Yumka Self-Initiation—Tibetan

༄༅། །ཡུམ་ཀ་མཁའ་འགྲོའི་བདག་འཇུག་དབང་དོན་རབ་གསལ་བཞུགས།།

 

རང་བཞིན་མེད་པའི་ཆོས་ཉིད་ཀྱི། །

རྟེན་འབྱུང་རྣམ་པར་ཐར་བའི་སྒོ། །

རྡོ་རྗེ་བཙུན་མོའི་མཁའ་དབྱིངས་ལ། །

རྣམ་ཀུན་མཆོག་ལྡན་དྲན་པས་རོལ། །

རིག་འཛིན་ཡུམ་ཀའི་བདག་འཇུག་ལ་སྤྱི་དོན་རྣམ་པ་གསུམ་ལས།

དང་པོ་སྦྱོར་བ་ནི།

གཞི་མ་དུལ་བ་ཡིན་ན་ས་ཆོག་སྔོན་དུ་འགྲོ་བས་རྡུལ་ཚོན་ནམ་རས་བྲིས་གྲུབ་ན་རབ། མ་ནུས་ན་སྟེགས་བུའི་ཁར་ཚོམ་བུ་ལ་བྷནྡྷ་བདུད་རྩིས་བཀང་བ་ཆོས་སྨན་དང་བུམ་རྫས་ཉེར་ལྔས་བྲན་པའི་སྟེང་

མེ་ལོང་སིན་དྷུ་རས་བཅགས་པར་ཆོས་འབྱུང་བསྣོལ་མ་བྲིས་པའི་དབུས་སུ་དགའ་འཁྱིལ་དམར་པོ་མཚན་ཉིད་བཞི་ལྡན་ལ་ཏཱཾཿདང་། མདུན་ནས་བརྩམས་པས་གཡས་བསྐོར་དུ་དགའ་འཁྱིལ་ཕྱོགས་མདོག་ཅན་བཞི་ལ་ཧ་རི་ནི་ས་ཡིག་མགོ་ཕྱིར་བསྟན་དུ་བཀོད། དེའི་སྟེང་དུ་དྲིལ་བུའི་བཀབ་པ་དར་དམར་གྱི་ལྡིང་གུར་དང་བཅས་གཞུག །སྨན་གཏོར་རཀྟ་དང་ཉེར་སྤྱོད་ཀྱིས་བསྐོར། ཉེ་ལོགས་སུ་ལས་བུམ་བཅུད་ལྡན་ཀྱང་གཞག་གོ། །

གཉིས་པ་དངོས་གཞི་ལ་གཉིས་ལས།

དང་པོ་དཀྱིལ་འཁོར་སྒྲུབ་པ་ནི།

ཐ་མལ་གྱི་སྣང་ཞེན་མཁའ་འགྲོའི་དཀྱིལ་འཁོར་དུ་གསལ་ཐེབ་ན་བདག་མདུན་གྱི་གོ་ས་ལོགས་སུ་མ་བྱས་ཀྱང་རུང་ལ། རིག་པའི་མེ་ཏོག་དོར་བ་ཙམ་གྱིས་དཀྱིལ་འཁོར་དུ་འཇུག་པའི་དོན་རྫོགས་པ་ཡིན་ཀྱང་།

དེ་ལྟར་ལྷོངས་སུ་མ་གྱུར་པ་ལ་བདག་འཇུག་དམིགས་ཀྱིས་བསལ་པ་ཡིན་པས་བསྟོད་པའི་མཇུག་ཏུ་རྩ་སྔགས་ཕཊ྄ཿ ཛཿ བཏགས་པའི་སྒྲ་གདངས་ཀྱིས་བདག་མདུན་ཐ་དད་དུ་དབྱེ་ནས་དོ་ལའི་བཟླས་པ་དང་

དེ་བཞིན་རང་བྱུང་བདེ་སྐྱོང་གི་བུམ་པའི་སྣོད་གཞལ་ཡས་ཁང་དང་། བཅུད་ལྷའི་རང་བཞིན་གྱི་ངེས་པ་དྲན་པའི་བུམ་བཟླས་དམིགས་ཕྱེད་པའི་མཐར་མཆོད་བསྟོད་དང་བཅས་དུང་ཆོས་ཀྱི་ཆུ་མཆོད་ཡོན་དུ་ཕུལ་ལ་འོད་ཞུ་བྱ།

ལས་བུམ་དུ་རྟ་མགྲིན་ཐོད་དབྱུག་དང་སྡིགས་མཛུབ་མཛད་པ་བསྐྱེད་ལ།

ཨོཾ་བཛྲ་ཀྲོ་ཏ་ཧྱ་གྷྲི་ཝ་ཧུ་ལུ་ཧུ་ལུ་ཧཱུྃ་ཕཊ྄ཿ

ཅེས་ཅི་རིགས་པར་བཟླས་ནས་ཀྱང་

ཨོཾ་ཨཱཿཧཱུྃ་

གིས་མཆོད་ཡོན་ཕུལ་ལ་འོད་ཞུ་བྱ་བའོ། །

གཉིས་པ་བདག་འཇུག་

ལ་དོན་བརྒྱད་ལས།

དང་པོ་ནི།

ཇི་ལྟར་བལྟམས་པ་ཙམ་གྱིས་ནི། །

ལྷ་རྣམས་ཀྱིས་ནི་ཁྲུས་གསོལ་ལྟར། །

ལྷ་ཡི་ཆུ་ནི་དག་པ་ཡིས། །

དེ་བཞིན་བདག་གིས་དབང་བསྐུར་རོ། །

ཨོཾ་སརྦ་ཏ་ཐཱ་ག་ཏ་ཨ་བྷི་ཥེ་ཀ་ཏ་ས་མ་ཡ་ཤྲི་ཡེ་ཧཱུྃ།

སོགས་ཀྱིས་ཁྲུས་ནས་དབྱུང་།

ཕྱི་རོལ་པ་ལ་གཏོར་མ་བྱིན་ནས་སྲུང་འཁོར་སྒོམ།

ཙཀྵུ་བྷནྡྷ་ས་མིག་དར་འཆིང་། 

ཨ་ཁཾ་ཝཱི་རས་མེ་ཏོག་བཟུང་། 

མཎྜལ་འབུལ་བ་རྣམས་བྱའོ། །

གཉིས་པ་གསོལ་གདབ་ནི།

ཀུན་མཁྱེན་ཡེ་ཤེས་ཕུང་པོ་ཅན༔

སྲིད་པའི་འཁོར་ལོ་རྣམ་སྦྱོང་བ༔

དེ་རིང་བཤད་པའི་རིན་ཆེན་གཏེར༔

གཙོ་བོས་བདག་ལ་བཀའ་དྲིན་སྩོལ༔

ལན་གསུམ།

གསུམ་པ་ཚོགས་བསག་པ་ནི།

རྡོ་རྗེ་སློབ་དཔོན་སངས་རྒྱས་དཔལ། །

དུས་གསུམ་བཞུགས་ལ་ཕྱག་འཚལ་ལོ། །

 

མཆོག་གསུམ་བསྟེན་པའི་ཞིང་གྱུར་ལ། །

གཉིས་མེད་ཡིད་ཀྱིས་སྐྱབས་སུ་མཆི། །

 

དངོས་སྦྱོར་ཡིད་ཀྱིས་རྣམ་སྤྲུལ་པའི། །

དག་པའི་མཆོད་པ་བཞེས་སུ་གསོལ། །

 

དངོས་གྲུབ་ཆུ་བོ་གཅོད་པའི་གེགས། །

ཉེས་བྱས་མ་ལུས་བཤགས་པར་བགྱི། །

 

ཕྱོགས་བཅུ་འཁོར་གསུམ་དག་པའི་ཆོས། །

མ་ཆགས་སྤྱོད་ལ་རྗེས་ཡི་རང༌། །

 

དག་པའི་མཐའ་བའི་དྲི་མ་མེད། །

རྫོགས་པའི་བྱང་ཆུབ་སེམས་བསྐྱེད་དོ། །

 

བདེ་བཤེགས་དབང་ཕྱུག་སེམས་ཅན་ལ། །

དགོས་པ་གསུམ་ཕྱིར་ལུས་འབུལ་ལོ། །

 

ཚེ་རབས་བགྲངས་པའི་དགེ་བ་རྣམས། །

བསྡུས་ནས་བྱང་ཆུབ་མཆོག་ཏུ་བསྔོ། །

ལན་གསུམ།

བཞི་པ་སྡོམ་བཟུང་ནི།

བདེ་བར་གཤེགས་པ་ཁྱེད་ཅི་འདྲ། །

དེ་འདྲ་ཁོ་ནར་བདག་འགྱུར་ཤོག །

སྤྱོད་པ་རྨད་བྱུང་བསམ་ཡས་པ། །

འགྲོ་ལ་ཕན་ཕྱིར་བདག་གིས་སྤྱད། །

བྱང་ཆུབ་སེམས་མཆོག་དམ་པ་དང་། །

སྐུ་གསུང་ཐུགས་ཀྱི་ཕྱག་རྒྱ་ནི། །

སྲོག་གི་ཕྱིར་ཡང་མི་གཏོང་ན། །

རྡོ་རྗེ་རྒྱལ་པོས་བྱིན་བརླབ་མཛོད། །

ལན་གསུམ།

བཞི་པ་དཀྱིལ་འཁོར་དུ་འཇུག་པ་ནི།

དེ་ནས་རིག་པ་བདེ་གཤེགས་སྙིང་པོའི་ངོ་བོ་ཉིད་སློབ་དཔོན་གྱི་ཕྱག་ལ་འཇུས་ནས་ཚོགས་བརྒྱད་གློ་བུར་བའི་རྟེན་ཐིག་ལེ་ཉག་གཅིག་པའི་སྒོར་ཁྲིད་པར་བསམ་ལ།

ཨ་ཁཾ་ཝཱི་ར་ཧཱུྃ་ཞེས་ལན་གསུམ་བརྗོད། 

ཨོཾ་ན་མ་ཏེ་ཧཱུྃ།

ཨོཾ་ན་མ་མེ་ཧཱུྃ།

ཨོཾ་ན་མ་ན་མ་ཧཱུྃ།

ཞེས་སྐུ་གསུང་ཐུགས་ཕྱག་བྱ།

ལྔ་པ་སྲས་སུ་བསྐྲུན་པ་ནི།

རྗེ་བཙུན་རྡོ་རྗེ་རྣལ་འབྱོར་མའི་མདུན་དུ་དབང་སྟེགས་པདྨ་འདབ་བརྒྱད་ལ་རང་ཉིད་འཁོད་པས་གཙོ་བོ་དང་རིགས་བདག་གི་ཐུགས་ཀ་ནས་རཾ་ཡིག་དམར་པོ་བདེ་བའི་བདག་ཉིད་ཅན་དུ་བྱུང་བས་ཀུན་གཞི་ཚོགས་བརྒྱད་དང་བཅས་པའི་རྣམ་སྨིན་གྱི་ཕུང་པོ་སྦྱངས།

རྣམ་པར་ཤེས་པ་ཏཱཾ་ཡིག་ཏུ་གྱུར་པ་རིགས་བདག་གི་ཞལ་དུ་དྲོང་། སྐུའི་དབྱིབས་བརྒྱུད། ཡུམ་གྱི་མཁའ་གསང་དུ་ལྷུང་།

ཞུ་བདེ་དང་གཉིས་སུ་མེད་པའི་བྱང་ཆུབ་ཀྱི་སེམས་སུ་གྱུར་པ་སྔར་གྱི་དབང་སྟེགས་ལ་འཁོད་པར་གྱུར།

དྲུག་པ་ཡེ་ཤེས་དབབ་པ་ནི།

འོད་ཀྱི་རྣམ་པའི་སྟོང་གཟུགས་ལས༔

མཁའ་འགྲོ་བདེ་ཆེན་རྒྱལ་མོ་ནི༔

ཞལ་གཅིག་ཕྱག་གཉིས་སྐུ་མདོག་དམར༔

གཅེར་མོ་མཉམ་པའི་དོར་སྟབས་ཅན༔

ཤིན་ཏུ་ཆགས་དང་བཞད་པའི་ཞལ༔

ཕྱག་གཡས་ཐོད་པའི་ཅང་ཏེའུ༔

སྙན་གྱི་ཐད་ཀར་གཏོད་ཅིང་འཁྲོལ༔

གཡོན་པ་གྲི་གུག་ཡུ་བ་ནི༔

དཀུ་ལ་བརྟེན་ནས་མཆོག་དུ་འགྱིང་༔

བྷ་ག་རྒྱས་ཤིང་ནུ་མ་འབུར༔

རིན་པོ་ཆེ་དང་གཞོན་ནུའི་རྒྱན༔

པུཎྜ་རི་ཀའི་དོ་ཤལ་འཕྱང་༔

རུས་པའི་རྒྱན་དྲུག་སྐུ་ལ་མཛེས༔

གནག་སྣུམ་དབུ་སྐྲའི་ལན་ཚར་ཅན༔

རིན་པོ་ཆེ་ཡི་རྩེ་བྲན་བརྗིད༔

དབུ་མའི་སྤྱན་ནི་དབྱིངས་ལ་གཟིགས༔

ལོངས་སྐུའི་སྤྱན་གྱིས་འགྲོ་བ་འདུལ༔

སྤྲུལ་སྐུའི་སྤྱན་གྱིས་ཁམས་གསུམ་འགུགས༔

 

སྐུ་ལ་རྒྱུད་སྡེའི་དཀྱིལ་འཁོར་རྫོགས༔

ཐུགས་ཀར་ཨཱརྻ་ཏཱ་རེ་མ༔

ལྗང་སྔོན་ཞལ་གཅིག་ཕྱག་གཉིས་ཚུལ༔

དེ་ཡི་ཐུགས་ཀར་ཡེ་ཤེས་ཀྱི༔

ཕག་མོ་གནག་སྣུམ་གྲི་ཐོད་ཅན༔

སེམས་དཔའ་སུམ་བརྩེགས་གནས་ལྔ་རུ༔

ཕྱག་མཚན་ལྔ་དང་ས་བོན་ལྔས༔

མཚན་པ་དེ་ལས་འོད་འཕྲོས་པས༔

འོག་མིན་གནས་དང་མཁའ་སྤྱོད་ཞིང༔

གཡུ་ལོ་བཀོད་དང་པདྨ་འོད༔

རང་བཞིན་གནས་ནས་ཡེ་ཤེས་པ༔

དྲངས་ཏེ་གཉིས་སུ་མེད་པར་བསྟིམ༔

 

ཧཱུྃ༔ ཡུལ་གྱི་མིང་ནི་རྒྱ་གར་ཡུལ༔

གནས་ཀྱི་མཆོག་གྱུར་ཨུ་རྒྱན་གནས༔

དྷུ་མ་ཐ་ལ་མཁའ་འགྲོའི་གྲོང་༔

གླིང་གི་གླིང་མཆོག་རྔ་ཡབ་གླིང་༔

དོན་ལ་འོག་མིན་བདེ་ཆེན་ཞིང་༔

རྣམ་པ་མཁའ་སྤྱོད་སྤྲུལ་པའི་གནས༔

དགྱེས་ཤིང་བཞུགས་པའི་ཡུལ་ཀུན་ནས༔

ཆོས་སྐུ་ཡུམ་ཆེན་མཚོ་རྒྱལ་མ༔

འབུམ་ཕྲག་མཁའ་འགྲོའི་འཁོར་དང་བཅས༔

བྱིན་གྱིས་བརླབ་ཕྱིར་གཤེགས་སུ་གསོལ༔

གནས་མཆོག་འདི་རུ་བྱིན་ཕོབ་ལ༔

སྒྲུབ་མཆོག་བདག་ལ་དབང་བཞི་བསྐུར༔

བགེགས་དང་ལོག་འདྲེན་བར་ཆད་སོལ༔

མཆོག་དང་ཐུན་མོང་དངོས་གྲུབ་སྩོལ༔

ཨོཾ་པདྨོ་ཡོ་གི་ནཱི་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་ཝཱ་རཱ་ཧཱི་ཕཻཾ་ཕཻཾཿ

ཞེས་སྤོས་རོལ་དང་བཅས་འཕར་གཡོ་འབྱུང་བ་ཙམ་དུ་ཡེ་ཤེས་པ་དབབ་རྗེས་

ཏིཥྛ་བཛྲས་བརྟན་པར་བྱ། 

པྲ་ཏཱི་ཙྪ་བཛྲ་ཧོཿ

ཞེས་རིག་པའི་མེ་ཏོག་དོར།

པྲ་ཏི་གྷྲི་ཧ་ན་ཨི་མཾས་ཏ་མ་ཧཱ་བཱ་ལཿ

ཞེས་མེ་ཏོག་སྤྱི་བོར་བཞག་ལ་ལྷག་ལྷ་ཐིམ་པར་བསམ།

ཙཀྵུ་པྲ་བེ་ཤ་ཡ་ཕཊ྄ཿ ཅེས་པས་མཐོང་བ་བསྟན་པར་བསམ། 

བདུན་པ་གསོལ་གདབ་ནི།

བྱང་ཆུབ་རྡོ་རྗེས་སངས་རྒྱས་ལ། །

མཆོད་ཆེན་ཇི་ལྟར་སྩལ་བ་ལྟར། །

བདག་ཀྱང་ཡོངས་སུ་སྐྱོབ་པའི་ཕྱིར། །

ནམ་མཁའི་རྡོ་རྗེ་དེང་བདག་སྩོལ། །

བརྒྱད་པ་དབང་བསྐུར་དངོས་

ལ་བཞི་ལས།

དང་པོ་བུམ་དབང་ནི།

ཐོད་བུམ་སྤྱི་བོར་གཏུགས་ཤིང་།

ཧོཿ གསང་སྔགས་དམ་ཚིག་བླ་ན་མེདཿ

རང་བྱུང་ལྷུན་གྲུབ་བུམ་པའི་དབངཿ

སངས་རྒྱས་ཀུན་གྱི་གསང་གསུམ་གྱིཿ

དབང་བསྐུར་དམ་པ་ཁྱོད་ལ་སྦྱིནཿ

ཨོཾ་པདྨོ་ཡོ་གི་ནཱི་ཏཱ་རེ་ཏུཏྟཱ་རེ་ཏུ་རེ་ཛྙཱ་ན་ཝཱ་རཱ་ཧཱི་ཀ་ལ་ཤ་ཨ་བྷི་ཥིཉྩ་ཧཱུྃཿ

ཞེས་བུམ་བཅུད་མྱོང་།

གཉིས་པ་གསང་དབང་ནི།

བདུད་རྩི་དེ་ཉིད་བླ་མ་ཡབ་ཡུམ་གྱི་བྱང་སེམས་དངོས་སུ་བསམ་ལ་ཡུམ་གྱི་མཁའ་གསང་ནས་བླངས་པར་མོས་ནས་ཧུབ་གང་བཏུང་སྟེ།

ཧོཿ བྱང་ཆུབ་སེམས་ཀྱི་དམ་ཚིག་ནི༔

རྩ་ཁམས་ཡི་གེའི་འཁོར་ལོར་བསྟིམ༔

བརྗོད་པ་མེད་ལས་ཐམས་ཅད་སྐྱེས༔

གྲགས་སྟོང་གསུང་གི་དབང་ཐོབ་ཤོག༔

རྩ་སྔགས་དང་།

བྷོ་དྷི་ཙིཏྟ་ཨ་བྷི་ཥིཉྩ་ཨཱཿ

ཞེས་དང་རྗེས་འབྲེལ་དུ་བགྲང་ཕྲེང་དང་བཅས།

མདུན་བསྐྱེད་ཀྱི་ཐུགས་ཀ་ནས་སྔགས་ཕྲེང་བྱུང་། །

བདག་བསྐྱེད་ཀྱི་ཞལ་དུ་ཞུགས།

ཐུགས་ཀའི་ས་བོན་ལ་འཁོར་བར་བསམས་

ལ་རྩ་སྔགས་ལན་གསུམ་དང་།

བཅོམ་ལྡན་བདག་གིས་བཟུང་ལགས་ཀྱིས། །

བདག་ལ་ཉེ་བར་མཛད་དུ་གསོལ། །

གསུམ་གྱི་མཐར། ཕྲེང་བ་མགོ་བོར་བཞག་ལ།

བཅོམ་ལྡན་འདི་ལ་སྩལ་ལགས་ཀྱིས། །

འདི་ལ་འགོ་བར་མཛད་དུ་གསོལ། །

སྔགས་ཀྱི་དངོས་གྲུབ་སྩལ་ནས་ཀྱང་། །

བརྟུལ་ཞུགས་བརྟན་པར་མཛད་དུ་གསོལ། །ཞེས་བརྗོད། 

གསུམ་པ་ཤེར་དབང་ནི།

དགའ་བ་བཞིའི་བདག་ཉིད་སིནྡྷུ་རའི་རྟེན་དྲིལ་བུའི་བརྟེན་པ་དང་བཅས་པ་བླངས་ལ་ཐབས་ཤེས་འབྲེལ་བའི་ཐར་པ་བསྟེན་པ་མོས་ལ།

ཧོཿ ཡེ་ཤེས་རྣམ་པ་ཐམས་ཅད་པ༔

དགའ་བ་བཞི་ལ་ཡང་དག་བསྟེན༔

ཐབས་ཤེས་འབྲེལ་བའི་དམ་ཚིག་གི༔

ཕྱག་རྒྱ་ཆེན་པོ་ཁྱོད་ཀྱིས་ལོངས༔

ཛཿཧཱུྃ་བཾ་ཧོཿ

ཞེས་པས་རོལ་པ་ཆེན་པོའི་དམ་ཚིག་དང་།

ཨ་ཧོ་མ་ཧཱ་སུ་ཁས་བདེ་བས་ཐབས་བྱས་པའི་ལྷན་སྐྱེས་ལ་ངེས་པ་བརྟན་པར་བསམ་

ཞིང་སིནྡྷུ་ར་སྙིང་གར་བྱུག །

བཞི་པ་དོན་དབང་ནི།

དྲིལ་བུ་དཀྲོལ་ཞིང་དེའི་སྒྲ་ལ་རིག་པ་གཏད་ནས།

ཐབས་ལས་བྱུང་བའི་དཔེའི་ཡེ་ཤེས་ཀྱིས་ཀྱང་མི་མཚོན་པའི་ཆོས་ཉིད་ལ་མཉམ་པར་བཞག་ནས།

ཧོཿ སྒྲ་ནི་གྲགས་པ་ཉིད་ནས་སྟོང་༔

དེ་བཞིན་སེམས་ལ་ངོ་བོ་མེད༔

ངོ་བོ་མེད་པའི་གནས་ལུགས་ལ༔

བལྟ་བྱ་སྤངས་ནས་ཡང་དག་ལྟོས༔

ཨ་ཨཿ

ཞེས་སྐྱེ་མེད་ཀྱི་དོན་ལ་བལྟའོ། །

དེ་ལྟར་དབང་བཞི་སོ་སོའི་དག་བྱ་དག་འབྲས་ནི་བླ་མའི་རྣལ་འབྱོར་ལྟར་ཚིག་ཕྲད་བསྒྱུར་ནས་བརྗོད་པའང་རུང་སྟེ་དོན་ལ་ངེས་ཤེས་ལྷོངས་པར་བྱའོ། །

གསུམ་པ་རྗེས་ཀྱི་རིམ་པ་

དམ་ཚིག་ཁས་བླང་པ་ལ་སྤྱི་དང་བྱེ་བྲག་གཉིས་ལས་

དང་པོ་ནི།

དབང་བཞི་རྫོགས་པའི་དམ་ཚིག་ཏུ༔

རྡོ་རྗེ་སློབ་དཔོན་མི་སྤང་ཞིང་༔

མར་ངོའི་ཚེས་བཅུ་རྒྱུན་མི་གཅད༔

གཞོན་ནུ་མ་ལ་བསྙེན་བཀུར་བྱ༔

རྟག་ཏུ་བྱང་ཆུབ་སེམས་གཉིས་བསྒམ༔

ལན་གསུམ།

གཉིས་པ།

གཙོ་བོས་ཇི་ལྟར་བཀའ་བསྩལ་པ། །

དེ་དག་ཐམས་ཅད་བདག་གིས་བགྱི། །

ཁྱོད་ལ་བདག་ཀྱང་ཡོངས་སུ་འབུལ། །

སློབ་མར་བཟུང་ནས་སྤྱད་དུ་གསོལ། །

སོགས་ཤློ་ཀ་ལན་གསུམ་བརྗོད་ཅིང་། ཚོགས་ཀྱི་འཁོར་ལོ་དང་བསྔོ་སྨོན་སོགས་རྗེས་ཆོག་སྤྱི་ལྟར་བྱའོ། །

འདིས་ནི་ཉམས་ཆག་ཐམས་ཅད་འདག་ཅིང་རྒྱུད་ལ་བྱིན་རླབས་འཇུག་པ་ཡིན་པས་ཡང་ཡང་བླང་བར་བྱའོ། །

 

ཞེས་པའང་བསམ་ཡས་ནས་རབ་བྱུང་སློབ་དཔོན་དམ་ཚིག་རྡོ་རྗེའི་ངོར་རིག་འཛིན་འཇིགས་མེད་གླིང་པས་སོ།། །།