད་ལྟ་བའི་མཚན་བསྟན་པ་ནི༔ ལྟ་བ་དེ་དག་ལ་མིང་དུ་བཏགས་ན་བྱ་བྲལ་ཡོངས་རྫོགས་ཀྱི་ལྟ་བ་ཞེས་བྱ་སྟེ༔ བརྩོན་འགྲུས་རབ་ལྷག་མེད་དུ་སངས་རྒྱའོ༔ འབྲིང་བར་དོར༔ ཐ་མ་སྤྲུལ་སྐུའི་ཞིང་ཁམས་སུ་སངས་རྒྱའོ༔ ཉི་ཟླ་ཁ་སྦྱོར་ལས༔ རབ་ལ་སྐྱེ་གཉིས་མི་དགོས་ཏེ༔ འབྲིང་པོ་སྐྱེ་གཉིས་མཚམས་སུ་འོ༔ ཐ་མ་རྣམས་ནི་དབུགས་ཕྱུང་སྟེ༔ སྤྲུལ་པ་པོས་ནི་རང་རྒྱུད་གྲོལ༔ ཅེས་སོ༔ ཐེག་པ་གཞན་གྱིས་ནི་འདིའི་དོན་མ་རྟོགས་ལ༔ འདིའི་རྣལ་འབྱོར་པས་ནི༔ བལྟས་པས་མི་གྲོལ་བ་གང་ཡང་མེད་དོ༔ སྔ་ཕྱི་བར་གསུམ་དུ་འཁྲུལ་པ་མེད་པར་རྟོགས་པས་ཆོས་ཟད་བྱར་མེད་ཡོངས་རྫོགས་ཀྱི་ལྟ་བ་ཞེས་བྱའོ༔ དེ་ནི་ལྟ་བའི་རྣལ་འབྱོར་ཞེས་བྱའོ༔ ཨི་ཐི༔