Concise Kings’ Posts Ritual—Tibetan

༄༅། །རྒྱལ་ཐོ་བསྡུས་པ་བཞུགས་སོ། །

རྒྱལ་ཐོའི་མདུན་དུ་མཆོད་གཏོར་བཤམས།

རཾ་ཡཾ་ཁཾ།

རྣམ་དག་ཆོས་དབྱིངས་ངང་ཉིད་ལས༔

རང་བྱུང་མཆོད་པའི་ཕུང་པོ་ནི༔

ཀུན་བཟང་མཆོད་པའི་སྤྲིན་ལྟ་བུས༔

དཔག་ཡས་ནམ་མཁའ་གང་བར་གྱུར༔

ༀ་བཛྲ་ཨརྒྷཾ་པཱ་ཌྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝིཌྱ་ཤཔྡ་ཨཱ་ཧཱུྃ།

ཞེས་པས་མཆོད་པ་དང༌། ཆོ་ག་ལྟར་གཏོར་མ་བྱིན་གྱིས་བརླབ།

རང་གི་སྙིང་ག་ནས་འོད་ཟེར་འཕྲོས་པས་རི་རབ་ཀྱི་ཕྱོགས་བཞི་ནས་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་བཛྲ་ས་མཱ་ཛཿ

ཞེས་པས་སྤྱན་དྲངས།

ཛཿཧཱུྂ་བཾ་ཧོཿས་རྟེན་དང་དབྱེར་མེད་དུ་བཞུགས་པར་བསམ།

ༀ་དྷྲྀ་ཏ་རཱཥྚ་ཡ་སྭ་ཧཱ༔ ༀ་བི་རཱུ་ཌྷ་ཀཱ་ཡ་སྭ་ཧཱ༔ ༀ་བི་རུ་པཱ་ཀྵ་ཡ་སྭ་ཧཱ༔ ༀ་བཻ་ཤྲ་བ་ཎཱ་ཡ་སྭཱ་ཧཱ༔ ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི༔ ཞེས་ལན་གསུམ་གྱིས་གཏོར་མ་འབུལ།

ༀ་ཙ་ཏུརྨ་ཧཱ་རཱ་ཛ་ས་པཱ་རི་ཝཱ་ར་ཨརྒྷཾ་པཱ་ཌྱཾ་པུཥྤེ་དྷཱུ་པེ་ཨཱ་ལོ་ཀེ་གནྡྷེ་ནཻ་ཝིཌྱ་ཤཔྡ་པྲ་ཏཱི་ཙྪ་སྭཱ་ཧཱས་མཆོད།

ཟབ་ཅིང་རྒྱ་ཆེན་གཟིགས་པ་པོ། །

ཡུལ་འཁོར་སྲུང་དང་འཕགས་སྐྱེས་པོ། །

སྤྱན་མི་བཟང་དང་རྣམ་ཐོས་སྲས། །

ཤར་ལྷོ་ནུབ་བྱང་ཕྱོགས་བཞི་ཡི། །

རྒྱལ་ཆེན་བཞི་ལ་ཕྱག་འཚལ་བསྟོད། །

ཅེས་བསྟོད།

མཆོད་སྦྱིན་གཏོར་མ་འདི་བཞེས་ལ། །

རྣལ་འབྱོར་བདག་ཅག་འཁོར་བཅས་ལ། །

ནད་མེད་ཚེ་དང་དབང་ཕྱུག་དང༌། །

དཔལ་དང་གྲགས་དང་སྐལ་པ་བཟང༌། །

ལོངས་སྤྱོད་རྒྱ་ཆེན་ཀུན་ཐོབ་ཅིང༌། །

ཞི་དང་རྒྱས་ལ་སོགས་པ་ཡི། །

ལས་ཀྱི་དངོས་གྲུབ་བདག་ལ་སྩོལ། །

དམ་ཚིག་ཅན་གྱི་བདག་ལ་སྲུང༌། །

དངོས་གྲུབ་ཀུན་གྱིས་སྡོང་གྲོགས་མཛོད། །

དུས་མིན་འཆི་དང་ནད་རྣམས་དང༌། །

གདོན་དང་བགེགས་རྣམས་མེད་པར་མཛོད། །

རྨི་ལམ་ངན་དང་མཚན་མ་ངན། །

བྱ་བྱེད་ངན་པ་མེད་པར་མཛོད། །

འཇིག་རྟེན་བདེ་ཞིང་ལོ་ལེགས་དང༌། །

འབྲུ་རྣམས་འཕེལ་ཞིང་ཕྱུགས་འཕེལ་བ། །

དགེ་ལེགས་ཕུན་སུམ་ཚོགས་པ་དང༌། །

ཡིད་ལ་འདོད་པ་ཀུན་འགྲུབ་མཛོད། །

ཅེས་ཕྲིན་ལས་བཅོལ། གོང་གི་སྔགས་བཞིའི་མཐར།

ཨོཾ་སུ་པྲ་ཏི་ཥྛ་བཛྲ་ཡེ་སྭ་ཧཱས་བརྟན་བཞུགས་བྱ།

གནས་འདིར་ཉི་མོ་བདེ་ལེགས་མཚན་བདེ་ལེགས། །

ཉི་མའི་གུང་ཡང་བདེ་ལེགས་ཤིང༌། །

ཉིན་མཚན་རྟག་ཏུ་བདེ་ལེགས་པ། །

སྐྱབས་གནས་དཀོན་མཆོག་གསུམ་གྱི་བཀྲ་ཤིས་ཤོག །

ཅེས་བཀྲ་ཤིས་བརྗོད། ཐོ་ལེན་སྐབས་མཆོད་གཏོར་བཤམས་ལ་བྱིན་རླབས་གོང་ལྟར། སྤྱན་འདྲེན་མི་དགོས། གཏོར་མ་དང་མཆོད་བསྟོད་ཕྲིན་བཅོལ་མཐར།

མ་རྙེད་ཡོངས་སུ་མ་ཚང་དང༌། །

གང་ཡང་ནུས་པ་མ་མཆིས་པས། །

འདིར་ནི་བགྱི་བ་གང་ནོངས་པ། །

དེ་ཀུན་ཁྱོད་ཀྱིས་བཟོད་མཛད་རིགས། །

ཞེས་པས་ནོངས་བཤགས།

ཨོཾ། ཁྱེད་ཀྱིས་སེམས་ཅན་དོན་ཀུན་མཛད། །

རྗེས་སུ་མཐུན་པའི་དངོས་གྲུབ་སྩོལ། །

སངས་རྒྱས་ཡུལ་དུ་གཤེགས་ནས་ཀྱང༌། །

སླར་ཡང་འབྱོན་པར་མཛད་དུ་གསོལ། །

བཛྲ་མཱུཿ

ཞེས་གཤེགས་གསོལ་བྱ། བཀྲ་ཤིས་གང་རིགས་བརྗོད་ནས་མཆོད་གཏོར་གཙང་སར་གཤེགས། ཐོ་བླངས་ནས་དབེན་སར་བཞག་གོ །

ཞེས་པའང་མཁྱེན་བརྩེའི་དབང་པོས་སོ། །དགེའོ།། །།