Melong Dorje Biography—Tibetan

༄༅། །ལོ་རྒྱུས་རིན་པོ་ཆེའི་ཕྲེང་བ་ལས། མེ་ལོང་རྡོ་རྗེའི་རྣམ་ཐར།

དེ་ལྟར་ངོ་མཚར་མཆོག་དང་ལྡན་པའི་བླ་མ་དམ་པ་ལས། གྲུབ་ཆེན་མེ་ལོང་རྡོ་རྗེས་གསང་བ་མཆོག་གི་རྒྱུད་ལུང་མན་ངག་དང་བཅས་པ་མ་ལུས་པར་རྫོགས་པར་མཛད་དོ། །དེ་ཡང་སྒྲགས་ཕུར་ཡབ་རྣལ་འབྱོར་པ་བསམ་ཡེ་དང༌། ཡུམ་འབར་མ་གཉིས་ཀྱི་སྲས་སུ་སྐུ་འཁྲུངས་ཏེ། ལོ་དགུ་ནས་གྲུབ་ཐོབ་ཟ་ལུང་པ་དང་མཁན་ཆེན་སེ་ལུང་པ་གཉིས་ལས་རབ་ཏུ་བྱུང་ནས། ཟངས་རི་མཚོ་བྲག་ཏུ་བསྒོམས་པས་ཉམས་འབར་ཞིང་མངོན་ཤེས་ཕྲ་མོ་ཐོབ། བཅུ་དྲུག་ལ་སྒྲགས་ཕུའི་ཞོགས་སྟེངས་སུ་གླེགས་བམ་བརྒྱ་ཚར་མཛད་པས་གནས་ལུགས་ཀྱི་དོན་རྟོགས་ཏེ་རང་ཤར་རང་གྲོལ་ཆེན་པོ་སྤྱོད་པ་གཟའ་གཏད་དང་བྲལ། དེ་ནས་བཅུ་བདུན་གྱི་བར་ལ་ཡུལ་ཕྱོགས་ཐ་དད་པ་ཀུན་ཏུ་བྱོན་ནས། བླ་མ་མཁས་གྲུབ་མང་པོའི་ཞབས་ལ་གཏུག་སྟེ། ཡང་དག་པའི་གདམས་པ་རྣམས་ཐུགས་ལ་སྦྱངས་ནས། ལྷོ་ཤ་འུག་སྟག་སྒོ་དང༌། མཁར་ཆུ་ལ་སོགས་པའི་གནས་ཆེན་མང་པོར་བྱོན་ཏེ། ནས་བྲེ་གང་གིས་ཟླ་བ་གཅིག་དང་ཞག་ཉི་ཤུ་རྩ་གཅིག་ལ་སོགས་པའི་འཚོ་བ་མཛད་ནས། དཀའ་ཐུབ་དང་དཀའ་སྤྱད་མང་པོ་མཛད། བཅོ་བརྒྱད་ལ་སེང་གེ་རྒྱབ་ཏུ་སངས་རྒྱས་དབོན་པོའི་སྤྱན་སྔར་གསང་བ་སྙིང་ཏིག་ཞུས་ཏེ་བསྒོམས་པས། ཁྲིད་ཀྱི་སྔོན་འགྲོའི་དུས་སུ་ཉིན་མཚན་ཞག་དྲུག་ཏུ་རྡོ་རྗེ་སེམས་དཔའ་ནམ་མཁའ་ནས་ཉིན་མཚན་མེད་པར་གཟིགས་ཤིང༌། དངོས་གཞིའི་དུས་སུ་རྨི་ལམ་དུ་བླ་མ་བརྒྱུད་པ་རྣམས་དང་མཇལ་ནས་བྱིན་གྱིས་བརླབས་གསུངས། རྩ་གསུམ་པ་ལ་ཡང་སངས་རྒྱས་རས་པ་ལས། རྡོ་རྗེ་ཕག་མོ་ལ་སོགས་བའི་གཏེར་ཆོས་མང་དུ་གསན་ནས་བསྒྲུབས་པས། རྩ་བཞི་ལ་རྡོ་རྗེ་ཕག་མོ་དང་དངོས་སུ་ཞལ་མཇལ་ཞིང༌། ནམ་མཁའ་འོད་ཀྱི་ཕུང་པོའི་དཀྱིལ་ན་བདེ་མཆོག་ལྷན་སྐྱེས་དང༌། རྟ་མགྲིན་དང༌། སྒྲོལ་མ་དང༌། ཐུགས་རྗེ་ཆེན་པོ་དང༌། ཀུན་ཏུ་བཟང་པོ་དང༌། རྡོ་རྗེ་སེམས་པ་དང༌། བི་མ་ལ་དང༌། ཨུ་རྒྱན་དང༌། ཟྭ་ལུང་པ་དང༌། སངས་རྒྱས་རས་པ་དང༌། འགྲོ་མགོན་རིན་པོ་ཆེ་རྣམས་བཞུགས་པ་མཐོང་གསུངས། དེ་ནས་དོང་ལུང་ན་བཞུགས་དུས་ཐོ་རངས་མནལ་སད་དུས་མཁའ་འགྲོའི་རང་སྒྲ་ཤིན་ཏུ་སྙན་པོས། ཨེ་མ་བློ་བདེའི་མལ་དུ་ཆོས་ཉིད་དོན་བལྟས་པས། །སྐྱེ་རྒྱུན་འདིས་ཆོད་ནམ་མཁའི་རྣལ་འབྱོར་པ། །སྒྲུབ་རིམ་སྲོག་འཕྲོག་སྙིང་པོ་རྒྱུན་བཟླས་པས། །འབྲལ་མེད་སྡོང་གྲོགས་བྱ་ཡིས་སྙིང་གི་བུ། །ཞེས་པ་ཐོས་གསུངས། ཡང་ཀ་བ་ཅན་ན་བཞུགས་པའི་དུས་སུ་ཚེས་བཅུ་གཉིས་ཀྱི་སྔ་དྲོ་ནམ་མཁའི་དཀྱིལ་ནས་ཕག་མོ་དམར་མོ་དང༌། གྲུབ་ཐོབ་ཟྭ་ལུང་པ་བཞུགས་པ་དང༌། དར་ཕུག་ན་བཞུགས་པའི་རྨི་ལམ་དུ། ཕག་མོ་གཙོ་འཁོར་ལྔ་མཐོང་ཞིང༌། ས་གཡོས་དུས་མནལ་སད་པས། འོད་ཀྱི་ཕག་མོ་གཟིགས་པ་དང༌། སྐྱབས་གནས་རྫོང་ན་བཞུགས་དུས་བླ་མ་ལྔ་དང་རྡོ་རྗེ་སེམས་དཔའ་རྨི་ལམ་དུ་རྫོགས་པ་ཆེན་པོའི་དབང་བཞི་རྫོགས་པར་བསྐུར་ཞིང་བརྡ་དོན་ངོ་སྤྲོད་མཛད་གསུངས། དགུང་ལོ་ཉི་ཤུ་རྩ་དྲུག་ལ། འཁྲུལ་ཞིག་དར་མ་དང༌། སྤྲུལ་སྐུ་རྒྱ་མཚོ་ལ་སོགས་པའི་བླ་མ་མང་དུ་བསྟེན་ཅིང༌། གསང་སྔགས་ཀྱི་དབང་ཁྲིད་གདམས་པ་དང་བཅས་པ་མང་དུ་ཞུས་སོ། །དེ་ཡང་ཁྱད་འཕགས་ཀྱི་བླ་མ་བཅུ་གསུམ། འགྲན་ཟླ་དང་བྲལ་བའི་བླ་མ་གྲ་ཕུའི་གྲུབ་ཐོབ་ཟྭ་ལུང་པ་དང༌། མཚུར་ཕུའི་མདོ་བོ་རས་པ་དང༌། དགོན་རྩེའི་འཁྲུལ་ཞིག་དབོན་པོ་སྟེ། རྣམ་པ་གསུམ་བསྟེན་ནས། སྙིང་པོ་དོན་གྱི་གདམས་པ་དཔག་ཏུ་མེད་པའི་རྒྱ་མཚོའི་གཏིང་དཔོག་པར་མཛད་ཅིང༌། ལྷོ་འཁན་པ་ལྗོངས་དང༌། འཁན་པ་གླིང་དང༌། སེང་གེ་རྫོང་དང༌། ཀུན་བཟང་གླིང་དང༌། མཁར་ཆུ་ལ་སོགས་པའི་གནས་ཆེན་དུ་མར་སྒྲུབ་པའི་རྒྱལ་མཚན་བཙུགས་ཤིང་སྐལ་ལྡན་དུ་མ་སྨིན་གྲོལ་ལ་བཀོད་དོ། །དེ་ནས་དགུང་ལོ་སུམ་ཅུ་སོ་བདུན་ལ་འདའ་བའི་དུས་ཡིན་པས། སློབ་དཔོན་ཀུན་དགའ་ཞེས་བྱ་བའི་སྐལ་བཟང་གཅིག་གིས་གསོལ་བ་བཏབ་པས། དྲུག་ཅུ་རྩ་གཅིག་གི་བར་བཞུགས་སོ། །དེ་ནས་དྲུག་ཅུ་རྩ་གཅིག་ཡོས་ཀྱི་ལོའི་སྟོན་ཟླ་ཐ་ཆུང་གི་ཉི་ཤུ་ལྔའི་ཐོ་རངས་ལ་དུར་ཁྲོད་ལ་ཁར་ཐུགས་འཕོ་བའི་ཚུལ་བསྟན་དུས། འོད་ཆེན་པོ་སྒྲ་དང་བཅས་པ་ནུབ་ཕྱོགས་སུ་ཡལ་ཞིང༌། པུར་སྦྱང་དུས་ནམ་མཁའ་ཤིན་ཏུ་དྭངས་པའི་དཀྱིལ་ནས་པུར་ཁང་ལ་འཇའ་འོད་སྣ་ལྔའི་སྣམ་བུ་དང༌། འོད་དྲྭ་བ་རིས་སུ་ཤར་རོ། །གདུང་རུས་ལ་ཨ་དཀར་པོ་གཅིག་དང༌། གདུང་ཤ་རཱི་རཾ་རིགས་ལྔ་བྱོན་ཞིང་འགྲོ་བ་ཀུན་ངོ་མཚར་གྱི་ས་ལ་བཀོད་དོ། །