Lama Yangtik Phowa—Tibetan

༄༅། །འཕོ་བ་འོད་གསལ་སྙིང་པོ་བཞུགས་སོ། །

གདོད་ནས་མཁའ་མཉམ་ཡངས་པའི་མགོན། །ཀུན་བཟང་རྒྱལ་ལ་ཕྱག་འཚལ་ཏེ། །མི་གནས་དབྱིངས་སུ་འཇུག་བྱའི་ཕྱིར། །འཕོ་བ་འོད་གསལ་སྙིང་པོ་བྲི། །དེའང་སྒྲ་ཐལ་འགྱུར་ལས། སྦྱངས་ཏེ་འཕོ་བ་ལ་སོགས་པར་མང་དུ་གསུངས་པ་དག་གི་ངེས་དོན་གནད་ཀྱི་གདམས་པ་ནི་འདི་ཡིན་ཏེ། དང་པོ་སྟན་བདེ་བ་ལ་འདུག་ནས། སྐྱབས་སུ་འགྲོ་བ་དང་སེམས་བསྐྱེད་དེ། བླ་མའི་རྣལ་འབྱོར་བསྒོམ་པའི་རྗེས་ལ། རང་གི་གསང་བ་ནས་སྤྱི་བོའི་བར་རྩ་དབུ་མ་མདའ་སྨྱུག་ཙམ་ཚངས་བུག་ཧ་རེ་སྐར་ཁུང་བཞིན་ཡོད་པའི་སྙིང་ག་ནས། འོད་ཀྱི་གོང་བུ་འཇའ་ཚོན་སྣ་ལྔའི་ར་བ་ཅན་གྱི་དབུས་ན། ཨ་མཐིང་ཀ་འཚེར་བ་སྲན་མའི་གའུ་ཙམ་གཅིག་བསྒོམ་པའི་ངང་ལ་སེམས་གཟུང་བས། གསལ་སྟོང་རང་བྱུང་ཡེ་ཤེས་ཀྱི་འོད་གསལ་སྐྱེའོ། །དེ་ནི་ལོངས་སྐུའི་འཆར་གཞི་གདོད་མའི་མགོན་པོ་འོད་མི་འགྱུར་བ་ཀུན་བཟང་ཡབ་ཡུམ་དབྱེར་མེད་ཀྱི་དགོངས་པ་ཞེས་བྱའོ། །དེ་ནས་ཨ་ཨ་ཨཱ་ཞེས་བརྒྱ་རྩ་བརྒྱད་དབྱངས་དང་བཅས་བརྗོད་པས་གོང་བུ་དེ་ཇེ་མཐོ་ཇེ་མཐོར་སོང་བས་ཚངས་བུག་ནས་ཐོན་ཏེ། སྟེང་གི་ནམ་མཁའ་ལ་ལོངས་སྤྱོད་རྫོགས་པ་སྐུའི་ཞིང་ཁམས་ལྷུན་གྲུབ་སྟུག་པོ་བཀོད་པའི་རིགས་ལྔ་བཞུགས་པའི་གཙོ་བོ་རྣམ་སྣང་ཡབ་ཡུམ་གྱི་ཐུག་ཀར་མདའ་འཕངས་པ་ལྟར་སོང་ནས་ཞིང་ཁམས་དེ་ཡང་གོང་ནས་གོང་དུ་ཇེ་མཐོ་ཇེ་མཐོར་སོང་བས་མཐར་དམིགས་སུ་མེད་པ་བསམ་གྱིས་མི་ཁྱབ་པ་ནམ་མཁའི་དབྱིངས་དང་དབྱེར་མེད་པའི་ངང་དུ་སོང་བ་ལ་རིག་པ་གློད་ནས། ཨ་གྲངས་མེད་པ་དབྱངས་རིང་པོས་བརྗོད་པས། སྟོང་གསལ་སྤྲོས་བྲལ་རྒྱ་ཆད་ཕྱོགས་ལྷུང་མེད་པའི་ངང་ལ་གནས་པའོ། །དེ་ལྟར་ཉིན་མཚན་བདུན་སྦྱངས་པས་ཚངས་བུག་དོད་ནས་ཁབ་དང་ཤིང་བུ་ཚུགས་པ་འབྱུང་ངོ༌། །དེ་ནས་དམིགས་པ་ཉིན་ཞག་ཕྲུགས་རེ་ལ་ལན་རེ་བྱའོ། །དེས་ནི་བར་དོའི་འོད་གསལ་ངོས་ཟིན་ནས་གྲོལ་ཏེ། སྲིད་པ་བར་དོའི་གཡང་ས་མི་མཐོང་ཞིང༌། གཞོན་ནུ་བུམ་པ་སྐུའི་ཞིང་ཁམས། ཀུན་ཏུ་བཟང་པོ་དང་དབྱེ་བ་མེད་པའི་ས་ལ་མངོན་པར་རྫོགས་པར་སངས་རྒྱས་ཏེ། སེམས་ཅན་གྱི་དོན་གཉིས་ལྷུན་གྱིས་གྲུབ་པའི་ཕྲིན་ལས་མཛད་པ་ལ་མངའ་དབང་འབྱོར་བ་ཡིན་ནོ། །དེ་ལྟར་མངོན་སུམ་ལམ་གྱི་ཆ་རྐྱེན་དུ། རྒྱུད་དང་མན་ངག་ཞལ་ནས་གསུངས་པའི་དོན། །བླ་མ་ལས་ཐོས་ཉམས་སུ་བླངས་དེ་བཞིན། །ལེགས་བཀོད་དགེ་བས་འགྲོ་ཀུན་ཡོངས་གྲོལ་ཤོག །འཕོ་བ་འོད་གསལ་སྙིང་པོ་ཞེས་བྱ་བ། ཐེག་པ་མཆོག་གི་རྣལ་འབྱོར་པ་ཀློང་ཆེན་རབ་འབྱམས་ཀྱིས་གསང་བ་ཡིད་བཞིན་མཆོག་གི་གནས་སུ་ལེགས་པར་བཀོད་པ་རྫོགས་སོ། །དགེའོ། །དགེའོ། །དགེའོ།། །།