The Fully Fledged Garuḍa—Tibetan

༄༅། ཁྱུང་ཆེན་གཤོག་རྫོགས་བཞུགས་སོ། །

ཁྱུང་ཆེན་གཤོག་རྫོགས་ཞེས་བྱ་བ།

ཆོས་ཉིད་གདལ་བ་ཆེན་པོ་ལ་ཕྱག་འཚལ་ལོ། །

གཞི་མེད་རྩ་བྲལ་འགྱུར་མེད་གཉུག་མའི་སེམས། །
མ་བཅོས་རྒྱལ་པོ་ཅོག་བཞག་རང་གྲོལ་བ། །
སྤང་བླང་དགག་སྒྲུབ་རེ་དོགས་ཀུན་ལས་འདས། །
གཞི་རྫོགས་སེམས་ཉིད་ངང་ལ་ཕྱག་འཚལ་ལོ། །

གདོད་ནས་རྣམ་དག་བསམ་ཡུལ་འདས་པའི་ཀློང༌། །
སེམས་ཉིད་རྒྱལ་པོ་རང་བཞིན་རྫོགས་པ་ཆེ། །
གང་ཡང་མ་སྤངས་ཀུན་ལས་འདས་པའི་ངང༌། །
ཆོས་ཀུན་ཡེ་ནས་གྲོལ་བའི་རང་བཞིན་ཉོན། །

བརྗོད་བྲལ་ཡེ་རྫོགས་སེམས་ཉིད་ནམ་མཁའ་ཆེ། །
བྱར་མེད་རྩོལ་བྲལ་དྲན་བསམ་ཀུན་ལས་འདས། །
གང་ཤར་ཞེན་མེད་ལྷུན་འབྱམས་རིག་པའི་ཀློང༌། །
ཅོག་བཞག་རང་གྲོལ་ཅེར་མཐོང་བསམ་ཡུལ་མེད། །
རང་བཞིན་བབས་ཡིན་བཅོས་བསླད་མ་བྱེད་ཅིག །

རྨོངས་པ་གང་གིས་ངོ་བོ་དེ་བོར་ནས། །
གཉུག་མའི་སེམས་ལ་སྒྲིན་པོའི་གཟེབ་བསྐུར་ཏེ། །
བཅོས་ཤིང་བཅོས་ཤིང་སྙིང་པོའི་དོན་ལ་སྒྲིབ། །
གྲོལ་བ་མེད་དེ་དེ་ཡིས་སླར་འཆིང་བྱེད། །

གང་ལ་བློ་ཡི་ཁོག་ཡངས་ལྷོད་ཡོད་པ། །
རང་བཞིན་ཉིད་དེ་དེ་ལ་བཅོས་མི་དགོས། །
འགྱུ་མཐོང་རང་དག་གཉེན་པོས་མ་བསླད་ཅིང༌། །
སྤང་བྱས་མ་བསྒྱུར་ཤེས་དེ་རྫོགས་པ་ཆེ། །

ཡོད་ཉིད་མེད་སྦྱངས་མེད་ལས་ཡོད་པའི་མཐར། །
དངོས་ཀུན་བཤིག་པའི་སྟོང་པ་ནམ་མཁའ་ཆེ། །
བཅོས་ཤིང་བཅོས་ཤིང་གྲོལ་བར་འདོད་པའི་མི། །
རྟག་ཆད་ཉིད་ལས་ཐར་པ་ཡོད་དམ་ཅི། །

གཞི་མེད་རྩ་བྲལ་ཡེ་ནས་རྫོགས་པ་ཆེ། །
སྟོང་དང་སྣང་དང་ཡོད་དང་མེད་མི་བསྒོམ། །
གང་ལ་སྒོམ་ཡོད་ལྟ་དང་སྤྱོད་པ་ཡོད། །
དེ་ལ་སྲིད་ཡོད་འཁོར་བའི་སྡུག་བསྔལ་ཡོད། །
གང་ལ་ཆོས་ཡོད་ཐེག་པའི་ཞེ་འདོད་ཡོད། །
དེ་ལ་ཉོན་མོངས་གཟེབ་ཡོད་འཆིང་བྱེད་ཡོད། །

གཞི་བྲལ་ལམ་འགགས་འབྲས་བུའི་ཞེན་པ་ཟད། །
ཐེག་པའི་འདོད་ཞེན་རྡུལ་ཙམ་མི་གནས་པ། །
དེ་ལ་ལས་མེད་རྣམ་སྨིན་གོས་པ་མེད། །
སྲིད་ཞིར་མི་གནས་ནམ་མཁའི་ངང་དུ་གྲོལ། །

རྩ་དང་རླུང་སྦྱངས་ཐིག་ལེའི་འགྲེམས་སྡུད་དང༌། །
གཉིས་སྦྱོར་དབང་པོའི་བདེ་བ་ལ་གནས་པའི། །
དགའ་དང་མཆོག་དགའ་དགའ་བྲལ་ལྷན་སྐྱེས་སོགས། །
བདེ་དང་སྟོང་ཞེས་གྲོལ་བའི་རྒྱུར་སྨྲ་བ། །
འདོད་པའི་ཁམས་ལས་གང་དུ་འདའ་མི་ནུས། །
བཅོས་མའི་སྟོང་པས་གྲོལ་བ་ཉིད་མི་འགྱུར། །

སེམས་གསལ་ཉིད་དམ་དབང་པོའི་སྒོར་སྣང་བའི། །
རླུང་གི་ཁ་དོག་ཡུལ་རྐྱེན་གསལ་ལ་སོགས། །
མི་རྟོག་ཉིད་ཅེས་བཅོས་ཤིང་སུས་བསྒོམས་པ། །
གཟུང་བའི་ཡུལ་ལ་འཛིན་པའི་གདིང་བཅས་ཏེ། །
ཡུལ་ཅན་ཡུལ་གྱི་འཆིང་བས་རབ་བཅིངས་ནས། །
གཟུགས་ཁམས་ཉིད་ལས་གྲོལ་བ་ཡོད་དམ་ཅི། །

ལུས་བཅོས་ངག་བསྡམས་སེམས་བསྒྲིམས་རྣམ་རྟོག་བཀག །
དམིགས་འབྲས་སྣང་ཡུལ་མེད་པའི་སྒོམ་པ་ཡང༌། །
གཟུགས་མེད་ཉིད་དེ་མཁའ་སོགས་རྣམ་པ་བཞིར། །
འཁོར་ཞིང་འཁོར་ཞིང་གྲོལ་བ་ནམ་ཡང་མེད། །

བདེ་གསལ་མི་རྟོག་སྲིད་གསུམ་སོ་སོའི་སེམས། །
འདོད་གཟུགས་གཟུགས་མེད་སྲིད་པར་འཁོར་བ་ལས། །
གྲོལ་བའི་སྐབས་མེད་མུ་སྟེགས་རྣམས་ལའང་ཡོད། །
འགྲོ་གཞན་སེམས་དང་ཁྱད་པར་གང་ཞིག་ཡོད། །

འོན་ཏེ་དེ་དག་སྟོང་པར་སྒོམ་ཞེ་ནའང༌། །
བཅོས་ཤིང་བཅོས་ཤིང་སྟོང་པར་སུས་བསྒོམས་པ། །
བཟང་རྟོག་ཉིད་དེ་འཆིང་བྱེད་གཉེན་པོའི་བློ། །
རང་བཞིན་བབས་མིན་སྟོང་པས་ཕན་ཅི་ཡོད། །
རྟོག་ལས་རྟོག་འཐུད་བཟང་ངན་རྟོག་ཚོགས་ཅན། །
ད་དུང་འཁོར་བའི་གྲོང་ཁྱེར་སྒྲུབ་བྱེད་ཡིན། །
བཟང་པོར་རྟོག་གང་མཐོ་རིས་བདེ་འགྲོ་གཉིས། །
ངན་པར་རྟོག་གང་ངན་སོང་རྣམ་པ་གསུམ། །
རིམ་གྱིས་འགྲོ་ཞིང་འཁོར་རྒྱུན་འདའ་མི་ནུས། །

གང་ལ་བཟང་ངན་ལས་ཀྱི་རྒྱུ་མེད་པ། །
དེ་ལ་དེས་བསྐྱེད་འབྲས་བུར་འཁོར་བ་མེད། །
ནམ་མཁའ་བཞིན་ཏེ་གང་གིས་གོས་པར་འགྱུར། །

ཡུལ་གྱི་ཆུ་བོར་བློ་ཡི་གཟིངས་བཅས་ཏེ། །
དམིགས་གཏད་གྲུ་འཛིན་འབད་མེད་རྩོལ་བའི་མི། །
སྲིད་པའི་རྒྱ་མཚོར་འཁོར་ཞིང་དུབ་པ་ལས། །
རྣམ་གྲོལ་རྒྱ་མཚོའི་ཕ་རོལ་ཕྱིན་མི་ནུས། །
གང་ལ་དམིགས་གཏད་སྒོམ་པའི་སེམས་ཡོད་པ། །
རྩོལ་ཞིང་འབད་དེ་སྒྲུབ་པ་དེ་སྲིད་བར། །
འཁོར་བ་ཉིད་ལས་གྲོལ་བའི་ཐབས་མེད་དོ། །

ཡུལ་གྱི་མཁའ་ལ་རིག་པའི་རྩལ་འཕྱོ་བ། །
གཏད་མེད་རྒྱལ་པོ་འཛིན་མེད་ཤར་བའི་མི། །
ཡུལ་དང་ཡུལ་ཅན་སྲིད་ལས་རང་གྲོལ་ནས། །
དུས་གསུམ་འཕོ་འགྱུར་མེད་པའི་ངང་དུ་གནས། །

རྩོལ་བའི་དུག་གིས་སུ་ཡི་སྙིང་ཟིན་པ། །
དེ་ལ་སྲིད་པའི་སྡུག་བསྔལ་ཆར་བཞིན་འབབ། །
རྩོལ་མེད་རྒྱལ་པོ་བྱ་བྲལ་བློ་བདེ་བ། །
རང་གྲོལ་རྒྱལ་པོ་མཉམ་པའི་གདིང་རྙེད་ནས། །
རྟོག་པའི་འཕྲོ་འདུ་ཡེ་ཤེས་རོལ་པར་འཆར། །
དེ་ནི་གདོད་མའི་སར་ཕྱིན་འཁྲུལ་པ་མེད། །
རང་བྱུང་ལྷུན་གྲུབ་ཆེན་པོའི་དགོངས་པར་ཕྱིན། །

གང་གི་ཡིད་ལ་གྲོལ་བ་སུ་འདོད་པ། །
གཉུག་མའི་སེམས་ལ་བཅོས་བསླད་མ་བྱེད་ཅིག །

བཅོས་ཤིང་བཅོས་ཤིང་དེ་ཡིས་ངེས་པར་འཆིང༌། །
མ་བཅོས་རྒྱལ་པོ་ལྷུན་རྫོགས་རིག་པའི་གནད། །
གང་བབས་ངང་ལ་རང་བབས་རང་དགའི་སེམས། །
བྱ་རྩོལ་མ་བྱེད་ཟང་ཐལ་སྐད་ཅིག་མ། །
གང་ཡིན་ཡིན་གྱི་དགག་སྒྲུབ་རྡུལ་ཙམ་མེད། །
འདི་ཡིན་མེད་གྱིས་སྤང་བླང་ཐ་སྙད་བྲལ། །
གཞི་གྲོལ་ལམ་གྲོལ་འབྲས་བུ་གྲོལ་བའི་ངང༌། །
རང་གྲོལ་རྒྱལ་པོ་དུས་གསུམ་འཕོ་འགྱུར་མེད། །
བརྗོད་མེད་བསམ་འདས་གཞི་རྫོགས་གཉུག་མའི་ཀློང༌། །
གྲོལ་བ་མེད་དེ་གྲོལ་གཞི་རྡུལ་ཙམ་མེད། །
བལྟར་མེད་མཐོང་མེད་བརྡ་ཡིས་མཚོན་དུ་མེད། །
བསམ་ཡུལ་འདས་ཏེ་བསམ་བྱའི་དངོས་པོ་མེད། །

ཡོད་མེད་མ་ཡིན་གཉིས་དང་གཉིས་མེད་མིན། །
མུ་བཞི་ལས་འདས་གདལ་བ་ཆེན་པོའི་ཀློང༌། །
རང་བཞིན་ལྷུན་རྫོགས་སྐྱེ་མེད་ནམ་མཁའི་ཀློང༌། །
གཏིང་མཐའ་མུ་མེད་རིན་ཆེན་རྒྱ་མཚོའི་ཀློང༌། །
རང་བཞིན་འོད་གསལ་སྣང་སྟོང་ཉི་ཟླའི་ཀློང༌། །
མ་སྤྲོས་རྒྱལ་པོ་འདུ་འབྲལ་མེད་པའི་ཀློང༌། །

རྒྱུ་མེད་རྐྱེན་བྲལ་མཐོང་སྣང་རང་སར་དག །
སྒྲིབ་བྲལ་ཅོག་བཞག་རང་གྲོལ་རིག་པའི་གནད། །
འགྱུས་པས་འགགས་ལ་སྣང་བས་རང་སར་གྲོལ། །
གྲོལ་དང་མ་གྲོལ་ཐ་སྙད་རྨི་ལམ་འདྲ། །
རྩ་བྲལ་ངང་ལ་གོལ་བ་གང་ཞིག་ཡོད། །
འདི་ཀུན་བརྗོད་པའི་ཐ་སྙད་ཙམ་དུ་འོ། །

རིག་པའི་རྒྱལ་པོ་སྟོང་གསལ་ཆོས་སྐུའི་གདིང་། །
ཡེ་གྲོལ་རང་བབས་ཡེ་གྲུབ་ཆེན་པོའི་གདིང༌། །
མ་སྤངས་ཡོངས་རྫོགས་གདོད་ནས་དག་པའི་གདིང་། །
མི་འགྱུར་ལྷུན་གྲུབ་གཞི་རྩ་བྲལ་བའི་གདིང༌། །
རང་གྲོལ་ཅོག་བཞག་རང་ཤར་ཆེན་པོའི་གདིང༌། །

སོ་མ་གཉུག་མ་མ་བཅོས་རང་ག་མ། །
ཐ་མལ་ཤེས་པ་རང་གྲོལ་རྒྱལ་བའི་ལམ། །
རང་རིག་རང་གྲོལ་གཉེན་པོས་བཅོས་མི་དགོས། །
སྐྱེ་མེད་ལྷུན་རྫོགས་ཡེ་གྲོལ་རིག་པའི་ཀློང༌། །
གང་སྣང་གྲོགས་སུ་འཆར་བའི་རང་བཞིན་ལ། །
སྤང་བླང་འཁྲུལ་བའི་བྱུང་ཁུངས་ཟད་པ་ཡིན། །
བཟང་ངན་བདེ་སྡུག་གང་ཤར་རིག་པའི་ངང༌། །
རིག་པའི་རང་བཞིན་ཡེ་ཤེས་རོལ་པའི་ངང༌། །
འཁོར་འདས་འཁྲུལ་གཞི་ཟད་པ་ངོ་མཚར་ཆེ། །

གཅིག་གིས་ཀུན་གྲོལ་ཀུན་གྱིས་གཅིག་མི་གྲོལ། །
དེ་ལྟར་ཤེས་ཏེ་རང་གྲོལ་རིག་པའི་གནད། །
ཡེ་གྲོལ་བསྐྱར་གཞི་མེད་དེ་གདོད་མའི་ངང༌། །
ཅེར་གྲོལ་ངོ་བོ་མེད་དེ་བདེན་པས་སྟོང༌། །
རང་གྲོལ་གཉེན་པོ་མེད་དེ་གཉུག་མའི་སེམས། །
འགྱུས་གྲོལ་རང་སར་དག་སྟེ་སྐད་ཅིག་མ། །
ཤར་གྲོལ་དུས་མཉམ་ཡིན་ཏེ་སྔ་ཕྱི་མེད། །

གང་ལའང་ཆེད་འཛིན་མ་བྱེད་གཟའ་གཏད་བྲལ། །
རང་ཤར་རང་བབས་རང་གར་ཡན་དུ་ཆུག །
རང་ཡན་རང་ཞིག་ངོས་གཟུང་ཀུན་ལས་འདས། །
བློ་ཡིས་མ་གཟོ་འགྱུ་བ་མ་དགག་ཅིག །
ཕྱི་ནང་ཡུལ་མེད་ནམ་མཁའ་ལྟ་བུའི་ངང༌། །
ཡེ་སྟོང་ནང་ན་བློ་སྟོང་ཡངས་པ་ཆེ། །
ཆོས་ཟད་ངང་ནས་བློ་ཟད་ཉམས་རེ་དགའ། །

ཡུལ་གྱི་རང་བཞིན་བློ་ཡི་སྐྱོན་ལས་འདས། །
བློ་ཡིས་ངོ་བོ་ཡུལ་གྱིས་གོས་པ་མེད། །
སྤང་ལེན་དགག་སྒྲུབ་རེ་དོགས་མ་བྱེད་ཅིག །

གང་ལ་མི་གནས་བརྗོད་གཞི་ཀུན་ལས་འདས། །
མ་བཅོས་ལྷུག་པ་ཡེ་གྲོལ་ཆོས་ཉིད་ལ། །
ཕྱི་ནང་གཉེན་པོ་དེ་ལ་བཅོས་མི་དགོས། །

རང་གྲོལ་རྒྱལ་པོ་གང་བབས་རིག་པའི་གནད། །
རང་བཞག་ལྟོས་བྲལ་བཅོས་བསླད་མེད་པའི་ངང༌། །
ལྷུན་འབྱམས་རིག་པ་གང་ཤར་ཡུལ་ལ་རོལ། །

མ་བཙལ་རང་བཞག་རང་བབས་ཀུན་བཟང་ངང༌། །
ཚིག་དང་བློ་ཟད་དབང་པོའི་ཡུལ་ལས་འདས། །
བལྟར་མེད་བསྒོམ་མེད་འདི་ཞེས་མཚོན་དུ་མེད། །
བྱ་བྲལ་གླེན་པའི་ཤུགས་འཆང་བློ་བདེ་འོ། །

ཕྱོགས་མེད་རིས་བྲལ་ཡེ་ཤེས་ཁྱབ་གདལ་བ། །
མ་རྙོག་རང་གདངས་དཔེ་ཟླ་མེད་པའི་དོན། །
བཙལ་བས་མི་རྙེད་བཞག་པས་རང་རྙེད་པའི། །
རང་སྣང་འགྱུ་བ་ཆོས་སྐུའི་རོལ་པར་ཤར། །
ཤར་ཙམ་ཉིད་ནས་འཆར་ནུབ་རྙོག་བྲལ་བ། །
བླ་མའི་དྲིན་གྱིས་རྟོགས་པའི་དངོས་དེ་རྒྱལ། །

སྣ་ཚོགས་གྲུབ་མཐའ་ལམ་གྱིས་མི་རྟོགས་ཤིང༌། །
ཡིད་དཔྱོད་བློ་ཡིས་སྒྲོ་འདོགས་དང་བྲལ་བ། །
རང་གྲོལ་རང་བབས་རིག་པའི་མཚངས་འདི་མཚར། །

གཞི་རྫོགས་བསམ་ཡུལ་ཀུན་ལས་འདས་པའི་ངང༌། །
སེམས་ཀྱི་མཁའ་ལ་ཡིད་ཀྱི་དལ་འཕྱོ་ལ། །
རྒྱུ་མེད་རྐྱེན་བྲལ་ཉག་གཅིག་ཐིག་ལེའི་འགྲོས། །

རང་བཞིན་དག་པའི་མཁའ་ལ་རང་སྣང་བ། །
མི་འགྱུར་མཉམ་པའི་གཟེར་ཆེན་ཐེབས་པ་འདི། །
སྣང་མིན་སྟོང་མིན་མུ་བཞི་གདལ་བའི་ངང༌། །
རྣམ་ཀུན་སྟོང་པའི་གཟུགས་ཀློང་ཡངས་པ་ཡིན། །
རང་བཞིན་རང་གྲོལ་ལྷུན་གྲུབ་ཡངས་པའི་ཀློང༌། །

ཁྱུང་ཆེན་གཤོག་རྫོགས་མུ་བཞི་གདལ་བའི་དོན། །
ཀློང་ཆེན་རབ་འབྱམས་ངང་དུ་བཤད་པ་འདིས། །
འགྲོ་ཀུན་མ་སྤངས་ཀློང་དུ་རྫོགས་པར་ཤོག །

ཁྱུང་ཆེན་གཤོག་རྫོགས་ཞེས་བྱ་བ། །བྱར་མེད་ཀློང་ཡངས་ཀྱི་རྣལ་འབྱོར་ཀློང་ཆེན་རབ་འབྱམས་ཀྱིས། མཆིམས་ཕུ་དཔལ་གྱི་དབེན་གནས་སུ་སྦྱར་བ་རྫོགས་སོ།། །།དགེའོ། །དགེའོ། །དགེའོ།། །།