Red Sur Offering—Tibetan
༄༅། །དམར་གསུར་ལ་བརྟེན་ནས་རང་གཞན་གྱི་འཆི་བ་བསླུ་བ།
དམར་གསུར་ལ་བརྟེན་ནས་རང་གཞན་གྱི་འཆི་བ་བསླུ་བ་ནི།
ཨོཾ་ཨཱཿཧཱུྃ་ལན་གསུམ་བརྗོད།
དམར་གསུར་འདོད་ཡོན་རྒྱ་མཚོ་འདི། །
དཀོན་མཆོག་སྲི་ཞུའི་མགྲོན་རྣམས་ལ། །
ཟས་ཀྱི་ཉེར་ལེན་མི་མངའ་ཡང་། །
མཆོད་པའི་ཡུལ་དུ་དམིགས་ནས་འབུལ། །
བདག་ཅག་བསོད་ནམས་ཚོགས་རྫོགས་ནས། །
མྱུར་དུ་ཡེ་ཤེས་མཐོང་བར་ཤོག །
མགོན་པོ་ཡོན་ཏན་མགྲོན་རྣམས་ལ། །
ཟག་མེད་བདུད་རྩིར་དམིགས་ནས་འབུལ། །
བྱང་ཆུབ་སྒྲུབ་ལ་བར་གཅོད་པའི། །
འགལ་རྐྱེན་མི་མཐུན་ཕྱོགས་ལས་སྲུངས། །
རིགས་དྲུག་སྙིང་རྗེའི་མགྲོན་རྣམས་ཀྱིས། །
རང་རང་འདོད་པའི་ལོངས་སྤྱོད་དུ། །
མཐོང་ནས་ཟད་མེད་གཏེར་ལ་སྤྱོད། །
དགའ་མགུ་ཚིམས་ཤིང་ཡི་རང་ནས། །
སོ་སོའི་སྡུག་བསྔལ་བྲལ་བར་ཤོག །
བགེགས་རིགས་ལན་ཆགས་མགྲོན་རྣམས་ལ། །
ཕམ་རྒྱལ་འཐབ་རྩོད་མེད་པར་བསྔོ། །
སོ་སོའི་ཡིད་ལ་གང་འདོད་པའི། །
ཟད་མི་ཤེས་པའི་ལོངས་སྤྱོད་དུ། །
གྱུར་ནས་ཤ་འཁོན་བུ་ལོན་བྱང་། །
གནོད་སེམས་འཁོན་འཛིན་དག་པར་ཤོག །
ཁྱད་པར་གཞན་གྱི་ལུས་སྲོག་ལ། །
རྣམ་པར་སྡང་བའི་གནོད་སྦྱིན་དང་། །
ཤ་ཟ་སྲིན་པོ་འབྱུང་པོའི་གདོན། །
ཚེ་བརྐུ་མདངས་འཕྲོག་སྲོག་ལེན་ཅིང་། །
ཤ་དང་ཁྲག་ལ་གདུང་བ་རྣམས། །
དམར་གསུར་འདོད་ཡོན་ཀུན་ཁྱབ་འདིས། །
ངོམས་ཤིང་ཚིམས་ལ་མཐུན་གྱུར་ཅིང་། །
ཁྲོ་ཞིང་གཏུམ་པའི་སེམས་བོར་ནས། །
བྱང་ཆུབ་སེམས་དང་ལྡན་པར་ཤོག །
རྒྱུ་འབྲས་བསླུ་བ་མེད་པ་དང་། །
དཀོན་མཆོག་གསུམ་གྱི་བདེན་པ་དང་། །
བདག་གི་ལྷག་བསམ་རྣམ་དག་མཐུས། །
བྱམས་པའི་སྟོབས་ཀྱིས་གནོད་སྦྱིན་ལས། །
རང་གི་ཡུལ་ཁམས་བསྲུངས་བ་བཞིན། །
མཐར་ཐུག་རང་གཞན་དོན་ཡོད་ཅིང་། །
གནས་སྐབས་འཆི་བས་འཇིགས་པ་ལས། །
འགྲོ་བ་མང་པོའི་སྲོག་ཐར་ཤོག །
གང་ཞིག་འདི་རུ་ལྷགས་པ་ཡི། །
ས་འམ་འོན་ཏེ་བར་སྣང་གནས། །
འབྱུང་པོ་གདུག་པའི་སེམས་ལྡན་ཀྱང་། །
རྒྱུད་ལ་བྱང་ཆུབ་སེམས་སྐྱེས་ནས། །
གཞན་ལ་འཚེ་བའི་བློ་སྤངས་ཏེ། །
ཐར་པའི་ས་བོན་ཐེབས་པར་ཤོག །
ཆོས་རྣམས་ཐམས་ཅད་རྒྱུ་ལས་བྱུང་། །
དེ་རྒྱུ་དེ་བཞིན་གཤེགས་པས་གསུངས། །
རྒྱུ་ལ་འགོག་པ་གང་ཡིན་པ། །
དགེ་སྦྱོང་ཆེན་པོས་འདི་སྐད་གསུངས། །
སྡིག་པ་ཅི་ཡང་མི་བྱ་སྟེ། །
དགེ་བ་ཕུན་སུམ་ཚོགས་པར་སྤྱད། །
རང་གི་སེམས་ནི་ཡོངས་སུ་གདུལ། །
འདི་ནི་སངས་རྒྱས་བསྟན་པ་ཡིན།
སོགས་དགེ་བ་བསྔོ།
སྤྱིར་དུས་ལ་ངེས་པ་མེད་ཅིང་ཁྱད་པར་མུན་སྲོས་ལ་གནོད་སྦྱིན་རྣམས་གཞན་གྱིས་སྲོག་ལ་འཚེ་བའི་སླད་དུ་རྒྱུ་བ་ཡིན་པས། དེ་ཚེ་དམར་གསུར་སྦྱར་ཞིང་རང་གི་རྒྱུད་ལ་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པས་ཆོས་དང་ཟང་ཟིང་གི་སྦྱིན་པ་ཐུན་མོང་དུ་གྱུར་པ་འདི་བྱས་ན་ཕན་ཡོན་བསམ་གྱིས་མི་ཁྱབ་པ་ཡིན་ནོ། །
ཞེས་པའང་ཀློང་གསལ་བ་དང་ཆོས་ལྡན་པས་བསྐུལ་ངོར་རིག་པ་འཛིན་པ་མཁྱེན་བརྩེའི་ལྷས་སོ།། །།
