Advice Revealing How Our Faults Become Clear—Tibetan

༄༅། །ངན་སྐྱོན་མངོན་ལུགས་སྟོན་པའི་གདམས་པ།

ངན་སྐྱོན་མངོན་ལུགས་སྟོན་པའི་གདམས་པ་ནི། ན་མོ་གུ་རུ། གྲུབ་པའི་རིག་འཛིན་བླ་མར་ཕྱག་འཚལ་ལོ། །དུག་ལྔ་ལམ་དུ་ཤར་བར་བྱིན་གྱིས་རློབས། །གཏི་མུག་གི་མུན་པ་ཨེ་བསལ་དེ། །ནུབ་མོའི་མལ་ཉལ་བའི་དུས་སུ་མངོན། །ཞེ་སྡང་གི་མེ་ལྕེ་ཨེ་སོད་དེ། །ཚིག་རྩུབ་ཀྱི་མཚོན་ཆ་བྱུང་དུས་མངོན། །ང་རྒྱལ་གྱི་བྲག་རི་ཨེ་ཞིག་དེ། །ཤེས་དམན་གྱི་གཙུག་ཏུ་བཀུར་དུས་མངོན། །བརྐམ་ཆགས་ཀྱི་རྒྱ་མཚོ་ཨེ་སྐེམས་དེ། །གཞོན་ནུ་མ་མཛེས་མོས་བརྩེ་དུས་མངོན། །ཕྲག་དོག་གི་རླུང་རི་ཨེ་ཞིག་དེ། །འགྲན་ཟླ་ཅན་གོང་དུ་ཤོར་དུས་མངོན། །སེར་སྣ་ཡི་མདུད་པ་ཨེ་ཁྲོལ་དེ། །ཟང་ཟིང་གི་ནོར་དང་འཕྲད་དུས་མངོན། །ཚུལ་ཁྲིམས་ཀྱི་མེ་ཏོག་ཨེ་བཀྲ་དེ། །གྲོང་ནག་གི་ཁྲོད་དུ་འདུག་དུས་མངོན། །བཟོད་པའི་གོ་ཆ་ཨེ་བྱོན་དེ། །གློ་བུར་དུ་འཕྲལ་རྐྱེན་བྱུང་དུས་མངོན། །བརྩོན་འགྲུས་ཀྱི་རྟ་ཕོ་ཨེ་བཟང་དེ། །ལས་དགེ་བ་སྒྲུབ་པའི་དུས་སུ་མངོན། །བསམ་གཏན་གྱི་རྫོང་དེ་ཨེ་བཙན་དེ། །འཕྲལ་ན་ཚ་དྲག་པོ་བྱུང་དུས་མངོན། །ཤེས་རབ་ཀྱི་རལ་གྲི་ཨེ་རྣོ་དེ། །ཉོན་མོངས་པའི་འདབ་མ་རྒྱས་དུས་མངོན། །ཞེས། ངན་སྐྱོན་མངོན་ལུགས་བསྟན་པ་འདི། །སློབ་བུ་མང་པོས་བསྐུལ་བའི་ངོར། །སྤྲང་རྒན་བདུད་འདུལ་མིང་གིས་བྲིས། །དགེ་བས་འགྲོ་ཀུན་སྐྱོན་བྲལ་ཤོག །