Tamdrin Nyenpo Lha Nga Lineage Prayer—Tibetan

༄༅། །ཡང་གཏེར་རྟ་མགྲིན་གཉེན་པོ་ལྷ་ལྔའི་བརྒྱུད་འདེབས་པདྨའི་ཕྲེང་མཛེས་ཞེས་བྱ་བ་བཞུགས།

ཆོས་སྐུའི་སྟོན་པ་ཀུན་བཟང་འོད་མི་འགྱུར། །

ལོངས་སྐུ་ཐུགས་ཆེན་པདྨ་གར་གྱི་དབང་། །

སྤྲུལ་སྐུ་རིག་འཛིན་པདྨ་འབྱུང་གནས་ལ། །

གསོལ་བ་འདེབས་སོ་ནད་གདོན་མཐར་བྱེད་ཤོག །

མི་བརྗེད་གཟུངས་ཐོབ་མཁར་ཆེན་བཟའ་མཚོ་རྒྱལ། །

ཡེ་ཤེས་སྤྱན་ལྡན་བཻ་རོ་ཙ་ན་དང་། །

སྤྲུལ་པའི་གཏེར་ཆེན་མཆོག་ལྡན་མགོན་པོ་ལ། །

གསོལ་བ་འདེབས་སོ་ནད་གདོན་མཐར་བྱེད་ཤོག །

ཁྲི་སྲོང་རྣམ་རོལ་པདྨ་མདོ་སྔགས་གླིང་། །

རྣམ་པར་སྣང་མཛད་བློ་གྲོས་མཐའ་ཡས་དང་། །

གྲུབ་པའི་རིག་འཛིན་སྣང་མཛད་རྡོ་རྗེ་ལ། །

གསོལ་བ་འདེབས་སོ་ནད་གདོན་མཐར་བྱེད་ཤོག །

སྨིན་གྲོལ་དོན་སྟོན་རྩ་བའི་བླ་མ་རྗེ། །

ཡི་དམ་རྟ་མགྲིན་གཉེན་པོ་ལྷ་ལྔ་དང་། །

མཁའ་འགྲོ་ཆོས་སྐྱོང་ནོར་ལྷ་གཏེར་བདག་ལ། །

གསོལ་བ་འདེབས་སོ་ནད་གདོན་མཐར་བྱེད་ཤོག །

བསྙེན་སྒྲུབ་སྐྱེད་རིམ་བཟླས་པའི་རྣལ་འབྱོར་གྱིས། །

སྔོན་ལས་འཕྲལ་རྐྱེན་ནད་གདོན་བར་ཆད་ཞི། །

རྫོགས་རིམ་དུག་ལྔ་ཡེ་ཤེས་ལམ་ཁྱེར་གྱིས། །

རིག་པའི་རྩལ་རྫོགས་དཔལ་ཆེན་འགྲུབ་པར་ཤོག །

ཅེས་པའང་ཉེ་བར་གནས་པ་དྲུང་ཡིག་ཚེ་རིང་བཀྲ་ཤིས་ཀྱིས་ལྷ་རྫས་བཅས་བསྐུལ་ངོར་ཆོས་ཀྱི་བློ་གྲོས་པས་གསོལ་བ་བཏབ་པ་སིདྡྷི་རསྟུ།། །།