Song for the King of Bhutan—Tibetan

༄༅། །འབྲུག་ཆོས་རྒྱལ་ཆེན་པོ་ལ་གཏམ་དུ་བྱ་བ་གསར་བྱུང་མགྲོན་པོའི་རྒྱང་གླུ་ཞེས་བྱ་བ་བཞུགས་སོ།།

རྒྱལ་བ་ཀུན་གྱི་འཕྲིན་ལས་གཅིག་བསྡུས་པ། །སྙིགས་མའི་རྒུད་པ་འཇོམས་ལ་གཅིག་ཏུ་དཔའ། །
ཨོ་རྒྱན་རིག་འཛིན་བརྒྱུད་པར་བཅས་པ་ཡིས། །མི་བདག་ཁྱོད་ལ་དུས་ཀུན་བསྲུང་གྱུར་ཅིག །

ས་སྐྱོང་རྗེ་བོའི་དབུ་འཕང་དགུང་ལས་མཐོ། །འབངས་ཀྱི་སྐྱེ་བོ་རང་དབང་བདེ་དགེས་འཚོ། །
ཀུན་ཀྱང་ཐེག་ཆེན་ཟབ་མོའི་དཔལ་ལ་སྤྱོད། །ཆོས་ལྡན་རྒྱལ་ཁབ་འདི་ལ་ཡིད་རེ་སྤྲོ། །

དཀར་ཟླུམ་ཁ་བའི་རི་བོ་རབ་མཛེས་ཀྱང་། །བདེ་སྡུག་གྲོགས་ཀྱི་སྣང་བ་མི་བརྟན་པས། །
ཆུ་ལྷའི་འཕྲག་པར་ཁུར་བའི་འོད་སྣང་གིས། །ཡུན་དུ་འཁྱུད་ན་ཆབ་ཀྱི་ཕུང་པོར་འགྱུར། །

སྐྱབས་གསུམ་ཀུན་འདུས་ཨོ་རྒྱན་ཐོད་འཕྲེང་དང་། །ལྷ་མཆོག་རྡོ་རྗེ་ཕུར་པའི་བསྙེན་སྒྲུབ་ཀྱིས། །
དངོས་གྲུབ་སྤྲིན་ཕུང་གྲོགས་སུ་འགུགས་ནུས་ན། །རབ་བརྗིད་གངས་ཀྱི་རི་བོ་སྲིད་མཐར་བརྟན། །

སྔོན་སྤྱད་མི་བཟད་རྟེན་འབྲེལ་གཞན་དབང་གིས། །སྲོག་བདག་སྲོག་ལ་འགྲན་ཟླ་འཚོལ་སྲིད་ན། །
འཇམ་དབྱངས་ཐུགས་སྤྲུལ་མི་ཡི་ནོར་བུ་ཉིད། །མ་གཏོགས་སྐྱབས་གཞན་སྲིད་འདིར་རྙེད་པར་དཀའ། །

བཀའ་བརྒྱུད་བསྟན་པ་གསེར་གྱི་རྒྱལ་མཚན་རྩེར། །སྔ་འགྱུར་ཙིནྟ་མ་ཎིའི་ཏོག་འཆང་འདི། །
བླ་ནས་བླ་རུ་འདེགས་པའི་སྟོབས་བསྐྱེད་ན། །ཆོས་སྲིད་ལེགས་ཚོགས་ཡར་ཟླའི་མཆེད་དུ་འགྱུར། །

བསླུ་མེད་དཀོན་མཆོག་གསུམ་གྱི་བདེན་པ་དང་། །བདག་གི་ལྷག་བསམ་རྣམ་པར་དག་པའི་མཐུས། །
ཡུལ་འདིར་དགེ་ལེགས་ངང་གིས་འཕེལ་བ་དང་། །འགལ་རྐྱེན་མཐའ་དག་ཞི་བའི་བཀྲ་ཤིས་ཤོག །

ཅེས་ཚིགས་སུ་བཅད་པ་རྒྱལ་སྲིད་སྣ་བདུན་གྱི་གྲངས་ལྡན་འདི་ནི་ཆོས་རྒྱལ་སྲོང་བཙན་སྒམ་པོའི་ཡང་འདུལ་གྱི་གཙུག་ལག་ཁང་ཆེན་པོར་འབྲུག་རྒྱལ་པོ་དང་སྐུ་འཁོར་ལྷན་རྒྱས་ལ་མཇལ་འཕྲད་བྱེད་སྐབས་ངག་དབང་བློ་གྲོས་མཚུངས་མེད་ཀྱི་ཡིད་ངོར་ཤར་བ་བཞིན་མཁན་པོ་བསོད་ནམས་དར་རྒྱས་ཀྱིས་ཡི་གེའི་གཟུགས་སུ་བྱས་པ་དགེ་ལེགས་འཕེལ། །རབ་བྱུང་བཅུ་བདུན་པའི་བོད་ལྕགས་རྟ་ཟླ་ ༧ པའི་ཚེས་ ༢༢ ལའོ།། །།