Yoga of Fruition—Tibetan

༄༅། །རྣལ་འབྱོར་བཞི་ལས༔ འབྲས་བུའི་རྣལ་འབྱོར་བཞུགས་སོ༔ ༔

དཔལ་ཀུན་ཏུ་བཟང་པོ་ལ་ཕྱག་འཚལ་ལོ༔ འབྲས་བུ་ལ་རྒྱུན་དུ་བྱེད་པའི་རྣལ་འབྱོར་ལ་དྲུག་སྟེ༔ འབྲས་བུའི་ངོ་བོ༔ ཚུལ་ལམ་ཐབས༔ ངེས་ཚིག༔ དབྱེ་བ༔ ཉམས་སུ་བླང་ཐབས༔ མཚན་བསྟན་པའོ༔ དང་པོ་འབྲས་བུའི་ངོ་བོ་ནི༔ བཙན་ས་ཟིན་ཏེ་མི་ལྡོག་པ་ལ་ཟེར༔ དོན་གྱི་ངོ་བོ་འཁྲུལ་མེད་ལ་བརྟན་པ་ཐོབ་པས༔ འབྲས་བུ་སྨིན་ཏེ་རྒྱུར་མི་ལྡོག་པས༔ སད་ཁྱེར་འབྲས་བུའམ༔ བསེ་ཤིང་གི་འབྲས་བུ་ལྟ་བུའོ༔ རྒྱུད་ལས༔ འབྲས་བུ་ཞེས་བྱ་བཙན་ས་ཟིན༔ རྒྱལ་པོ་གདན་ས་ཟིན་པ་ལྟར༔ མི་འགྱུར་ལྡོག་པ་མེད་པ་འོ༔ ཞེས་སོ༔ འབྲས་བུ་སྨིན་པའི་ཚུལ་ནི་བརྟན་པ་ཐོབ་སྟེ་རྐྱེན་གྱིས་མི་འཇིག་པའོ༔ རྒྱུད་ལས༔ འབྲས་བུ་སྨིན་ཚུལ་བསྟན་པ་ནི༔ རྐྱེན་གྱིས་མི་འཇིག་ལྡོག་པ་མེད༔ ཅེས་སོ༔ ངེས་ཚིག་ནི༔ ལམ་ཡོངས་སུ་སྨིན་པས་འབྲས་བུ་ཞེས་བྱའོ༔ རྒྱུད་ལས༔ སྨིན་པས་འབྲས་བུ་ཞེས་བྱའོ༔ ཞེས་སོ༔ དབྱེ་བ་ལ་གཉིས་ཏེ་གནས་སྐབས་དང་མཐར་ཐུག་གོ༔ གནས་སྐབས་ཀྱི་འབྲས་བུ་ནི༔ ལམ་ཉམས་སུ་བླང་བའི་དུས་སུ་ཐུན་མོང་དུ་སྨིན་པ་རྣམས་སོ༔ མཐར་ཐུག་གི་འབྲས་བུ་ནི༔ ལུས་ངག་ཡིད་གསུམ་གྱི་ལས་དང་བག་ཆགས་ཉོན་མོངས་པ་དང་སྡིག་སྒྲིབ་ཐམས་ཅད་དཔེར་ན་སྦྲུལ་གྱི་མདུད་པ་ལྟར་རང་ཤར་རང་གྲོལ་དུ་སོང་བའོ༔ རྒྱུད་ལས༔ འབྲས་བུ་དབྱེ་བ་གཉིས་སུ་འདུས༔ གནས་སྐབས་དང་ནི་མཐར་ཐུག་གོ༔ ཞེས་སོ༔ དེ་ཉམས་སུ་བླང་བའི་ཐབས་ནི༔ རིག་པ་ཉིད་གང་སྣང་གང་ཤར་གྱི་སྟེང་དུ་བཞག་པས་བརྟན་པ་མྱུར་དུ་ཐོབ་པའོ༔ རྡོ་རྗེ་སེམས་དཔའ་སྙིང་གི་མེ་ལོང་ལས༔ འབྲས་བུའི་ཆོས་ཐམས་ཅད་སྐུ་གསུམ་ལས་ཕྱིར་མི་ལྡོག་པར་ཤེས་པར་གྱིས་ཤིག༔ ཅེས་སོ༔ འབྲས་བུའི་མཚན་བསྟན་པ་ནི༔ འབྲས་བུ་དེ་དག་ལ་མིང་དུ་བཏགས་ན༔ རྣམ་དག་ལྷུན་གྲུབ་ཀྱི་འབྲས་བུ་ཞེས་བྱའོ༔ དེ་ཅིའི་ཕྱིར་ཞེ་ན༔ ཡང་དག་པའི་དོན་རྒྱུད་ལ་སྐྱེས་པ་དེ་བརྟན་པ་ཐོབ་ཅིང་སྨིན་པས་ན་འབྲས་བུ་ཞེས་བྱའོ༔ སྒྲ་ཐལ་འགྱུར་ལས༔ འབྲས་བུ་བརྗོད་པར་མི་ནུས་ཀྱང་༔ ཆོས་རྣམས་ཟད་སར་ཕྱིན་པ་དང་༔ རང་གི་གྲུབ་པའི་མཐའ་ཡང་འཇིག༔ འདི་དུས་བླ་མའི་མན་ངག་ནུབ༔ ལྟ་སྒོམ་སྤྱོད་པའི་མཐའ་སྟོངས་པས༔ ཆོས་སྐུའི་སྣང་བ་ཡོད་མ་ཡིན༔ སྐུ་དང་ཡེ་ཤེས་རྒྱུན་ཆད་པས༔ སངས་རྒྱས་མེད་ཅིང་སེམས་ཅན་མེད༔ མདོར་ན་གང་ཡང་གནས་པ་མེད༔ སོང་བ་མེད་པས་འོང་མེད་པའོ༔ ཞེས་སོ༔ དེ་འབྲས་བུ་ལ་རྒྱུན་དུ་བྱེད་པའི་རྣལ་འབྱོར་རོ༔ གསང་སྔགས་སྙིང་གི་ཏི་ཀ་ལས༔ ལམ་ཁྱེར་རྣལ་འབྱོར་བཞི་པོ་འདི༔ ཡེ་ཤེས་མཚོ་རྒྱལ་ཁྱོད་ལ་གཏད༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ རྒྱ་རྒྱ་རྒྱ༔ རྣལ་འབྱོར་བཞིའི་གདམས་པ་རྫོགས་སོ༔