Sequence of the Four Empowerments—Tibetan

༄༅། །དབང་བཞིའི་གོ་རིམ་ཐོ་ཡིག་བཞུགས་སོ༔

རིགས་ཀྱི་ཌཱཀྐི་ལྔ་ལ་ཕྱག་འཚལ་ལོ༔ མཁའ་འགྲོ་སྙིང་ཐིག་ཏི་ཀ་ཡི༔ ཆགས་ཅན་ལམ་དུ་འཇུག་པ་ཡི༔ དབང་བསྐུར་བ་ཡི་ཆོ་ག་ནི༔ ཞེས་པས༔ དེ་ལ་ཞག་གསུམ་དུ་བྱས་ཏེ༔ ནུབ་དང་པོ་ལ༔ གཞི་བདག་ལ་གཏོར་མ་བྱིན་ས་བླངས་ལ༔ དཀྱིལ་འཁོར་སྟེགས་བུ་བརྩེག༔ སྟ་གོན་གྱི་ཆོ་ག་བྱའོ༔ ནུབ་བར་པ་ལ་ཉིན་མོ་དཀྱིལ་འཁོར་བྲི༔ ནུབ་མོ་སློབ་མ་དཀྱིལ་འཁོར་དུ་གཞུག་ནས་བུམ་པའི་དབང་བསྐུར༔ མི་གཞན་ཡང་བཅུག་པས་ཆོག་གོ༔ དེས་གང་ཟག་སློབ་བུ་ཐུན་མོང་དུ་སྨིན་པར་བྱེད་པའོ༔ ནུབ་ཐ་མ་ལ་གང་ཟག་མཚན་ཉིད་དང་ལྡན་པ་གསུམ་ལས་མི་མང་བར་བྱས་ལ་དཀྱིལ་འཁོར་མ་བསྡུས་པར་ཚོགས་མཆོད་གཏོར་མ་མང་དུ་བཤམས་ནས༔ སྲོད་ལ་དཀྱིལ་འཁོར་ལྷོར་གསང་དབང་བསྐུར༔ གུང་ལ་དཀྱིལ་འཁོར་ནུབ་ཏུ་ཤེས་རབ་ཡེ་ཤེས་ཀྱི་དབང་བསྐུར༔ ཐོ་རངས་དཀྱིལ་འཁོར་བྱང་དུ་དབང་བཞིའི་ངོ་སྤྲོད་རྒྱས་པར་བྱས་ལ་ནམ་ལངས་ནས་ཚོགས་ལ་རོལ་ལོ༔ གླུ་གར་དང་རོལ་མོ་ཡང་བྱའོ༔ དེ་ནས་དཀྱིལ་འཁོར་གཤེགས༔ གཏོར་མ་བཏང་༔ བཀྲ་ཤིས་བསྔོ་བ་སྨོན་ལམ་བྱའོ༔ ཨོ་རྒྱན་པདྨ་བདག་གིས་དབང་བཞིའི་གོ་རིམ་ཐོ་ཡིག་ཏུ་བཀོད་པའོ༔ ཁ་ཐཾ༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་པར་ཤོག༔ ས་མ་ཡ༔ ཨྠིྀ༔ དགེའོ༔