Trulzhik Sengge Gyabpa Biography—Tibetan

༄༅། །ལོ་རྒྱུས་རིན་པོ་ཆེའི་ཕྲེང་བ་ལས། འཁྲུལ་ཞིག་སེངྒེ་རྒྱབ་པའི་རྣམ་ཐར།

དེ་ལྟ་བུའི་བླ་མ་དམ་པ་ལས། འཁྲུལ་ཞིག་ཆེན་པོས་གདམས་པ་རྣམས་རྫོགས་པར་མཛད་དོ། །དེ་ཡང་གཡོ་རུ་གྲ་ཡི་ཕུ་སོ་གད་ཕྲེང་གི་གྲོང་དུ་ཡབ་བཀྲ་ཤིས་དངོས་གྲུབ་དང༌། ཡུམ་དཔལ་ལེགས་གཉིས་ཀྱི་སྲས་སུ་སྐུ་འཁྲུངས་ཏེ། བལྟམས་དུས་ཉི་མ་རྩེ་ཤར་ལ་ཁང་པ་འཇའི་གུར་ཕུབ་པ་ཀུན་གྱིས་མཐོང་ངོ༌། །དགུང་ལོ་དགུ་ན་རིགས་སད་དེ། དག་སྣང་དང་མོས་གུས་དཔག་དུ་མེད་པ་སྐྱེས་ནས་ཐ་མལ་པ་ལས་བློ་ལོག བཅུ་ནས་སྣང་བ་སྒྱུ་མར་འདུག་པ་ལ་བདེན་བདེན་རྟག་རྟག་འདི་འདྲ་མི་ཡོང་ཐང་སྙམ་དུ། སྣང་སྲིད་བླ་མར་ཤར། བཅུ་གཉིས་ལ་འཁོར་བའི་ཆོས་ལ་སྐྱོ་ཤས་དང་ངེས་འབྱུང་སྐྱེས། བཅུ་གསུམ་ལ་ཐོ་རངས་ཀྱི་རྨི་ལམ་ན་ཉི་ཟླ་དུས་གཅིག་ཤར་བ་ལ་སོགས་པའི་རྨི་ལམ་སད་དུས། ཐུགས་རྗེ་ཆེན་པོས་ལུང་བསྟན་པ། ཨེ་མ་སྐལ་ལྡན་ཚེ་གཅིག་གིས་གྲོལ་བ་ཡང་གསང་བླ་ན་མེད་པ་སྙིང་ཐིག་གི་དོན་སྒོམས་ཤིག །ཅེས་གསུང་ནས་མི་སྣང་བར་གྱུར་ཏོ། །དེ་ནས་བཟུང་སྟེ་སྙིང་རྗེ་ཕྱོགས་མེད་དུ་རྒྱས་ཤིང་འགྲོ་བ་ལ་བུ་གཅིག་གི་འདུ་ཤེས་དང་མ་བྲལ་གསུངས། བཅོ་བརྒྱད་ན་སྣང་སེམས་བདེན་མེད་དུ་རྟོགས་ནས་ཟང་ཐལ་སྨྱོན་པའི་སྤྱོད་པས་རང་བྱུང་ཡེ་ཤེས་ཀྱི་དོན་ལ་རྩལ་སྦྱོང་དུས། ཕ་མས་ལྷ་གསོལ་བའི་ཡོ་བྱད་གསར་པ་ལ། ཕོ་གདོན་རྒྱལ་པོ་མཆོད། མོ་གདོན་བསེན་མོ་མཆོད། ཅེས་ཕུད་གཏོར་བས། ངེད་ལ་ཁྱེད་ལྟ་བུའི་བུ་སྐྱེས་པ་ཟེར་རོ། །ཉི་ཤུ་ལ་མཁན་པོ་ལེའུ་སྒང་པ་དང༌། སློབ་དཔོན་བཀྲ་ཤིས་སྒང་པ་གཉིས་ལས་རབ་ཏུ་བྱུང་སྟེ། འདུལ་བ་ལ་ཐོས་བསམ་མཛད་དོ། །ཉི་ཤུ་རྩ་ལྔ་ལ་སྲིད་ཞལ་གྱི་སེང་གེ་རྒྱབ་ཏུ་བྱོན་ཏེ། སེང་གེ་རྒྱབ་པ་ལས་ཞང་ཚལ་པའི་དབང་ཁྲིད་གདམས་པ་དང་བཅས་པའི་སྐོར་རྣམས་ཚང་བར་གསན་ཅིང་ཐུགས་ཉམས་སུ་བཞེས། བླ་མ་ཙ་རི་བ་ལས་རླུང་སེང་གེ་མཇིང་བསྣོལ་ལ་སོགས་པ་ཞུས་ཤིང༌། རས་པ་དྲི་མེད་འོད་དང༌། ལྷ་རི་དཔལ་དང༌། གཞོན་ནུ་འབུམ་དང༌། སྟོན་ཕྱར་དང༌། བྱང་ཆུབ་ཡོན་ཏན་དང༌། སློབ་དཔོན་ཇོ་སྲས་ལ་སོགས་པའི་བླ་མ་རྣམས་ལས་གཅོད་ཡུལ་དང་ཞི་བྱེད་དང༌། ཕྱག་རྒྱ་ཆེན་པོ་དང༌། གསང་སྔགས་གསར་རྙིང་གི་སྒྲུབ་སྡེ་མན་ངག་དང་བཅས་པ་དུ་མ་ཞུས་ཤིང༌། ཁྱད་པར་དུ་ཆོས་བདག་གུ་རུ་ཇོ་འབེར་ལས་རྫོགས་པ་ཆེན་པོ་གསང་བ་སྙིང་ཐིག་གི་དབང་ཁྲིད་གདམས་པ་དང་བཅས་པ་མ་ལུས་པ་རྫོགས་པར་ཞུས་ནས། གྲོ་བོ་ལ་སོགས་པའི་རི་ཁྲོད་དང་ལུང་སྟོང་རྣམས་སུ་ལོ་དུ་མར་སྒྲུབ་པ་ལ་ནན་ཏན་སྙིང་པོར་མཛད་དོ། །དེ་ནས་སྐལ་ལྡན་མང་པོ་སྨིན་གྲོལ་གྱི་ས་ལ་བཀོད་དེ། དྲུག་ཅུ་རྩ་གཅིག་ལ་ཆོས་ཉིད་གདོད་མའི་དབྱིངས་སུ་གཤེགས་སོ། །དེ་ཡང་པུར་སྦྱོང་དུས་ནམ་མཁའ་ལ་འཇའ་འཁྲིགས་ཤིང༌། རིང་བསྲེལ་དང་ལྷ་སྐུ་མང་པོ་བྱོན་པས་འགྲོ་བ་རྣམས་ངོ་མཚར་དང་དད་པ་སྐྱེས་སོ། །